2006年12月31日星期日

工展會大豐收

尋日我地一行五人去左工展會,唔知係唔係最後兩日的關係,好多人呀!  好多地方都迫滿人,尤其係有得試食地方,真係大排長龍。我地見到依個情況,當然緊係唔同人迫啦!所以我地有兩條最多人嘅街都行唔到呀!

哈哈!係工展會都不忙要影相呀!媽咪見到依隻金豬就一支箭去左要影相,點知係我地影完之前,就有好人都去影。唔知人地係唔係見到我地影得靚,就去學我地呢?

我地一邊行,就一邊睇嗰D職員示範,行吓大家又去左廣場食野。嘩....仲多人,好唔容易先找到一個企位。有好多特別嘢(鮑魚....乳鴿....小籠包...)都唔係幾敢食呀!因為都真係好迫人,唔地唔想食得咁辛苦,所以我地都只係食一D街頭小食就算啦!

其實每年去工工展會都已經成為左我屋企嘅習慣,因為爸媽都係鐘意熱鬧,唔係打算買平嘢,會在有一個地方睇吓嘢,所以我地往年都冇買嘢。點知...今年都唔知佢地仲乜,好似見都乜都想買。最後佢地竟然買左五袋嘢,有磨力機、針板、醬油兩大袋、燈膽同埋燙斗。真係服左佢地可以係短短兩個鐘買咁多野呀!算啦~見又真係好似比出面抵,都唔阻止佢地啦!

不過,我都有收獲,我就買左我最鐘意嘅叮叮糖。都幾抵$10有三包,同埋依家都唔係咁多地方有得買。

蘭桂芳倒數

我地同爸媽食完飯後,就同大肥豬D大學同學約去倒數。

我地約左去中環聖誕小屋等,我地早左去到,就週圍去行吓影相,不過就冇入去,因為又係好多人,大排長龍。不過係出面影都好啦~起碼叫去過嘛,同埋出面睇好似同之前差唔多,唔洗去都得啦~

等整人就開始出發,原本我都以為係天星碼頭附近倒數,點知.....其中一位朋友話去蘭桂芳,我當時聽到真係有少少傻左。因為我真係未去過蘭桂芳,仲要行入去倒數,真係從未諗過。不過...嘅然出左嚟,都冇法啦~就一齊去啦!

我地根本上係跟住D人流行,真係超多人呀.....個感覺真係可以用恐怖形容。我地都排左好耐先入到去嗰條斜路,但都好攪笑就係我地企左係有線攝影機個位下面,個位置好似係中間的有利位置。當倒數完之後,其中一位朋友用左訪問,唔知有冇影到我呢?(希望唔好啦~因為我知我嗰時係一面驚青樣)

講番倒數,真係幾恐怖,可能我唔習慣呢,真係有少少驚呀!嗰D人係又叫唔係又叫。又唔知佢地想點.....

倒數完,警察解封,後面嗰D人又係咁迫上嚟,真係俾佢地嚇死呀!

我地都係警察解封後,慢慢沿路走啦~根住宵夜完就走啦~

返到屋企都成兩點幾,真係幾倦呀!不過都係一年先一次,唔緊要啦~大家開心嘛.....

不過...下次我諗我都唔會去超多人嘅地方倒數啦~因為真係好多人呀!氣氛真係好濃烈,可能只係我唔習慣啦!

2006年12月29日星期五

中學同學聚會

哈哈~~終於可以係屋企LOGIN到入嚟啦!真係開心啦~

我剛剛同D中學同學聚會,我地去左其中一個男同學屋企打邊爐,玩得都好開心,仲食得好飽呀!

計吓我地都有成半年冇聚會,但都唔覺得有好陌生嘅感覺,可能依D就叫做老朋友啦!

今次大肥豬都有陪我出席,開頭我都有D擔心佢唔習慣。最後我問佢對我D同學仔有乜感覺嗰時,佢竟然話佢食得都好開心,對我D同學仔嘅感覺都好好,仲話下次有聚會都可以考慮出席。聽完真係好開心呀!開頭我仲怕佢悶.....

打邊爐完之後,我就負責洗完D嘢(因為佢地已經負責左事前洗嘅工作,我做後面工作都應該啦),攪好晒我同大肥豬就走先啦!

真係有少少唔好意思呀!佢地仲有野玩,我早走好似好掃興。不過因為我地可能都唔係太習慣夜,同大肥豬之前都話有少少倦。希望佢地唔會怪我啦!

元旦快樂

仲有兩日....就係2007年啦!

係度先同大家講句:新一年樣樣事都比舊年好,所有地方都冇天災,個個都開開心心!

早就係好似早左少少,不過都冇法啦!因為唔知點解係屋企login唔到入嚟,反而係公司就完全冇問題好順利就可以登入到,所以係可以上BLOG嘅時間,先同大家提早預祝新年。

希望佢地可以快D整番好D電纜,我地個個都可能順利上網就好啦!

2006年都可以話係個重要嘅一年,因為我地下左一個重大決定~~~~就係結婚,開始去搞我地結婚野,又去左影結婚相;大肥豬又辛苦完,讀完佢個課程。所以都可以話係一個好年呀!

嚟緊2007年,相信我會係一個畢生難忘嘅年份,因為我地會成年都好忙去搞我地婚禮。之後我地就會組織一個小家庭。

所以我個新年願望就係....係我身邊每一個人都開開心心,我個婚禮可以順順利利舉行。

2006年12月28日星期四

假期候群症

由放完聖誕假期開始,都返左幾日工,但唔知點解依幾日做野都完全冇心機,心情又極度低落,仲好想哭,諗吓我又冇乜特別唔開心嘢發生過呀!真係唔知乜原因,依D係唔係就叫做假期候群症呢?

點先可以開心番呢?依個問題連我自己都唔識答。

開心真係好似好容易?諗D開心事咪得……

但當你自己處於一個極度低點的情況吓,又點會好容易去諗好嘢呀~ 不過我都要學習吓點可以令自己開心多D,如果唔係,我真係驚我遲早會有情緒病呀!(媽咪都已經成日話我,再成日唔昱心,好容易痴線啦)

不過我諗應該過多一兩日個心情就會好,因為希望在明天嘛!

2006年12月27日星期三

地震後感

因為台灣大地震的關係,台灣地底的電纜遭受破壞,結果造成網絡大塞車。很多網址都唔可以正常運作,就連MSN 同BLOG都用不到,所有E-MAIL都不能運作。好像斷了對外接觸一樣,坐在電腦前一臉無奈。

這次台灣大地震的破壞力都頗大,睇電視見都一幕幕的傷失至親的情境,真係有少少心痛。希望死者的親人能夠早日跨越痛,傷者能夠早日康復吧!

最令我感動就係知道有一位媽媽因為保謢她兩個愛兒,以自己的身體擋著瓦礫, 結果他的愛兒只受輕傷,但這位媽媽就這樣犧性了.... 母愛就是這樣的偉大~

其實我地都算幸福啦!起碼唔洗經歷這樣的天災,所以真係要學識珍惜身邊所有野呀!

2006年12月26日星期二

冇乜人嘅金都

尋日,我同大肥豬去左旺角行街街,點知行完之後,佢竟然問我去唔去金都行吓。

因為佢成日都話唔洗咁早準備,最快都叫我過左年先再去搞......所以我當時都真係幾突然嫁!佢叫都我當然好樂意去行吓啦~

今次我地主要目的就去睇婚禮攝影,因為我地到依家都未真正去睇過,只係知道依樣係其中一樣好重要嘅野。其實我見有好多姊妹婚期比我還耐,都已經BOOK好晒,我都真係有少少擔心同心急呀!

唔知係唔係假期關係呢?成個商場都好少人,行得都比較舒服........起碼唔洗同人迫,仲可以一間鋪睇好耐呀!

我見一間婚禮攝影嘅傳單就取一張,唔覺就已經成大袋啦~~真係利害呀!

行到一間叫『新婚天地』嘅公司,大肥豬俾佢地SHOW出嚟嘅相簿同相吸引住,個位年輕人又不停SELL佢,我遠睇都真係覺得好好笑呀!後來我地直頭坐係度聽佢介紹同睇D版,都真係唔差呵!

不過佢地主力SELL數碼相,仲話可以根據你擺酒圍數俾一個價錢任影,仲幫你執相....加上佢地送嗰本相簿又真係幾靚,同埋個位年輕人又好似幾老實,講開佢又話仲話佢地有幫皇延酒樓(即我地擺酒嗰間)做場地佈置同進場DVD

我地又叫佢送多D野俾我地,佢都答應….其實唔係在乎佢送乜俾我地,我覺得係個過程,我地都好愉快,對依間公司有多少少信心。

大肥豬對依間公司少少信心,我地都幾滿意.........睇可仲有冇其他更好啦~~

我都有係新婚易睇過依間公司的口碑,雖然唔係好好人俾意見,加上好壞都有所以都真係有少少心大心細呀!

不過諗吓真係好睇吓你好唔好運氣同夾唔夾個攝影師傅。有時人地話好,真未必合你心水,所以都真係幾煩呀!


2006年12月25日星期一

超開心的聖誕日

尋晚照我地原定嘅計劃,去左NEWAY唱K自助餐慶祝,原本只可以唱3個小時,但唔知係唔係冇乜人關係,佢地竟然冇吹我地走,最後我地都唱左差唔多四個鐘,我地一行四人都玩得好開心呀!

根本上都係我地3位女士唱哂,因為大肥豬原本有好多歌都唔識唱,或者係佢唔鐘意唱歌啦~~所以佢嘅任務就係聽我地唱歌同食野。不過我都揀左幾首合唱歌同佢合唱,唔洗咁悶嘛!

講番個自助餐先,佢需要冇CEO嗰間咁多選擇,不過佢地嗰D野食都番得好快。佢地D三文魚先勁,每次排隊都俾有五、六片,仲要都幾厚身同新鮮。我仲幾BUY佢地個SERVICE,因為佢地有好多STAFF好主動成日都話幫你拎上房,又問你有冇落醬汁,真係幾細心呀!我地個個都食得好飽呀!

我覺得依間雖然冇CEO咁新同冇獨立廁所,但其他地方都OK呀!所以如果下次仲有機會,都會考慮去依間呀。

我地唱完K之後,LULU妹就建議番屋企打四方城,其實我唔係好識打,不過見咁高興,同埋我地打得真係好細,只你一蚊兩蚊....就玩吓啦!

一開頭係LULU妹贏左先,佢同嘉汶表妹都輪流食糊.....我咪得個俾字啦~~不過到最後.....竟然係我做左大贏家,我總贏左19蚊呀!

哈哈!尋晚真係玩得開心啦~~

2006年12月23日星期六

平安夜的節目

今日係平安夜,我地嘅節目都幾豐富嫁~~

我見之前係朋友仔個BLOG見到朗豪坊D佈置好靚呀!所以同大肥豬食完壽司LUNCH之後,就出發啦~

嘩!真係好多人呀!每一個角落都係人,影相都要排隊先有靚位呀!仲要有好多街外係你D相度出現.....算啦~鬼叫今日係平安夜,不過都有一個好處就係可以容易D叫人幫我影合照嘛!

行左一間商場,我地就開始向尖沙咀海港城出發啦!

年年都想去海港城影相,因為佢地D佈置真係好靚,不過年年都冇機會。好在今年終於可以有得去啦~~

一起到...真係勁多人呀!我地好迫先入到去,想影相又要等,又多人......都幾慘呀!不過個景真係好靚呀!迫D都值得呀!

我地影完相之後,本來諗住搭船....點知俾D警察叔叔封路阻止左,最後都係要搭MTR啦~~冇得浪漫吓哦!

今年平安夜又真係幾平安呀!好早就番到屋企,因為我地兩個都好倦。可能我地都好少行咁多地方,仲有我感覺都大肥豬真係好似唔係太在狀態(可能前排為左個考試真係好辛苦啦~)

不過早D番屋企都好呀,我地都唔係咁鐘意去街嘅人,係條街又多人又嘈,真係有少少怕。

所以我地成日都話始終都係屋企好。

2006年12月22日星期五

最後一天

今曰我相信係大肥豬最重要嘅日子之一,因為佢考埋今日就所有考試已經完成,可以放下心頭大石啦!

仲有六個鐘頭...佢就可以一身鬆晒,諗起都登佢開心呀~當然我亦都會好開心啦~因為佢可以唔洗咁辛苦讀書。我知佢依幾個星期佢都好慘,成日都係對住D書,又驚讀唔切,所以成日溫書溫都好夜。對佢一個極愛訓覺嘅人嚟講,真係幾慘呀!

原本我打算今日係佢學校等佢考試一齊食飯慶祝,不過佢又講話想訓覺多D,所以我都唔知去唔去好。

不過諗起佢係需要好好嘅休息,都係算啦~唔去嘈佢啦~~等佢今晚休息夠,之後仲有幾個假期,大把時間啦~等佢個熊貓眼消失左,先可以同我影好多靚相呀!

今晚佢終於都可以安安樂樂訓餐飽啦~我都係一樣......

MERRY CHRISTMAS

2006年12月21日星期四

送給LULU妹的禮物

今日因為係冬至關係,所以老細四點已經放左我地走,所以就陪媽咪去買餸啦~~

當我路經城市電腦售票網,於是就入去睇吓仲有冇HOCC演唱會PART 2嘅飛買。因為之前我MISS左佢信用咭訂飛,次次去買都售票網又關左門,於時趁今日去到仲開緊就去入吓。

排到我嘅時候,問個售票姐姐尾場仲有冇位啦~佢竟然話仲有少少連位,所以我豪不考慮就叫佢幫我找最近嘅位。嗰位姐姐又好有心機幫我找,終於買到係第27行,都算OK啦~你咁遲買,唔洗坐山頂已經好好啦~

依張飛係我送俾LULU妹的禮物,因為佢之前都講過吓想睇,但我冇乜理佢。

今晚話佢知,佢一定開心死啦~

2006年12月20日星期三

與特別嘉賓食大餐

一早知道今日學校飯堂有聖誕大餐食,所以就貪得意,冇帶媽媽嘅愛心飯盒,係飯常訂一日飯啦

平日都覺得飯堂D野食唔好食,所以都好少食佢地D野。但唔知係唔係聖誕關係,好似又幾好味,仲食得好飽呀!個聖誕大餐都幾豐富嫁~有螺絲粉、薯條、麥樂雞、PIZZA.....好多野食呀!

今日嘅午餐都有D特別,因為之前已經退休嘅兩位嬸嬸番嚟探我地(其實係我地貪得意叫佢地番嚟一齊試大餐),我地一齊食好豐富聖誕大餐,有講有笑,真係幾好玩呀!好耐都冇試過一班人食LUNCH啦~因為我地係分時段食LUNCH,所以成日都係得我一個人食,有時候都幾悶呀!

食完大餐之後,我仲靜靜俾佢地睇我銀包嗰張結婚相(因為學校唔係咁多人知我就結婚),佢地仲我影得好正呀!!真係超開心呀。

佢地行左一間就走啦~真係有少少唔捨得佢地呀!不過我知好快又會見到佢地,因為聖誕節假期我地應該會約埋係LUNCH飲茶,都時又有得見啦~~

小肥牌沙津


我地見學生聽日舉行聖誕聯歡會,所以我地都唔執輸,成班人都打算係校務處開個小型大食會慶祝一吓。

經過我地開會決定後,英嬸嬸會主力整我地嘅野食,有炒麵、咖哩魚旦、雞翼.......之後有人建議就話食沙津,所以依個任務就由我負責整啦~~

我放工就去左買材料,有栗米、菠蘿、青瓜、蘋果......好多我鐘意食嘅野都有買。

唔知整成點呢因為我都好少整野食,希望佢地聽日唔好食到有唔舒服啦~

依個就係製成品就係小肥牌沙津啦~~

睇個樣都唔係好差呀!我偷食少少試味,都幾好味呀!

真係幾有成功感,希望聽日佢地個個都食得開心啦~

2006年12月19日星期二

又一份聖誕禮物

尋晚契大佬一家嚟左屋企打邊爐(諗住人多D,可以買多幾款野食呀),點知.....我又收到一份聖誕節目呀~

契嫂知我係一個極度怕凍嘅人,所以就送左兩件超薄防寒內衣俾我。唔止呀,仲送多一條閃閃嘅原子褲,俾我,佢知我依其鐘意著依D褲襯短裙仔,話叫我聖誕著,一定勁YEAH呀!

嗰件防寒內衣真係好得呀!我尋晚已經急不及待著嚟訓覺啦!點知我半夜竟然熱醒,仲要除左好可以再訓呀!今日著左成日,都唔覺凍,仲唔洗著大褸呀!你地話件衫係唔係好勁呢!我依個冬天可以唔洗著咁多衫啦~~真係勁鐘意呀!

今年未到聖誕已經收左幾份禮物啦~~真開心......

2006年12月17日星期日

阿嫂生日PARTY

尋晚去左CEO NEWAY去幫契大佬慶祝佢老婆生日,我地一家人同埋契嫂的家人,一早就去左CEO準備,俾一個驚喜嘅生日會佢。

我地事前一D都冇漏過風聲俾佢知會幫佢開PARTY,個個仲扮晒忙,唔得閒同佢慶祝(當然條橋係契大佬諗啦)。當阿嫂一入K房,我地成班係廁所跳出嚟,見到佢真係好開心呀!之後係媽咪協助下,契大佬又突然送左一扎花俾阿嫂,見到佢地真係好SWEET SWEET呀!

講番我自己先,唔知係唔係多生面孔嘅人係度,加上自己又唔係好舒服,所以我都冇乜點唱歌。(真係有少少唔盡與呀!不過算啦~下次同埋大肥豬一齊唱仲好啦~)但我就成日出去自助餐位拎野食,食都好飽呀!(跟住嗰幾餐又要食少D啦)。

唔知點解,我就覺得佢地D野食好似差左呀!上次LULU妹生日都有好多野食,時隔二個月…都唔知點解少左好多野食,仲唔係成日加添~~三文魚又得嗰一轉,蛋糕又冇款,真係好似唔係得呀!

哈哈~~雖然話我唔係咁有MOOD,不過我都唔執輸,見到佢地D裝飾好有聖誕FEEL,我都影左幾張相呀!今次係我轉左新形象之後第一次影相(其實只係剪左齊音),大家睇吓得唔得啦~

PLAN好第一個聖誕節目

哈哈我終於PLAN左第一個聖誕節目啦~

之前都有諗過係25號聖誕節去山頂臘像館玩,不過又好似幾貴(入場費都成二百幾蚊,我地一行三人去,倏數都幾甘呀),同埋又好似得影相,好似冇乜聖誕氣氛呀!

我都諗左好耐,又要有得玩,又要有聖誕大餐食.....終於俾我諗到啦~~~

就係去唱K加食自助聖誕餐。可能係尋晚唱得唔夠啦~所以真係好想再去玩,加上佢地今次好抵呀!只係$98再加一就得啦(冇其他什費呀!)仲可以唱3個鐘呀!我已經BOOK左4個位,同埋LULU妹、嘉汶表妹一齊去.....今次仲唔俾我地唱餐飽

今次仲要有大肥豬陪我一齊玩,雖然佢唔係好識唱歌,但有佢陪住我玩,個感覺都唔同D呀!

我仲諗住嗰日早D出去銅鑼灣去D商場影吓聖誕相......諗起都開心呀!

2006年12月14日星期四

天氣寒冷

好凍呀~~~由尋日開始個天氣就開始轉冷,對於一個極度怕凍嘅我嚟講,真係辛苦呀!

著得多衫又好唔方便,著得少又唔夠暖。我尋晚已經開始蓋羽絨先可以訓到呀~

今日先係第一日開始凍,跟住D日子都唔知點算好啦~

依家D天氣真係好唔好,室內同室外D溫度相差好大,好容易會病呀~

相信我已經又中招,D鼻水流不停,今晚又要早D訓先得啦~

星期日好似會下降得番12度,所以大家著多件衫,小心冷病呀!

 

2006年12月12日星期二

矛盾的心情

今日係大肥豬第一科考試,唔知份卷深唔深呢?

我依幾日都冇嘈過佢,冇同佢點傾過電話,加上佢又準備充足,我相信一定冇問題。

不過......話就咁講,其實都有少少擔心呀!我又唔敢問佢讀成點,我驚好似俾壓力佢。

為左要應付依幾科考試,我都好耐冇面佢啦~電話都講少左好多,由以前每晚都傾半個鐘以上,到上星期開始傾幾分鐘,再到依家只係一兩句,都有少少唔開心。但當我諗到佢咁努力讀埋依個學位,都係為左我地將來,我又覺得好感動,我D心情真係幾矛盾呀!

前兩日3G見到佢,大肥豬竟然變左一隻大熊貓,嗰時真係有D心痛呀!

依家為由希望快D到24號,考晒所有試~大肥豬可以鬆一口氣,佢又可以成日陪住我。

可以過一個開心聖誕。

2006年12月11日星期一

新HIFI到

之前申請左VISA咭,簽帳滿一定嘅數目就送部DVD HIFI。今日終於都去左銅鑼灣換領中心取我嘅HIFI啦~我都衰啦~原來今日係LAST DAY...好在有得換,如果唔係大肥實話我呀!

真係好多人呀!一上到去嗰層都已經見到條人龍排到出去樓梯口,又熱又多人,真係幾慘呀!唔覺唔覺都要排左成半個鐘先到我,真係誇張呀!

原來好多人都好似我地咁,因為一D好嘅迎新禮物先去申請信用咭。部HIFI我原本諗住留番係新屋用,不過要等成年,唔知會唔會壞呢....

真係唔鐘意自己一個人去取嘅感覺,因為部機好重,真係幾辛苦呀!我要行幾步就要停一停,抖吓嘛~嗰D街上嘅人成日都係度望住晒,真係好難為情呀!

貪靚本色

前幾日係玻璃鞋個BLOG睇到佢介紹左韓國一隻MASK,唔係咁容易敏感。

其實我都係好容易敏感,好容易生粒粒,都試過好多隻唔同牌子嘅MASK,有平有貴。不過都好似冇乜邊隻特別好呀!

我頭先去左銅鑼灣見到依間舖頭,於是咪入去睇吓,八吓有乜好野~

開頭都冇諗住買d乜,不過個SALES就好比心機介紹好幾隻MASK俾我,又幫我係手度試好幾款,我覺得都幾好,價錢又唔係好貴,所以就買左好幾樣野呀!

我買左黑芝麻深層清潔MASK同埋紅酒保濕MASK,今晚我就開始會KEEP住用。

我今日仲買左一支黑色Mascara,搽左好濃密,隻眼立即變大,好精靈呀!

依個聖誕節我一定會好靚靚啦~

2006年12月10日星期日

給自己的禮物

哈哈~~我今日又買左野啦~~

食完LUNCH之後行吓個商場,見到一間精品店有好多聖誕精品,咪入去八吓啦~

嘩~~唔知係唔係聖誕關係,有好多野都做緊大特價,真係好多野都想買,不過諗吓都唔買嚟做乜,所以睇完就算啦~(唔知係唔係就嚟做師奶,依家買野都諗得好清楚先買,學慳錢嘛!),不過我最後都買左一隻暖杯同一張聖誕咭。

張聖誕咭係會送俾我中學嘅中文老師嫁,由我畢業到依家,每年我都有寄聖誕咭問俾佢,表示一吓我嘅心意。

我見依隻暖杯用緊特價(真係好抵$60有找),諗番我嗰隻暖杯又爛左,加上冬天又嚟啦,所以就買左啦~~當係買俾自己嘅一份聖誕禮物啦~聖誕節特別多藉口買野呀~~


 

2006年12月8日星期五

關你乜事

請問我幾時結婚又關你乜事呀?????

你洗唔洗成日係度嘈住晒,又借D上嚟問長問短呀!你知唔知你好煩呀!

大家感情都唔好啦,你知嚟仲乜呀,唔係真係咁關心我呀!係關心我地,就唔會成日俾香蕉皮我地踩啦、係關心就唔洗成日唱我地啦!關心~~~~

係適當嘅時候我就會同大家講啦!我連最高領導人我都未通知呀,幾時輪都你呀!

做第一.........你唔好發夢啦~~~~成日係度扮晒野,諗吓自己個地位先啦~

有時間就管吓你自己D野先啦~

面皮幾百萬尺厚,我俾面大人先叫你一聲,唔好以為自己好重要呀!!

真係見你前面,憎你後面。衰人......

 

各位BLOG友,唔好意思呀~因為有D野想發洩,所以先咁粗魯,大家唔好介意呀!

不過有D人真係好鬼死煩、好八、好黑心,因為輩份問題又唔可以當面罵佢,唯有借一少少位置發洩吓。

2006年12月5日星期二

溫暖牌

一踏入十二月,又係一個頭痛嘅日子,因為聖誕節又到啦~

好果唔係LULU妹送左第一份聖誕禮物俾我的話,我到依家都未正式諗過送乜禮物俾大肥豬呀!

今年係最後一年以女朋友身份送嘅禮物,一定要特別D,都幾煩呀,大肥豬又唔鐘意我亂買貴野俾佢,成日話要儲番多D錢出年用。隨意買我又唔想。

諗左好耐……終於都諗到一份又有心思又溫暖嘅禮物啦,就係我織番件溫暖牌冷背心俾佢。我之前都送過五件溫暖牌冷衫俾佢,不過近依一兩年都冇織啦(一來自己懶,二來大肥豬話唔洗我咁辛苦,仲嗰D仲合身)。不過計吓,好多件都應該會好舊著唔到啦。所以今年又嚟過,織件又靚又合身嘅背心仔俾佢等佢開心吓。

於是尋日放工就叫媽咪陪我去買冷,我揀左一舊藍色花冷,好靚嫁。我貪花冷可以唔洗織花紋,可以用平針幟,快D完工嘛!

我有少少擔心,尋晚織左成晚先得一吋多少少,仲有兩個星期左右就到聖誕節啦,我驚趕唔到呀!!! 不過我會努力,希望到時大肥豬可以著住同我係D聖誕樹前影相啦~~

2006年12月4日星期一

第一份聖誕禮物

哈哈~~尋日LULU妹送左一份聖誕禮物俾我呀!

之前我同佢講過話老闆公幹完返嚟買左好多紅豆味嘅白兔糖俾我地做手信,不過我地分得好少,每人都係得一兩粒,真係唔夠喉。之後LULU妹話佢公司附近好似有得買,如果見到就買俾我。

點知佢尋晚一返屋企就古古怪怪係個手袋度拎左一大包紅豆味嘅白兔糖,話係聖誕禮物哦~~真係好正呀!

粒粒白兔糖都好濃紅豆味,今次可以食番夠本啦~~

咁早就收到聖誕禮物,希望今年可以有好多好多禮物啦~~

不過今次真係要多謝我個LULU妹~~

2006年12月3日星期日

蘆薈真係得

唔知係唔係依排打得邊爐多,我成個額頭同埋塊面都生左好多粒粒,又有好多暗印,即刻唔靚女啦~

我都用左好多野呀,又CREAM又藥膏!不過都係冇用,仲係咁多......真係好唔開心呀!

不過尋晚敷完一個另類MASK之後,就好D左......

爸爸係屋企花槽仔種左幾盆蘆薈,佢見我塗乜都唔得嘅時候,就叫我試吓剪少少蘆薈敷面。我見試乜都冇辦汰,所以就聽佢話就試吓啦~~

尋晚用蘆薈敷左15分鐘,今日起身就發覺D粒粒真係好似謝左少少,D印淺色左好多,真係好開心呀!我諗我KEEP住敷,一定好快變番做個美女啦~

2006年12月2日星期六

明年今日

出年依個時候唔知我你做緊乜呢?

不過依日一定係我一生最難忘嘅日子,仲有最煩忙的一天。唔知嗰日會點呢?

有時諗,真係想快D到嗰日呀!我唔係恨嫁...只不過係原來結婚真係好多野搞,好多野煩。以我一個極度騰雞嘅人嚟講,未來依一年我一定成日都會好煩,好多野諗,大大小小嘅野我都可以諗一餐。不過,都仲有成年時間,我可以係每個細節慢慢做好(仲有好多人會幫我嘛),我相信一定冇問題。

由明年今日起,我個身份會唔同左,由黃小姐正式變為吳太、由父母心目中嘅乖女轉成人地嘅老婆同新胞。依個轉變對我嚟講都真係好大。因為我平日都係一個被人服侍多嘅人,好多家務都唔洗我做。但之後就要自己組織一個家庭,好多野都要自己做,對我嚟講真係一個難度。我真係要跟媽咪學多D野先得啦!

仲有一年時間,我要繼續搞好我個婚禮,同時要學做一個入得廚房、出得廳堂嘅好老婆。