2007年1月31日星期三

頭髮病了

唔覺唔覺...依家係我最長頭髮嘅一次。真係好開心呀!

由細到大都係好鐘意長髮(覺得咁先係女仔嘛)。依家仲會因為準備大日子關係,繼續留長,諗住可以係嗰日SET多D款式嘅靚靚髮型。

不過....依幾日我面臨左一個問題,就係唔知係唔係做得負離子多,依家個髮尾開左好多叉,仲好嚴重呀!我已經用左好多方法去防止...但都冇用呀....

救命呀!點樣可以防止髮尾開叉?我又唔想剪短D頭髮,好辛苦先留都咁長......

有冇姊妹有D好辦法,可以幫吓我呀!

2007年1月30日星期二

蠔豉之家

尋日媽咪入左新界探朋友,佢返嚟嗰時拎左一大袋野番,由於尋晚我地都掛住睇我地嘅結婚相,所以就冇理嗰袋野係乜啦~

點知....我今日放工返到屋企見到依個奇景!

兩張枱都放滿晒蠔豉.....真係有少少驚嚇呀!

原來媽咪個朋友係識得自己晒蠔豉,每一隻都係佢自己親手除殼、清乾淨同佢自己晒,所以媽咪就叫佢幫手晒少少,留番新年用。

由於D蠔豉仲未乾透,所以媽咪就鋪起度吹乾......

救命呀!張蠔豉枱依家放左係我電腦枱附近,有時D味吹過嚟都真係幾.......難嗅呀!

不過...鬼叫媽咪要,忍幾日啦~希望佢快D乾啦~

2007年1月29日星期一

拎左三本細相簿

哈哈...原本要下星期六先有得拎細相簿,點知...今日有的提早拎,真係超爆開心呀!

今朝十點幾收到新天地打嚟話有得拎,想同我約時間,我當然立刻約今日啦!於是立刻CALL大肥豬約佢放工去拎啦!

因為要放工時即刻去九龍塘,怕時間唔夠,於是就用自己LUNCH嗰時的士來的士往,番屋企拎單,準備一放工就去。

當我約好晒之後,成個人都真係既興奮又擔心。興奮就係可以有得睇番自己個靚樣....(唔洗成日都睇住相版嗰六張),擔心就係好怕唔知會影成點,因為我揀相嗰日都真係冇乜心機,好怕高興越中失望越大....

今日成個下午都完全冇心機做野,我個心已經飛左去新天地啦~~

好在....睇到本相簿,都OK呀,唔錯!只係覺得自己好肥呀!

我諗依幾日我都會好忙,因為.......我會成日睇住我依三本細相簿,有成58張,可以慢慢睇啦~

下一次....就要等到3月中就可以拎埋其他野,油畫啦、底片、大相簿(超期待,唔知佢會執到我個怪係點呢?因為細相簿係未經修改).真係~~又係要等。

等我SCAN幾張我最LIKE嘅相俾大家睇吓先!

↓依張用左嚟做大油畫

↓我好鐘意依個宮廷晚裝呀!不過最衰就係影到我對肥手臂呀!

↓我都好鐘意依張嫁,不過大肥豬條呔俾攝影師拎走左,成個FEEL好似欠少少呀!

哈哈~~仲有幾張你地可以去我相簿

2007年1月28日星期日

回歸

我部電腦終於都回歸啦~~真係開心都爆呀!

唔覺我部電腦都整左成四日啦~原先應該可以係星期六有得拎啦~

開頭都以為係個WINDOW有問題,諗住FORMAT左個C DRIVE就得啦。點知整整吓,佢地發現,原來部電腦中毒太深,成個HARDDISK都有問題,終於....成部電腦都要FORMAT過,再整過先要咁多日......不過慘在好多野之後有冇BACKUP,冇晒啦~好在我D相有定時燒落DVD留底,如果唔係真係血本無歸呀!

話事話,佢做我生意都好慘呀!因為聽佢講原來我部機D毒過左入去佢地部外置HARDDISK,之後又過左去其他客人部腦.....總之大傳播啦~

聽完佢講,都有少少唔好意思,但唔關我事嫁~我都唔想~~~我都唔明白點解會中毒...

大肥豬成日罵我係因為不停DOWNLOAD先會中毒,我諗我依排玩電腦都真係要小心D呀!不過都係暫時性啦~轉頭我又會瘋狂DOWNLOAD呀~~

2007年1月26日星期五

激死我啦

尋日一放工就番屋企繼續整我部電腦,到試過根據我同事教我個方法整,都係唔得呀!最後....唯有用最衰嘅方法 - 自己搬落樓下商場相熟嘅電腦鋪仔叫佢幫我FORMAT個部電腦呀!

都真係幾慘呀!要自己一個人拎住一部電腦,都真係幾唔方便嫁,好在D路人都好好,都幫我推吓門,等我唔洗咁麻煩。我都覺得原來人都係有同情心,不過就好似有少少尷尬....

講番D激氣野大家聽先,事原當我搬到去間鋪頭時,幫我整開嗰位哥仔唔見左,鋪入面只係得一個新面孔同一個婆婆,我當然係問點解唔見左嗰位哥仔啦~點知阿婆好串答話:你有乜重要事呀,你可以問依位職員,你都係整機,佢都可以幫你啦~

之後我就同佢講:我幫襯佢好耐,想叫佢幫我整嘛!跟住阿婆D態度180度轉話:哦!佢去左幫客做野....要好晚先番呀~

我都搬左部機落去,我又急住用電腦,都要整啦~~

聽完之後都真係火到嚟埋,人地好心問吓,洗唔洗咁態度呀!一知我係熟客仔又轉晒態度,真係覺得佢好衰囉....

人地壞左部電腦都已經唔開心,仲要自己一個人搬,你仲要咁嘅態度,真係俾佢激死啦!

2007年1月24日星期三

愛情問題TAG

哈哈~~俾QQ Tag中左,之前都未試過玩,都係得個睇字,終於有得玩啦~~

等我乖乖地答問題先。

遊戲規則﹕將所有愛的問題誠實地答出來,不能說某某、所有和不知。答完後請點名8位朋友繼續下去!

祝我好運啦~

之前都同大家講過話我部電腦有D問題。

點知...頭先部電腦仲自己熄機,我諗佢都你中左中毒啦~~真係好唔開心呀!

經大肥豬電話教導下,我依家嘗試自己 FORMAT部電腦,希望成功啦~因為跟住幾日都唔得閒,如果唔係到要等到星期一先拎去整,最快都要下星期尾先可以再同大家見面啦~(因為始終係公司都唔係太方便出網誌同巡BLOG。

我依家都係偷偷地用我細路部電腦呀...

我要繼續努力啦~祝我好運啦~

2007年1月23日星期二

睇錯天氣著錯衫

今朝起身....都因為時間關係,所以好衝忙咁梳洗啦~

當我想換衫嗰時,未去睇電視依家係幾多度,睇吓著乜衫嘛!

當我睇到係17度嗰時,咪唔諗住著件大褸,快快趣趣換衫返工(因為已經遲左少少啦)。

點知...當我等車嗰時,越來越唔對路,點解咁凍....仲要係D風唔知係邊度吹過嚟,真係幾辛苦呀!心諗冇理由呀,17度..就算冇太陽都唔會凍成晒呀!不過因為已經遲緊到,所以唔理啦~唔番屋企換衫啦~

跟住我一番到工就去天文台個網睇啦~~原來係自己白痴左!天氣係13度,最高溫度17度。

今日成日都凍到震震吓,成日個頭都勁痛,都唔知係唔係凍親呀!

今日真係傻啦~~下次睇天氣真係要小心D呀!我剛剛先可以話病好,我唔想再病呀!

大家都係呀~~依幾日天氣唔係太好,記住出門口著多件衫呀!!唔好學我咁傻呀!

2007年1月22日星期一

執左!!

前幾日同大家講過話我屋企樓下間餐廳D服務態度~~超差.....

頭先返屋企途中,貪得意裝吓佢有冇生意啦~~

點知....見到漆黑一片,係門口仲有一張告示話『內部裝修』。通常寫得依句都係表示間餐廳都要關門大吉啦~

唔怪得之嗰日D職員咁啦~原來係知道自己就嚟失業,心情唔好......

2007年1月21日星期日

靚靚KITTY利是封

今日食LUNCH時係精品店買嫁,係唔係好靚呢?雖然我唔係KITTY嘅FANS,但都覺得好合結婚用呀!

我知道係我結婚嗰日係要自己私底下派D利是俾幫我嘅姊妹,所以我一見到就覺得好靚,所以就買打算嗰日用啦~我D姊妹唔多,所以買2包都應該冇問題。

我都知好似係早左少少買,不過依排係新年期間,出左好多款新野,我怕到時先買...就冇得買呀。

你知啦~見到合用嘅樣就要買定先呀,到時唔洗咁麻煩嗎!

2007年1月20日星期六

激正嘅HOCC演唱會


尋晚同LULU妹去左睇HOCC演唱會PART II,雖然大部分RUNDOWN同上次係差唔多,但都只能以一個字嚟形容~~~~正。

同上次一樣,差唔多一到D快歌位,個個都起晒身,拿住支捧捧跟拍字拍,全部人都HIGH晒,個氣氛真係好好呀!我自己都HIGH到唔識形容,嗰支捧捧係中場已經俾我拍到漏晒氣,跟住下半場全程用手拍,散場時對手就好似麻痺左,真係好開心。

今個最演唱會新加入的一PART,亦都係全晚HIGH嘅環節。HOCC著住一件令我諗起梅姐既"裂焰紅唇"嘅歌衫,加上一連串快歌串燒歌,真係好好正!原來HOCC係可以晒SEXY......真係另一個形象呀!

總括成晚都真係好好睇,雖然係第二次睇,但都覺好好呀~~仲唱到12:00先散場,真係正。

我真係越來越LIKE HOCC啦~

不過美中不足就係座我後面嗰位妹妹仔,佢真係比我HIGH十倍,成日都大聱尖叫,仲間唔中用佢支捧捧拍都我個頭呀!真係都幾慘!但我都明白佢都係投入,唔可以怪佢。但係.....座我隔離嗰個就有少少離譜,一入場就成大袋麥當當,佢又唔立刻食(嗰時仲有成15分鐘先開),等到開場先食。當佢企起身嗰時,又一路搖身,又將個飽拎係手,真係好驚佢個飽整到我呀!

 

唔知係乜服務態度

因為媽咪要去探朋友關係,所以今日嘅晚餐就由我、大肥豬同LULU妹陪佢食啦~所以我地一行四人就去左屋企附近嘅餐廳進行我地嘅晚餐。點知...都食左一面無奈同少少激氣呀!

我地都差唔多七點半左右入到去啦~當時都唔係有太多人,但佢地職員竟然要我地座門口嗰張枱(間餐廳好 ,入面仲有半間鋪未開),因為度門成日又開又關,好唔方便,我地當然唔肯坐啦,等左一間,個職員好唔願意先肯安排我地坐入面。

我地一坐間,就已經ORDER好晒食乜野~~點知,隔左好耐,都冇人拎幾杯水俾我地,到我提個職員之後,都隔左一段時間先俾我地。我唔係話嗰幾杯水嘅問題,只係覺得好似俾人遺棄嘅感覺....

到我地晚餐到.....我ORDER嗰時都好強調LULU妹個餐係要洋蔥汁同埋要番茄飯,點知佢地又送錯左黑椒汁同白飯,叫佢換過,個態度又超差.....

我地之前都間唔中會去依間餐廳食野,佢地服務都唔係話特別好,但到未致於係依家服務態度,今日又唔係咁多客人,點解會係咁呀!可能佢地請左一批比較年青嘅職員...影響左啦~真係要叫劉德華教吓佢地乜先係好嘅服務態度呀!

2007年1月18日星期四

電腦唔知乜事

好擔心呀~~

尋日係屋企仲好正常地上網睇BLOG同玩MSN,點知過左一間,個電腦冇端端一開IE,就會變左一個大陸網站,真係俾地嚇死啦~基本上,上網都冇乜問題,我用電腦掃過吓毒又冇事。冇理由呀,我都唔會隨便上一D唔安全網站,冇理由會變成咁..

我已經係再重新SET-UP過D『首頁』同『我的最愛』都係唔得呀!!!整左成晚都唔得。

今日返工問左同事,佢地話應該係中左毒(不過唔係好緊要嗰種),佢地仲俾左隻防毒軟件我,叫我番掃吓就OK啦~

希望得啦~

2007年1月17日星期三

麥當奴嘅生肖公仔

尋日睇電視見到,軟硬仔著生肖公仔衫,好得意呀!

「軟硬暖笠笠 12 生肖」公仔,好似話係由軟硬天師設計。

由今日起,每星期推出 4 款生肖公仔,買任何食品加 $9.5 就可以換取一隻啦。

我都好想要呀~不過...我面上D粒粒,真係唔容許我再食依D熱氣野呀~~~

我都為有難為大肥豬啦~

我終於都換左隻『麥狗狗』啦~~

原來只要係買杯汽水都可以加錢換呀!

不過我冇打算12隻換晒,只係會換狗仔、羊仔、馬仔同埋老虎仔。因為依D生肖都會旺我,我諗住放晒係OFFICE枱面,新年一定冇由怕。

2007年1月16日星期二

變左鍾無艷

都唔知仲乜,依排塊面勁生粒粒,生完一粒都仲未謝,係隔離又生。不過佢地都集中係我塊右邊面,真係好唔開心呀!

為左要KEEP靚靚,我都已經好介口,好多熱氣野都唔食啦,但係都唔知點解仲會成日生粒粒

心情真係勁DOWN,又唔敢做咁多FACIAL,怕會養大D粒粒,會繼續係咁生。有乜辨法呀!

就嚟新年啦~~下星期又要去飲,我唔想好似鍾無艷呀!

由我影完結婚相之後,我都冇出去美容院做FACIAL,都係自己係屋企做。依家...我諗真係要再去美容院清清先得啦~~

我幾時可以變番靚靚呀~~

2007年1月13日星期六

木糠布甸

第一次食木糠布甸,係幾年前係澳門,嗰時覺得好好味,好似雪糕口感

。我仲一次過食左三杯,仲俾大肥豬話我為食。

前幾日,同事糖糖整左木糠布甸俾我食,真係幾好味....於是我就問佢點整啦~~原來係好容易,於是我又學人整吓啦~

真係好簡單,買三樣材料就OK啦

好在我在攪拌機同撥蛋器,所以D餅碎同忌廉都好容易整,不過最難將餅碎同忌廉要一層一層舖好,都有少少唔平均。

經過半個鐘頭係廚房蔽關,終完成功啦~

睇個外觀都好似幾似樣,依家要放左入雪櫃,等我地去完街街番嚟就有得食啦~

好勁張~~~唔知好唔好食呢?

頭先終於都食左啦~~

好在大家都覺得好食,爸爸仲好快咁食晒成杯(原本佢係同媽咪兩份),仲話口感唔錯,真係有少少成功感呀!

2007年1月11日星期四

喜訊

好開心呀!尋日大肥豬知道佢考試成績啦~~佢終於完成左佢個大學課程,可以戴四方帽啦~~

其實之前唔多唔少都有少少擔心,因為佢真係好辛苦,又要番工,又要讀咁多科。當然我對佢絕對係有信心,知道一定冇問題,但始終都要有結果先可以放心,依家終於都可以鬆口氣啦~~佢仲好叻仔,成績屬於二級呀!

當我知道佢可以畢業之後,我真有少少感動,好似終於等到啦嘅感覺,我聽完之前眼仔都濕濕

年尾先會行畢業典禮,唔知到時會點呢?大肥豬著住件畢業衫會係乜樣唸?

不過...我真係有少少擔心嗰日我會忍唔住D眼淚......

 

 

2007年1月10日星期三

打敗仗

經過幾日同病魔同凍神作戰,今日終於到打敗仗了....其實都已經唔舒服左好幾日,加上依幾日又轉凍左好多,可能我著得唔夠衫啦!

今早一起身個就發覺對腳浮浮,鼻水又唔停,行路都行唔到,所以都冇番到工,留係屋企訓啦!

剛剛睇完醫生,醫生話我偏桃線發炎加上發燒同埋感冒呀!真係好慘~~要我介口,不過都好,趁機可以減肥嘛!

唔止佢一個醫生話我偏桃線比一般人大,所以會好容易發炎,引致發燒。如果再成日發炎,就叫我做手術....諗起都好驚呀!希望唔洗啦~

醫生叫我要多休息,所以我又要訓...訓.....訓

2007年1月8日星期一

多謝支持



好開心....真係好開心,昨日係第一次有超過100人次瀏覽我個BLOG呀!真係冇諗過會有咁多人會來睇我所寫嘅野,所以真係要多謝入嚟探我嘅朋友仔呀!

你地多D嚟探我,感受一吓小肥豬我嘅開心事。

我會繼續努力,希望日日都有好多人嚟探我。

你地都要多D留言呀.....因為你地係我寫BLOG嘅動力。