2007年2月28日星期三

究竟我係乜事呀

究竟我係乜事呀!我由年初二開始病到依家,大大話話都睇過幾個醫生,又西醫又中醫,都好似冇乜好過。

前晚咪話開始去睇中醫,飲苦藥。

點知,尋日返工仲辛苦過前幾日,都唔知仲乜...成個人都發晒冷,又頭痛...又反胃,終於都頂唔順要早走。又再走去睇西醫,醫生話我係重感冒,加上可能D中藥有問題,叫我要休息幾日,唔好再飲嗰D中藥。佢仲同我打針,真係幾痛呀!

開左兩日假紙俾我,叫我休息。原本都冇諗住今日唔番工,但今朝一起身就成身都冇力,又頭痛。終於都係唔返工。

死啦~~已經係一個星期請左三日假,老細一定唔鐘意呀!不過我又真係好唔舒服,返到去冇心機做野咪又係死.....

依家可能食左D西藥,好似好左少少(可以有番D精神)。真係唔可以唔信,今次睇嗰個醫生係由細到大到睇開,不過佢都只係每日睇上午,仲要好多人,要排好耐先可以睇到。我又怕等,所以冇乜大問題都唔去睇去,依家.....都係要睇佢先得!

希望食哂今次D藥,可以好番啦~

再唔係我諗真係再拜吓神先得啦~

2007年2月26日星期一

面對現實

由初二開始病,都一直未好番....都食左好幾日西藥,食到個人都....痴痴地,仲唔知係唔係D西藥燥,塊面都開始生粒粒,好慘呀!

媽咪都一早已經叫我去睇中醫,不過我怕飲嗰D苦藥,所以一直都唔去睇。

今日我竟然好乖,自動自覺同媽咪講叫佢放工陪去睇中醫。真係好慘,個中醫師話我感冒入根(都唔知係乜,話好嚴重啦),要連續飲三日藥先得,仲叫我要番去睇多次呀!

嘩~~我一聽到話要飲三日藥,都真係打左個特,飲一日都已經夠辛苦,仲要飲三日.....諗起都怕怕。不過為左要好番,都真係要面對現實....照飲啦~~不過就要麻煩媽咪幫我煲啦!

我就係咁衰...次次唔係去到最辛苦嘅時候,到唔會去飲嗰D苦茶。

2007年2月25日星期日

好驚呀

今日都仲係唔係好舒服,所以成個人都傻吓傻吓!

剛剛放工返屋企嘅時候,當我出LIFT嘅時候,見到有個年約四十多歲嘅男人係隔離部LIFT出嚟,企係度,唔出聲,又唔行,仲要望著我....真係好驚呀!(佢個LOOK又唔似係D維修師傳)

見佢冇動靜,我都立刻企係屋企門口(因為今日屋企冇人,得自己一個呀!我當然係唔開門住,點知佢想點呀!)之後立即係個手袋找定個電話同KEY,諗住有乜野就即刻打999。

係依個時候,個男人終於有反應,佢以一口鄉音話:我唔係跟住你呀~我係找唔知幾號室......(之後一連串我聽唔明嘅說話啦),之後佢又走左去第二條走廊度啦。

都真係好驚嫁,所以我一見佢走之後,就以九秒九速度開門,之後立刻鎖好門窗。

入到屋之後...都叫定番少少呀!

個男人都唔知係乜人,究竟我係自己多心定係真係有問題呢?

希望只係我自己傻吓傻吓諗多左啦~

2007年2月23日星期五

生日快樂

 

拆利士啦

年初七除左係可以食生日蛋糕之外,亦都係一個重要嘅日子,因為...可以拆利士啦~真係開心呀!

記得細細個時,媽咪都係規定要過左新十五先可以拆,拆完就將所有利是錢俾晒媽咪(當然嗰時唔係自願啦)不過越嚟越大個就...越來越早拆,之後得媽咪批准後,開始習慣左係人日拆利是啦!

我今年逗左都幾多利是嫁!

拆左之後...都有一千幾百啦!都同往年差唔多啦!當我一路拆就一路諗番封利是係邊個俾,都真係幾好開,不過....依個開心都係最後一年啦,因為出年都唔會有咁多利是俾我拆,仲要派俾人,一諗都依點就有少少唔開心。

有樣野都幾攪笑,基本上大多數人派利是俾我嗰時都係講同一番說話:今年係最後一年啦~出年到你派啦!聽完之後都有少少難為情呀!

話雖如此,今年D利是錢我都打算買少少野醒吓自己,唔知買乜好呢?

SAMMI 07演唱會

頭先係一個網站見到嫁,真係超開心呀!

因為我個超級偶像~~SAMMI終於都再開演唱會啦~~真係好掛住佢呀!

好在我有中銀信用咭,可以打電話去訂飛(希望可以好順利打的通啦)

sammi 07演唱會正式日期巳出

「中銀信用卡」將於2007年3月12日至2007年3月17日(9:00am-9:00pm)提供『鄭秀文演唱會2007』優先訂票服務,詳情如下:

中銀白金卡專用訂票熱線:(852) 2185 6194

中銀信用卡優先訂票熱線:(852) 28 611 611

演唱會日期:2007年5月18日至2007年5月21日(共4場)

 地點:紅磡香港體育館 時間:8:15 pm開始

 票價:HK$480、HK$300、HK$200、HK$100

條款及細則:

 1. 是次優先訂票只適用於香港發行的港幣中銀信用卡、U-point信用卡、y not信用卡、商務卡、中銀聯營卡及澳門地區信用卡的卡戶(不適用於長城國際卡、美金卡、長城人民幣卡、中銀人民幣信用卡、採購卡、中銀『易達錢』及 Intown網上卡的卡戶)。

2. 門票數量有限,售完即止,座位將根據卡戶訂票時的日期及時間以先到先得方式分配座位。每名卡戶最多可購票20張;訂票一經接納,所購門票總值及手續費(每張HK$14,有關費用由AEG Promotion Limited收取)將即時從卡戶的中銀信用卡戶口扣除。扣帳時卡戶戶口必須正常,否則訂購申請無效。

3. 卡戶如訂購6張或以上的門票,演唱會主辦機構保留安排分隔座位的權利。

4. 所有成功訂購的門票將以平郵方式於演唱會前10至14天寄至卡戶所提供的通訊地址(4張或以上門票必須以本地速遞方式寄送,每次需另加HK$22。如郵寄至澳門地區,則需另加HK$100。有關費用由AEG Promotion Limited收取。不適用於郵寄至中國內地。)如成功訂票的卡戶於2007年5月8日仍未收到所訂購的門票,請致電(852) 28 611 611 (上午10時至晚上6時)查詢。

5. 卡戶如在演唱會舉行前7天內仍未能收妥門票又未有致電AEG Promotion Limited查詢,本公司恕不承擔有關責任,也不會作出任何賠償。

6. 所有已訂購或發出的門票均不可取消、退還或更換。

7. 演唱會如改期、取消或卡戶與演唱會主辦機構有任何爭議,演唱會主辦機構將保留最終決定權。

 8. 一人一票入場,包括手抱嬰兒。

2007年2月22日星期四

貪心的司機叔叔

今天因為仲未好番哂,唔係好想等車,所以就用左一個最方便同最貴嘅交通工具返工-----的士。

我一上到車就發現右邊有一大袋紙袋(我估係上手遺留左),我就不奇然好大聲話:仲乜有袋野嫁。個司機一聽到就叫我即該俾佢(基本上我冇時間睇袋野係乜東東),話會嘗試俾番個物主。

我個人都傻吓傻吓,咪依佢講俾袋野佢,等佢開車啦~

點知佢一路開車,一路就話嗰D人點唔小心,又話都應該係D拜年野,找唔到個物主,都應該冇問題…總之佢俾我個感覺就係想自己要左袋野啦!

我一落車就打電話話俾媽咪,話佢知個司機D衰野啦!點知媽咪仲話我蠢,應該睇吓係乜先出聲,依家好明顯益左個司機。

算啦!雖然我都知係益左個司機,但我係一個誠實嘅小肥豬,唔會貪心嫁,因為我相信『好人有好報』。

2007年2月21日星期三

黑豬日開始

話說我年初二已經開始唔係好舒服,把聲都開始變左。

到初四開工都係帶病返工…(費時一開工就請假,好似唔係太好)。

到左放工嗰時終於都頂唔順,去左睇醫生,醫生話我感冒,仲發燒呀!好慘…。醫生都已經開定請假信俾我,佢叫我多D休息…不過我都打算到時先算(拎定冇損失嘛!)。

今日…終於都頂唔順,仲未退燒,所以又要請病假,張醫生紙有得用啦!

今日成日都係訓…食完藥又訓…食完野又訓。

雖然係病,但都有少少開心野,就係大肥豬成日都陪住我,又提我食藥,又睇住我訓覺,佢自己就係我床尾睇書。我都知佢好悶,都有少少感動呀!

仲有一樣野就係LULU妹知我唔舒服,佢一早落街買瘦肉用電飯煲煲粥我食,雖然我係冇乜為口,但佢一番心意,我都有食一碗,味道雖然係淡DD,但佢心意加埋,都唔差呀!

今個新年都真係幾黑…仲連燒都俾我發埋,所以話我今年應該都會幾發呀!

2007年2月20日星期二

新年大忙碌

新年可以話係非常忙碌,眼看就係放假,但每日都要一早就起身,好夜先番屋企,真係早出晚歸.....連寫BLOG嘅時間都冇晒。都真係幾辛苦!

加上依D天氣....時熱時凍,真係好容易令人病呀....我都不幸地中左招,所以話今個新年真黑仔....

年初一

一早就要起身同爸媽食年榚拜年,之後十點幾又要去茶樓同嫲嫲拜年。

之後就去左大肥豬屋企拜年啦!係未食晚飯之前就佢嫂嫂打吓D衛生麻雀仔,佢地知我唔係太識打,所以打得好細,就吓我。大肥豬仲打本俾我添。哈哈~唔覺唔覺都打左成個幾鐘,好彩冇輸到,仲有幾蚊執呀!

嘩,今年食飯都真係好多人呀~佢地七兄弟全部番晒嚟(除左佢家姐冇番),成屋總共有二十幾人,真係好利害。利害係佢媽媽可以煮咁多人餸呀!

食完飯就當然佢地成班兄弟開賭啦~我就同兩個B仔玩,佢地都係得嗰3歲,真係好好笑,我仲同佢地拍左短片,最慘UPLOAD唔到,如果唔係俾大家睇呀~

當日大肥豬玩啤牌仲贏左一百蚊呀!哈哈~~當然佢將依D新年財收歸國(小肥豬我)有啦!

年初二

又要一早起身,因為要入去新界錦田同大肥豬婆婆拜年,都真係幾悶呀!因為要坐成個鐘頭車入去,真係坐到人都發緊夢,不過...一年先入去探婆婆一次,辛苦少少都冇問題啦~

入到去就各有各玩,佢地有D就打麻雀,有D就睇VCD,我同大肥豬就同姪仔玩。我發覺原來大肥豬真係好鐘意B仔,成日都又抱又鍚,又同佢地玩得好開心呀! 

年初三

我爸爸有一個習慣,就係每年年初三都要揸車一家人遊吓新界,話行個大運。每年都唔例外,我地一行七人就一早出發。

不過依日我就真係好黑仔啦~真關係未出發前都已經覺得自己好唔舒服,但為免影響爸爸心情,唯有食粒傷風藥之後就出發。

點知....都唔知係唔係黑開有條路,當入到新界嗰時開始覺得隻眼好唔舒服,等左一間都冇好轉,於是我就除左隻隱形眼鏡吓乜事啦~點知....原來眼鏡爛左,都已經戴唔到,唯有要做獨眼龍,繼續行程.....

開頭都冇乜唔舒服,點知越來越辛苦...原本兩隻眼睇左唔同真係好辛苦嫁,終於連最後個隻眼鏡都要除埋先叫做舒服D呀!

雖然我都係只係有成四百幾度近視,所以成個下午都係毛查查做人,要大肥豬足著我行,都真係幾慘!

當我入到去流浮山行嗰時,媽咪見到有D花花好靚,就捉住我地影相。係影相嗰時,我聽到有人話:小肥豬呀!之後見到好似有兩個人望住我。但因為我睇唔到關係,再問大肥豬,佢又話聽唔到。唔知係我真係聽錯呀,定係真....如果係有BLOG友見到我,唔好介意我唔應你地呀,因為我真係睇唔到你,所以先唔敢亂認呀!

我嘅新年假期就係咁就過左啦~

有時真係諗,放依D假又真係辛苦過番工呀!

不過...都係一年一次,算啦!最緊要係開心嘛!

開工大吉

唔覺唔覺4日新年假期已經冇晒啦!

今日返工見到條街都好靜~~~我諗好多人都仲係同緊『周先生』拜年(包括我隻大肥豬,佢自己就攞左依幾 日假,又唔一早話我知,等我冇得一齊放。)一諗到依點,就真係超唔開心啦!

但...番工都可能話好嫁.....因為可以逗利事,雖然唔係多(因為D已婚老師都唔興派利事),但唔緊要呀!

今朝早一踏入學校門口就收到一封利是,係護衛叔叔俾我嫁,真係開心啦~~~因為冇諗過一入門口就有利是收,我覺得好似係一個好好嘅意頭,話俾我知今年工作可以順順利利啦~

希望所有人都可以係豬年工作順利...個個都又升職又加薪

2007年2月17日星期六

恭喜發財

今日係大年初一,我小肥豬係度恭祝大家:

豬年行大運、男嘅就越嚟越有型,女嘅就越嚟越正!

一家大細都甜甜蜜蜜,總之想個樣有嗰樣啦!

         

2007年2月15日星期四

冇左份會議記錄

經過幾日嘅努力,終於完成我份會議記錄,點知我一手唔該竟然DEL左個FILE,真係好唔開心~~

會議記錄係我覺得最難嘅工作,因為係最浪費時間同頭痛,仲要諗吓有邊D唔落得.....

基本上一份都要做幾日...依家冇左~~又要再做過.....好慘呀!

我仲有2份未做....都唔知點算好啦!開頭打算迫自己係新年假後一定要交到俾老師,依家.....

總之一個字~~~慘啦!

不過唔理啦~過左年先算,唔好影響自己過年心情。

2007年2月14日星期三

好多利是

嘩!好多利是呀~~~

今日我地係屋企做節,食完飯之後隔左冇耐,媽咪突然間話:見有時間,不如就封定D利事,因為年三十晚我地都會唔好忙,費時太趕入利是啦!

我同LULU妹一聽到就立即興奮地話要幫手,我地一路話邊個利是封幾多錢,邊個又點入。唔覺唔覺都整左成個鐘呀!封利是真係好開心!

不過...諗諗吓,出年依個時候應該到要自己封啦~唔知到時會唔會仲係咁開心呢?因為要用自己錢去封,諗起都有少少肉痛呀!不過...新年係一件開心事,派少少利是都應該冇問題.....

唔好理啦~~今年盡快享受最後一年收利是嘅感覺啦~希望今年可以大豐收啦~

2007年2月13日星期二

平淡的情人節

今日過左一個平平淡淡嘅情人節!

我地只係去左旺角食飯,之後行左一間...九點幾就番屋企啦。因為真係好多人,去邊都係人迫迫,好唔鐘意依個感覺,早D番屋企,睇吓電視都好呀!不過...番到屋企仲俾媽咪笑我地太早返。

雖然係平淡左少少,但我都已經好滿足啦!大肥豬仲話我地已經去到老夫老妻嘅感覺,其實真係有你鐘意嘅人陪你,無論做乜都係開心呀!

講番我送俾大肥豬份禮物先。點解我會有內疚感覺呢!

依年冷衫就係我送俾大肥豬嘅禮物,如果有留意,依件應該係打算係聖誕節送俾佢,點知......我病左一排冇織,之後自己又有少少懶惰啦!終於要迫自己係情人節完工。我都係尋晚先完工(之前有幾晚都織到好夜呀,變左大熊貓呀),好在趕的切。你話係唔係要內疚呀!

好在大肥豬都合身,仲好LIKE呀!我D心機都冇白費。

2007年2月12日星期一

情人節快樂

聽日就係情人節啦!係度先祝大家同情人過一個好SWEET SWEET嘅情人節!

                         

記得上年過左一個好悶嘅情人節,因為大肥豬要考試,所以冇陪到我,都幾慘呀!係嗰時唯有同自己講,只要兩個人係開心,日日都係情人節啦~但講就係咁,始終都係唔開心嫁。

今年終於可以陪番我啦~~不過我地就冇乜PLAN去邊,諗住去吓街食餐飯就算,感受吓情人節氣氛啦!唔知點解今年冇乜情人節嘅心情,可能我將所有心思放晒去年尾件事度啦~~覺得其他日子都唔係太重要啦~

我地都一早講好左唔買禮物俾大家,就番D錢去準備我地年尾件大事嘛!但我都準備左一樣小小禮物俾大肥豬,應吓節嘛!

不過....其實件禮物都幾內疚!詳情要聽日先同大家講,因為大肥豬會間唔中上嚟睇,費時俾佢知住,俾個半驚喜佢嘛!

2007年2月11日星期日

忍痛剪頭髮

原本都唔係好想去剪嫁,因為真係留左好耐,咁試過咁長,真係唔係好捨得呀!不過...見到佢又開叉又黃,成頭都好似草咁。今日放工終於都的起心肝去剪頭髮呀!

放工去左糖糖介紹嗰間新髮型屋剪,都真係錯。嗰位姐姐真係心俾心機幫我剪,最鐘意就係佢幫我剪個『音』,佢剪就係我想要個款,真係幾靚呀!

不過唯一唔開心就係.....真係短左好多,我估都應該剪左有3-4吋,真係好唔開心呀!好耐都冇試過咁短啦!希望到年尾都應該可以長番...如果唔係好難SET頭呀!

鬼叫係成頭都係草.....冇法啦!依家雖然係剪短左,但嗰位姐姐話個頭都仲有開叉,叫我密D去修,有時間多D去做焗油呀!

終於感受到新年氣氛


唔覺唔覺,下星期一就已經係年初一啦!依排除左行商場見到D佈置比較有新年氣氛,我個人都唔覺有特別,只係知道我仲未幫自己間房大掃除,又未買新衫過年.....總之都係冇乜心情去迎接依個金豬年....

不過今日開始個心情開始有唔同啦!

今日返工冇耐,就收到今年第一封利是~~~依封係學校俾我地嘅年賞,雖然係幾百蚊,但都好好,因為可以有錢去買新衫嘛!每年年尾都會有嫁,不過今年就特別少少,因為係校監親手派俾我地,個感覺就真係怪左少少。

係臨放工嘅時候,其中一位工友姐姐拎左好多盒年榚入OFFICE,原來佢今日係LUNCH嗰時借左飯堂個地方自己整嫁,真係好勁呀!佢仲每人俾左一盒呀!我地雖然未食入口,但都覺得好WARM。

我終於都覺得就快新年啦!今年仲係我最後一件收利是,所以真係要主動出擊,希望可以收好多好多利是,發吓新年財呀!

2007年2月9日星期五

大出血

尋晚出左銅鑼灣同個好姊妹食飯,飯局之後,當我等緊車嗰時記得我D搽面嗰D差唔多用晒,所以就走去入番D貨。

我一向都係用開Laneige,都大大話話有成三年幾啦!不過...唔知點解我D皮膚好似冇乜改善,所以都有打算轉吓牌子,等佢可以有D改善啦!

之前都有提我轉左SKIN FOOD嗰D面膜,我覺得都幾好用(起碼用完我冇敏感),所以我就打算試吓轉晒用佢地條LINE啦~

我一入到去間鋪頭,已經有個STAFF好有心機幫我睇吓我D皮膚有乜問題,俾佢講中左我係嚴重缺水,之後就介紹左南瓜保濕系列俾我啦!

我開頭都15/16,唔知試唔試好,因為我好怕唔合我用,會生粒粒呀!你知啦~我又係要開始KEEP番我塊面嘛。後來個STAFF幫我用手試時,又真係好似幾好,幾潤但又唔笠。最後..我都係買左依條LINE嘅爽膚水、乳液、精華素同雙效營養霜,之後又蜂蜜洗面奶。真係好多嘢呀!

好在都唔算好貴,如果唔係一定俾大肥豬話我又亂買野呀!

我尋晚開始用,用左兩次啦~都OK。個STAFF話應該兩個星期就會開始有明顯改善。希望真係WORK啦!如果唔係好似好浪費呀!

有時真係諗,女人錢真係容易賺。因為每一個女人都係鐘意扮靚!

2007年2月7日星期三

點解又係我呀!

我返工第一個嘅工作就係睇吓有邊個學生冇番學,如果我冇收到佢請假通知,就會打電話問吓個屋企人佢仲乜唔番!

今日我又如常地做依樣嘢!點知...又遇到不公平對待呀!真係好嬲呀!

當我打電話問其中一個家長時,佢竟然用好惡死同串嘅態度(以滿口香音)同我講:我咪同左個班主任請假囉,仲乜仲要打嚟煩我呀!乜你地冇溝通呀!你點做野呀!聽完之後,真係火到嚟埋...但為左份工,我共只好控制自己情緒,同佢講:唔好意思,因為老師冇同我地話,所以校務處見佢冇番,就要打俾你問吓!如果左到你,真係唔好意思啦!之後個家長又講番同一段講再加多…(下刪數十唔係好好嘅字句),就收左我線。

其實依D情況間唔中都會發生,有時都已經麻木晒。不過今日個家長真係反應過激,佢嘅態度真係好黑人憎,加上好似一番工就遇到依件事,所以真係好唔開心呀!

有時真係想問,係唔係真係我有錯呢?我都係照我工作去做,咁都有錯嗎?點解成日俾人話都係我。

有時都覺得自己係一個夾心人,俾兩邊夾住,想講又講唔到,有時都真係幾辛苦呀!

不過..鬼叫你要冇錢,唯有要忍啦~

2007年2月6日星期二

心理作用

今日我竟然做左一件白痴嘅事呀!

唔知仲乜今日成日都好口渴,轉個頭就飲晒支水,係依個時候....當然入去茶水部湛水啦....個件傻野就係依個時候開始

我去嗰電子熱水煲度湛滿個水杯,一口氣就飲左大半杯。我一路飲都覺得好唔對路...點解D水一D到熱,仲凍???之後我就睇清楚個熱水煲~~原來佢係煲緊,嗰粒煲水制係著左,不過...唔係太光,所以我睇唔到呀。但唔知點解部水機又冇D煲水聲.....好慘呀.......

救命呀!原來D水係未煲緊...即係我飲左成大半杯水喉水呀!

之後,成日個胃都好唔舒服,仲有D想嘔嘅感覺呀~又食唔落野,唔知係心理作用定係真係有事呢!遲D再係咁就要去睇醫生啦~~

我將件事話俾大肥豬聽,佢仲笑我傻呀!真係唔開心啦~~~