2007年3月30日星期五

成功抽血

今朝一早就同大肥豬食左一個好飽飽嘅早餐

,之後就開始出發去灣仔家計會進行抽血同約時間見醫生,做我地嘅婚前檢查嘅事前工作啦!

一路係地鐵就開始有少少驚,話晒我咁大個女都未試過抽血,唔知係點...有人話唔痛,又有人話好痛...加上肥豬係度嚇我,所以都懷住一個又擔心,又唔想去嘅心情去啦!

一入到去到係填FORM,俾錢,CHECK資料....好快姑娘就叫我地坐埋一邊等叫名抽血。

一路等,個心情就越來越緊張,見到一個又一個人係抽血房出嚟,真係唔想咁快到我。

等左十分鐘左右,聽到姑娘叫大肥豬入房...佢就一個人入左去(姑娘唔準其他人入呀)。嗰時仲驚,因為下一個一定係到我....開頭以為大肥豬可以入去陪我,依家得我一個....個心真係幾驚呀!叫到大肥豬行出嚟,姑娘就立刻叫我啦~~

入到去..姑娘都問左我一D問題之後,就開始佢嘅工作。佢原本係想係我右手抽血(一般人都好似係抽右手),不過找左好耐都找唔到一絛好清楚嘅血管,最後要係我左手抽,不過都找左好耐先得呀!當佢開始嘅時間,心跳指數真係升唔少,我唯有將成塊面貼落牆度,希望令自己睇唔到成個過程啦!

個姑娘真係好好人,佢教我點放鬆自己,又同我傾計分散我注意力。

係成個過程真係又唔係我想像中咁痛,只係針入去嗰一吓有少少痛,都係可以接受都哦!

我抽完血仲叫姑娘俾我睇,見到我D血係深紅色,我問姑娘係唔係唔正常,(我成日以為係鮮紅色)。佢話冇問題,一般都係咁顏色,可能我平日少飲水,所以深左少少啦!

依家要等5月22日見醫生同睇報告,希望我同大肥豬都冇問題啦!

 

2007年3月29日星期四

特別的善款

話說今日又繼續數嗰D羊仔善款,好在今日唔係太多毫子,所以雙手都冇咁大銅臭味。係我數緊嘅時候,俾我發現左一樣好野呀.....當我數錢途中,見到一個SIZE好似伍毫子嘅物體,但又係銀色哦...我咪拎上手究竟吓啦!點知...睇清楚先發現原來依個銀仔係屬於1951年出嘅伍毫子(仲大個我爸爸呀!)~~我立刻將自己一個2004年伍毫子同佢轉左...

拎番屋企俾媽咪睇,佢話依個好值錢....因為依個男仔頭伍毫子當年係出得好少,如果放出去一定會好好價。

不過...我地一致都為唔好買左佢,因為依個毫子始終都係由善事開始得番嚟,當留番嚟做一個記念,或者到時留番俾我D仔仔女女,等佢地一代代KEEP落去。

2007年3月28日星期三

滿手銅臭味


今日一返到工就要開始數錢....仲要係好D濕濕碎碎嘅毫子,真係頭都痛啦!

事關我地天主教學校係三月份都會為明愛機構舉行『四旬期捐款活動』,每一班都會有一隻羊仔錢箱,等D學生捐錢入去,當然唔限佢地捐幾多啦!

就係依個原因,個個學生都係捐毫子,仲要係一毫最多。最誇張就係有一班數完之後,竟然有成三十幾蚊一毫....真係數死我呀!

我唔係唔讚成佢地捐錢,但都唔好全部都係毫子呀。

依家先係數左幾班,仲有十班嘅羊仔錢箱未數呀!我食完飯之後又要再努力啦!

依家...唔知係唔係D錢有味呢,我成對手都已經好銅臭味...洗幾次手都仲有呀!

有相睇啦


經過我一晚嘅努力…我終於都將SCAN完嗰隻DVD嘅FILE縮細。可以將成輯新天地婚紗相放上嚟俾大家睇啦!

大家可以去 

婚禮倒數 - 新天地婚紗相  ,記得睇完要讚吓我呀!(真係唔知醜,迫人讚自己)

 

今日媽咪將我隻婚紗相DVD拎左去晒左一套(拎完先話我知),仲要係5R呀!

佢話將佢晒嗰套放係屋企度,等佢可以俾佢D朋友仔睇。又話下次去舅父屋企,一定會帶埋去俾佢地睇,等佢地知道佢有個咁靚嘅女同型仔女婿,真係俾媽咪笑死呀…

 

2007年3月27日星期二

SCAN 左相啦

之前經小賢介紹去我去北角 JOSEPH PHOTO SCAN婚紗相菲林做DVD,今日終於有得拎啦!

所以...頭先一放工就立即去拎啦!

因為佢幫我SCAN到FILE都幾大,所以我要慢慢縮細先可以UPLOAD上嚟,等我整好晒就可以俾大家睇啦!好快就有得睇啦!

我之前仲有一張細油畫同一張8R嘅珍珠版相未做框,我都係依間做埋呀,整完之後,又幾OK哦!最重要係比新天地平成一大半呀!

↓依張係擺係媽咪屋企嘅細油畫,由揀相到揀框都係媽咪自己揀,佢話好鐘意依個景同埋依件衫!

↓依張就係珍珠版相啦

 

2007年3月26日星期一

終於要放棄

之前同係網上到醫院減肥餐單,跟住見有好多朋友仔都話得,睇見又唔係好辛苦,我就試吓啦!

點知..食左兩日,已經覺得唔舒服,個胃成日都抽住痛,仲好反胃…我都係跟足佢個份量食,又冇特別減少食量,都唔知點解會係咁!

媽咪話可能我個胃唔受得西柚,太酸啦~~仲叫我唔好再食呀!

所以...我終於要係要放棄食依個減肥餐,唔係我冇恒心呀,只係我身體唔受得呀!

依家為有做多D運動,游多幾個池,補番數啦!

2007年3月25日星期日

天氣的錯

唔知點解,今日成日都好冇心機做嘢,總係覺得個人好悶悶

諗諗吓...終於都估到啦!可能因為個天氣太唔好,天氣太個潮濕,攪都所有地板成日都濕淋淋,個人又『笠痴痴』...真係有少少忟呀!

雖然D人成日都話『一年之計在於春』,春天係一個新開始。但我就最唔鐘意春天,成日都濕淋淋,行路都真係好唔方便(我係一個好唔小心嘅人,成日都會滑倒)。仲有,D衫又成日唔乾,就算乾都好似有D『UP』味....真係好唔鐘意依D感覺呀!

真係~~希望春天可以快D過啦~~

2007年3月24日星期六

sammi演唱會公開發售啦


城市電腦售票網由26/3 開始,公開發售Show Mi 鄭秀文 2007 演唱會門票。未買飛嘅朋友仔,記得去飛奔去買飛啦!

好在我上次優先訂飛嗰時,我有中銀信用咭可以訂到,如果唔係我又要去排隊啦!

真係好心急呀~~好想快d睇呀~~~

2007年3月21日星期三

珍珠婚記念日

今日係爸爸媽媽嘅珍珠婚記念日,所以就一家人約埋契大佬一家出街街食飯,同佢地慶祝啦!

我地去左杏花村間稻香食晚飯,餐飯都OK,幾好食,不過...就真係細碟左少少啦!

雖然係咁...但大家氣氛都好好,見到爸爸媽媽都好開心,令到自己都覺得開心呀!

唔覺唔覺,佢地嘅婚姻都去到珍珠婚,雖然佢地都會有少少嘈交嘅時候,但好快就冇事啦,仲成日都好恩愛,有時都真係幾羨慕佢地嫁。

希望佢地日日都SWEET SWEET,繼續恩恩愛愛直至白金婚....燭光婚。

有時都會諗第日同大肥豬結左婚之後會唔會都好似佢地咁恩愛呢?

 

2007年3月20日星期二

應該幾多套衫

唔覺唔覺...我已經準備左好多野,化妝、攝影....好多大野都已經OK哂~~

不過..仲有一樣大PROJECT未決定 - 就係租衫啦~

好多人都話我已經算遲...叫我快D去揀衫,因為年尾好多人結婚,怕我租唔到靚衫。

其實,我都唔知去邊間睇衫好,金都又好似太平凡(有D怕係黑店),去尖沙咀嗰D,又好似太多選擇,唔知由邊度開始好。

所以....我終於下左個決定,就係趁復活節假期去行多幾間,睇吓JOIN邊間。(各位姊妹有乜好介紹呢?)

不過..除左諗JOIN邊間之外,我都有一個問題。

就係....究竟我嗰日應該著幾多套衫呢?應該著點著法呢?

我依家初步打算......

早上:著掛出門同入男家、之換婚紗註冊

夜晚:一到酒樓先著晚裝1影相、之後換、再晚裝2影相(如時間許可)、換返婚紗進場、之後換晚裝3直至敬酒完再換晚裝1送客(因為我覺得一早冇乜人見過晚裝1應該可以再著/如晚裝2未著就著這件送客)。

即總共成日5套衫,唔知有冇問題呢!

各位姊妹俾D意見我呀!

 

2007年3月19日星期一

救命~~要洗眼呀

今日放工,我就好乖又去左游水。我都游左成45分鐘,都真係幾攰,尤其對手臂真係好酸痛。不過,我諗對減我對肥臂會好有效,我會繼續努力....

係我游完水入去更衣室換衫嘅時間,見到件唔係好想見嘅事呀!

當我行到去LOCKER嘅時間,打算囉衫換啦,點知見到一個年約四十嘅中年女性,剛剛由沖涼室走出嚟,佢竟係唔著衫就走過嚟,仲要企係我隔離拎野。嗰時我真係好唔好意思...仲有少少難為情呀!但佢完全冇介意,仲慢慢係個LOCKER拎衫。

真係唔明白D人會咁OPEN,或者可能只係我太怕羞啦~~~我次次換衫都一定要入去最入嗰格換衫,仲要換完用條大毛巾包住自己...

救命呀!要洗眼呀!睇完人地全相,我怕會生眼挑針呀!

2007年3月18日星期日

反轉豬肚...

我終於明白到乜野叫做~~反轉豬肚...就係『嗅嗅』。

平日冇事冇問題嘅時候,日日都笑笑口對住你,同你講笑,同你玩,好似好幫你。但一到出現問題嘅時候,就會同你樣樣計到足,就算係係D雞毛算皮嘢都同你計....真係好唔明點解依個世界上會有D咁嘅人。

真係好唔明白,點解人要係咁,點解成日都要裝著副假面具做人?

日日都係咁,乜唔會覺得辛苦嗎?

其實大家都係D普通人,點解唔可以和平共處。

人生都係短短幾十年,點解唔可以大家開心見成,有嗰句講個句。仲乜成日都要你防我時我防你呀!

2007年3月17日星期六

最後一次的選擇

今日同大肥豬去左婚紗展,我都地一點幾入到場,唔知係唔係仲係早關係...冇乜人,所以都好好行。我地主要目的就係JOIN埋最後一次影結婚相。

其實我都睇過朋友仔影嘅幾間婚紗公司,我都已經打算去 - 羅浮宮,因為真係幾鐘意佢D景呀!所以行完幾間,就入左去同嗰D職員傾吓啦~

係個過程都幾好,同個STAFF都傾得幾好。可能我已經有一輯關係,我覺得可以唔洗要張大油畫同大相簿,所以我都係JOIN左比較平嗰個PAIN。

最後佢就送多一套晚裝、一套男仕禮服、民族服、同埋10張相片連底片。(唔知算唔算多呢?)

即我嗰日有四個造型,大肥豬就有三個,加埋就有30張相片連底片。

我即場已經BOOK埋係五月尾影啦~

好緊張呀!真係要開始減肥,希望係最後一輯影唔到肥豬啦!

 

2007年3月16日星期五

堅持到底

之前話過我已經下定決心減肥,一來為左自己身體可以好D,另一方面當然係為左年尾嘅大事件,可以有最佳狀態啦!

其實我都打算每星期去游水兩次,希望可以有少少成效...不過上排天氣太凍加上唔係太方便,所以就停左成個星期冇做依樣野。

因為依個原因,又俾我諗到多一樣可以自己一個人做同埋我都幾鐘意嘅運動 - 跳繩。

我打算每個星期去游水2日,其餘日子就落屋企樓下公園仔跳繩半個鐘(之後慢慢加至一個鐘,不過要睇吓自己個身體狀況先)。

日日做運動,加上我又戒甜野(盡量啦,因為我都係一隻『為食豬』),希望真係可以有成效啦~

 

我尋晚將依個大計話俾大肥豬聽,點知佢一句:聽住先啦!

真係激死我啦!人地咁大決心,都唔支持吓。

不過為左佢依一句,我一定會堅持到底,做D成績俾佢睇!等佢有個又靚又FIT嘅老婆仔!

2007年3月15日星期四

又試新野

頭先行過7-11,終於俾我試到新出嘅可樂 - COCA COLA COKE ZERO。

佢係標榜無糖、無脂肪、同無加路里.....專俾我地依D減肥人飲呀!

一番到屋企就即刻試飲,個味道都OK,比起原味就淡左少少,唔係太甜。但就冇COKE LIGHT個味就冇咁怪。

可樂~~我都唔係太鐘意飲,飲完之後成肚都係氣,唔係太舒服。不過有時用嚟過吓口引都唔差呀!

但都係一句啦~~汽水無益,小飲為妙!