2007年5月31日星期四

救命~~好熱

救命~好熱呀!

今日學校舉行什麼無冷氣日,真係熱到想死!

全校都唔可以開冷氣,學生都可以話係課室開風扇...冇咁辛苦。但我地office又冇風扇,又只係得個窗仔,風都吹唔到入,就算打開晒門都扯唔到風入嚟,攪到好似好焗。加上今日個天氣又幾悶熱,所以我都真係有少少好似暈暈地呀!好在~~有同事自備左小風扇,佢地都好好,擺好個位等可以吹到我,如果唔係點算呀!

我已經好醒目今日著件薄薄地衫番工,但依家都感覺到個背脊都開始流汗,個身又笠痴痴...總之就係好唔舒服,周身唔自在啦!攪到做野都冇晒心機呀!

今日又要去做會議記錄,仲要放六點,真係有排捱,都唔知點算好啦!

2007年5月29日星期二

心甜嘅感覺

尋晚做完白白豬之後,吹乾個頭...就急不及待開冷氣,跳上張床度做一隻懶訓豬,真係好耐都冇試過咁早訓啦!

正當我好夢正濃嘅時候,我感覺都有人移動我,我咪朦朦朧朧醒左少少(基本上都係唔太清醒)....原來係我個LULU妹想幫我蓋被,佢仲話:冷氣凍呀!要蓋好被呀!小心病呀!

係嗰時因為我真係太倦,完全冇反應,只識繼續訓覺。

但今朝諗番起依件事,覺得真係好SWEET,仲覺得自己好幸福呀!

向羅浮宮出發

尋日去羅浮宮影相,真係可以話好..好...玩呀!

因為前日嘅天氣同埋仲有少少緊張(都唔明白點解仲會緊張,都唔係第一次影結婚呀!),所以訓得都唔係咁好。因為怕對眼會有訓唔醒嘅腫,所以我尋日七點幾就起身。起身第一時間就去睇吓個天氣,好在..都陽光普照。之前就去煮早餐蛋俾自己食,之後又 FULL左個眼凍袋,希望對眼會太腫啦!之後就係地鐵站join埋大肥豬,向羅浮宮出發~

去到時間剛剛好九點鐘,唔洗等太耐就去左二樓準備化妝轉衫。

依個時候我就開始化妝,大肥豬就自己揀禮服。佢揀左一件銀灰色揀禮(原本可以揀白色呀~~不過佢話上次影左好多白色,所以今次唔揀呀!),真係俾佢激死..不過最緊要就係佢鐘意啦!另外仲有一套基本嘅黑色禮服,不過原來依件係唔包背心,最後要我地加$180先可以UPGRADE呀!不過為左靚都要加,依度就係唯一唔開心嘅地方呀!

講番我化妝先,好在BOOK到LING幫我化,我先拎左新天地影過嘅造型俾佢睇,佢就話幫我整過其他款唔好相同。因為我好唔鐘意將D頭髮札起哂(好老嘛!)所以佢幫我整嗰三個造型我都好鐘意呀!一D都唔老,仲好可愛呀!(真係唔知醜,自己讚自己)。LING又好細心幫我化妝,尤其化對眼(因為我大細眼得好緊要),所以對眼真係化左好耐呀!當然化都我好靚啦!我又覺得佢地好好,可以俾好多首飾、頭飾你自己揀(新天地嗰次係佢地安排,冇得揀呀!)

化好晒妝就開始影相啦!

今次幫我地影相係SK,佢未開始影時,就解釋我地聽點影最靚,又問我地最鐘意邊個景..感覺上好接受我地嘅意見呀!首先我地係去影大堂,我最鐘意係大堂影,所以都影左好多呀!影完之後,換衫去影花園啦,開始有D攪鬼動作,又V手勢、又跳躂腳..有一張仲要錫錫呀(嗰時真係好尷尬呀!),總之好多古怪動作啦,但都好好玩,我地仲影得好開心。助手阿清又非常好,一見我個頭紗移位(要姐手臂嘛!),即該幫我整番好呀!不過唔知影出嚟個效果好唔好啦!係臨影完花園之前,SK問我仲有乜想影,我就同佢講我好鐘意個千秋,所以佢又即刻再同我去影多好幾張。

之後換衫影民族,不過今唔係SK幫我地影,另一個攝影師(唔記得乜名,但佢好似係專負責影民族),終於都俾我影到中國衫啦~~(上次都好想影,但大肥豬唔鐘意呀!)不過因為件衫真係好厚,好熱~~所以都冇乜心機影呀!

係我地影完民族衫嘅時間,一上到二樓就見我媽咪呀!原來佢怕我地冇野食,專登買D三文治我地食,真係好感動呀~因為之前佢已經話今次唔會陪我去影相,所以都冇諗過佢會嚟呀!我地就陪媽媽傾左一陣,食飽飽先再影過呀!

換埋最後一件婚紗,去個小園影埋少少外景。佢地又好好呀~上次新天地連外景都唔俾媽咪睇我地影呀~今次阿清見行行吓唔見左我媽咪,就專登去大堂叫我媽咪睇我地影呀!

去到我好鐘意嗰部電單車呀~原本我都只係好小鳥依人伏係度影,後來我叫SK幫我影左張好型嘅動作,(諗起都好好笑呀~~唔知影左會係點呢?)影左一陣,又番去二樓影室內景啦!今次真係超開心,因為終於可以影BEAR BEAR景呀!影埋就依個..終於都影完晒啦!

唔覺已經成6:30,真係快活不知時日過呀!落埋妝換番衫就走啦~媽咪都等埋我地先一齊走呀!

因為真係時時刻刻都有職員係你附近,所以真係唔可以偷影呀!

我約左6月10號睇相,希望影出嚟都OK啦!不過經過上次經驗,真係唔敢抱大太期望,真係好怕希望越大,失望越大呀!平常心啦~不過都好心急呀!

2007年5月28日星期一

我回來了

我番嚟啦~~

託賴各姊妹嘅支持~~我今日終於係一個天朗氣清嘅環境吓影左結婚相啦!我真係好好好開心呀....

今日影相成個過程都好開心呀!

不過,因為尋晚又訓得唔係太好,今朝又勁早起身,所以依家真係好倦。我真係要洗完白白之後訓番餐飽先得呀~~

所以要到聽日先同大家分享今日嘅開心野啦!

大家要等我呀!

 

2007年5月26日星期六

火腿周打魚意粉

今日爸爸媽去左飲,所以我就留左係屋企同大肥豬玩煮飯仔啦!

記得之前係Little Bunny睇到佢整一個簡單意粉,所以我今日就偷師整左依個意大利粉俾大肥豬食啦!

我今之就用左罐頭周打魚湯加少少火腿煮意大利粉,個買相都OK!

大肥豬就話OK,仲俾我八十分呀!不過佢叫我下次最好用忌廉粟米嗰D款,因為佢鐘意飲嗰D多少少呀!

我自己就覺得好似個汁杰就左少少,唔係好係好夠。同埋可能我D意大利粉出水唔夠耐,仲有少少硬身。可能係第一次整,我會吸收今次經驗,等下次煮得好D呀!

2007年5月24日星期四

愛心面膜

為左要以最靚靚嘅態度去影結婚相,我都已經日日係屋企做補濕MASK,真係好勤力呀!

之前同契嫂傾開補濕面膜時,佢叫我用FANCL嗰支充電更生軟膜,佢話依隻都幾溫和,可以日日用又唔會起粒粒,仲話佢細妹係結婚前都係日日FULL依支MASK,到結婚嗰日真係好容易上妝。

雖然契嫂講都咁好,真係令我有少少心動去買呀!不過...最後都冇買到!

因為我之前都有試過用依支面膜,都覺得OK,不過唯一就係好似貴左少少。細細嘅一支用一星期左右,就要成$130,好似唔係好抵呀!

頭先同契嫂食飯,佢竟然送左份小禮物俾我呀~~就係依支補濕面膜呀!

仲叫我依幾晚KEEP住用,要以最佳態度影相呀~~

真係好開心呀!

2007年5月23日星期三

羅浮宮揀衫

今日我去左羅浮宮為下星期影最後一次結婚相揀衫啦,成個過程都好好玩~~係可以用過玩字嚟形容!

原本我係可以揀兩件婚紗同一件晚裝,但我今次就決定揀三件都係婚紗,因為我覺得上次影新天地嗰時都已經影左好多晚裝相,加上結婚嗰晚又會影好多晚裝相,所以一去到就主力揀婚紗啦!

原本打算都揀周麗淇著過嗰幾件,不過...最後一件都冇揀到,可能俾D新款吸引住啦!

我地都揀左成12件婚紗嚟試,好多都係新款呀!試左好幾件都好鐘意,真係有少少心大心細,唔知邊件好呀!不過最攪笑就係最後我決定嘅三件婚紗,有兩件係個STAFF姐姐介紹,可能佢地幫慣左人試衫,可以知道我地D身形有乜衫著出嚟好睇啦!

不過....試完衫之後,我又發覺我對麒麟臂真係~~~好肥呀!都唔知點算好啦,唯有襯仲有幾日時間,希望可以減少少,等影相出嚟可以好少少啦!

 

2007年5月21日星期一

自來雀仔

頭先當我係廁所開始洗面就FACIAL之際,我睇到一D『吱..吱』聲,開頭以為係電視D聲啦,點知隔左一陣LULU妹好大聲叫左一聲『嘩~~有隻雀仔飛左入屋呀!』因為我好驚,所以第一時間關左廁所度門,唔敢出嚟,只係大聲叫出佢地快D捉走佢。

隻雀仔仲飛左入我同LULU妹間房,飛左去LULU妹張床度呀!(好在唔係我張床~~)

依個時候,神勇嘅LULU妹同爸爸一齊捉隻雀仔,佢地都攪左一陣...終於都捉到隻雀仔。爸爸話隻雀仔應該係出世冇幾耐,因為佢D毛仲未出齊呀!

當隻雀仔放番出去窗口時,唔知佢係唔係太驚恐,佢冇即時飛走,仲留左係我地個窗台花盆一陣呀!

係依個時候...安全晒我先肯離開個廁所,出去睇隻雀仔.....(自己真係冇用,LULU妹仲大膽過我!)

原本都想影張相同依個客人留念,不過一拎相機出嚟,佢就飛走左啦!

請不要落雨

點解依幾日不停落雨呀~~真係好唔開心呀!

死啦~~好擔心呀!下星期就去影婚妙相,好驚會落雨.....冇得去影相呀!我又唔想分兩次影,好麻煩呀!依家都要睇吓環境,到24號試衫時同佢地SALES姊姊傾吓,再唔係就要改期~~

但我又唔想....我好辛苦先可以請假,如果有乜問題,我都真係唔知點算好,都唔知再可以BOOK幾時去影。要再請假又唔知得唔得、遲影又怕拎唔切相做DVD,總之好似好多問題.....

不過,仲有一個星期,可能依幾日落晒雨,都時冇問題呢?

唔諗啦~~希望唔好有D乜問題,可以順順利利去影相啦~

容許我自私少少講:
雨落埋今個星期就好啦~~太陽伯伯下星期二一定要出嚟呀!俾我係一個天朗氣清嘅環境影靚靚結婚相呀!

 

完成婚前檢查

今日去完家計會睇我地個驗血報告同見醫生,好在我同大肥豬都健康正常。只係醫生話大肥豬重左少少...醫生冇話我過重,真係開心。

我終於都知道自己係乜血型啦!我就係O型,大肥豬就A型。下次人地問我係乜型時,就唔洗答話K型啦~

但原來我地兩個都對乙型肝炎都冇抗體,醫生話怕到時會對BB有影響,所以就叫我地打抗體針,仲要分三次打。一聽到話對BB唔好,大肥豬就話要一齊打針....真係俾佢激死。

不過我知道佢迫我打針都主要唔係為左第日生BB,佢成日都好怕我身體唔好。雖然我都好怕打針,算啦~~就聽佢話一次咁多啦!

今日就打完第一針,要成$150一次,都幾貴,仲要打三支......不過為左可以預防乙型肝炎同第日BB嘅健康,冇法啦!

 

2007年5月20日星期日

難受

激死我啦~

之前要請一日假,都已經左問右問,個感覺真係唔好太好(PS:我已經係封信寫左個原因!),要我地留番學校假先放...依點我明白,但平日總有一兩日會突發事要請假,洗唔洗要令人難受呀!

都唔知到時我結婚嗰幾日要請假點算...真係好煩!

今日因屋企少少事(PS:我係有講乜事),想請一個鐘頭假,都只係一個鐘頭.....點解都要咁呀~

我唔係有事,我都唔請啦~我自己已經冇晒心情,點解仲要咁呀!平日要我地早返遲走都冇計(係冇得計),真係好唔開心。

雖然最後到俾我早,但個感覺好難受呀~

依家我唯一可以做嘅就係忍..忍...忍!除左依點,真係唔知可以用乜啦!

放心晒

媽咪佢唔舒服左好幾耐,成日都見暈,依排仲無端端瘦左好多,真係好擔心,加上媽咪有時病嘅時候又會收收埋埋,成日有乜唔舒服又唔出聲...所以仲更加擔心。

因為依件事,所以依排心情都真係唔係咁好。雖然都知道應該唔會係D乜大病,但都總係會好擔心....好驚~

幾經辛苦,終於都捉到佢去睇醫生。

剛剛陪完媽咪去睇醫生做檢查(依個就係我要請假一個鐘嘅原因,因為我怕佢會唔出聲,所以跟埋入去見醫生),檢查過冇事,只係一D婦女毛病,只要依時食藥多D休息,就會好番。

聽完醫生講之後,真係成個人都放心晒~~

2007年5月19日星期六

激正嘅SAMMI演唱會

終於睇完SAMMI演唱會啦,只得兩個字形容~~激正!

由唱第一首歌開始,我已經HIGH哂,一邊跟住唱,一邊拍支棒棒,拍到最後嗰PART支棒棒都已經俾我拍到冇晒氣啦!真係都唔知自己做緊乜......超HIGH呀!

成晚個氣氛都真係好好呀~~慢歌有慢歌正,快歌有快歌HIGH....當SAMMI講到佢父母嗰PART時,真係好感動。

不過都有少少失望,就係竟然嘉賓係張敬軒....我個人都佢真係唔係太喜歡佢。不過算啦,嘉賓都係D過場位!但都有個驚喜...係握手後,SAMMI叫左阿嬌上台一齊唱多得他,我個LULU妹真係開心都爆(因為佢好鐘意阿嬌),不過真係估唔到阿嬌又唱得幾好...

最後...唱都差唔多十一點三左右就完場,冇ENCORE。

當D燈開晒時,我地個個都係咁嗌,希望SAMMI再出嚟唱,但最後都等左成十分鐘,SAMMI都係冇出嚟ENCORE,真失望....

真係好想SAMMI快D再開呀...好想再睇呀~

2007年5月18日星期五

期待

一個勁...勁...勁期待嘅SAMMI演唱會,終於今晚可以入場睇啦~~~真係好緊張呀!

係入場前都有好多SAMMI嘅精品賣,有衫、袋、手錶....!不過...我就最想買限量版CD BOX-SET,但要成三百幾蚊,大肥豬一定話貴唔俾我買呀!就算俾買都唔知仲有冇啦~~好似係限量版唔係太多呀~~唯有等六月一日先買平民版啦!

頭先去幾個網站論壇睇過D報導,個個都激讚,話個氣氛好好,依家我不停睇有線娛樂新聞台,希望可以睇D片段先啦!(不過都依家都仲未播,真係激死呀!)

都唔明白都已經唔係第一次睇SAMMI,但總係好心急,成個妹妹仔咁,真係唔知醜呀!....真係越睇越想快D到夜晚入場睇呀!

2007年5月17日星期四

蕃茄炒雞蛋

今日依個餸係我專登要媽咪教我呀!仲係尋日已經叫佢買定材料,今日就要學呀!

因為....依個餸係大肥豬鐘意食嘅餸之一,佢仲話有時簡簡單單嘅餸已經係好好味,唔洗一定要整D高難度菜式。

不過...今日依個餸有少少失敗,就係咸左少少....可能係我落鹽重手左啦!仲有就係炒蕃茄時炒耐左,有少少D蕃茄皮燶左,真係有少少唔開心!

雖然係有少少失敗,但都食得晒,連平日高要求嘅爸爸都用嚟送飯....都有番少少安慰呀!

下次我一定要留意今次失敗原因,整得更加好味!

2007年5月16日星期三

心癮

為左要做個又靚又FIT嘅新娘,基本上已經戒食好多零食....朱古力、糖、薯片、甜野等等.....我都好耐冇食啦!

對於我依隻為食豬都幾辛苦,有時見到人地食,都真係好心思思去食呀~~不過為左靚都要忍啦!

唔知係唔係已經習慣左,依家都唔係太心掛掛去食零食,但唯一一樣野我戒唔到就係 - 檸檬荼(仲要係維他牌)

我都可以話係檸檬荼怪,由三年前開始,我基本上都係每日一包,有時仲兩包呀!但因為大肥豬覺得我飲得太狼死,同埋冇益,所以趁我依家要減肥,就要我戒.....

我最叻嗰次係試過有一個多星期冇飲過,之後....頂唔順偷偷地買一包嚟飲,嗰包真係最好味呀!

依家...我又開始要迫自己唔好飲,都已經好幾日冇飲過,所以檸檬荼癮又嚟啦!

不過我真係要迫自己唔好飲,希望真係可以戒左佢啦!

真係唔知點解,一日唔飲就好似成身唔舒服,依D唔知係唔係叫心癮呢?

 

2007年5月15日星期二

有得睇冇得玩

早前經嘉汶表妹介紹左一個好低嘅手提月費PLAN,仲有一部PCCW手提電話送。我見真係好低,就同大肥豬一齊等今個月之前嗰份合約期到左就轉台啦!

等左好幾日,今日終於都收到部電話啦!

不過...原來部機依家俾人LOCK左,除非你係用PCCW SIN咭。我張咭未生效,所以依家冇得玩呀~~要等聽日拎部機去門市部叫D職員解鎖先得呀!

今晚真係有得睇冇得玩呀~~

婚宴音樂

原來結婚嗰日係需要好多歌仔,好似成長DVD、婚紗相DVD、進場、上乳豬、敬酒同送客,原來都係需要歌仔,所以依排都開始又聽歌又睇歌詞,選定D到時用。好在...我都已經好初步定左幾首歌,等大肥豬聽完再決定用唔用。

除左依D,仲有一D歌係要用嚟席上播,等客人冇咁悶,尤其我唔打算玩GAME,好似好需要喲!

首先多謝小賢介紹左佢個LIST俾我,真係好多好歌呀!所以我剛剛找吓自己D珍藏CD,睇吓再有冇好歌可以加入個LIST度啦!

竟然俾我找到樣好野,就係一隻宮峪駿電影嘅PIANO音樂。

我特然間諗到,有D朋友仔話播純音樂會好D,唔知如果嗰晚播依隻PIANO音樂碟好唔好呢?

如果可以好,我又好想找DISNEY嘅純音樂嗰晚播,因為DISNEY音樂好似浪漫D.....同埋我兩隻婚紗相DVD都已經決定用DISNEY呀!

 

2007年5月13日星期日

唔好玩我啦

死啦~~依排唔知仲乜,由4月尾開始,番面就係咁爆粒粒,依家都仲係咁爆,仲出左幾粒暗瘡呀!

我已經學習唔好俾任何衰野影響心情,又戒盡所有熱氣野,連平日都唔可以飲涼茶(因為我寒地),但為左都已經飲左好幾杯啦!點解仲未好呀!

5月尾就要去最後一次嘅影相啦!好驚D粒粒仲係咁爆,影出嚟D相唔靚呀~~~

依家唯有希望D粒粒唔好再玩我啦!

點算好呀....有冇人可以話我知點解決D粒粒呀!

2007年5月12日星期六

中左三個字呀

今日同媽咪搭車去太古城行街街嘅時候路徑馬會,見今日有六合彩開,咪貪玩開左一條飛啦!

點知頭先對嘅時候,竟然.....俾我中左三個字呀!雖然都係得$20獎金,但都已經超開心啦!因為我真係好..好...好耐冇中過任何獎啦!不論係大大小小嘅抽獎,對我依個超級黑仔王嚟講,都真係一定冇我份。所以今次六合彩中左三個字,已經好叻啦!

希望D好運可以開始跟住我同大肥豬啦!不過~~~最好就多D跟住大肥豬,等佢可以好好地,想嗰樣有嗰樣。

買左唐餅咭


原本諗住係下次EXPO先去買唐餅,點知前日知道今日會奇華有八折,同EXPO一樣折扣,所以就去左大量入貨啦!

原來唐餅咭都有分三種,我今次就買左三十張中價嘅餅咭,媽咪要二十八張嚟派俾親戚,另外有二張係個職員提我地買,佢話到時可以用嚟換龍鳳餅嚟過大禮呀!

我地又買左二張最貴嗰隻,係叫大肥豬到時去換兩盒禮餅嚟過大禮呀!

另外,我今次係門市買餅咭,佢地會送一個禮金盒俾我,好似話係用嚟過大禮放禮金哦(不過我都唔知係乜,只係知係一個紅色長方型紙盒呀!)~~我打算都係到時先拎啦!

唔知D餅咭夠唔夠呢?不過點都好,依家我地又攪好一樣嘢,又放心左少少啦!

 

2007年5月11日星期五

小禮物的煩腦

我都曾經去過一D朋友仔嘅婚宴,見到好多客人都冇將D小禮物拎走,就算係拎番屋企,都係擺一排就會唔要。(我自己都試過,因為有D真係唔太實用呀!)

我覺得好似好浪費左一對新人嘅心思同金錢,所以我一早已經決定唔會送小禮物。(當然大肥豬同我媽咪都好讚成我依個做法,因為我地已經會係帖度俾回禮利事,可以慳番D買小禮物錢去做其他嘢呀!)

但依家好似送小禮物已經成為一個指定動作,如果我唔送,會唔會俾人笑呢?會唔會俾人話我地做唔足呢?會唔會俾人話我地CHEAP,連依D野都冇?

真係好多問題....但諗深一層,就算真係送,總會有D衰嘅親戚朋友左彈加彈,一定有唔滿意。

我真係15/16,正所謂送又煩,唔送又煩....都唔知點好啦!

不過我都係應該唔送多啦~~點解我要因為就佢地而改變自己初衷呢?

 

2007年5月10日星期四

奇華母親節八折

頭先上網睇到話奇華係5月13日(星期日)母親節當日,

全線奇華餅店所有餅咭8折優惠,好似EXPO都係一樣做8折呀!

咁未好抵哦~~

我已經打算星期日去買啦!未買唐餅嘅姊妹可以去入貨啦!

改日子過大禮

過大禮日子其實都煩左我好耐,不過依個日子係我媽咪個朋友幫佢攪(佢都可以話係做擇日嗰行)。佢幫我選左係11月21日過大禮。

當我知道過大禮後唔夠一個星期就結婚,我已經話根本就係派唔切帖,想選過第二日。但可能係朋友關係,佢唔想再煩去幫我再選過另外一日呀!(我係有依足個金額俾利是呀)

之後同媽咪傾開,佢話唔介意我地自己睇通勝選個好日提前派帖,但照用番11月21日過大禮。因為我地都有睇通勝睇過佢幫我選結婚同過大禮嗰日,真係好日。

我當然唔想啦~~因為好多人都話一定要過左大禮先可以派帖,吉利D嘛!不過除左依個辦法,都冇其他啦.....

不過....事情係兩日前又有新轉機啦!

因為前兩日,媽咪陪契大佬去一間廟宇探一位師傅,佢地傾開結婚問題。就叫我媽咪最好跟番傳統,過左大禮先派帖。佢仲即場幫我再選個另外一個日子。

經我同大肥豬傾過之後,我地都決定跟嗰位廟宇師傅個日子過大禮,嗰日就係11月11日,仲要係星期日,真係開心晒。又可以跟番傳統做,又可以有多D人幫手,同埋又唔洗煩請假呀!(因為我請假真係好麻煩呀!)

 

2007年5月9日星期三

我都有花收

頭先放工行去搭地鐵時,見到好多媽咪級嘅女性都有一支假嘅康乃馨花收。當行到去某屋苑門口,就見到一個政黨嘅成員係度擺攤位,送康乃馨俾行過嘅女性,慶祝母親節。

我都冇為意,咪照行唔理佢地啦!點知...當我行過個攤位時,嗰個議員就遞左一支花俾我,係嗰個時候我當然接左,唔接好似冇乜禮貌嘛!

嘩~~點解會俾我呀!唔通我個LOOK似阿媽.....

算啦!當佢地係做宣傳係人都派啦,又或者叫我返屋企送俾媽咪啦!

不過又真係幾攪笑。

我依家打算將依支花留番嚟試整簽名筆,如果成功就先買D靚靚花花嚟整!(不過...真係成功先算啦!)

2007年5月8日星期二

黑仔王又嚟啦

今日再一次證明我係超級黑仔王啦!

我地依間新校舍已經運作左都有一年多,上年十一月係我第一次困LIFT,估唔到半年後嘅今日,我又再一次經歷依個情況。上次都好,有個老師陪吓,今次仲要係得我一個人,真係好驚呀!

當部lift停左係度嘅時候,我真係好驚,好驚一個人嘅感覺。個一剎,我個腦都真係一片空白,乜都唔知,只係不停按個警鐘。不過好在好快就有同事應我,都定左少少,不過都係好驚。

等左約3分鐘左右,部lift又無端端行番,仲落左地下,我一見度門打開,就即刻衝出去,企左係度行唔到,因為對手同腳都麻痺晒.....等左一陣,慢慢就行番入office。

坐左一陣,成個人定番再開始做嘢啦!

點知...部lift放左我出嚟嘅時候,部lift又正常番。D師傅嚟check,又話冇問題。

真係唔到你唔信,成間學校都只有我困過兩次lift,真係黑呀.....依家真係好怕再搭lift啦!

終於有新菜式

今日又有新嘢學啦!

大家睇吓我依個煙肉炒椰菜,煮得叻唔叻呢?

都真係難過上次嗰D,因為又要落多D油,我都唔小心中左招,隻手彈到~~~好痛呀!

之後又要炒煙肉,又唔可以太熟,因為遲D要再同D椰菜炒,怕太熟會唔好味。真係要睇得好準,不過好在有媽咪提水,我先可以煮得OK。

到最後炒椰菜,因為太多菜...又要不停炒佢....,真係炒到手軟呀!

原來煮餸真係唔容易,真係有排學呀!

2007年5月7日星期一

都係整唔到

我成日都好想係婚宴嗰晚整三個DVD播:一隻係係成長DVD,依隻一定要整啦!另外兩隻係我嗰兩輯婚紗相嘅DVD,因為我唔打算放D相簿出嚟俾人睇,所以想係入席前,輪流播晒我地D靚靚婚紗相。

個問題就嚟啦~~因為我酒樓同攝影公司分別包我一隻DVD,即我自己要另外整一隻呀!

之前問過同事,可以用VideoStudio 10這個程式做,我亦曾經試過整,可以話算識,但真係好簡單嗰隻。

我依兩日都好俾心機再慢慢美化佢,不過...真係好唔得呀,完全都唔似人地整嗰D咁靚。整極都整唔到,真係有D想放棄呀!媽咪已經叫我唔好再自己整,叫我拎去俾人整呀!

我依家都唔知點好啦!又好想自己整,一嚟可以有感情D,二嚟又可以慳番少少。但我整到咁簡陋,到時真係會俾人笑呀!

有冇朋友仔可以幫吓我,或者有冇其他SOFTWARE可以容易D整,唔該教吓我呀!

再唔係,知唔知邊度有得整,不過要又平又靚又正呀!

2007年5月6日星期日

收到飛啦~

收到啦~~終於都收到SAMMI演唱會飛啦!

由打電話訂飛嗰日開始就已經好期待,好想快D收到,希望可以坐前D。

今日一開信箱就已經睇到封信,我就好心急咁係等LIFT時候拆開嚟睇。我地坐$200飛嘅第25行,唔知算唔算前呢?不過都唔緊要啦,最重要就係可以入場睇SAMMI!

學人煲薏米水

依幾日睇到網站有介紹整檸檬薏米水,話可以美白同去濕兼健脾,仲話可以廋身。我見好似好吸引,所以就貪得意買D料嚟煲啦!

真係好抵,成份材料都係買左八蚊!

剛剛煲好,飲左一細杯,都OK幾好飲。依家雪凍一大支,留番聽日再飲!

因為凍飲仲好味呀!

2007年5月5日星期六

想當年嘅相片

因為今日媽咪係佢個床下低換季,所以我可以趁依個機會拎D細細個嘅相出嚟,睇吓有乜相識合做成長DVD嘅相嘛!(因為我地D相都係放晒係佢個床下低)

原來我地真係好多相,不過最多嘅就係我個LULU妹,佢有成3大本相簿呀,可能佢係最細,個個都成日同佢影相。

我自己啦~~我成日以為自己好多相,點知原來都唔係好多。因為媽咪話我細個時影相係一件好貴嘅嘢,同埋嗰時係興影幻燈片,所以就算影都係影幻燈片相,所以相紙就比較少啦!

我地一路睇相,媽咪就一路講依張幾時影、依張又係邊度影、相中個BB係邊個(因為我同細路個BB樣真係好似呀),真係好開心,諗番起好多細個嘅嘢呀!

依張相我係其中一張最鐘意嘅相,係唔係好CUTE呢?原來依張相個頭髮陰係我有份自己剪呀!係唔係好有大師級技巧呢?

媽咪話依張相我嗰時趁佢掃緊地嘅時間,自己拎把較剪剪左一大半,我仲好叻冇剪親手呀!不過剪完之後就俾媽咪罵同佢埋我執番少少手尾呀!

雖然係咁,我都有找左成三十幾張細個相出嚟,到時等埋大肥豬一齊睇先再決定用邊幾張啦!

不過亦都有一個難題就係....大肥豬因為佢屋企係好似唔興影相,所以佢好似有冇細細個嘅相。到時真係唔知點好啦,或者我地放少D細個相啦!

2007年5月4日星期五

又嚟買新香水

剛剛我路經莎莎嘅時候,俾我見到ANNA SUI又有新香水出啦!

今次支香水又係以Dolly Girl做主,名為巴黎戀愛。紫色洋娃娃樽,好CUTE呀。佢個味都好清花香味,真係好正呀!作為一個ANNA SUI香水嘅忠實FANS,我當然唔理三七二十一就買左一支啦!

雖然我屋企D香水真係未用晒(因為我已經買齊佢之前所有款式),但又真係忍唔到手唔買呀!

大家睇吓我嘅新全家幅,係唔係好似有少少敗家呢?(成日話要慳,但又買買咁多香水未搽晒!)

ANNA SUI嘅香水樽真係支支都好靚,唔知點解佢近依一兩年個樽都係差唔多,只係改吓個顏色同公仔,真係想佢出多D唔同款啦!不過到時又到我銀包大出血啦!

點解咁多人

今日陪媽咪出銅鑼灣拎部 DV去整。我記得大約一年前都拎過部DV去時代廣場整,我今次未又再去嗰度整啦,點知去到先知道原來間公司搬左,攪左都成半個鐘,又打電話又問人,先知原來佢地搬左去對面大廈。

都好到最後都拎到去整...依家要等一個星期先知部機乜事。不過原來我地過左保養期,要俾$250 CHECK機費,到維修師傳睇完之後再報價睇吓維修零件費幾多。我覺得好似唔係太值,不過媽咪話睇吓先,如果太貴先唔整,費時浪費就機哦!

唔知係唔仲係5.1勞動節假期關係,成條街都迫滿晒人。入去店舖嘢,你周圍都係人,仲要係個個都係操流利嘅普通話,真係有少少覺得好似係自己返左內地呀!係依個情況吓我都冇乜心機再行啦!

見佢地好多個都係一袋袋咁拎,都好可以振興香港經濟嘛!

2007年5月3日星期四

『超』衛生嘅7-11

今日冇帶飯,所以要去商場食LUNCH。當我食完飯再去7-11增值嘅時候,竟然見到一個奇景。

話說我一入到去7-11嘅時候,已經聽到好嘈嘅BB聲,開頭都冇為意係乜事。

等左一陣,見到一個小朋友(我估佢讀緊幼稚園),手拎一個公仔玩具糖(可以吹出BB聲,又有糖食嘅玩具),一邊吹同時又四周走,完全冇大人睇住佢。由於太嘈,所以好多人都好留意佢(包括我啦)。

可能我地個個都望住佢關係,有一個7-11職員出嚟同個小朋友講:衰仔,唔好玩啦,放番低啦!

之後佢竟然將個玩具好順手地放番係陳列品位置,仲完全冇清潔過,尤其係吹出嘅位置,嗰小朋友吹過一定好多口水啦,但佢完全冇抺過...真係好唔衛生呀!

因為時間關係,我睇唔到事件嘅結尾,唔知個小朋友係唔係個職員嘅親戚。

但佢嘅行徑真係唔係好得,點可以將其他人玩過嘅嘢,完全唔清潔就擺番出嚟買呀!

我覺得真係好誇張,攪到我都有少少怕去依間買嘢呀!

 

2007年5月2日星期三

今晚又嚟學炒菜

上星期心情唔係幾好,所以都冇心機跟媽咪學煮餸。

唔知仲乜今日條煮餸引起左,所以就入左廚房叫媽咪俾一樣餸我煮啦!由於今晚都係得蒸排骨同炒通菜,所以媽咪只係我炒嗰個通菜。

我原本都唔係咁想,因為上次都已經炒過菜,想學第二樣。不過媽咪話今晚冇乜餸,怕我有D乜差錯,大家都冇餸食呀!(對我都冇信心!)媽咪仲話,炒菜係基本功,同埋都有好多炒法,叫我慢慢學呀!今次我都係一手一腳去抄菜,好在都冇炒黃晒,仲幾好味呀!

原本想學用腐乳炒呀,因為我鐘意食嘛!不過.....因為我地用開嘅廖孖記腐乳用晒,所以唯有改用蒜茸炒啦!

原來由蒜頭切成為蒜茸都真係唔簡單,我整嗰時真係好怕切頭手指呀!

2007年5月1日星期二

又有新野用


今日食完飯陪媽咪去吉之島買嘢,原本都冇諗住買嘢,不過行到SOFINA,見到小花豬推介嘅超級防晒,咪入去睇吓啦!

當我試上手嘅時候,真係幾好,唔笠都幾爽,最好就係可以當埋DAY CREAM用,仲有50度防晒。對於一個早上超趕時間嘅我,真係幾慳時間,仲可以一舉兩得。我見依家用緊嗰支都差唔多用晒,加上又唔係咁貴(只係$250),所以就買左嚟試啦!另外我又買左佢嗰支洗面CREAM,我剛剛用完,都幾好用呀!

試多幾日睇吓個效果,如果OK我都打算轉吓依間。因為我依家用緊都係冬天嗰時買,夏天用好似笠左少少,同埋以日本牌子嚟講又真係唔係咁貴!