2007年7月29日星期日

等待放假的日子

好多朋友仔知道我係學校入面做嘅時候,都會好羨慕我,可以我都有一個悠長假期。但佢地又點會知道,作為一個小小嘅書記係冇暑假放呀~~日日都要返工呀~都幾慘呀!

唔覺學生已經開始放假一星期有多啦~~唔知點解,當有學生返學時,有時會覺得佢地都幾煩(當然成日入嚟校務處嗰D係『好』學生),成日都要幫佢地解決問題。但依排冇學生嘅時候,又會覺得都幾悶,好似時間過得好慢呀....依D都唔知係乜心態呀!

我自己呢?因為我八月中先開始放我今年嘅大假,當我一返番工嘅時候,我就會開始忙番(因為老師都要返工,我可能又要忙做會議記錄),所以係依排我都要執好晒來年嘅學生資料,準備晒所有新學年嘅文件,因為怕放完假冇時間整呀!

不過唔知係唔係好怕到時有MISS,我係上個星期好似開左摩打咁,所以攪到我依家手頭上嘅野都做得九九十十啦!係仲有少少手尾等老師番嚟先可以再做呀....

早知之前就唔開摩打,留番D野依排做啦~~

依家我個心情就真係......等~等~~等~~~要等多兩個星期左右先放假呀!

 

2007年7月28日星期六

一品窩晚餐

今日屋企又冇晒人,所以又係我玩煮飯仔嘅時候啦!

一早就問左大肥豬睇吓佢想食乜,點知佢竟然話食『一品窩』,仲話大熱天時唔好煮咁多野食,食小小麵就得啦!(一品窩....即係一煲過煮熟D麵同餸。)

雖然係一個好簡易嘅晚餐,但原來去買餸都幾難呀!因為買得多又怕食唔晒,買得少又怕唔夠食....都幾傷腦筋呀!我係個街市行嚟行去,都大大話話行左五次先決定到買乜餸呀!

依個就係我地今晚嘅晚餐,係唔係都OK呢?

好在...大肥豬都對依餐晚餐滿意,仲話食得飽飽,咁都安心D,因為我一路煮都覺得唔夠食呀~~

不過...佢就話碟韮菜花好硬,所以麻麻地。當我話可能係韮菜花老啦~佢就話我唔識買餸,叫我要學埋依樣野,聽完之後..真係唔知好嬲定好笑啦!

食完之後,大肥豬話批准我到時可以俾我一星期煮一次『一品窩』,真係唔知應該開心定激死啦!

2007年7月27日星期五

再次約會小賢

今日又再約左小賢食LUNCH,首先真係有少少唔好意思呀! 因為我每個月有兩天係要食素,剛好今日就係其中一日,所以我都諗左好耐去邊度食呀!終於我都決定去仙蹟岩(我可以食吐司嘛!),好在小賢都唔介意,咁我都放心晒!

我地係成個LUNCH入面,我地真係可以話未停過口,總係有好多話題傾唔完,真係.....傾到連過左LUNCH TIME都唔(因為我仲要番工呀~~好慘! ),如果唔係小賢幫我睇住個時間,我自己都唔知已經遲左啦! 我地走嗰時都仲有好多野未傾完呀~

今日真係好開心呀!除左我地傾得好開心之外,小賢仲送左兩扎玫瑰絲花俾我,等我下星期去整簽名筆用呀~花花真係好靚呀! 多謝晒~

不過~~有一樣失敗嘅樣呀~就係我地掛住傾啦,傾到過左時間啦~所以....我地又唔記得左影相呀!真係...我地下次再去街街第一時間要影左相先,影完相先好傾呀!

講真~~雖然係第二次見小賢,同佢相識都唔係話耐,但唔知點解已經有一種好親切、好似識左好耐嘅感覺。我覺得我地真係好有緣份,我一定會好好珍惜我地嘅友誼呀!

 

2007年7月26日星期四

等等等

今晚大肥豬約左班朋友去睇電影,仲要睇十點場呀~(真係過份呀...睇咁夜,不過佢話買唔到早D飛哦~)

我冇跟埋去呀,一嚟我唔鐘意睇西片,二嚟佢地成班男人去,有個女人係度,好似唔係好方便呀!(哈哈~~真係一個體貼女朋友啦!)

係入場前,大肥豬話怕睇到好夜,已經叫我唔好等佢電話,我早D訓...仲話佢唔會周圍去,睇完戲就番屋企。

不過,我都係堅持要佢一番到屋企打俾我,我先去訓。

我唔係唔信任佢,我等佢...只係要知道佢已經平平安安,開開心心咁番到屋企,冇任何事啦~~~咁先會好安心去訓嘛!

如果叫我依家就走去訓,我諗我一定訓唔著呀!因為會諗點解咁耐都未返,會唔會有冇危險.....好多好多唔好嘅野,真係會好驚呀!

依D係唔係做人師奶仔嘅心態呢?依家真係覺得自己有少少似望夫石呀!    (大家唔準笑我呀!)

2007年7月25日星期三

不知所謂的人

心情真係好..好...好DOWN,點解會有D咁嘅人!

一個識左十幾年嘅朋友,從來都冇做過入任何野得罪過佢,以一個真心真意嘅對待佢,可以話真係隨傳隨到,有事都會去盡心盡力去幫手,總之一有需要都會幫手。

但換來嚟,可以將你D野四周圍講,仲要加鹽加酷...仲要將你D野打橫嚟講,明明唔係..都老作到你係。仲要話親都冇句好,把口都唔知點解要咁臭,總之係你身邊嘅所有人,都用一D好難聽嘅說話嚟唱你......笑你...話你。平時見佢對佢父母都唔好,總之佢做乜都係佢最好,有問題嘅都係你地。

不過..點解佢自己唔會反醒吓呀!一個話你就係人地問題,但個個人都係咁嘅時候,係唔係應該自己檢討吓呢....

真係好唔明白依個世界上點解會有D咁不知所謂的人,點解會有D咁黑人憎嘅人呀!

我知為左依D無賴嬲,真係好唔值,但我條氣真係好頂,點解會咁呀!

依家真係見佢前面,憎佢後面!

講真...真係日久見人心,初初識嘅時候,都冇乜特別.....但人總會為名利所影響,令人係會變質呀!

2007年7月24日星期二

西蘭花炒魚鬆

依排成日都掛住整蛋糕仔同桂花糕,好似好耐都冇煮餸啦,所以今日又入左廚房攪攪震啦!

今日學就係.....西蘭花炒魚鬆

原來整依個係唔難,係要煎D魚餅有少少問題,唔係煮嘅問題,係好怕D油彈到手呀!係開始煮D油時,聽到D油『沙沙聲』又見D油彈彈吓,真係幾驚呀~有少少唔想煮嘅感覺呀!

我真係要慢慢克服依個心理關口先得,如果唔係都唔知點煎野食呀~~

上次已經煮過西蘭花,點解今日又係.....因為我係好鐘意食西蘭花,次次出街食飯我都一定會ORDER,所以學多D煮西蘭花方法,到時可以有多D唔同選擇,唔洗食到悶呀!

2007年7月23日星期一

想當年...滿月

頭先陪媽咪去買餸時,冇端端講起金價...再講講吓,又唔知點解講到我地滿月嘅野。

原來我係滿月嘅時候都有手鏈同頸鏈收過,不過已經冇晒印象啦!(連我自己都唔知有件咁嘅事呀!)

我地仲越講越開心,所以一返到屋企就收媽咪拎出嚟俾我睇吓啦!

依幾件就係我滿月時嘅禮物啦~~

今日真係第一次見到依幾件禮物呀!

媽咪話怕我細個會唔見,所以一直都唔俾我地拎嚟戴,因為太貴重同有意義嘛!到我地大個,佢又話已冇機會拎出嚟俾我地睇,所以都真係冇見過呀~~(可能細個時有見過,不過已經冇晒記憶啦!)

媽咪話唔會依家俾番我,但話我怕我唔見,要等我第日生BB之後,親手戴落佢孫仔身上,咁就有一代傳一代個意思。

真係俾佢激死又笑死呀!

2007年7月22日星期日

我都有禮物收

今日一返到工就有份神秘禮物收,仲包得好靚靚,真係好開心呀!

哈哈...一打開,原來係一本關係結婚嘅書仔呀!

依本書仔係糖糖送俾我呀~~尋日糖糖去左會展書展,佢話見到依本書關係結婚,所以就買嚟俾我啦!

我已經係LUNCH開始煲本書啦~~又真係幾多野睇哦,有好多去HONEY MOON嘅浪漫地方推介,有好多婚禮提示,最好就係入面有接新娘同酒樓時好多玩新人同集體嘅遊戲,等我可以參考吓嘛!(不過我都係冇依D環節啦)

有禮物收當然係一件好開心嘅事,不過最開心係知道你有個朋友係行行街時,都有掛住我D野,個感覺真係好難形容,依份心意係好難得,真係有少少感動呀!

2007年7月21日星期六

又嚟桂花糕

因為尋日買左咁多整桂花糕嘅材料,所以今日就又嚟整桂花糕啦!

我今次用埋桂花嚟煲水,所以成舊糕都好有桂花嘅香味。加上唔知係唔係新買嘅桂花糖比上次買嗰係濃D同杰D,所以整體上都幾好味。

原本依碟糕係打算整嚟做飯後甜品,點知整好後試吓個味嗰時,佢地就唔洗15分鐘食晒成碟~~真係勁呀!但見佢地個個都食得好開心,又話好好食,連爸爸都話我有進步呀~~真開心呀!

不過....我有一個問題呀!

個糕食落去個口感有少少似啫喱糖,同酒樓嗰D唔同呀~~唔知係乜問題呢?會唔會係魚膠粉問題啦?

希望有整個嘅朋友仔可以教吓我呀!

 

我都有一張

今日終於都收到一張新嘅拾蚊紙啦!

一拎起上手真係.....感覺好膠呀,一D都唔係錢紙,有少少似大富翁入面D玩具。同埋又真係冇乜特別,最特別都係有一個透明嘅小圓圈。

話說新拾蚊紙都出左好幾個星期,係我仲未擁有嘅時候,又真係幾期待,因為D報紙講到好似好特別。嗰時都有曾經諗過唱D嚟做回禮利是,好似UP-DATE少少嘛!

不過...就俾媽咪反對左啦!因為佢話『膠膠聲』唔好聽,仲有就係到年尾嘅時間,已經個個人都有,唔新鮮啦!

但最大原因都係~~~媽咪已經叫左人幫我唱左一疊直版拾蚊紙留番到時用啦!

2007年7月20日星期五

上環半天遊

今日陪媽咪去上環一間寺廟祈福,媽咪就幫我細佬求事業。作為一個小小迷信嘅小肥豬,當然都有幫大肥豬求埋事業啦!原本都想問我自己野呀~~不過每人都只可以求問一樣野,所以我就冇得問自己啦!算啦..大肥豬好就得啦!下次有機會先求自己野啦!

我地完成左之後,見仲有時間,就去海味街行吓街街啦~~

當我地行過一間茶葉鋪時,媽咪就入去八卦吓啦!係依個時候,我就見到佢地有桂花買哦,我就即刻打算買啦,因為可以係整桂花糕時用嚟煲桂花水,咁個糕就真係完全係桂花味啦!

跟住我地就行吓海味街啦~~當媽咪睇緊海味嘅時候,我就見到隔離有間南貨鋪,於是我就入去問吓有冇桂花糖買啦,點知係冇...真係有d唔開心呀!因為見blog友仔話南貨鋪會有嘛!

不過..我都冇放棄,一邊行就一邊見有雜貨店就入去問....終於都俾我買到啦~~真係開心呀!(都真係要多謝LULU妹呀~因為依間鋪真係好細間,唔講都唔知係雜貨店,係佢話我知我先見到呀。)

今次樽桂花糖比我上次買多好多同香好多呀~~我聽日又可以開工整好味嘅桂花糖啦!

依D就係我今日嘅戰利品啦~~
(我仲買多左兩份送俾我好好嘅同事,因為佢地都話想整呀~)

今日真係收獲豐富,仲俾媽咪笑我整野食整上癮,可以冇端端行街都諗住買材料呀!

2007年7月19日星期四

菊花桂花糕

前幾日終於都俾我買到桂花糖啦~~所以就急不及待係尋日買埋其他材料整桂花糕啦!

原本個食譜係用普通水,不過媽咪就建議用菊花水,等可以個味濃D,同埋菊花可以清熱氣呀。媽咪又話改用冰糖,可以健康D呀!

依個甜品整法真係好簡單,我同媽咪係廚房整左唔洗15分鐘就得啦~~佢雪得好好快(我諗雪左一小時左右啦),係臨訓嘅時候已經食得啦!

依個就係我個靚靚製成品啦~~睇吓幾靚!

不過唔知點解D桂花沈晒係底,我見其他朋友仔整嗰D桂花係中間都有呀~唔知佢地點整呢?唔該教教我呀!

因為怕肥(食宵夜好易肥呀!),所以就食左少少。不過成碟桂花糕唔洗半個鐘就食晒啦~~因為爸爸不停係度食...真係攪笑呀!

又真係幾好味哦~有好香嘅菊花味,不過就淡左少少,同埋唔係好夠桂花味。

我諗下次整要再加多少少冰糖同桂花糖先得,下次一定仲好味!

 

2007年7月18日星期三

你今日扭左未

係上個星期麥當當又有新玩意推出,但我嘅最愛就今日先開始換。

原本都打算唔去換呀,因為上星期去過麥當當睇過成套公仔,覺得今次隻玉桂狗好似唔係咁靚,有少少唔似樣呀!

不過...唔知係唔係整定呢?我今日LUNCH冇帶都愛心飯盒,當我仲諗緊去邊度食LUNCH時,個腦突然間閃出想去麥當當,之後再發現今日開始有玉桂狗換哦....(之前真係完全唔記得左有公仔換呀!)

就係咁...我個LUNCH就去左麥當當,食左個兒童餐....加$10換左啦!

哈哈~~諗番起都覺得神奇呀!我為左要靚靚,都戒左食麥當當好耐啦....今日又會冇端端想食。

可能隻玉桂狗好想我帶佢返屋企,所以用念力叫我去換左番嚟呀!

下定決心整個表

成日都唔知自己有乜未做,好多野都好似已經攪好,但又好似好多野未攪,都好傷腦筋呀!

今日終於都的起心肝開始整依個WEDDING LIST啦!

其實之前都參考左好多朋友仔嘅WEDDING LIST,各有不同啦~不過個個都好詳細,攪到我都要做番一個咁上吓嘅LIST,起碼自己同姊妹們都明白我想做乜呀!

原來整SET依D野都真係幾煩,又要諗應該要做乜,有乜我未做,冇乜係要幾時前要做好....真係諗到我頭都痛埋,都幾經辛苦(不過依D辛苦都值得呀!),終於SET左個初步LIST提自己有乜未做,真係做到嘔心瀝血呀!

做左成日,都只係做左個表嘅第一部分(即預備表),真係~~仲有排整呀!睇睇吓,我仲有好多野未整呀,真係要繼續努力先得啦!

之後,真係要多謝車車呀!佢同我傾左成晚MSN,又幫我諗左好多大日子嗰日會遇到嘅問題,仲幫我SET-UP左個初步嘅RUNDOWN呀!

原來結婚真係一個大PROJECT呀!整左成晚,都好似係整左好少野,真係有排攪呀!

 

PS:
車車~~真係好多謝你呀!俾我煩左你成晚,希望冇因為我攪到你唔方便啦!你真係幫左我好多呀!

 

2007年7月17日星期二

兩大袋蛋糕仔

今日又整蛋糕仔啦~~哈哈!真係整極都唔厭!

首先就係今日買左好多材料啦,又有條癮出左呢,加上之前應承左整D番工俾同事食....所以頭先食完飯就即刻開工,焗~~焗~~焗~~啦!

終於都焗左兩大袋呀!

今次我係整朱古力味,可能經過兩次經驗,今次真係好好味,有好香嘅朱古力味,又好鬆軟哦,連爸爸都讚話好味呀!真係開心啦~

不過唔知點,今次個蛋糕面都係爆開左呀!我已經用細左火嚟焗,都唔明白點解...算啦~~唔理佢個外表啦,好食就得啦!(希望同事們唔好介意啦!)

我見整出嚟唔係太多,原本打算整多盆咖啡味,不過因為時間問題,真係整唔切呀~~所以只拎所有朱古力味俾各位同事試食先啦,下次再整其他味俾佢地食啦!(連LULU妹想找番工食都冇呀!)

其實整左咁多次,我都唔係食左好多粒(加埋都唔知有冇五粒)。因為我好鐘意其他人食你嘅製成品,而且又食得好滿足嘅樣呀!

依家真係越來越鐘意整蛋糕呀! 

好運開始嚟

因為尋日要陪媽咪去睇醫生關係,所以就冇去學校飯局,不過知道有抽獎活動,所以就托同事幫我抽啦!

真係好開心呀~~竟然抽到$500,真係未試過抽到咁多錢呀!

我記得次次有抽獎活動,我都係黑仔王,抽親都係最底面值。但今次冇去就可以抽到最高面額,真係開心到飛起呀~~仲俾媽咪笑叫我唔好再去飯局,一唔去就有好野抽到呀!

有種感覺就係~~~我D運開始嚟啦!(當然我又要十分十分感謝我同事幫我抽到啦!)

希望真係開始可以脫離黑仔王嘅日子,多D好運嚟找我啦!不過最好就係去多D大肥豬度,等佢可以快D如願意賞~~

2007年7月16日星期一

又買野啦

原本今日學校夜晚有飯局,不過因為我要陪媽咪去覆埋,所以就冇去啦~~冇法啦!乜野都好,媽咪係最緊要呀,飯局可以等下年嘛!

所以今日一放工就即刻趕出銅鑼灣,好在都趕到見醫生!醫生話媽咪已經好左好多,食埋每次藥就應該冇晒事,唔洗再覆診啦,都放心左一半啦!(另一半就係佢隻腳趾...仲未好番晒,行路都仲痛,要等慢慢埋口。但媽咪仲成日都行嚟行去,真係激死!)

睇完醫生之後,就發現原來係大廈入面,有一間買整蛋糕嘅材料鋪頭,所以我地就入去入吓啦!

嘩~~真係好多野買呀,又唔係貴哦!我都唔執輸,入左好多貨呀!
真係好多野買,我連桂花糖都買左呀~~今次可以桂花糕啦!

有個奇景就係,今次媽咪竟然唔阻止我買依D材料,仲一邊同我睇,一邊鼓勵我買呀!可能佢知道我今次唔係講玩,真係好想整蛋糕呀!所以我一定會努力呀!(原來真係會上癮呀!)

其實我仲有好多野想買,不過..等我成功左一樣野先再學整另一樣,慢慢嚟嘛!加上個地方又近,鐘意幾時上去買都得啦!

之後我去左銅鑼廣場買JENNY BAKERY嘅曲奇啦!因為我見個個BLOG友都話好正,所以都去買呀!

佢地真係好好生意呀~~我想買盒大都冇晒,為有買盒細試吓啦!

不過我都覺得幾貴,細細盒都要成$50。不過如果好食都值呀~~加上個靚盒仔。

睇吓,佢地盒仔真係好得意呀~~不過因為剛食飽飽,聽日先食啦!

今日主要都係陪媽媽覆診,一D都冇諗過會買野,但最後竟然俾我買左咁多樣野~~~

真係...自己都覺得利害呀!

2007年7月15日星期日

飯氣攻心

今日食完LUNCH冇耐,就要去幫老師做會議記錄,係開始嘅時候都冇乜特別,一路都有好多野要寫低,始終今次依個科目都係我第一次做,都要打醒十二分精神。

點知當老師佢地開始討論問題嗰時,可能人數又唔係好多,所以成日都『DEATH AIR』,攪到個場面又好靜局,於是我就係度坐吓. 坐吓..咁,加上又剛剛食完LUNCH,所以就越來越眼訓,但又要死頂,因為又要寫低D POINT,都真係幾辛苦呀!

開完會先發覺自己有部分資料都唔知寫乜,今次都唔知點死好啦!

好在嗰位老師都好人,俾左佢份NOTE我參考,都可以幫都唔少忙,如果唔係都唔知點嘔份野出嚟呀!

原來飯氣攻心個威力都真係幾勁呀!所以都真係幾怕食完LUNCH後做重要事呀!

2007年7月14日星期六

又嚟蛋糕仔

經過上次整小蛋糕嘅成功,所以攪到我整蛋糕癮又嚟啦~~所以今日就又嚟整蛋糕仔啦!

因為大肥豬鐘意飲咖啡,所以我就係今次就加埋咖啡粉,諗住整咖啡味蛋糕仔俾佢食啦~~

真係黑仔呀~~當我開始動工時候,先發現我D麵粉同牛油都唔夠,都係差少少,我自己又唔整預份量哦,所以就又要落街買材料,跟番材料去做安全D呀!

哈哈~~咖啡味蛋糕仔終於出爐啦!

不過唔知係唔係得少咖啡粉,第一次焗時完全冇咖啡味(食譜指用一茶匙就得呀),所以我又加左成大半包入去再焗,之後就OK少少啦~~有番少少咖啡味!

於是就繼續焗...繼續焗...終於又焗左四轉呀,又整左好多出嚟啦~~

但唔知係乜問題,佢地粒粒都做左『爆裂刑警』,爆開晒,都唔靚~~

雖然味道係OK,但見都到真係有少少失敗感呀~~不過我係唔會放棄,一定會再繼續整呀!

原本打算將依D蛋糕仔拎番去俾同事食呀,不過見到咁嘅賣相.....都係唔好獻醜啦!

究竟係乜問題呢?點解佢地會爆開晒呢?會唔會係我落發粉重手左,定係我打蛋時打得太耐呢?唔該各位高手教吓我呀!

 

2007年7月13日星期五

可愛襟花

頭先係其他朋友仔個BLOG見到,真係覺得好CUTE呀~~原來佢都係ESD睇到,所以我又上睇八吓啦!

我見到嗰時真係覺得好得意,有別於一般嘅手花同襟花,好特別呀!如果D兄弟姊妹係晚宴上用,一定好靚呀~~

唔知可唔可以自己整呢?睇就好似都唔難,不過對於一個完全唔識做手工藝嘅人嚟講,一家唔得啦!(如果得就好啦~~我可以自己用玉桂狗公仔呀!)

唔知有冇BLOG友識整。可唔可以教吓我呀~

不過~~媽咪已經叫我放棄啦,佢話如果唔貴就買算啦,唔好自己整,又唔靚又麻煩!

算啦~~如果唔貴,我都係打算買就算啦~~唔洗煩呀!

但如果我真係買,唔知班兄弟姊妹肯唔肯戴成晚呢?佢地會唔會覺得好低B呢?

2007年7月12日星期四

葡汁四蔬

今日又入廚房攪攪震~~~

因為有我最鐘意嘅葡汁四蔬,所以就叫媽咪教整啦!

原來整個餸都有幾事前功夫,先要將D材料出左水先,媽咪話咁就可以容易D熟,整個汁嗰時可以入味D~~

同埋煮D咖哩粉時真係好攻鼻,同好大煙呀!攪都到有少少唔舒服呀!終於明白點解媽咪之前次次整依個餸都係咁咳啦!

哈哈~~~依家就係我製成品,係唔係好靚呢?又黃又緣又多種類....

依家餸真係好好味,LULU妹仲為左食個汁食多左一碗飯呀~~真係好有滿足感呀!

不過,我個細佬就講個汁味唔夠濃呀!唔緊要,有意見一定要接受,等我下次煮得更好呀!

2007年7月11日星期三

開心小禮物

係今日一個心情唔太好嘅情況下,收到依份小禮物收,真係開心到唔知點形容呀!

登..登..登...登...就係依條玉桂狗大浴巾啦~~係唔係好靚呢?

依份小禮物係我個LULU妹送俾我呀!

佢話今日放工經過見到,見係我嘅至愛公仔,同埋又係我最鐘意嘅綠色,所以就買俾我啦!(我事前真係完全唔知,所以收嗰時都真係幾驚喜呀!)

雖然係一件好普通嘅浴巾,但真係為左我而買,加上完全冇諗過LULU妹行街都會留意我鐘意嘅野,真係好感動呀!唔捨得用呀~~

有咁錫自己嘅屋企人,就算有唔開心嘅野,都唔記得啦!

開始預人數

我地之前落第一次訂時都真你有諗過要請幾多人,只係諗住BOOK左個酒樓先,所以都係俾左18圍訂先,可以俾我地開到24圍。因為我地都係打算PLAN擺20-24圍左右。

我八月初就要去酒樓交第二次大訂,到時真係要決定擺幾多圍啦!所以頭先食飯時就同爸爸、媽咪講起依個問題,佢地好開心咁講話要請邊個....最近我就用電腦整左個表俾佢地填。

經過短短嘅半個鐘,仲要係好普普通通咁填,就已經填左成100個人啦~~真係勁呀!佢地仲有好多朋友未填入去呀~~我已經叫左佢地月尾要整好晒,再等我預圍數。到時唔知佢地最後請幾多人呢?

經過我依家初步計吓,再加埋男家圍數,我真係怕24圍都唔夠呀!不過話晒佢地第一次辦囍事,加上我爸爸又好鐘意熱鬧,所以都冇所為啦~~佢地鐘意就好啦!

嘩!原來擺酒真係幾煩呀!我依家先係第一步諗請乜人,仲有編座....好多好多野呀!希望可以順順利利啦!

 

2007年7月10日星期二

夏天必備

真係唔知乜天氣,又熱又晒,攪到到唔係好想出街。因為一出街就成身笠痴痴,好唔舒服呀!最好就係可以留係冷氣房入面涼冷氣,食二雪糕,甘就正啦!

依幾日因為媽咪唔舒服,所以夜晚都冇煮飯,咁我又冇愛心LUNCH BOX,所以就要出外食LUNCH啦!

嘩~~十二點鐘行出去食飯都真係幾慘,個太陽好似係你頭上面,加上我學校都算係半山,行去商場都真係幾『金』呀!攪到食飯都冇晒胃口.....

我今日終於都做左一個聰明方法啦~~就係帶把傘仔(仲要係防UV)出街,一見有太陽就開住,起碼冇咁辛苦嘛!唔知係心理作用定真係WORK,又好似冇咁晒哦!

雖然好似有少少婆仔FEEL,為左唔變小黑豬都冇法啦!好在我把傘仔咁CUTE~~

不過...攪到我個手袋就鬼死咁重!我諗成個夏天都要日日帶住係身,以防太陽嘛!

2007年7月9日星期一

又要人擔心

係差唔多放工嘅時候,收到契嫂打嚟,佢話依家帶緊我媽咪去睇醫生,因為佢隻腳又腫左,又有少少發燒,所以就捉左佢去睇醫生。

點解媽咪會整到腳.....就係佢係上星期五晚唔小心對腳撞到個梳化腳,即時聽到有『拍』一聲,同開始瘀左,幫佢塗左D藥膏啦!點知依幾日都係好痛,我地幾個都不停叫佢睇,不過媽咪又唔肯去睇醫生,因為佢今日有一個好重要嘅節目,成日都話過埋今日先去睇醫生....真係俾佢激死!

剛剛睇完醫生,照左X光,原來佢左腳尾二隻腳趾裂左,可能係咁就影響都有少少發燒呀~~真係嚇死我呀!原來係咁嚴重...

醫生叫佢要小心D,要多休息~~要等D骨慢慢埋口,不過都係要等約八個星期左右先好番呀~~

真係....擔心死我呀!

2007年7月7日星期六

煩忙的早上

尋晚半夜起身,竟然見到有隻小強係我間房行嚟行去...當我想打死佢嘅時間,佢已經走左唔知去邊!我都有嘗試去找佢,不過都係唔得~~所以尋晚都訓得唔好呀!

因為訓得唔好,所以一早就已經起左身啦。為左想找到隻小強出嚟,所以一早就係間房度左找加找,都係找唔到,所以我決定用1:49漂白水清洗我房入面所以地方啦~~等佢知道我依度係好乾淨嘅地方,唔再嚟呀!

原來我都有好多野,我有兩個大櫃仔,逐件清都用左成個幾鐘,都幾倦呀!

我依家都清潔好晒,不過成間房都好漂白水味。我就點左香薰,希望冇晒D味啦!

不過,清潔好晒間房之後,都係發現唔到小強嘅行蹤。但我間房依家咁乾淨,小強都應該走左啦!

都唔知點解會有小強,我平時都好乾淨呀~~點計都冇理由會入嚟呀。

 

2007年7月6日星期五

一口小蛋糕

今日都唔係咁好精神,不過就已經好左好多,只係想留左係屋企繼續休息~~

不過由尋日開始,我已經訓左好多啦,個人都痴痴傻傻咁,所以就決定下午唔再訓啦,找D野玩吓,所以就學人玩吓爐蛋糕仔啦!

好耐之前都已經係其他BLOG友仔見佢整,我都已經好想整啦!我仲買好晒D材料好耐啦,不過一直都冇心機去整,加上時間又唔許可呢?因為一去整依D野,就會攪到成個廚房都係野,一碗碗材料要預備晒係度,真係霸住晒個廚房,阻住媽咪呀!

今日終於都有機會啦~~

我係廚房攪左半個鐘左右,就整好左個麵粉漿,就慢慢少少倒入個紙杯仔,之後就可以入爐啦!

我睇住佢地發脹嗰時,真係都幾開心呀~~我仲捉大肥豬入去睇呀!

等多大約五分鐘,哈哈~~小蛋糕終於出爐啦!

我覺得自己都好叻呀~~冇爐燶呀!

我一共都爐左四盆呀~~真係有排食啦!有D可能我倒得滿左少少,所以有D個買相就差少少!

第一粒當然係俾大肥豬食啦,好在佢都話好好味,真係有D成功感呀!

依家我個整蛋糕癮又開始發作啦,等我快D再整其他蛋糕先得!

2007年7月5日星期四

終於都病了

今朝起身,個頭真係暈到天璇地轉咁。原以為坐定定個人,等一陣可以冇事繼續返工。點知,最後都係頂唔順,爬番上床度..打電話番學校請假。

訓到差唔多十一點幾,媽咪就番嚟陪我去睇醫生,因為佢怕我暈左係街都唔知呀!都唔知係唔係天氣唔好,真係好多人睇醫生,我都等左成個鐘先可以見到醫生呀!

醫生話我有感冒低,加上血壓又低,所以導致會好容易暈,仲叫我食番多D野,令血壓升番呀!

其實我都冇特別減食呀~~每晚都唔食飯,只係食餸。都唔明白點解會咁!不過媽咪已經下左命令叫我餐餐都要食番少少飯,有番D糖份就冇咁暈哦~~

經過我訓左成個下午,又食左兩次藥,依家都好番好多啦~~起碼冇再暈,不過食藥食到個人痴痴傻傻咁!

PS:今日我冇返工,又要糖糖同ZOE幫我頂埋我D工作,真係麻煩晒佢地啦!
        真係要同佢地講句:唔該晒你地呀!

2007年7月4日星期三

救命~~好凍呀

頭先洗白白途中發覺個熱水爐壞左,我唯有用凍水繼續洗埋個白白啦!因為冇理由成身都係泡泡去出嚟嘛!

嘩~~真係好辛苦呀!D水真係好鬼凍,著埋衫之後,成個身都係震晒,要跳上張床度蓋被一陣,先叫好少少,等我仲冇得睇晒學警呀!真係慘呀~~

原來個熱水爐係下午都已經開始壞壞地,爸爸仲話佢都係用凍水,真係俾佢激死,又唔話我知壞左,等我仲一開就開大個花灑對住自己。

死啦~~個維修職員要下星期先嚟CHECK呀~~仲有咁多日,都唔知點算啦!

不過依幾日唯有衰D,用煲熱嘅水彬身,我誋咁會好,起碼唔會咁凍呀!不過唔知媽咪會唔會罵呢?

我都已經病病地,加埋今日係冇心理準備吓沖左個凍水涼.....我都唔知會唔會仲病,今晚一定要食定粒感冒藥,早d訓,希望冇事啦!

 

06/7/07更新:

經過媽咪打電話去煤氣公司再問,維修職員剛剛已經整番好個熱水爐啦!

今晚可以有熱水用啦!

我又買鞋仔

依排都成日落雨,所以攪到我唔敢著對3吋高根鞋去街,怕容易整到腳呀。所以對妹成仔鞋已經俾我著都爛爛地,所以好想買過對好耐啦!

今日放工同媽咪出左太古城買野,路經小賢之前介紹嗰間鞋店,我地咪入去睇吓!見都有好多對都好靚呀~~不過...衰在好多都冇我SIZE呀,可能佢地做特價已經有一段時間,俾人買晒啦!真係有D唔開心!

可能我試鞋試出癮,所以我地見有時間就去左吉之島又睇鞋啦!

我地行左好幾間,都係有好人有心水,但又係冇我碼.....真係心都灰晒。可能佢地好多都真係做緊大特價啦!有好野都俾人買晒啦!

行左一陣終於都去俾我睇中左一對靚靚紅鞋仔係有我碼呀!真係開心晒。都OK抵啦~~$350,佢原價係七百幾蚊嫁~~(哈哈!平左一半呀!)

不過我對腳都唔知係點呀~~著37號又少少鬆,36又窄,真係麻煩!最後個SIZE幫我加左鞋墊就真係舒服晒...我就決定買左佢啦!

好開心呀!今日終於都買左對靚靚新鞋啦!依對鞋仔都幾好呀,親裙仔同褲都得~~

PS:小賢~~我現場睇過你嗰兩對鞋仔啦,真係好靚呀!連我媽咪都話親到晚裝同掛呀!你可以放心啦!

2007年7月3日星期二

激死我

今日真好唔開心...唔開心...唔開心!

臨近學期完,開始有好多野要整...好似下個星期一要派畢業證書俾六年級嘅學生,所以依幾日都要做好準備。

因為整畢業證書都係一件好麻煩嘅工程,始終對畢業生嚟講係一張好重要嘅證書,所以我地老細都好著緊畢業證書是否整理。

我嘅工作係分配工友蓋校印..校長印...等等,所以係上星期我已經出左一張MEMO叫佢地蓋印時要注意地方,我仲每一班整左一張樣本俾佢地睇!

係佢地嚟拎去做時,再係口頭講過一次點整,D印位係邊....諗住一定唔會有錯啦!

點知尋日佢地開始蓋印,佢地四個分別都有蓋錯,要重新整過新嘅俾佢地蓋印。我都算啦(可能係第一次做),係要成日麻煩糖糖成日RE-PRINT張畢業證書。

不過,今日當工友A再蓋印時,又蓋錯印....仲要聲大大咁話我張MEMO寫住係要細細力印,細細力就係咁啦!

當時老細入左OFFICE,所以我費時俾佢知就冇出聲。(因為老細剛剛先叫我同佢地講小心D,話畢業證書成本好貴呀!如果俾佢知道印錯哂多,實拆天呀!)我為大家著想,為有啞忍......

點知...當我自已一肚氣咁自己蓋好晒之後,工友A又走埋嚟話:點呀~~係唔係要再整呀!

我當時真係火到嚟埋,話我自己整晒啦!

之後佢又再講:又係你張MEMO話要細細力印,細細力就係一定印唔晒啦,出年咪大力番囉!

聽完之後,我D火仲勁,終於我大聲講左一句:我夠有係MEMO話叫你地用廢紙試印啦,你又唔做!

之後個工友A就走左出OFFICE啦!

我都係做好自己本分,點解要咁呀!

講真唔係我挑剔,如果佢地整完D畢業證書之後,老細有乜唔滿意,到頭來俾人罵嗰個係我,唔係佢地(冇人敢話佢地,都唔明點解佢地仲有勢力),所以我整依D會好緊張呀!仲有點解另外幾位工友都冇依個情況呀!做錯野仲要大聲夾惡....

死啦~~嚟緊仲有好多成績表、獎狀....都有排驚呀!

2007年7月2日星期一

為食累事

尋晚都唔知做乜,個胃好鬼死痛,攪到我一早就去左訓覺啦~~

諗番點解會胃痛....原來又係衰為食。

事緣尋日我就訓到成一點幾先起身(都好耐冇試過啦~~),因為LULU妹自己已經煮左野食,我未起身,所以就冇煮埋俾我啦!我見佢食野麵食得咁開心,攪都我都鬼死咁肚餓,所以我就入廚房找野食啦!

我一打開個雪櫃,就見到有好多日本八爪魚...螺肉...裙翅...(係契大佬買嚟請媽咪食),之後我就食左一大碗。真係好好味~真係唔可以停口呀!

之後,到二點幾,LULU妹落街買野,佢返嚟嗰時就買左個麥樂雞餐俾我食。(LULU話見我冇食LUNCH,所以買俾我食呀~~真係開心啦!)

食埋個麥樂雞..個胃都終於投訴啦,應該係話我食得大多難消化嘅野呀!

最後要食左胃藥先叫做好似好少少~~不過成晚都唔係好舒服呀!

真係~~又嚟衰為食。

不過有咁多好野食,同埋愛心套餐!又點可以忍口呀!

又有免費飛送

頭先收到ESD個E-MAIL,登記左之後,就有機會得到7月個婚紗展的飛送呀!

我已經登記左啦!你地都快D去登記啦~~

http://www.esdlife.com/soloemail/audace/20070702/default.asp  

講真,如果要俾錢買飛入場,我諗我地都應該唔會去啦!但有免費飛就唔同啦~可以當係一個節目去行街街嘛!

雖然我已經有左一張免費飛,但如果今次可以拎多兩張飛,就可以同媽咪同大肥豬入去行吓啦!

好似有少少貪心添~~不過師奶仔就係咁嘛!

2007年7月1日星期日

MSN中左毒

好唔心呀~~我部電腦又中左毒啦~~

我尋晚係E-MAIL收到個好好嘅朋友SEND野俾我,個FILE名係『I MADE A CARD FOR U!IT IS NICE』,我咪開嚟睇啦~~

點知就係咁.....攪到部電腦好鬼死慢。今朝開機又開左成半個鐘先開到,開到之後又係好鬼死慢~~~

開頭都唔知係中毒,點知.....睇到糖糖個BLOG就知~~~死啦~~中左!!

我用防毒軟件SCAN又冇野!好唔開心呀~~有冇朋友仔可以話我知點攪番好佢呀~~~

我依家部電又慢,又開唔到MSN....真係好唔開心呀!