2007年9月30日星期日

花車公仔準備好

終於都買到對花車公仔啦~~真係開心呀!

依一對就係我地嘅公仔~~大雄同靜兒!

一直都好想用我嘅至愛~~玉栓狗呀!唉...都睇唔啱,一係好老翻FEEL,一係就好貴唔太值。所以都唔知買乜好啦,大肥豬一直都想用絲花代替,不過我就好唔想,所以就好努力咁去睇公仔啦!

同大肥豬都行左金都睇公仔幾次,都睇唔啱。不過我就冇放棄到,今日再去睇。

好在今日我地都睇到對靚靚公仔,就係依對啦!佢有一中式同西式選擇,不過大肥豬就揀左中式,因為咁好似特別少少哦!

睇睇吓大雄又幾似大肥豬哦,又係戴眼鏡呀!哈哈哈~~

仲有呀~原來我地係羅浮宮都有影過同類型嘅POST呀!真係好橋呀!

間鋪頭有加整托公仔蝴蝶絲帶同車門蝴蝶服務,大肥豬話唔好麻煩一次過做埋,所以對公仔就留左係佢地度,要11月中先有公仔拎呀!

 

我們的婚網~~

2007年9月28日星期五

未來老爺奶奶的禮物

今日放工就去左同未來奶奶飲茶,之後就去左買係我地婚禮上嘅金器啦!

一入到金鋪,就發現原來今日個金價又升左。唉~~真係誇張呀!不過我地都唔理個價照買,因為怕年尾會越來越升呀!

睇吓我地買左D乜~~

首先就係一對靚靚龍鳳鐲,每一隻鐲各自寫上『百年好合』『永結同心』,真係幾有意思呀!

之後,就揀左一對耳環啦!原本都唔知會買,不過未來奶奶話一定要買,好似話係鄉例咁啦,所以就揀左依對啦!

最後就係買左條金鏈,係未來奶奶買俾大肥豬。

係度真係要多謝未來老爺奶奶。

 

我們的婚網~~

2007年9月27日星期四

又有戰利品

今日小豬媽去飲,所以....又要自己攪個晚餐啦!

由於今日要夜D放工,所以就等埋LULU妹放工就約左出太古城食晚餐,順便幫大肥豬拎番上個星期小豬媽買俾佢嘅過大禮西褲啦!

當我地食飽飽同拎左西褲之後,我地行過一間小小嘅精品店,見佢做大特價哦,當然入去八掛吓啦!

嘩~~~唔知係唔係特價關係,真係好抵呀!最後我當然抵受唔住,買左幾對耳環同一條手鏈呀!

買左幾樣野,真係好抵,一百蚊有找,D耳環仲話係防敏感呀!

雖然唔知係唔係真,不過當用嚟襯吓衫仔都好呀!

哈哈~~又嚟大洗錢啦!

2007年9月26日星期三

真係瘦左?

為左要做一個靚靚新娘,可能著到靚靚婚紗同晚裝,真係要開始KEEP FIT啦!

雖然我D衫全部都係鋼紗LOOK,個小肚腩都應該睇唔到。不過對麒麟臂就真係~~驚嚇到呢真係....所以一定要減肥呀!

基本上我一向都已經少食澱粉質嘅野,加上由上星期開始已經戒晒所有甜野,最鐘意嘅糖、朱古力、檸檬茶全部都冇得食,真係冇晒人生樂趣呀!不過為左靚都冇法啦!

另外,有一次陪小豬媽睇醫生時,個醫生教話每日飲20杯350ML嘅室溫水,係最有效嘅減肥方法。依個又平又方便嘅減肥方法,小肥豬當然唔執輸,所以每日都不停狂食水啦!

經過一個星期冇晒人生樂趣嘅日子,尋晚上磅....真係輕左3磅呀!我自己就唔係太覺瘦左,但小豬媽就話好似係瘦左少少。

不過...剛剛上教員室整野時,有一個平時都有幾句計傾嘅老師問我(佢係出於關心我)做乜事瘦左!

嘩~~一聽到又真係好開心呀!唔知係唔係真係瘦左呢?

不過唔理~當係啦!真係開心死我啦!原來依個星期咁辛苦地忍口、唔食咁多野都係值得呀!

希望可以繼續KEEP住啦!一定要堅持呀!

不過有效日期係12月3日晚!

因為我相信嗰晚一返到屋企就要食番晒依排所以冇食嘅零食、檸檬茶....諗起都好想食呀!

依家真係要忍..忍...忍....

 

2007年9月25日星期二

整好帖啦

前幾日收到酒樓打電話嚟話我地D帖已經整好晒,不過因為中秋關係,我地冇時間去拎,要等到今日先有時間去拎,所以就同左大肥豬、小豬媽一齊去拎啦!

一去到酒樓睇到自己D帖,第一時間就睇清楚入面D細字有冇錯。因為我真係好驚對錯,張帖有乜問題呀!我地三個人每人睇過一次,好在完全冇問題,真係放心晒啦!

不過原來佢地係唔幫我地入埋張牛油紙入帖度,所以我地係要加工呀~~(可能係酒樓送關係啦!)

所以一返到屋企,我地就好心急開工啦!

睇下我地D帖~~

靚靚牛油紙內頁,真係估唔到張相都印得幾靚哦!

經過小豬媽同LULU妹嘅幫手,我地四個人好快就將D牛油紙套好晒入帖啦~~真係勁快手呀!(其實係我地心急。哈哈)

依家套好晒D帖,不過又會開始忙忙地,因為要打信封、入回禮利是同餅咭。

雖然十一月初過大禮完先可以派,不過襯依家有時間整好,可以唔洗到等到時忙嗰陣整嘛!

 

我們的婚網~~

2007年9月24日星期一

找到心水歌

我都仲未決定婚禮上用D乜歌,因為真係諗到頭都大晒呀!

原來揀歌真係幾難呀~好多流行歌又好似唔多MATCH,所以都係初步都係想用阿拉丁首純音樂做進場音樂(因為我真係超鐘意依首歌呀!大家睇我個婚網就知啦~我都係用依首做主題音樂呀!)

係尋日竟然俾我上網找到一隻好碟,係一隻管樂音樂,不過成隻都係迪迪尼卡通純音樂呀,佢有米奇進行曲、世界真細少、美女與野獸....總之好多好合心水嘅歌呀~~~

哈哈!依家我可以係依隻碟入面揀歌嚟上乳、敬酒同送客啦~~~真係開心又可以煩少D樣野!

因為我成日都想純音樂係婚宴上播,可能我鐘意純音樂,同埋真係好難揀到真係合心水嘅歌啦!

依家又可以播埋迪迪尼音樂,個感覺好似好浪漫呀~~

不過唔知我依個建議好唔好呢?大家俾D意見呀!

 

我們的婚網~~ http://www.darizi.com/hk/blog/yanyan_hinghing/

2007年9月23日星期日

豐收的大肥豬

小豬媽見今日有時間,就提意我地去行吓太古城,因為佢想買定幾份禮物俾大肥豬係過大禮嗰日回番俾佢呀!雖然我地十一月先過大禮,不過小豬媽知道我地之後嘅日子會開始忙,就襯依家有時間買定,唔洗等第日忙嘛!

我地都曾經有考慮過用利是代替,但小豬媽話其他都可以考慮,不過依D禮物一定唔可以,因為要留為一個小小嘅紀念,所以我地今日就去左買西褲、銀包同皮帶啦!

我地都行左幾間公司,買西褲都睇唔合心水,其實應該話唔合小豬媽心水先真呀!因為當我地覺得OK時,小豬媽就會話個質地唔好,叫我地買D好。又話另一條唔好,叫我地唔好買得太平。都唔知我地想幫佢慳錢呀...真係唔知激死定笑死呀!

最後我地就去左永安買啦~~揀左一陣都終於買到一條合大家心水嘅靚靚西褲啦!不過要改呀~下星期先有得拎!

跟住我地又去附近買左銀包同皮帶,都幾靚呀~

不過都係一樣啦!小豬媽又叫我地揀最鐘意個款,唔好太留意個價錢。真係~~~都唔知講乜好啦!總之我真係嘅感動又好開心啦!

小豬媽話雖然過大禮就俾左大肥豬,但留番12月3日嗰日先可以用呀!

另外,當大肥豬揀緊銀包時,我又睇中左一個綠色銀包好靚呀~好鐘意呀!

依個時候,小豬媽就鼓勵我買。我當然受到引誘啦!不過我依份禮物係大肥豬送俾我呀,但小豬媽都唔準我依家用,要我都係12月3日先可以用呀~

 

我們的婚網~~

2007年9月22日星期六

打攪晒~車車

尋日同小M去車車屋企,因為我地想學整一D小手作仔係我地婚禮上用。

首先就係我同小M搭車入去車車度,原本車車教左我地有一個較為抵嘅搭車方法過西鐵。點知我地傻吓傻吓就用左一條快遞的通道過左西鐵月台,唉~~真係唔抵啦!

依個時候,小M就俾左張觀禮咭名兩張結婚小相我,真係好開心呀!
哈哈~小M,我會準時嚟啦!不過我到時要同靚靚新娘影張相呀!

係成個車程我地都不停咁傾計,好似未停過口呀!哈哈哈

終於去到目的地,咁我地回合左車車次後,咁就去車車家出發啦!

我地參觀左一陣,車車就俾佢D結婚相俾我地睇,仲一邊講D趣事俾我地聽,真係聽到好開心呀....係依個時候我地有幻想吓到我嗰日會點呢?真係攪到我又有少少緊張心情啦!

睇完相就開始動工啦~~~我地整左乜....總之幾靚啦~~下篇先講啦!(因為落番婚禮籌備的網誌嘛!)

我地整..整...整....,整完之後車車就拎左佢D出品,一口冰皮芒果月餅俾我地試,真係好好味呀!(講真呀,我唔講大話呀~)。仲有呀~~車車去完迪迪尼,就買左個鎖匙扣俾我,叫我留番新屋用呀!
哈哈~車車,你放心啦!我一定會留番放我新屋鎖匙,不過等我研究吓佢個構造先得!

我地整好之後,就去左食飯啦!係食飯其間,我就講左一個我嘅麻煩事俾大家知,都好多謝車車同小M佢地幫我分析同開解。放心啦!我會聽你地話,唔理其他野啦!

食完飯,車車就送我地去西鐵站,咁我地就要同車車暫別啦~~不過我知,我地會好快想相約呀!哈哈哈

講到依度,真係覺得自已好『魚』呀!因為小M比我早落車,咁我就自己一個人由南昌站再轉車啦!點知我出左西鐵閘之後,行左好耐都找唔到位置入地鐵閘,可能夜夜地關係,又找唔到職員問,真係希少少驚呀!找吓找,終於俾我找到個入口啦~原來就係西鐵閘口行過少少就係啦!真係...唉~~~大鄉理出城呀!

尋日真係好開心呀~~不過打攪左車車成日,希望我地冇做成混亂,要佢再執屋啦!哈哈哈~

婚禮上的小手工

尋日去左跟車車學嘅分別係......一對香檳杯同一個小花籃啦!

原本都唔打算整對香檳杯,不過見到車車之前個製成品,真係好鐘意,同埋問過酒樓佢地都係提供一D普通款俾我祝酒用,我見我都入去車車度,所以就整埋啦!

依對就係靚靚香檳杯先,睇吓係唔係好靚呢?

雖然話係我整,不過有大部分都要由車車出手幫忙,因為我嘅手工又真係非常差....好在有車車係度,如果唔係都整唔到呀~~

另外,我又整左一個小花籃,係用嚟插上簽名筆呀!

我自已就覺得依個比較難,因為係要自己諗一個款式再襯用乜花花好,對於完全冇設計天份嘅小肥豬,又真係幾難呀!好在最後都可以完成,我自已都覺得幾好呀!

放晒D簽名筆上去,個效果仲靚呀~

剛剛俾大肥豬同小豬媽睇,佢地都讚我整得好,仲話靚呀~~真係開心啦!

真係要好多謝車車教我整咁多靚野呀~

 

我們的婚網~~

2007年9月20日星期四

股壇初哥

小豬爸依排都唔知仲乜,成日都對股票好有興趣,一路過銀行都會睇下D股市,但佢係冇買呀!

不過依排有好多新股出,咁就大件事啦~~

因為真係差唔多隻隻新股小豬爸都想抽,仲去晒D銀行去拎FORM填。當然填個責任落左係小肥豬新上啦!

依兩個星期我都好似已經填左成六份,由初時好怕填錯,到依家真係填到熟晒,冇辨法啦,又係做女嘅職責之一嘛!

剛剛又用左唔洗三分鐘填好多一份,我一路填小豬爸就不停話隻股好,有錢賺....真係唔知係俾佢笑死定激死呀!

不過剛剛有個唔好嘅消息,就係之前有兩隻新股小豬爸抽唔到呀!唔知係唔係由我依個超級黑仔王填所影響呢?

希望今次小豬爸可以抽到啦!因為我知道佢抽唔係為左賺大錢,只係貪得意玩吓同睇下自己有冇運。

希望嚟緊D抽股結果有好消息啦!

2007年9月19日星期三

好似幾好用

依排暗瘡不停咁生,我已經冇食熱氣野,都唔知點解仲成日生,仲要係塊面珠度,唔大粒都唔生呀~真係激死我啦!

前幾日係*** Yan+Ho ***睇到介紹左一隻暗瘡貼,咁我尋日食完lunch之後就去左萬寧買盒嚟試啦!

我尋晚就即刻貼住粒瘡瘡嚟訓,今朝起身洗面時發現粒瘡已經謝謝地,真係開心。為左粒瘡瘡快d謝,就繼續用,貼埋返工,希望可以快d謝晒啦!

依隻暗瘡貼又真係幾work哦,不過當然唔希望再用啦!

粒瘡瘡謝左雖然係開心,不過又有第二個問題,希望有人又可以幫下我啦!就係我d暗瘡印啦!

點先可以快d去晒d暗瘡印呀?依家塊面有幾粒大大地嘅印,攪到人地即刻唔靚女啦,一照鏡見到d印就好唔開心呀~

2007年9月17日星期一

租車的煩惱

結婚上好多野都已經準備好,除左過大禮野之外,就好似仲有租車未攪。所以尋日去完拎油畫之後,就去左金都睇吓D租車資料啦!

其實我地都唔知點入手好,我都地只係打算租一部普普通通嘅主車同一部24座VAN。都有問過一D朋友仔拎過資料,不過大肥豬話問多幾間比較吓好D呀!

我地入左公司問吓價,發現真係好海鮮價,有D就乜都包晒,有D就講都自己點好,所以都好難揀。有一間都好似幾好,不過我地都仲未有決定,打算再考慮下先,下星期先去BOOK。

所以由尋晚開始,就好勤力咁上ESD睇下其他姊妹嘅留言。發現我地睇中嗰間都有D唔係幾好嘅回應,所以都唔知點好啦!你地有冇聽過金都一樓嘅天使婚禮,好唔好呀?

原來租車都幾煩呀~~~又怕車唔好,又怕唔準時,點好呢?

所以就想問下有冇姊妹可以介紹一下又平又抵又好服務嘅租車公司俾我,等我可以快D解決依個難題啦!

 

我們的婚網~~ http://www.darizi.com/hk/blog/yanyan_hinghing/

2007年9月16日星期日

又一張靚靚油畫

相信今日將會係我最後一次去羅浮宮,因為上次拎相時發覺個油畫框做錯左,所以要再做過呀!

今日終於收到佢地個電話叫我去拎,心急嘅小肥豬當然放工即刻同大肥豬去拎啦!

一睇到張油畫,真係好鐘意呀!個框同張相好襯呀,好有中國味呀!好在...我上次拎相時堅持要轉番啱依個框呀~

話個小秘俾大家知呀~

原本張油畫唔係揀依張,係揀帖入面大肥豬坐係度嗰張,因為佢坐係度,感覺上好似大老爺咁(等佢威D嘛),不過因為我件衫條領整得唔係太好,同大肥豬個頭髮又亂左少少,怕放大左之後會唔好睇呀,所以就揀左依張啦!

哈哈哈~~不過依張我地都覺得好靚,因為影到我成個幸福少奶奶,仲感覺大肥豬好鍚我咁(佢又真係幾錫我呀~)。真係好鐘意呀!

 

我們的婚網~~

2007年9月15日星期六

超倦的一天

今日真係倦...倦....倦呀!因為做左好多野呀!

首先就今日學校開左個新學年家長會,咁我地就要返去留待校務處當值,所以又要一早返工啦!今朝真係好唔想起身,因為平日星期日都可以訓到十二點幾!唉~~為左份工都冇法啦!好在都係返半日,做做下野就放工啦!

原本大肥豬話嚟接我放工同我去食lunch,不過因為我地要同老細開個小型生日會,唔知個時間,所以就叫佢唔好嚟接我啦!

本來叫佢自己上我屋企等,點知當我走時打俾佢,原來佢自己一個人已經去左商場入面一間拉麵店找左個位。當我去到時,仲已經ORDER左個麵俾我食呀!哈哈~~仲要係我最鐘意嘅拉麵呀!真係開心到飛起呀!

食完麵就返屋企休息一陣,就同埋小豬媽做我地今日最倦嘅事~~睇樓啦!

我地今日都可以講大大話話睇左成十間有多,因為有D都係一座入面睇幾個單位,俾我嘅感覺就係真係細左少少,同埋可能有部分係新樓關係,個間格都好似唔太實用。有一樓睇到都幾鐘意,個間格都幾好,不過太低層,唔係太方便,所以都冇考慮。有D就因為小豬媽話大廈出面嘅風水唔好。

唉...原來揀樓都真係幾麻煩,好多野都要睇呀!不過買樓唔同買衫,一定要諗清楚先得呀!

今次都係第一次睇樓,希望慢慢睇,可以有合心水啦!但原來睇樓都真係幾倦呀!

不過樂觀地諗,可能我地揀到居屋,咁就可以有又平又靚嘅樓啦!

今日都有一個奇遇,就係當我地去第二間地產公司問時,竟然撞到小賢同大賢都去睇樓呀!之後我地仲一齊去睇其中一個單位...哈哈哈,我地真係有緣啦!

2007年9月14日星期五

第二份結婚禮物

今日又收到一份結婚禮物,就係一張結婚咭,同一封澳紙幣利是啦!

依份禮物係我其中一個已經移民嘅姑姐托個親戚送俾我地呀!因為佢年尾唔會番嚟出席我個婚禮,所以預先放依份禮物俾我啦!

其實係上年年尾,姑姐都有返過嚟香港,我都有邀請佢年尾返嚟出席我個婚禮。不過因為佢唔係年年都番嚟,所以都估到佢唔會番嚟,但就冇諗過會提早收到禮物,所以收到時都幾驚喜呀!

雖然係一張咭仔,但收時都真係好開心呀!因為個意思係包括左一個祝福,咁越多人祝福我地,我地就會越幸福啦!哈哈哈

 

我們的婚網~~

2007年9月13日星期四

空歡喜的COUPON

之前同大家講過話我參加左WEDDING MORE個現代經典婚紗攝影抽獎,佢地會送出每份$12880嘅婚紗套餐。

係上個月中收到WEDDING MORE嘅職員打嚟話我入左第一階段,話如果抽到我會好快打俾我!點知一等再等..等到我都唔記得左件事啦!

點知..今日收到WEDDING MORE寄嚟嘅信,一打開...原來係現代經典婚紗攝影COUPON!

一睇到真係好開心,心諗終於可以去影南瓜車啦!真係開心到連自己頭痛都唔記得啦!

不過...睇清楚張COUPON,原來佢送嚟嘅唔係一個豪華套餐,只係送一個價值$2380嘅套餐,只送得八張相,仲要唔包男仕禮服呀!

諗諗吓,又真係好似唔係好抵呀!有少少覺得好似係一張叫你不停加錢嘅COUPON。因為當你去到,一定冇理由一蚊都唔加就用都佢張COUPON!

雖然我真係好想去影南瓜車,不過真係好唔抵呀~~睇清楚又真係好唔值得呀!

加上依家去影都趕唔切結婚,所以都真係有少少失望呀!

可能我同南瓜車真係冇緣啦~~

2007年9月12日星期三

我都有利是收

都已經過左小肥豬生日,不過今日都有利是收呀!點解呢?

事緣小肥豬的農曆生日係同我其中一位叔叔農曆係同一日,所以因為咁....我嫲嫲都會記得我農曆生日。(因為佢好錫我依個叔叔呀!)

今日剛好係我叔叔新曆生日,佢係酒樓擺左幾圍請我地去飯。平時冇乜特別野做嘅小肥豬當然跟埋去食飯啦,唔洗一個人留係屋企咁悶呀!

就係因為咁,我嫲嫲見到我出現,就當正今日都係我生日,所以就俾左一封利是我啦!

不過有件事都幾唔好意思,就係我嫲嫲真係當正我生日,叫我去切蛋糕。唉~~今日真係唔係我生日嘛又點可以走埋去切呢!同佢講,佢又唔係咁開心嘅樣....真係都唔知點好啦!為有當聽唔到佢之後再講D乜啦!扮晒打NDS聽唔到啦!

雖然生日已經過左好耐,不過利是又有邊個話多呀~~所以今日又收到一封少利是啦!

2007年9月11日星期二

第一份結婚禮物

今日收到一份遲來嘅生日禮物加第一份結婚禮物,就係依本靚靚結婚證書冊啦!

依份禮物係LULU妹送俾我呀,真係好鐘意呀!

點知解佢會送依樣野俾我?因為前排成日上網睇依D婚禮小玩意,有日係一個網站睇到,覺得好靚呀!當我仲15/16買唔買之際,LULU妹就係依個時候好豪爽咁叫我訂,話當係我今年嘅生日禮物!

既然佢咁豪爽,我當然聽佢話啦~~真係開心死我啦!

原本我地係訂粉紅色,不過個職員做錯左....(唉!又一次證明我係黑仔王)

睇到件真貨,都幾OK呀!同時又睇到D粉紅色嘅SAMPLE,都好似白色靚少少,所以都算啦!

都唔知係好彩定點啦~~好似錯有錯著啦!哈哈哈

 

我們的婚網~~

2007年9月10日星期一

黑仔王又再來臨

依排都好似好有運,都算中過吓六合彩(雖然係$20,都當中過呀!),玩遊戲又有獎品。原本以為自己已經開始脫離黑仔王嘅日子,點知今日黑仔王又再一次嚟臨係我身邊啦!

一朝早返工冇幾耐,大肥豬送俾我嘅生日禮物~~靚靚聚財腳鏈.....斷左,雖然拾得番,不過冇得醫呀~~真係心都傷埋。心諗死啦~~今日係攪珠嘅大日子,一早就斷鏈好似好唔好意頭。

點知到差唔多三點幾(即開始攪珠嘅時候),個心已經完全冇心機做野,不停上網睇個攪珠結果,上房屋處網址又睇唔到,真係心急死我啦!

終於係RTHK個網址睇到個攪珠結果....不過係一個好唔想要嘅答案,就係我地唔可以係前十個,真係完全DOWN晒,即刻完全冇晒心機!

後來俾大肥豬CHECK到原來我地係排第47呀~~唉.....真係都應該冇乜可能啦!

真係點解咁黑仔呀~

幾時先可以好運嚟我地度呀!

2007年9月9日星期日

靚BANNER之謎

前幾日開始,轉左個GIF嘅BANNER,好多BLOG友仔都話我個BANNER整得好靚~~哈哈!真係開心呢!

原本都唔打算公開個BANNER之謎,不過因為好多人都話好靚,所以就出個POST話俾大家知啦!

其實個BANNER係我個同事加好友糖糖幫我整呀~真係好鬼靚!佢仲要係我唔知情嘅情況SEND左俾我,真係好開心,仲即該改左嚟做BANNER啦!

尋晚又再SEND左個新BANNER,同幾張幾張靚靚電腦效果相,真係幾靚呀~~

哈哈~~真係開心死我啦!

我都有問過糖糖個BANNER點整,佢話係用PHOTOSHOP先整好D相先,之後就用另一個SOFTWARE加飄雪效果,不過係乜就唔記得啦~~等糖糖自己上嚟話俾大家知啦!

仲有~~要同糖糖講:真係唔該晒你呀!成日幫我整咁多好野!仲唔話我意見多多!哈哈哈~~

PS:
糖糖已將BANNER之謎解開左啦~~
想學嘅朋友仔快D去睇下啦!

小肥豬之謎 ---------- 謎靚BANNER

2007年9月8日星期六

悠閒嘅開心的一天

今日原本話去金都睇吓D租車資料,不過唔知點解今朝一早起身個頭鬼咁痛,所以都係打消左個念頭,留係屋企係咁訓啦~~~

成個下午大肥豬都係我屋企陪我,買完野俾我食之後,我又繼續訓...佢就同LULU妹打NDS,好在都有野俾佢玩,如果唔係就悶親佢啦!

訓到個人傻吓傻吓時,大肥豬見我唔再頭痛,就同我出左太古城行街街食飯,話行吓個人冇咁傻哦~~哈哈!我日日都係傻傻地啦~

我地先出左吉之島食飯,之後就去行吓,乜都睇吓啦!當行過二樓個GAME鋪時,大肥豬就話入去夾公仔,我地最後都將唱$20嘅金幣玩晒擲彩虹。

我好叻呀~~擲左三份禮物呀!我幾好運,我仲將條靚靚即時用,希望之後日日都好有運呀!

之後我地又行去永安行吓,佢地做緊八折,見到有好多相架又好靚又抵,所以就大入貨,買左幾個嚟放我地D靚靚結婚相啦!

返到屋企即刻整,真係好靚呀~~真係有少少後悔買咁少呀!不過佢地做埋今日特價,再買就要等下次啦!(特價平好多呀~真係師奶仔啦!)

2007年9月7日星期五

好味晚餐

今日因為小豬媽有朋友生日去左慶祝,所以又到我煮飯仔嘅時候啦!不過今餐飯都煮得好趕呀!

原本叫LULU妹放工去到北角地鐵站打俾我,我先開始煮,咁可以唔洗整凍晒D餸嘛!點知佢掛住打機,去到屋企附近先打番嚟,所以就要極速咁煮啦!好在我之前已經整好晒,咁都只係煮。

但都係因為趕住煮關係,我好唔小心咁將D薹爆鑊時落左少少水,攪到彈起晒,仲彈到上眼角呀~~真係好鬼痛呀!不過都要繼續煮埋佢呀!

依餐就係我今日嘅傑作~~

今日餐飯真係食得好開心呀~~~因為所有野都清晒,大肥豬仲讚好好味,話我有進步呀!

所以...見佢地食得咁開心,真係油彈到抵呀~~不過...都依家都真係仲有少少痛呀!

美女飯局

尋晚同左幾位blog友去左銅鑼灣麻布茶房,進行我地嘅待嫁飯局啦!今次係除左小M之外,仲有兩位新成員加入,佢地就係白文e蚊同ARWIN啦!

我同佢地兩個都有好多野好似,大家都係同酒樓集團找擺酒,揀嘅簽名布同帖都差唔多。仲有結婚日子都差唔多呀!蚊蚊就早我地幾日,ARWIN就同我同一日,真係好橋呀!

我地四個人一入到麻布,就係大家都好FOCUS係D甜品度,所以我地都叫左主菜後就即刻諗食乜甜品啦!大家都好似唔記得左要KEEP FIT咁啦~~真係為食!

我地四個成晚都好似未停過口,乜到傾得一餐,結婚野啦、返工野啦、乜都講.....睇下我地幾開心!
(係蚊蚊個BLOG偷番嚟嘅相,唔好話佢知呀~~個BB女就係ARWIN啦~真係同細個時一樣呀!)

唔知點解講講下又講到NDS,蚊蚊就即刻拎佢部隻出嚟介紹個新GAME俾我依個新丁玩,點知就係依個時候俾蚊蚊偷影左我打機個樣,仲要POST左上嚟....真係激死我啦!哈哈哈

傾吓傾吓...我地原來傾到成十一點幾呀~~真係快樂不知時日過呀!

真係要好多謝你地俾左一個好開心嘅飯局呀~~蚊蚊又唔怕麻煩咁拎左部大相機同我地影相,仲有小m個鼻仔唔舒服嫁都照出黎應約,真係好多謝你地呀!

走嗰時真係有少少唔捨得呀,好想再有下次聚會呀!不過都因為之後我地會開始好忙咁去攪我地結婚野,小M又忙HONEMOON,所以都應該要過左我地婚期先可以再約到啦!不過咁仲好,我地到時可以好放縱咁食,唔洗怕肥啦!

尋晚仲有小禮物收呀!就係Sweet Pande製嘅好味曲奇啦!雖然Sweet Panda冇出嚟,但佢就托蚊蚊送俾我地呀~真係好好味呀!多謝晒!
Sweet Panda,你下次一定要出嚟呀~同埋要教我點整呀!因為真係好好味呀!

 

2007年9月6日星期四

請帖初稿

我星期二就拎左D相同資料去酒樓整帖,佢地個效率又真係好快,尋日下午就已經FAX左個初稿同排版俾我睇同對吓D字有冇問題!不過...佢地打錯左小豬爸個名,所以要改啦!

今日下午更正後,又再FAX左俾我睇。但都好似冇改過,仍然都係地打錯小豬爸個名,真係激死呀!當然佢地又要再改啦!

當我放工時,佢地又已經改好左,咁就叫佢地FAX俾我啦!今次冇再打錯啦!

不過...就係因為咁,我好驚會有睇漏呀~~我都睇左不下數三十次,仲迫大肥豬睇幾次,又叫小肥媽幫手睇,確實冇錯之後,跟住我就簽名FAX番去酒樓啦!

大約三個星期之後就收到帖製成品呀,唔知係點呢?靚唔靚呢?又好擔心自己對錯,整錯D帖呀!

希望快D收到D帖,睇完冇問題之後,就可以放心晒啦!

 

我們的婚網~~ http://www.darizi.com/hk/blog/yanyan_hinghing/

2007年9月5日星期三

忙忙忙

開左學都已經有好幾日啦~~

依幾日因為D學生要嚟校務處登記,所以見到好多學生呀!唔知係唔係經過一個悠長假期,所以好多學生都好似大個左,尤其係一D低年級學生,真係好唔同左,冇左BB樣啦~~

不過,依幾日真係幾忙,因為好多通告、文件要攪.....攪到一返工冇幾耐就LUNCH,之前就好快放工。咁都好呀,時間快過好多嘛!

唉~~忙都係一件好事,因為有野做即證明自己係依度仲有工作俾我做,冇俾人忘記左!不過最衰就係好多都要趕住交(牙保、書津呀...),但老細又話學生資料又要趕住入系統,因為好重要哦!但都有一個難題,就係仲有好幾班通告都未交到嚟,真係唔知追唔追老師好啦!又要做夾心人啦!

係樣樣都好似好趕嘅情況下,好在我有兩個好同事幫我手整,真係冇咁大壓力,仲一定可以好快攪好啦~~

開學初係會忙少少,以前都會好趕頭趕命咁做晒佢,不過依家學識慢慢做,唔好急....因為唔想做錯野,俾人話嘛!

2007年9月4日星期二

激死我~~

唔知係唔係剛剛開學關係,依兩日都好難搭車。小巴部部都FULL晒...巴士又唔知點解等極都冇.....

唉~~~尋日都好少少,俾我好唔容易咁等到一個小巴位,可以係好趕嘅嘅情況下返到工,冇遲到。

不過今日就冇咁好彩啦!等緊都冇車,我都已經早左出門口啦,不過都係等唔到車。係依個將近遲到嘅環境下,有一部的士經過,咁我又做左一個好大洗嘅決定,就係搭的士啦!

依件事都唔係最激氣,當我上到車,個司機個態度真係先最激氣呀!(我係筲箕灣上車,去目的地就係柴灣。)

當個司機知道我去柴灣時,佢好大聲又好串咁講:吓~~柴灣

依個時間我都已經嬲嬲地,之後佢仲係成個車程入面不停唉聱嘆氣,自言自語....係好似話我咁近都要搭的士。

真係嬲嬲地呀~~有冇攪錯呀,都唔知係乜服務態度,我都係乘客,有俾足夠嘅車費,點可以咁樣呀!

真係激死....不過我都唔弱,平時都會俾整頭數。但依個司機真係咁衰,當我落車時完全依咪表俾錢,一豪子我都冇俾多呀!

2007年9月3日星期一

開始整帖

尋日BOOK好左註冊時間,所以今日放工就去左酒樓攪我地D帖啦!

其實係第二次交訂金嗰時,都已經睇過下D款式。今次都只係交埋張相同D內頁資料。

首先講吓我張帖先,個設計就係咁啦~~

一睇到個封面就真係.....有少少唔開心呀!因為真係超普通,不過酒樓送都冇乜點可以選擇,我地又唔想用粉紅色,紅色都只係得兩款有得揀.....最後大肥豬就揀左依款啦!

唉....不過算啦!我相信賓客一收到張帖就會即刻打開內頁睇,佢地睇到我地張靚靚相就已經足夠啦!

唔好再洗錢係整帖啦,留番D錢係其他地方啦~~依個簡簡單單,都幾好呀!等對埋個稿之後,約三個星期左右就收到我地D帖啦!

跟住就整我地個簽名布啦!因為新天地有一張細細地嘅粉紅色簽名布,所以今次就揀左一個粉藍色底嘅簽名布啦~酒樓交依張係大張D呀,所以我就會主力用依張簽名布...

睇版就好似唔係太靚,不過經理係我地揀嘅時候拎左一張其他新人嘅樣本俾我睇,又真係幾靚呀!

一踏入三個月倒數,真係好似忙左少少...一定要繼續努力先得啦!

 

我們的婚網~~

2007年9月2日星期日

揀左註冊時間啦

今朝一早起身, 就出發去金鐘註冊署揀時間啦!真係仲比平時返工仲早起身,因為好怕會錯過左個時間,冇得揀第一呀!

我同大肥豬比原先預約個時間早左少少,之後好快就去拎FORM填,等左一陣就叫我地個籌啦!

個職員小姐好快咁問左我地幾個問題,跟進就見佢拎本登記冊出嚟,問我地要邊個時間。當我見到我係第一個揀時間嘅時候,真係好開心呀...當佢將我地D資料填入去3:00個時間上面,唔知點解有少少戚戚地嘅感覺,不過依種感覺係好,因為真係可以BOOK到3:00呀!

我地俾左錢同簽名之後,就要等宣誓啦!今次當然係由大肥豬做依樣野,不過佢好攪笑咁面珠紅晒咁嚟講,仲有開頭佢好大聲讀出嚟呀(因為一向佢都講野較大聲,但唔係冇禮貌嗰種)~~不過...佢咁即係好重視依個宣誓!

除左結婚資料外,個職員仲俾左一個臨時泊車證,不過佢地只可以俾一部車泊係紅棉路個停車場。不過我諗幫我地個VAN仔司機叔叔會有辨法泊車啦~

BOOK埋註冊,可以重要野都攪得七七八八啦~~放心左一大半啦!

我聽日就會拎埋D資料同相去整帖...仲有會去BOOK車,又開始忙忙地啦!

 

我們的婚網~~ http://www.darizi.com/hk/blog/yanyan_hinghing/

2007年9月1日星期六

被TAG中~~

依排BLOG 有好多TAG呀~~

都有好多朋友 TAG中左,真係開心啦!因為被TAG中即係有人記得我~~不過之前TAG中過,我都冇玩到,我唔係唔俾面呀,只不過嗰D都已經玩左啦!

不過剛剛俾*~心淚~*TAG中左玩新野,所以就玩吓啦!

遊戲規則如下:

A. 必須點名至少8個人,要用盡辦法通知各人參與這個遊戲,人數不夠的話就少點,2個以上就行。
B. 被點名的人不可重複被點,每個人只可玩一次。
C. 回答問題當中時,需自行刪除一個不喜歡的問題,更換一個新的問題,然後點名其他人來玩,如此延續這個遊戲。
D. 答案需在各自的blog內公佈。

開始遊戲:

寫出填寫日期:1-9-2007


1.   如果現在有一個願望給你,一定成真,你會做咩? 
       抽到好號碼,有一間好好嘅樓。

2. 如果有機會可以讓你重回一個時間,你會選擇回到那個時間? 
        返到BB時代嘅我,因為BB係最冇煩惱。

3. 你希望在別人眼中是怎樣的人? 
        傻傻地...

4. 如果唔駛返學/返工你會點呢? 
        留係屋企成日訓同去行街街

5. 如果中500萬獎金,你會怎麼花?
        買間靚屋,唔洗一定大,夠三人住就得啦!

6. 你最怕的事情?
        生離死別

7. 你覺得邊件事係令你最難忘既?
        暫時未有,不過 相信一定會係2007年12月3日 

8.   假如您只剩下一曰命 會點面對?
       都唔知呀~不過想自己一個人去另一個地方,唔想親人為我傷心!

9.   你能放下現在的生活,去鄉村或其他城市重新開始嗎? 
       可以呀~

10. 最愛的食物
          三文魚、同所有零食

11. 最愛的顏色
          綠色

12. 最愛的休閒
          訓訓訓同上網

13. 最愛的運動
          訓覺算唔算運動

14. 最愛的人
           大肥豬同小豬媽

15. 最愛的口頭蟬
          唔好玩啦

16. 最討厭的人
           講大話的人,虛弱嘅人

17. 最愛的季節
          秋天

18. 最了解我的人
           大肥豬同小豬媽

19. 最愛的節日
          以前係新年,因為有利是收...不過我相信之後都唔得啦

20. 最想見的人
           都冇呀~~因為個個想見嘅人都係身邊

21. 愛的定義
          錫我同關心我

22. 心中嘅目標
           擁美滿家庭,可以做一個賢妻良母

23. 愛我的人
           大肥豬同小豬媽

24. 最喜歡的地方
           屋企

25. 最愛的零食
           棉花糖、糖....基本上好多零食都好愛食

有幸俾我點中嘅人:

小賢 、 小M 、車車 、ღ白文e蚊ღ 、dydy 、Arwin 、 °♡°QuEeNiE°♡° 、 小肥肥