2007年11月30日星期五

倒數兩日

可能時間一日一日咁過,今日真係勁忙碌呀!

首先一早起身就整埋D枱號牌同幫D襟花加工,等D男仕們可以方便插入衫袋。

下午就陪小豬媽出金都去拎番件晚裝,真係好多人拎,等左好耐先到我地試呀!

番屋企開始我執野大行動,又要再執D日用品去大肥豬屋企,又要執去酒樓嘅野....總之都係執...執....執啦!

之後又封利是,原來都要預備好多唔同類型俾唔同嘅人,真係有少少難度呀!

今日都做左好多野,又真係都幾倦....

仲有兩日就到啦....依家真係識得緊張,仲有少少驚呀!

 

我們的婚網~~ http://www.darizi.com/hk/blog/yanyan_hinghing/

2007年11月29日星期四

倒數三日

雖然日子一日一日咁過,好似好快就到大日子。不過前幾日嘅心情都冇乜緊張,冇乜將結婚嘅感覺,不過依個心情心今日開始有變啦!

可能今日係我婚前最後一個工作天,所以有部分未能出席我晚宴嘅老師都分別送上賀禮,又有好多人問我結婚野...攪到我都有少少緊張起嚟,真係覺得好快咁啦!

不過都未算,下午仲收到一個驚喜啦~

事緣今日學校禮堂舉行週會時刻,突然收到一個電話好緊急咁叫我上禮堂話有急事要我幫手,我就即刻好驚咁衝上去啦...心仲諗:唔係又做錯野呀!

點知...一去到禮堂就聽到有老師彈緊結婚進行曲,之後校長就向全校學生講我下星期一結婚嘅事,又叫全體學生同我講『新婚快樂』。當時真係幾尷尬又感動,真係好多謝各位同學仔嘅祝福呀!

可能由明天開始就唔洗返工,所以個心情就真真正正開始緊張啦!

 

我們的婚網~~ http://www.darizi.com/hk/blog/yanyan_hinghing/

2007年11月28日星期三

倒數四日

之前都冇諗過話去整GEL甲,因為聽人講話會好痛,有少少怕呀!所以都係諗住去修吓甲,去油吓指甲貼吓花花就算。

經過我依幾個星期嘅努力,我D指甲係長左少少,不過就好慘咁開始斷甲,好醜樣呀...為左要靚靚,所以今日都係要去整GEL甲,所以今日放工就去左整啦!

因為都係第一次整,所以開頭都好驚會好痛。但整整吓又冇乜野,都係照燈嗰時有少少痛,但都可以接受。

整左個半鐘左右,我D靚靚指甲終於完成啦!睇吓幾靚~

我都幾鐘意,因為簡簡單單又夠閃,襯乜衫都OK嘛!

 

我們的婚網~~ http://www.darizi.com/hk/blog/yanyan_hinghing/

2007年11月27日星期二

倒數五日

經過一番頭痛咁安排,終於都初步編好左婚宴當晚嘅座位安排。

原來攪依樣野都真係好煩,又要顧及邊批客人較熟坐埋一齊,一係就FRIEND嘅人太多,要分枱坐,咁又要諗抽起邊個好....真係好煩呀!不過好在都可以講暫時安排好,咁都好少少~~

食完飯就同小豬媽去左吉之島拎番張龍鳳被同買野,我就買左套靚靚睡衣,同一D內衣褲,等我新婚後著。

番到屋企又開始執野大行動,因為要執定一D日用品等大肥豬幫我拎去奶奶家。雖然係暫住一個多月左右,都唔諗住拎太多野去,費是搬來搬去。但執執吓...又執多左一大袋(之後已經拎左一盒衫),都唔明白點解有晒多野。

一邊執野,我就有開始少少驚,驚並唔係因為大日子就到,而係好驚婚後需要改變自己嘅生活方式,仲要去另一個環境住,真係怕會好唔習慣呀!雖然大肥豬已經講左會盡量就我,但都總係會驚驚地.....希望自己可以好快習慣啦!

 

我們的婚網~~ http://www.darizi.com/hk/blog/yanyan_hinghing/

2007年11月26日星期一

倒數六日

今日放工就約埋嘉汶表妹同LULU妹上紫水晶LAST FITTING,可能我地上去都算早,都唔係好多人。等左一陣,就帶左去隔離FITTING室試衫啦!

因為嘉汶表妹趕住返學,所以佢就第一個試衫,之後就到我試揀左嗰幾件衫啦!

原來今次佢地係會幫我即刻改埋件衫,試到FIT晒為止,所以全程都係又試又改又著...都幾多野整,不過幫我試身嗰位姐姐又真係好好人,佢唔介意幫我試完又改,改完又試,仲教我點先可以著靚件衫,真係細心呀!

由於我掛住自己試衫關係,都冇時間理LULU妹件衫改成點,好在嘉汶表妹幫手睇埋先去走,咁我都安心去全程照顧自己D衫。

當試到中途,大肥豬就嚟到準備試件禮服,點知係依個時候先醒起我唔記得帶埋對皮鞋去試,真係失敗!唯有靠預計估計條褲嘅長度啦!

我地逗留左差唔多兩個幾鐘就終於試好晒啦!原本我想問可唔可以早多一日拎衫,不過因為由於1號太多人拎衫,所以唔可以早,都係維持係2號拎衫呀!

但係拎衫嗰時可以再俾我試著D衫多一次,睇吓要唔要再改。同時又可以再試埋大肥豬條褲,又真係超好人呀!

點知~~改衫姐姐叫我係依幾日唔好再肥OR再瘦,唔好到時要佢再改衫哦!(真係俾佢笑死呀!)

 

我們的婚網~~ http://www.darizi.com/hk/blog/yanyan_hinghing/

2007年11月25日星期日

喜事四重奏

今年可以算係大肥豬最豐收同最開心嘅一年,因為真係喜事接踵而來。仲要係短時間內完左依幾件大事,真係利害呀!

第一件喜事,就係完成左佢個大學課程,終於都畢業啦!

第二件喜事,就係抽到今期居屋,仲要可以揀到心水單位,做業主啦!

第三件喜事,亦都係最重要嘅,就係娶到一個又靚又可愛嘅老婆啦!(哈哈~又係度讚自己添~)

第四年喜事,終於都可以係今日宣佈啦~~~

就係由今日開始,大肥豬嘅工作有新轉變,轉左去另一個部門,係負責做ACCOUNT嗰邊(可以學以致用嘛!)。個職位就升左少少,人工都象徵式加左少少,可以話算做升職,都可以係一件開心事呀!

今年真係好多轉變呀,希望大肥豬繼續可以好運落去,佢好就已經足夠啦!

我自己....唔洗太好啦,因為佢好咪即係我好,D好運俾多D大肥豬就得啦!

咁等我繼續發揮旺夫能量。(哈哈哈~~)

 

倒數七日

今日終於都迫小豬爸同小豬媽開始問D客人嚟唔嚟,因為真係要開始預人數,要覆實圍數俾酒樓嘛!

因為小豬爸怕尷尬,所以等到依家去問人。我都用左好多口水同小豬爸講,佢先肯開始呀!其實我都知有少少難為情,不過為左可以預好D人數都冇法啦!

都問左七七八八,同我預期中差唔多啦!等大肥豬嗰邊OK埋就可以決定到啦!

問實左人數之後,就又要開始安排佢地座位啦!依個先係最艱辛嘅工作,有D人又唔可以坐埋一齊,邊D又唔可以坐得太近主家席.....總之就係煩...煩....煩....啦!

真係要加多幾錢肉緊編好個座位表先得呀!(真係頭都大埋呀!)

 

我們的婚網~~ http://www.darizi.com/hk/blog/yanyan_hinghing/

2007年11月24日星期六

倒數八日

之前係訂左嘅襟花、手花,今日終於都拎左啦!

首先當然講吓我兩個花球,由於我會用番之前影結婚相嗰兩個花球,所以就叫左訂花球位姐姐幫我執執。今日睇番又真係好似新嘅一樣,好靚呀!

特別係茶花依個,我想特別少少,就加左少少羽毛同珍珠,真係成個感覺都好唔同,靚好多呀!真係好鐘意依個呀,所以大肥豬就會拎住依個花球嚟接新娘啦!

依個就係另一個蕙蘭花球,姐姐再加左少少襯花,感覺上好似大左少少,都好鐘意依個呀!所以打算留係酒樓影相用啦!

另外,我仲幫大肥豬訂多左一個襟花,等佢敬酒時可以用。因為大肥豬成日都係著一套禮服,訂多一個咁就好似有多少少變化嘛!

依盒就係其他兄弟姊妹、四大長老用嘅襟花手花,都好靚呀!

真係開心,又完成左一樣野啦!

 

我們的婚網~~ http://www.darizi.com/hk/blog/yanyan_hinghing/

2007年11月23日星期五

倒數九日

今日放工就即刻同小豬媽飛去見我大日子嗰位化妝師,大家傾吓當晚嘅造型同揀吓D首飾、頭飾。

基本上成個過程都幾好,我揀左好多好靚嘅頭飾,有D仲係全新,真係好閃呀!我特別鐘意註冊嗰婚紗頭飾,係一個極閃嘅皇冠,真係有少少似小公主咁呀!希望嗰日化埋哂妝,可以成為靚靚小公主啦!(哈哈~~真係唔知醜啦!)

化妝姐姐又好好咁,問我有乜特別要求。其實我都好簡單,只要唔好紮晒頭髮上去,化大D我對眼就得啦!

經過今日一見,我同小豬媽都對化妝姐姐真係可以話完全信任,因為我相信佢一定可以將我嗰日扮到最靚靚呀!

 

我們的婚網~~ http://www.darizi.com/hk/blog/yanyan_hinghing/

2007年11月22日星期四

倒數十日

仲有十日就到大日子啦!

前幾日好多人都問我心情有冇緊張....攪好晒結婚野未....等等問題。其實嗰時我真係仲未識驚,因為感覺上好似仲有時間,同好似好多野都整好,個心情都係等嫁。

不過由尋晚開始,個心情開始有少少緊張,仲攪到我訓得唔係太好。原來今日就已經係仲有十日就到啦,真係唔到我唔緊張啦...

究竟我仲有乜未做?好似有好多,但自己仲係唔知係乜,因為好多我都已經七七八八,只係仲有少少濕碎野未整....

仲有最煩嘅編位未攪,依個問題真係最最最煩呀!希望可以順順利利咁整好啦!

依十日一定要好好咁利用,繼續日日做FACIAL....繼續KEEP住唔好肥番,要做過又靚又FIT新娘先得!

 

我們的婚網~~ http://www.darizi.com/hk/blog/yanyan_hinghing/

2007年11月19日星期一

愉快的晚餐

今日又約左兩位靚太車車同POODLE食晚飯呀!

我地今次約左係尖沙咀海港城入面間DOUBLE STAR食晚飯,因為我同車車早左去到,所以就係海港城出面個靚靚聖誕佈置影左一陣相。

嘩~~個佈置真係好靚,車車都幫我影左好多相呀!


(真係麻煩車車幫我影咁多靚相呀!)

影完靚相之後,我地行左一陣,就去餐廳啦!

今日成個晚餐都好開心,佢地兩位靚太都講左好多大日子當日要留意嘅野俾我知,等我可以了解多D,當日唔好出錯。有D佢地唔講,我都完全冇諗到,所以話真係收左好多好有用嘅料呀!

除左講經驗俾我知之外,佢地仲不停咁叫我食野,仲叫我食甜品,真係好攪笑呀!但我知道佢地都係關心我,怕我太刻意減肥會有反效果呀!

今日真係好開心....相信下一次嘅飯局就一定會好快到,到時就會變成靚太飯局,我又可以大食特食啦!

今日晚餐仲有另一個原因,就係POODLE送左一條毛毛披肩俾我,等我可以係大日子嗰日俾LULU妹用。(不過咁靚..可以留番俾自己用呀!哈哈)


POODLE:真係多謝你呀!

2007年11月18日星期日

第四份結婚禮物

今日收到第四份結婚禮物,真係開心,又有禮物收啦!

依份禮物係一位學校老師因為我結婚當日有事,唔可以嚟我地個晚宴,所有送份禮物俾我地啦!

依份禮物就係一條SWAROVSKI心心頸鏈,清清地幾靚呀!可以用嚟平日襯衫戴都幾好呀!

真係要多謝陳老師呀!

雖然有禮物收真係好開心,不過總係有少少唔好意思,好似要人破費買野送俾自己咁!

 

我們的婚網~~ http://www.darizi.com/hk/blog/yanyan_hinghing/

2007年11月17日星期六

好介紹 ~ 咖啡王子

之前聽咖啡王子依套韓劇係因為有線播,不過因為屋企人係嗰個時間係睇緊其他電視節目,所以都完全冇睇過!

不過前幾日路過買韓劇地方,係幫車車買嘅時候,自己又忍唔住買左一隻嚟睇。其實都因為個女主角關係我先買呀!(『宮』嗰個女主角做,佢幾靚女嘛!)

頭先試碟時睇左少少,又真係幾好睇哦~~睇嚟依排又可以開始煲碟啦!

不過....我依家先睇會唔會好OUT呢?次次我都係當個劇出左一排,我先識去買碟睇,真係好鬼OUT呀!

不過唔知幾時先可以睇完啦!因為都真係忙忙地,可能要等過埋大日子之後,同大肥豬一齊煲啦!

2007年11月16日星期五

德福聖誕迪迪尼

之前係幾個BLOG友仔見到德福商場已經佈置左好多好靚嘅迪迪尼聖誕裝飾,作為一個鐘意影相嘅小肥豬,當然見有時間就捉左大肥豬去影相啦!

一去到睇....真係好靚呀,尤其係胡迪同巴斯依個佈置係最靚,所以周圍都好多人影相,要等吓先可以行去影呀!不過就係因為多人影關係,所以都好易找人幫我地影靚靚合照啦!

之後又有反斗車王同怪獸公司,我地都影左少少相。

不過最攪笑就係當我去影怪獸公司時,因為四周冇人,所以就叫左一位護衛叔叔幫我地影合照,原本都係打算隨便影一張就算,點知個護衛叔叔幫我地影左好幾張,仲好專業咁就埋位,影出嚟個效果又幾好哦~~(哈哈!唔知係唔係依排幫人影得多呢?)

次次德福D佈置都好靚,成日都有迪迪尼公仔,不過係迪迪尼入面我最鐘意嘅MARIE唔知幾時會有呢?

2007年11月15日星期四

何謂朋友

前幾日返母校探老師時,講起一位已經好耐冇聯絡嘅中學時代最最要好朋友仔,因為之前我個手機壞左,冇左佢個電話號碼,所以就失去左聯絡。原來依位朋友仔都有同老師有聯絡,所以老師就俾左佢個電話我,等我地再聯絡番啦!

我見都係好幾年朋友,咁我咪尋晚打電話俾佢,講吓大家近況咁。不過唔知點解由第一句說話開始都已經覺得好唔同,個感覺係極度生保,一D都唔似係舊朋友咁。

言談間講起我會就結婚(都唔係一打電話俾佢就講啦!),佢一句恭喜都冇,只係講左一句『哦..好呀好呀!』,之後我地又講話出嚟食飯,咁佢就話『等新年先啦!』總之係成個電話過程都好冷淡,聽完都有少少唔開心呀!

其實我都經過幾次考慮先決定打俾依個朋友,因為我都知道係我將結婚嘅時間打俾佢,都會俾人誤會以為我想炸佢,所以佢嘅表現我可以理解。

不過點解可以咁冷淡呀!話晒都係中學時代最好嘅朋友,雖然好耐都冇聯絡,點解會咁呀!問你近況都冷冷淡淡咁回應。一般人聽到話有人結婚,都會好開心咁恭喜對新人呀!何妨係一位舊朋友呀?

我由頭都尾都冇打算請佢嚟飲,我都係因為剛剛拎番佢個電話,想找番佢傾吓計,想KEEP番段友誼,點解會係咁呀?

究竟我再唔再同依位朋友仔聯絡好呢?

學小豬爸話:朋友係分好多種,如果佢咁樣,咪當係普通朋友就算啦!唔好為左依D朋友仔影響自己心情。

2007年11月13日星期二

回母校

今日放工就返左去我中學時代嘅母校,因為主要係拎張餅咭俾一位係中學時代好錫我嘅老師。

其實由我畢業之後,每年都一定會寄張聖誕咭俾佢,同佢嘅感情都真係好好,話晒佢都係睇住我大,所以結婚依個人生大事,當然要話佢知啦!

不過...當我地傾開時先知,原來依位老師都只係中一及中二教過我普通話,其他年級係冇教過我呀!我地嘅感情就係由中一開始建立起嚟,真係好有緣份呀!今日再見番老師,覺得佢都真係冇乜點變,嗰份親切感覺一D都冇變過。

因為老師都較忙,所以我地都傾左一陣就走啦!不過我地已經約左等我婚後就出嚟食飯,到時再詳談啦!

計吓計吓...由畢業之後都有成十幾年冇返過學校(弊...咁咪俾你地估到我幾多歲~~哈哈),今日由搭巴士開始,都回憶左好多中學時代點滴,一入到學校個感覺就仲濃郁。不過學校已經改變左好多,好多地方都改變左,連學生校服都轉晒。

依D係唔係真係十年人事幾番身,何妨十幾年.......

唉....諗起依點又覺得自己好老啦!

2007年11月12日星期一

第一日派帖

一過完大禮就忙派帖啦!

尋日係我第一日派帖,真係好緊張呀!首先一返到工就派俾我校務處同事,佢地可能都一早知道我結婚,所以都冇乜驚喜,不過就有恭喜我同讚我張帖整得好靚同張餅咭印個『囍』字好有心思,聽到之後都好開心呀!因為有人讚賞嘛!

派完俾同事就即刻派俾老細,開頭都以為自己會好緊張 (話晒係老細哦),點知又好似好平靜咁,可能老細都已經知道啦,所以平淡D啦!

剛剛大老細(即校監)尋日嚟左學校,所以又派埋俾佢,由於唔係我親手俾佢,所以唔知反應。不過當佢離開學校前,佢竟然主動行嚟我個位,同我握手恭喜我,仲多謝我請佢地飲,又讚我張帖好特別,真係既驚慌又開心呀!(因為好少大老細會咁親民嘛!)

不過講到最緊張都係利用LUNCH時間去教員室派帖俾D老師,唔知點解一入到教員室就好緊張,拎帖都手震晒,又唔知點開始好….總係好驚咁。係依個時候好在有一位FRIEND底老師幫手,佢叫我冷靜,又幫我抽起係教員室入面D老師,又陪我去派帖。真係好在佢係度,如果唔係我都手足無措呀!

好快咁就派晒俾老師啦!好在佢地收時都好鄧我開心,咁我都定D。佢地仲不停讚我地張帖好襯張相,又話我好靚,真係聽到我都開心晒呀!

好在佢地都好鐘意我張帖,我開頭都怕太簡單,佢地唔鐘意呀!依家真係放心晒啦!

派埋學校我D帖都七七八八,係仲有D朋友仔同舊同學未派,不過相信好快就可以派埋啦!

 

我們的婚網~~ http://www.darizi.com/hk/blog/yanyan_hinghing/

2007年11月11日星期日

姊妹飯局

今日終於可以約埋姊妹團出黎食晚飯啦!

由於我姊妹團人數唔多,所以都好容易就約齊晒啦!原本都有打算約埋班兄弟一齊食飯,起碼大家見吓面嘛!不過大肥豬話唔需要,再加上臨時有一位兄弟請唔到假,所以又煩惱緊找另一人補上,所以今日都只係得我地成班女仔食飯啦!

我地約左係銅鑼灣意粉屋度食野,因為我貪嗰度靜靜地,又可以坐耐D,環境又幾好呀!不過衰在唔可以BOOK位,所以我同LULU妹就早左少少去找位啦!

當姊妹們嚟齊時,首先當然要炸吓佢地先啦,之後就俾我嘔心瀝血嘅RUNDOW俾佢地睇,好在睇完之後大家都明白我寫乜,之後再傾吓當日嘅情況。好在我幾位姊妹都好有經驗,咁都放心左大半啦!

傾完個RUNDOW就再講吓接新娘時玩乜遊戲,佢地都講左好幾個,(不過仲打算諗多幾個GAME,所以就交俾其中一個姊妹負責), 其他GAME所以好快就傾好左,仲分埋工作添,真係效率高啦!

總括黎講,今次既聚會都幾好呀,姊妹們大家認識左對方,好在佢地都唔似好生保,可以大家後生女易溝通啦!我地又傾好晒當日RUNDOW同接新娘時玩嘅GAME,可以話好放心晒啦!

各位姊妹:我嗰日將成個人交俾你地啦!真係又要麻煩你地,仲靠晒你地啦!

 

我們的婚網~~ http://www.darizi.com/hk/blog/yanyan_hinghing/

2007年11月10日星期六

過大禮啦

一改再改嘅過大禮日子,終於都嚟到啦!

今日就係我過大禮好日子,由於之前未來奶奶講過依日係唔可以見面,所以男家過大禮就由大肥豬阿哥同一位朋友幫手,我就留左係屋企等佢地嚟,幫手招呼佢地。

請真都幾緊張呀,所以今朝一早起身就執吓間屋(唔好失禮嘛!),之後就落街買D西餅同飲品,等一間可以有野招呼嘛!整埋D野都七七八八,就等佢地上嚟屋企啦!

係等緊嘅過程又真係幾緊張,不過唔知點解當佢地到達之後,個心情又冇乜野,只係覺得好忙,要記住有D乜係要回番去男家,因為真係好多野,好怕有錯漏呀!

成個過程都唔洗半個鐘就完成,可能因為大肥豬係樓下等佢地,所以阿哥都好快咁整好晒D野,等埋小豬爸番嚟就完成個儀式啦!

不過,小豬媽都有一樣蝦碌事,就係竟然回漏左一袋野,要打電話叫大肥豬同佢朋友番嚟拎呀,真係唔好意思呀!

過完大禮就可以派帖啦~~~好野….

各位朋友仔要有心理準備收炸彈啦!哈哈

 

我們的婚網~~ http://www.darizi.com/hk/blog/yanyan_hinghing/

2007年11月9日星期五

公佈好消息

前幾日同大家講過我忙緊同大肥豬去處理我地件重要事務,終於都可以話俾大家知依個好消息啦!

登..登...登....登,就係大肥豬買到今期居屋啦!我地買左藍田康逸苑某一個單位啦!

一路都以為我地個抽次序號碼係47,估計都唔會有得揀。不過時間一日一日咁過,竟然終於俾我地等到啦!

雖然當初都希望可以買香港島(因為可以近小豬媽嘛),不過到最後都係買唔到.....都有少少失望。

雖然冇最心水選擇,不過地依家所買嘅藍田都唔錯,起碼番小豬媽度都唔洗半個鐘,仲有可以有一層屬於自己嘅屋所。計過供樓仲抵租呀!

依家等埋攪銀行同律師樓之後,就可以拎鎖匙,到時小執吓就可以入伙啦!諗起都開心呀!仲覺得自己好幸福,可以有一個屬於自己嘅家呀!

相信攪埋晒入伙都應該12月尾啦!諗到依度又有少少擔心。

因為我BD之後未有新居住....原本都打算租酒店訓一個月,不過一問之吓,都真係幾貴呀!我寧願將D錢擺入新居度啦!所以應該好大機會要番奶奶度訓一個月。一諗起就好驚,雖然我奶奶平日都好錫我,不過始終大家有不同生活習慣,我怕好難適應呀!

但當一諗起可以慳番少少錢,又覺得好似都值得......個多月時間應該好快過,仲係一個訓練我脾氣嘅時候....唉,做人真係好矛盾呀!

唔知係唔係就快做人老婆,所以都覺得自己好似諗野成熟左,好多時諗野都冇以為咁任性。

2007年11月8日星期四

又打敗仗

依兩日終於都俾病魔打敗左,冇番到工,唉......真係慘啦!

不過尋日真係好辛苦,一起身就成身熱騰騰咁,個人又冇晒力。原來我係又發燒.....想自己去睇醫生都唔行到,最後就等到中午小豬媽番嚟先帶我去睇醫生啦!

原來係老毛病嚟探我,又係扁桃線發炎,所以引起發燒。

睇完醫生之後,食完藥就又訓過,訓極個人都好似傻吓傻吓咁。不過都間唔中會燒吓唔燒吓咁呀!

原本以為訓左成日會好番少少啦!點知今朝起身又燒番,所以又冇返工,等到醫生開門就去左打針(因為尋日醫生話唔得就要打針呀!),打完針之後,又好似好番少少,起碼就冇再燒番,不過就好痛囉!

依家都見有番少少精神,起碼都冇再燒啦,我就可以上吓網同約左班姊妹下星期食飯啦!因為我唔敢再訓,怕今晚訓唔著嘛!

我想信我應該好快可以冇晒事,因為嚟緊會好忙,好多野做呀!

 

2007年11月6日星期二

我的嫁妝~~PART 3

今日放工就俾小豬媽CALL左出吉之島,因為小豬媽話要係過大禮前買埋我另一份嫁妝~~就係成套床上用品及龍鳳被啦!

其實一早都已經睇好晒個款,因為小豬媽好鐘意依個款,話新潮得嚟又有囍字,好意頭呀!

今日買真係好抵,有枕頭送、有利是封送,又送繡名服務。真係好似幾抵呀!

依家就十四日後就可以拎番啦!希望可以繡靚D啦!

小豬媽除左買依套俾我地之外,仲好細心咁,買多張羽絨被俾我做嫁妝。不過....張羽絨被真係幾貴,我都有少少肉痛,但小豬媽話值得,因為佢知道我地兩個都怕凍呀!

 

我們的婚網~~ http://www.darizi.com/hk/blog/yanyan_hinghing/

2007年11月5日星期一

忙忙忙病病病

依幾日都真係只有兩個字可以形容~~~病......忙

都唔知仲乜,好似食極藥都好似未好過,攪到都冇晒胃口,又冇乜心機做野。不過咁都好,借機再減多少少肥嘛!(不過就好似冇乜點再瘦啦!)

究竟我係乜事呀!小豬媽話再係咁真係要捉我去睇中醫,飲苦藥啦!唉~~好慘呀!

病病地都已經慘,仲再上依幾日真係好忙。又要忙星期日攪過大禮野,又要忙一件對我同大肥豬都好重要嘅事。成日都要行行行,睇睇睇,真係人地癲啦!

不過希望過埋今個星期,我個病同所有忙嘅事都可以解決,等我可以有好好嘅心情去派帖啦!

(依件重要事係咩...等事成之後再講依個好消息俾大家知啦!希望係好好好嘅消息啦!大家要祝福我地呀!)

 

2007年11月4日星期日

點解咁嘈

今日都仲係病病地,唉....真係慘啦!

不過諗起已經成個幾星期冇去做FACIAL,所以今日放工就去左做FACIAL,打算都可以係做嘅同時,都可以訓番一陣嘛!

點知....最慘嘅情況出現左啦!當我開始做FACIAL時,隔離嗰位師奶真係勁煩,全程未之停過口,一時又講自己股票讚幾多,一時又講自己D仔女有幾叻,又係度講佢老公點賺錢多,總之就不停係度晒命,真係煩到呢.....最衰就係嗰位FACIAL姊姊又係度搭舢,個情況都有成十幾級煩呀,攪到我想好好訓陣都唔得。

我都已經做咳左幾聲,希望佢會停吓啦,不過佢真係完全唔理人感受,仲係不停咁嘈,真係激死我啦!

做FACIAL應該係靜靜地嘛,你講野人地又點會幫你做得好呀!

真你頂個位師奶唔順呀!希望下次唔好再撞到佢就好啦!

2007年11月3日星期六

唔好病啦

依排天氣真係好難估計,一早一晚就凍凍地,中午又好似熱熱地。唉..都唔知點著衫好呀!

好不幸地小肥豬已經覺得開始病病地,尋晚已經訓得唔係咁好,今朝一起身個頭又鬼咁痛,喉嚨又痛…仲忽冷忽熱咁,好慘呀!

唔好玩我啦!嚟緊會好忙嘛,下星期又要攪過大禮野,之後就開始忙派帖,我仲要KEEP住去做FACIAL,真係好多濕碎野做呀!

希望食完D傷風藥就可以冇事啦!

病魔唔應你過左12月3日先好嚟呀!因為我唔想做個病新娘呀!

大家都要小心身體呀!

2007年11月2日星期五

倒數一個月

時間真係好快過,由一年幾前開始籌備,到依家.....唔經唔覺終於都到左倒數一個月啦!

依家就只係差過大禮外,其他野都好似攪好晒,只係仲差少少濕碎野啦!

唔知係唔係大日子越來越近,個心情就開始緊張起嚟。有時都會諗吓嗰日會係點,有時都會係發夢時夢到自己係婚宴嗰晚嘅情況,有時又會好驚嗰日有D乜意外....總之成日都諗起,有時都會好驚呀!

真係怪怪咁....可能我係過分緊張啦!仲有一個月,真係要繼續努力籌備之外(雖然我都好似攪得七七八八),仲有要繼續KEEP FIT。

因為我都真係好想食D零食呀......薯片、檸檬荼、朱古力....等等,真係好掛住佢地呀!仲有一個月我都可以同佢地相見啦!

所以係依一個月倒數係除大日子嘅倒數之外,仲係可以食零食嘅倒數。哈哈~~真係為食啦!

 

我們的婚網~~ http://www.darizi.com/hk/blog/yanyan_hinghing/

2007年11月1日星期四

第三份結婚禮物

係大肥豬行畢業典禮嗰日,竟然收到我地嘅第三份結婚禮物呀!

就係一張內附一對電話繩嘅心意咭

同埋一個靚靚米老鼠婚紗相架

依份禮物係由大肥豬一個大學同學送俾我地,因為係唔可以嚟我地個婚宴,所以就提早送依禮物俾我地啦!

依位朋友仔真係好有心呀!個相架好靚呀,真係感謝依位朋友仔啦!

可能我係一個好鐘意影相同睇相嘅人,所以我真係好鐘意唔同款式嘅相架,我仲買左好多個相架,打算擺晒我同大肥豬嘅甜蜜照,四周擺係屋企。

依家又多一個靚靚相架,咁我又要忙考慮晒邊張相放入去啦!

 

我們的婚網~~ http://www.darizi.com/hk/blog/yanyan_hinghing/