2008年3月30日星期日

攪笑的小豬爸

今日返左小豬媽屋企食飯,因為都有個星期冇見到佢地,同埋當然係做最重要嘅野....派手信啦!

好在....大家都好鐘意我嘅手信,見到佢地咁鐘意,我自己都好開心。

係未開飯之前,小豬爸就捉住大肥豬一整研究點買六合彩。因為小豬爸有朋友借左一本六合彩天書俾佢,佢地兩個係度研究點中大獎,就連開飯都唔理,一直係度傾,依個情景都真係幾好笑。

今晚小豬媽煲左大肥豬最鐘意嘅青紅蘿白湯,真係好正呀!

我地習慣左電視撈飯,當做八點新劇時,我同大肥豬都好驚訝咁問:點解做新劇?

嗰時我地先諗起原來我地有成個星期冇睇電視,套劇都已經大左結局啦!

係依個時候,我地就即刻問小豬爸太極個ENDING係點啦?(因為小豬爸好鐘意睇依D劇種),小豬爸竟然好嚴肅咁講:太極個大結局咪就係講太極囉!

聽完之後,大家都大笑起嚟,估唔到小豬爸會咁攪笑...哈哈哈~~

當然,笑完之後,小豬爸都講左個ENDING俾我地知。

今晚食飯真係好開心,唔知點解...總覺得個心好WARM呀!

東京蜜月之旅 - 戰利品篇

經過我嘅努力,終於都執好左D戰利品,可以係聽日送俾有關嘅人仕。

各位朋友仔...你地等收禮物啦!

首先幫我嘅戰利品影番張合照先......都唔係好多呀!

等我慢慢介紹吓先...

麵包超人館嘅禮物

迪迪尼嘅禮物

HELLO KITTY LAND嘅禮物

富士急遊樂場嘅禮物

係新宿行街街買嘅禮物

食得嘅禮物

依份禮物真係要特別介紹,因為原本我都冇打算買袋,但係最後一日行商場時見到,都心大心細諗買唔買好,我都考慮左好耐。點知依個時候,大肥豬就同個職員講話要依兩款袋。就係咁...我就有依兩個意外驚喜嘅禮物啦!

係成個團嘅女仕計,我都係買得最少嘢呀!不過我冇覺得唔開心,因為我想買嘅野都買到嘛!

有好多都係寫住『MAKE IN CHINA』,冇理由係日本買中國製嘅野嘛,所以有D我都放棄左冇買呀。

2008年3月29日星期六

開心回歸

我地終於都番嚟啦,大家有冇掛住我先!哈哈~~

我等左好耐嘅蜜月之旅終於都完成左,過去依五日都真係幾開心呀!雖然SHOPPING時間唔多,不過自己想買嘅野都買到,仲有少少意外收穫添.....哈哈~~
(遲少少POST我嘅戰利品俾大家睇啦!)

我地雖然係跟團SHOPPING時間少,不過都有另一樣好處,就係可以識到一班唔錯嘅團友,大家互相幫助,都幾好呀!

不過就算幾辛苦,因為日日都要一早就起身去。不過好在我地都唔洗坐太長程車,最長嗰次都好似幾兩個鐘左右,對鴨仔團嚟講已經好好啦!

我一番到屋企就上BLOG,所以依家真係好倦...所以唔再長細講住...等我執好D相,就開始寫我依個蜜月之旅啦!

2008年3月23日星期日

出發啦

等左好耐,終於係聽日就可以去我地個蜜月之旅啦!

依家個心情真係......勁開心~~勁開心,好想快D去到呀!

不過聽日要一早七點幾到機場,今晚真係要早D訓,所以睇清楚、執多次行李就去訓啦!(相信今晚都應該唔係好訓得著啦!哈哈~~)

東京...我嚟啦!

各位朋友仔,我出發啦,五日後就番嚟啦!大家唔好太掛住我呀!

2008年3月22日星期六

德福KITTY

之前見到小M去德福影左好多KITTY靚相,所以趁今日有少少空檔時間,就捉左大肥豬去影..影...影...啦!

D佈置真係好靚呀...好多唔同款嘅公仔,不過..點解冇玉桂狗呀?佢都係KITTY家族成員,唉...可能佢真係唔太紅啦!


真係影左好多相,就係因為咁,所以我部相機影到冇晒電,所以我地都冇去第二期嗰邊影,真係失敗啦!

下次去影相一定要CHECK清楚部相機先得呀!

2008年3月21日星期五

開心的晚上

今日大肥豬請左幾位同事嚟我地嘅新居。

一早起身就執左間屋仔,好在平日都算整得OK,所以好快就攪好左。(話晒佢大肥豬同事,唔可以失禮嘛!)

依幾位同事都曾經見過,又嚟過我地嘅婚宴,所以都冇陌生,好快就開始玩啦!

其中一位帶左幾個智力GAME嚟,真係勁好玩,不過次次都係我包尾,真係冇智慧啦!唉...攪到我都想買番盒嚟玩呀!哈哈哈~~

為左唔好令到大家個個都肚痛,所以都係叫左PIZZA-BOX做我地嘅晚餐。我地叫左一個大餐,個個都食得好飽飽。

哈哈~~~好在今日成日都冇乜點出錯,同事們都好開心咁走,咁都好D我冇失禮人嘛!

不過我就有少少唔習慣,因為同事們都成日叫我做『阿嫂』。第一次聽都唔知佢地叫我,係到後尾先識應佢地呀!哈哈~~

講起PIZZA-BOX,都真係火火地。就係當我開始打電話落ORDER時,竟然要好似打電話去信用咭訂飛咁,不停咁打先有人聽。我計過..都要成半個鐘有多先打到去落ORDER,你話火唔火呀!

雖然佢地D野係好食,不過要打咁耐先可以落ORDER,又真係幾過份呀!

2008年3月20日星期四

愉快BBQ

剛剛同班同事們去左美孚某一個BBQ場玩。

首先講吓個場地先,講真我地就覺得真係唔係咁好。佢地D負責人都幾....見到佢地都驚驚地。我地都係貪佢係市區同埋都只係俾入場費就得,方便D嘛!不過如果你問我...下次都係去另一個場啦!

我地大大話話都燒左成三個幾鐘,我都整左好多野食,好多都冇乜點濃,幾叻女呀~~哈哈哈!就係因為咁,真係食得好飽飽呀!(又肥幾磅啦~~)燒完野食我地仲去左食糖水,嘩....真係好滿足呀!

今日真係玩得好開心,真係成同事一齊玩都真係幾好,大家可以聯誼吓嘛!

我地仲已經開始講定下次去邊度玩...哈哈~~諗起都好開心呀!

2008年3月19日星期三

攪笑嘅禮物

今日大肥豬一返到屋企,佢就話買左份禮物送俾我,心諗...唔會又係佢嗰D音響器材呀!

點知一睇原來係一家四口嘅鴨仔呀!

點解會買依套鴨仔俾我...因為我之前整水浸浴缸時,大肥豬就話只係浸水好悶,話遲D買嘢陪我玩。

我開頭都當佢係講笑,點知佢仲記得,仲真係買左番嚟,真係俾佢笑死...仲當我係BB女咁,買鴨仔俾我玩!哈哈哈~~

睇佢D鴨仔游得幾開心....哈哈哈~~

2008年3月18日星期二

註冊片段

九年前嘅今日,就係我地開始拍拖嘅日子。

九年後嘅今日,我地已經結左婚啦....

哈哈!時間真係好似過得好快。話咁快就做左人地老婆三個幾月啦,真係仲有少少未習慣呀!

為左慶祝今日依個好日子,所以我就貪得意將我地結婚時註冊嘅片段,等我回想一吓當日嘅情景!

睇番自己個樣,真係覺得自己嗰日好傻,都唔知自己做緊乜咁...因為要忍住唔俾自己喊嘛!(大家睇完唔好笑我呀~~)

2008年3月17日星期一

加入高清行列

今日大肥豬一返到屋企就俾左一個『驚』喜我....就係買左一機頂盒番嚟,我都加入左高清行列。

其實大肥豬由買電視時已經好想買,不過嗰時剛剛出,太貴啦,所以就冇買到,打算等平D先再買。點知今日係屋企附近有得做推廣,都算平..就買左番嚟!(終於都俾大肥豬“恨”到啦!)

佢一返嚟連飯都唔食住,就掛住係度整機。都唔知人地肚餓等佢食飯,真係激死我啦!

不過算啦...見佢一邊整機一邊係度笑笑口,好似成個小朋友終於得到一樣想要好耐嘅禮物咁。唉...見佢咁開心,就原諒佢一次咁多啦!

2008年3月16日星期日

仲有七日

依幾日可能因為學生提早放假,加上手頭上嘅工作冇咁忙,所以真係冇晒心機做野,因為我個心已經又再飛走左啦!

過多七日就可以去東京啦!

依家真係冇時冇刻都諗係去旅行、要開始諗定執D乜包袱去、去到個行程會係點(雖然我係參加鴨仔團,不過都想幻想吓個行程會好好嘛!)、日日都睇住本東京指南,諗定要買乜..真係好多好多嘢忙呀!

不過依幾日D日元升得好利害,雖然我已經係之前唱左少少,但依家咁貴..過到去到變左買貴野。

唉..點解我去嗰時先咁貴。如果真係太貴,咁就唔可以大購物啦!諗到依點就有少少唔開心呀!

不過唔理啦,最緊要自己盡興嘛!

2008年3月14日星期五

尋找最美麗的第七天

今日我地去左尋找最美麗的第七天!

哈哈~~就係去左珀麗灣行吓啦!由套劇一出就已經好想去,終於都可以係大結局前去到,咁都唔洗咁OUT。

一入到就覺得依個地方又靚又靜,好舒服。個VIEW就仲靚,我地就即刻開始係咁影,不過就因為係中午時間關係,好晒呀,好多張都係檬檬眼...真係唔抵啦!


唔知係唔係依度方便同狗仔玩,我見到有好多人都係度玩狗仔,有D仲係專登搭船入嚟呀!隻隻狗仔都好得意,好多唔同種類。最衰我怕狗啦,如果唔係都可以走去玩吓狗仔呀!

行左一陣,我地就去左馬灣公園行吓啦!成個公園都好靚,佢地都有幾個主題區,好多都係要行樓梯咁行上山。不過因為我地都行都倦倦地,所以有幾個都冇行到呀!

雖然冇行晒,不過我地都影左好多靚相呀!


係回程時,我地去左拍劇入面間餐廳食下午茶。不過依間餐廳就麻麻地,我碗麵要等成半個鐘先到(佢地嗰時唔多客人呀!),又要吹左幾次。唉...黑仔王又回歸啦!

2008年3月12日星期三

煮飯仔

今日又嚟煮飯仔,依一餐就係我地今晚嘅晚餐啦!不過今晚我地都好晏先開餐,因為大肥豬要開OT,等埋佢先開飯呀!

講番今晚餐飯先,首先就係.....又嚟雞翼呀!因為上次我支可樂卥水汁仲有少少,所以今次整埋佢,唔好浪費嘛!

之後就係西蘭花炒豬肉啦!唔知係唔係我煮得耐左D,西蘭花好似太熟,唔爽口。下次要改善吓依個問題!

今晚又可以清晒D餸,YEAH~~希望次次都可以係咁就好啦,即證明我嘅廚藝都有進步呀!

除左食晒D餸開心外,都仲有一件事好開心呀!

就係原本諗住睇完大佬穎先去執埋個廚房手尾,點知.....當我睇到好入神時,大肥豬已經將D碗碟洗好晒,只係留番D大件野我洗,仲話怕我一間做得夜,幫我做少少,真係好開心啦!

又係時候俾叻叻大肥豬啦!

煮飯仔

今日又嚟煮飯仔,依一餐就係我地今晚嘅晚餐啦!不過今晚我地都好晏先開餐,因為大肥豬要開OT,等埋佢先開飯呀!

講番今晚餐飯先,首先就係.....又嚟雞翼呀!因為上次我支可樂卥水汁仲有少少,所以今次整埋佢,唔好浪費嘛!

之後就係西蘭花炒豬肉啦!唔知係唔係我煮得耐左D,西蘭花好似太熟,唔爽口。下次要改善吓依個問題!

今晚又可以清晒D餸,YEAH~~希望次次都可以係咁就好啦,即證明我嘅廚藝都有進步呀!

除左食晒D餸開心外,都仲有一件事好開心呀!

就係原本諗住睇完大佬穎先去執埋個廚房手尾,點知.....當我睇到好入神時,大肥豬已經將D碗碟洗好晒,只係留番D大件野我洗,仲話怕我一間做得夜,幫我做少少,真係好開心啦!

又係時候俾叻叻大肥豬啦!

2008年3月11日星期二

停課..

剛剛睇電視知道教育局剛宣佈因流感影響,全港小學停課兩星期,學生可以提早效復活節假期。

唉...對學生嚟講應該係一件好事,但作為一個小小嘅書記嚟講,都應該唔係一件好事。

個影響就係.......我都冇得提早放假...(哈哈~~有人懶鬼上身唔想返工啦!)

不過講真,最大影響就係,今次停課好似趕急左少少,聽日一返工怕會好亂,同埋又唔知大家嘅心情好何...總之就驚驚地啦!

希望聽日可以冇乜大事發生,樣樣野都順順利利啦!

2008年3月10日星期一

別人的婚禮

今次係婚後第一次參加別人嘅婚禮。

講真..唔多唔少都有諗番起自己結婚嗰日嘅情況,想起婚禮的點點滴滴。除左我之外,小豬爸同小豬媽都成日講我地嗰個時間做緊乜…都真係幾攪笑。最攪笑都係小豬爸,佢一見到對新人有8對兄弟姊妹時,咁佢又開始話:『人多好玩D、應該要咁多人嘛!』,真係俾佢激死呀!(因為小豬爸係好鐘意熱鬧,我嗰時都成日都俾佢話,叫我要多D兄弟姊妹呀!哈哈~~)

係等開席時,冇野做..當然自己影吓相玩吓啦!

依一份就係婚禮上送嘅小禮物,係士多啤梨果醬呀!

成晚個氣氛都幾好,不過就夜左少少,差唔多十一點幾先散席呀!

新娘子好靚,仲好瘦呀..真係羨慕呀!

2008年3月9日星期日

都係冇中獎運

因為沉迷睇最美麗的第七天,所以每晚做完之後我都會上TVB網站,睇下一集個劇情。

當我睇劇情時,見到佢地有個攝影比賽。交一張浪漫嘅相同一個小故事。咁橋就係我剛剛用之前晒結婚相嘅COUPON,晒左一批8R,又係個婚網度寫左一個小故事,所以都好似齊晒,於是就膽粗粗咁寄左依張相去參加比賽啦!

雖然佢地嘅獎品都好似幾好,不過我參加主要目的係希望睇吓自己有冇中獎運(因為由細到大都未試過中獎)。同埋如果係我得獎時,可以係嘉穎頒獎俾我..咁就仲開心過得獎啦!

係上星期二,我收到TVB打嚟,話我知有關頒獎典禮嘅日子,話如果有再進一步結果,就再通知我。當時我真係開心到爆,心諗佢打得嚟都應該大機會有獎。

點知...都係唔可以離開黑仔王之列,最後都係冇得獎。大肥豬幫我打去問,原來我係入左第一ROUND,不過就冇頭三名。

再一次證明我係冇中獎運呀!不過唔緊要,都係一個遊戲,下次再有再參加過啦!

不過,就有少少係失望冇得見大佬穎呀!(哈哈~~我仲俾大肥豬笑我仲扮妹妹仔想見偶像呀!)

2008年3月8日星期六

開茶會啦

今日我地上左旅行社開茶會,原本大肥豬都話唔係好想去,不過我覺得去旅行點都要聽吓有乜特別嘢要注意,所以最後我地都去左聽依一個東京之旅嘅茶會。

我地因為怕唔識路,所以早左出門口,就係咁我地早左去到。

一上到去見仲有時間,首先我就交埋個尾數先,之後就當然就係食佢地一早準備好俾客人嘅茶點啦!款式都唔係太多,不過都OK啦(唔洗錢唔好要求咁多啦!)

 食左一陣,終於都開茶會,大約都係講吓到時嘅天氣、去到大約係玩乜、同最主要知道幾點去機場集合。

嘩~~好早…一早七點就要去到機場集合。不過都好…我地都算早機去,晚機返呀!有排玩啦~~

開完茶會之後,好似要準備諗定有乜野要執。要開始日日上網CHECK東京天氣,又要CHECK日元換價..好忙呀!

仲有半個月就走啦~~個心又開始飛走左啦….又飛左去東京啦!

2008年3月6日星期四

與靚媽咪飯局

今晚約左小賢、車車同poodle食飯,一行四人進行靚太飯局。小M原本都出席,不過突然有事嚟唔到。不過唔緊要,仲俾機會我地再約食飯嘛!哈哈~

今次我地約左去尖沙咀間SNOOPY餐廳食嘢,間餐廳開左咁耐我都係第一次去食,真係大鄉理啦!佢地佈置都真係好得意,有好多SNOOPY呀!不過因為我地掛住傾計,冇乜點影相,所以有機會都要帶大肥豬去玩吓先得。

講番我地個飯局先,我地成晚都好似未停過嘴,乜都有傾,不過講得最多都係BB問題,因為我地當中有兩位係靚媽咪,分享左好多有BB嘅開心野俾我地聽,我地成日都細聲講大聲笑,好開心呀!真係感受都兩位靚媽咪嘅幸福呀!(大家唔洗問啦,我未有咁快打算做靚媽咪,哈哈~~等吓先啦!)

唔覺唔覺我地都傾左成兩個幾鐘,真係快樂不知時日過,下一次再飯局應該要等我大戰完東京先啦!

2008年3月5日星期三

又嚟購物啦

繼上次大肥豬大購物之後,今次終於可以到我啦!

今日要返奶奶度食飯,放工後見時間仲早,就去左行吓街街啦!

行過一間鋪頭,就諗起我同事曾經著過依間公司嘅得意衛衣,見佢地仲做緊特價,就入去八掛吓啦!

可能係特價關係,好多得意款都賣晒,一係就冇晒我SIZE。不過..佢地都算平,個質地又好似幾好,所以我都買左兩件衫仔,打算留番去旅行著呀!

返屋企執野先發現原來我係冇乜衛衣,件件都係裙仔同返工衫。真係要間唔中轉吓形象先得啦!(其實又係一個藉口俾自己買嘢呀~哈哈!)

2008年3月4日星期二

私友化

由今日開始我會開始推行『私友化』,會將談及自己內心感受同較私人嘅事設為私人網誌

其實依個做法我都考慮左好耐,因為我知道當我進行左『私友化』之後,大家需要登入後才可以看到我的網誌,會帶來不方便。我亦有曾經諗過搬blog,但我又唔捨得放棄一個令我識到好多新朋友同滿載回憶嘅地方。

我覺得blog係一個好好嘅發洩平台,一個完全屬於自己嘅地方,想講乜都可以。

但我唔想將我用心寫出嚟感受,俾人作為笑柄,又或者幫我加鹽加醋咁散播出去,所以我唯有作依一個決定,希望大家明白我啦!

『私友化』之後,我亦會把內容寫得更詳細,大家就不用估我在寫什麼啦!

當然我都好歡迎有更多嘅朋友成為我嘅blog友,分享我嘅感受,所以如果我未將你加入為blog友,請回應話俾我知啦!

2008年3月3日星期一

士多啤梨場

哈哈~~估唔到有咁多朋友仔對摘士多啤梨有興趣,好多人都問我個地址...所以就出個POST同大家分享吓啦!

其實香港都有好多個士多啤梨場,我去依個係在粉嶺嘅雲泉仙觀附近,個正確地址就係:粉嶺坪輋泥路李屋新村。其實去到嗰度都有好多路牌指示,所以都幾易搵到。

嗰度有兩個士多啤梨地,我去嗰個就係較出,另有一個場就入少少,嗰個就多數係旅行團去。

我上次摘都仲有好多士多啤梨長大中,如果有興趣就快D去玩吓啦!

至於我之前講過個老細NO GOOD,個事緣係我地買時話一百蚊三磅。當我地摘玩磅重時,剛剛過左三磅少少(真係只過左少少呀!),佢就加一D唔係咁靚嘅俾我地,等我地齊頭四磅。仲有...個老細巳嘅態度都唔係咁好,有D似唔休做呀!

就係依幾個原因,我地都就話下次唔去依個場啦!

不過摘士多啤梨真係好好玩呀...所以如果有機會我都想再去摘呀!

美味意粉餐

今日又係屋企玩煮飯仔,不過今日依一餐就唔係撑枱腳。因為LULU妹知道我今日煮意粉,所以就又要嚟食,所以今晚就三人晚餐啦!

除左煮肉醬意粉之外,仲煮埋雞翼。

之前都有試過煮意粉,不過都唔好食,可能係出水方面有問題。不過今次我問左好多人意見,整出嚟都好好味,起碼都有口感呀!哈哈~~終於成功啦!

成功嘅肉醬意粉

雞翼我今次用左可樂味卥水汁,整出嚟真係好香可樂味...好好味呀!

哈哈~~唔知係唔係好好味,好快就清晒所有意粉同雞翼啦!(又有人係度讚自己啦!) 

我仲整多左,留埋整明天個LUNCH BOX,終於都可以帶飯啦!

2008年3月2日星期日

病夠未???

由新年開始,一直都病病地,睇醫生都睇到我怕啦!原本都以為自己已經好番晒,不過...又嚟過,真係好煩呀!

都唔知仲乜,尋晚可以話成晚都冇覺好訓,個喉嚨成晚都好鬼痛,仲不停係度乾咳,又唔敢咳太大聲,驚嘈醒大肥豬。真係唔知自己想點.....

今朝直頭出唔到聲,終於又要請假去睇醫生呀!唉....再係咁請假,就嚟俾老細列入黑名單啦!

真係病到成個人都好忟,究竟幾時先病好晒呀.....

 

2008年3月1日星期六

開心晚宴

今日約左兩位舊同事嚟我個新居打邊爐。

對上一次同佢地見面就係我結婚嗰日,一位就幫我手做姊妹,另一位就當日有事唔可以參加婚宴,但都好有心咁嚟同我地影相同祝福我,所以今日就請左佢地食飯,表達我地嘅小小心意啦!

當我買餸時都好驚唔夠食,好在...佢地個個都食得飽飽咁,都真係安心晒啦!

今日我自己就非常開心,希望佢地都滿意今日依一餐簡單嘅邊爐宴啦!

我位好姊妹送左一份好靚又合用嘅禮物俾我地,就係依支MARIE燈燈。

好合心水呀,因為我地都準備買支枱燈,仲要係MARIE,真係好驚喜....唔知點講好啦!總之係開心啦!

不過..真係唔係幾好意思,又要破費買嘢俾我地,真係只可以再講多一次:多謝晒呀!