2008年4月30日星期三

迪迪尼之旅

哈哈...今日我地著住上次係迪迪尼買左嘅史迪仔情侶裝,向迪迪尼出發啦!

不過,今日真係比上幾次去多左人,係應該話多左好多內地人。

我地都成差唔多十一點幾先入場,都要排隊,真係都未試過。嗰時先醒起係五一勞動節,當然多內地人啦!不過...唔緊要,最緊要係去玩嘛!

我地第一個目的地當然就係新GAME~~小小世界!

可能係新關係,都真係幾多人,我地都排左成四十分鐘左右先上到船仔呀!

為左可以睇得全面D同影多D相,我地要求左坐第一行。開頭都唔知得唔得,點知個職員好好咁叫我地行埋一面等上第二班船仔嘅第一行~~正呀!(真係要讚賞佢地嘅服務態度呀!)

坐前D真係唔同D,可以全面睇晒左右兩邊嘅公仔。成個佈置真係好靚,D公仔真係好得意呀!不過唯一覺得美中不足嘅就係香港個景真係好普通,唔多靚呀!

我地影左唔少相添,所以..各位準備去小小世界嘅朋友,記得坐第一行啦!


去完小小世界,我地就去左搵公仔影相啦!今次雖然唔係同好多公仔影,不過終於可以同DONALD & DAISY一齊影啦!

之後就去左花園影公仔啦..

我地仲同左『伊哦』影,係第一次同佢影呀!

唔知點解今日唔係咁多公仔出嚟,同唔到史迪仔影呀!不過,最唔開心都係...我又再一次搵唔MARIE影相啦,真係...MARIE幾時先出嚟呀!

影完相就先去拎SPACE MOUNTAIN嘅FASTPASS,之後就去左大街睇精品啦!

原本都唔打算買野,不過唔知仲乜今次竟然多左好多MARIE精品,所以都心思思想買。最後大肥豬見我咁鐘意,就送左依兩個電話繩俾我啦!哈哈~~真係開心呀!

夠鐘去玩SPACE MOUNTAIN啦!今次玩真係完全唔驚,仲一邊大叫又大笑,真係成個人都傻左咁呀!反而大肥豬話有少少驚呀。睇下我個樣幾攪笑~~

其他GAME都真係太多人,所以都冇去玩其他。

加上又有少少雨毛毛,所以係門口影埋張相就走啦!

不過...我知道我好快又會再去迪迪尼呀!希望下次可以搵到MARIE影相啦!各位朋友仔如果知道MARIE蹤影記得話我知呀!

2008年4月28日星期一

失望的金鳳

今日大肥豬約左兩位兄弟去山林道金鳳食飯,我同依兩位兄弟都熟熟地,所以就同大肥豬一齊去啦!

其實係我未去過,成日都聽人講金鳳鋸扒又抵又好味,所以都真係好想去試吓呀!

我地大約七點未夠就去到,當時都唔係太多人,所以都坐得幾舒服。可能因為太早關係,加上之前食左一大碗南瓜西米露,完全唔覺肚饑,所以我都冇自己ORDER一份,偷大肥豬一塊仔就算啦!

食嗰方面都OK啦,佢地個扒份量係好大,都有成兩大塊豬扒,仲大過塊個鐵板,D肉仲好淋呀!不過其中一位兄弟話佢地落左梳打粉,所以先咁淋哦!

不過飲野嗰度又真係唔係幾好,杯餐飲真係細得過份,同普通茶餐廳"免費茶"個SIZE一樣,加大先係叫茶餐廳嘅正常SIZE呀!

成個餐廳個環境都一般(有少少似普通茶餐廳),加上服務又麻麻,真係對金鳳有少少失望呀!(可能係我之前期望高左啦!)

2008年4月26日星期六

我的住家男

今日帶左LULU妹去朋友仔度整負離子,所以成個下午又得番大肥豬一個係屋企。不過就係因為依個原因,大肥豬又俾左一個驚喜我啦!

我今晚食完飯返到屋企,就發覺屋企好大唔同..就係好乾淨呀!(平時都算乾淨,不過今日就仲整齊呀!)

原來成個下午大肥豬就做左住家男,做左好多野..換床單、拖地、洗左一機衫,又洗埋個神檯..做左好多野,總之就執得間屋好整齊啦!

除左執屋之外,大肥豬仲將我之前係油畫街買幅牡丹花畫掛埋上牆呀!

一個下午可以做咁多野,都真係唔可以唔俾個叻叻大肥豬呀!

其實一向大肥豬都有幫手做家務,某程度上佢仲做得仲多過我。不過今日佢一個人留係屋企做到咁多野,又真係令我覺得好開心,又感覺到自己好幸福呀!(哈哈..唔可以俾大肥豬知..如果唔係佢又飄飄然啦!)

2008年4月25日星期五

我的奶奶

今日返左小豬媽屋企食飯,食完飯見冇乜電視睇,加上又倦倦地,所以就早左少少走,諗住返屋企整吓嘢咁!

當我地返到屋企樓下,突然有人大叫大肥豬。原來就係奶奶,因為佢煲左D涼茶,所以就拎嚟俾我地,又帶左D生果俾我地食。

當我地見都奶奶時,都真係幾突然,因為之前都完全冇聽過佢話拎野俾我地。加上都成九點幾,佢應該都等左我地一段時間!

原來奶奶唔識用部新電話,所以唔識打電話搵我地,所以就係樓下公園仔等我地返啦!

依件都係一件開心事,因為佢專登拎野俾我地,都好感動。

不過就有少少內疚,要佢一個老人家係樓下等我地,雖然佢都係公園仔坐,但始終都唔好嘛!

真係...要快D教識佢用電話先得,等佢下次再嚟可以先打電話俾我地嘛!

2008年4月24日星期四

旺角大購物

拎左小茵BEAR BEAR之後,就去左花墟匯合埋大肥豬,買小盆栽啦!我地想買小盆栽擺係櫃面,美化下間屋,有D綠色野望落去都靚D啦!

我地行左一陣,就好快咁已經買到一枇細細地嘅萬年青,之後我地又去買埋玻璃樽同彩石珠仔啦!

離開時經過花園街,見到有一D好靚嘅幻燈擺設,會變好多顏色,真係好靚呀!大肥豬見我睇左好耐,所以就買左兩粒送俾我啦!哈哈..好開心呀~~

因為我地都好心急咁想快D返屋企整小盆栽,所以我地就食完飯就即刻走啦!

返屋企真係衫都未換就開始處理我地嘅小萬年青啦!

睇見人地D小盆栽整得好靚,以為好易啦...原來都幾難整呀。大肥豬整完又整(又唔俾我幫手哦!)...整左好耐先叫有小小成積,最後用左差唔多個幾鐘先完成呀!

都幾靚呀!不過我總係覺得好似石仔唔多夠咁,遲少少就再去加D先得!

大肥豬真係整上癮,話要遲D買多盆放係電視櫃上面呀!

但我諗都要睇下依盆小萬年青生長情況先決定,因為我種乜都種唔耐,好快就……

希望今次唔會啦,依盆小萬年可以快高長大,唔好浪費大肥豬嘅心機啦!

2008年4月23日星期三

終於都齊晒啦

齊晒啦...今日連最後一隻『燈芯絨BEAR』都有埋啦!

真係多謝BLOG友仔小茵嘅幫忙。

睇吓...佢地終於都齊齊整整,一家團聚咁企左係電視機前面,真係又可愛又靚,哈哈哈..

依家換整晒啦..都真係幾開心呀!不過...我估開心都唔會咁早,因為睇番之前嘅經驗,7仔都應該會幫佢地出特別版,如果真係...就要再繼續換..換....換啦!

所以依家都留定D印花,等出特別版就再去努力先得。

2008年4月22日星期二

大昏迷

尋日我地學校開左運動會,一早七點幾就要去到運動場STAND-BY。唉...所以一早五點幾就要起身,六點幾就要係巴士站等車,真係慘啦!

雖然我個工作量都唔算多,留左係司令台做野,有一段時間都好忙,好在有同事幫手,所以都好快攪得到,仲冇做錯野呀!YEAH~~

但尋日嘅天氣真係太好啦...曬都我變左隻黑豬仔,真係要做番幾個美白MASK先得啦!

由於尋日太早起身,又忙左一朝,所以都真係都倦,當我食完飯番屋企,洗完白白之後就衝左去訓訓豬啦!(連電腦都冇開,就知我真係有幾倦啦!)

今日大肥豬話番我知....原來我尋晚真係好似昏迷咁,訓到冇晒反應,真係自己都覺得勁呀!

尋左一晚都總好似倦倦地,好似仲未訓夠咁,所以今晚又要早D訓先得啦!

2008年4月20日星期日

小肥豬靚樣

哈哈..見大家想睇吓我個新髮型,就等我將依個靚靚樣俾大家睇啦!

依個係尋晚等食飯冇野做時,拎BEAR BEAR出嚟玩時影,仲俾大肥豬話我傻呀!

不過....唔知點解影得好暗呢!

話我傻...當然要捉埋佢影啦!

其實都只不過係做左負離子,D頭髮直左好多,又貼左好多....總之就靚左好多啦!(救命呀...又有人係度自戀狂啦!哈哈~~)

真係好多謝發明負離子嗰位人仕,等我地依D多頭髮嘅人可以方便打理,又可以變靚呀!

2008年4月19日星期六

有經典BEAR啦

哈...哈...哈....今日終於都擁有依一隻『經典BEAR』啦!

真係多謝BLOG友仔☻メーキャップcc☻ 嘅幫忙。

不過,唉...剛剛又去左7-11換BEAR BEAR,但都係一樣,抽唔到我想要嗰隻。

心諗..係依個時刻都應該幾難,因為我只有六分一機會先可以抽到最後依一隻,都要好好運先可以一抽即中呀!

依家仲差一隻....仲差『燈芯絨BEAR』,希望佢快D出現,等佢地一家團聚啦!

2008年4月18日星期五

幾時先換齊

係7-11剛剛開始換BEAR BEAR時,都係打算換一兩隻。不過依家換吓換吓,好似上左引咁,成日都好想去換BEAR BEAR....(連大肥豬都俾我攪到上引,同我爭住睇個盒仔係邊隻BEAR呀!哈哈)

經過我嘅努力(當然都好多謝朋友仔俾D印花我啦!),係上個星期已經換左依四隻BEAR BEAR。

哈哈...我仲好開心咁,因為頭四次換都冇相同。某程度上都覺得自己好好彩,冇抽相同呀!

不過...好運原來係咁快就冇啦!

尋日..又再去換左三隻BEAR BEAR,點知....終於都相同啦!唉....都真係DOWN DOWN地,以為自己可以好快換晒。

我依家仲差『經典BEAR』同『燈芯絨BEAR』,唔知幾時先可以換整晒佢呢?

2008年4月16日星期三

溫溫登登

尋日因為發燒加上氣管敏感,攪到抖唔到氣,所以冇返工,睇完醫生返屋企又再繼續訓,總之成日都係訓...訓....訓,乜都冇得做,電腦又唔俾開,真係訓到個人都傻吓傻吓!

今日以為已經好番好多,起碼可以叫做抖到氣,又冇乜點燒,不過就可能食左兩日藥,基本上今日都唔知自己做過乜,攪到成個人都『溫溫登登』,真係食藥都食到驚啦!

究竟幾時先好番晒,成個人可以精神番呀!我星期六同日仲有好多節目,我唔可以再係咁落去,我要精神.......我要精神.....

2008年4月14日星期一

集三種動物於一身

依家天氣開左回暖,當然又係換季好時機啦!

就係因為已經著左夏天衫關係,俾我發現左一個現象~~~就係原來我真係肥左好多..好多...好多!

頭先係商場玻璃見到自己,真係...覺得自己依家集合左三種動物於一身。首先就係『麒麟臂』、之後就係『豬腩肉』,同埋『大象腳』。唉...問你死未!

鬼咩..結左婚之後都冇再戒口,成日都係度食..食..食,加上係日本又餐餐都食飯....想唔肥都幾難呀!

依家真係發覺自己冇改錯名,直頭係一隻『小肥豬』!

雖然大肥豬話我肥肥白白都幾好,叫我唔好再走去減肥,不過,見到自己依家個樣...真係要迫自己檢討吓,唔可以再放鬆,唔可以俾自己再肥落去...

我地努力KEEP番....唔想做『肥師奶』呀!

2008年4月13日星期日

困擾

我係唔係真係好似水魚..點解次次找著數都要向我埋手。

講真..一次半次我可以當真係唔記得,不過次次都係咁就一定冇可能啦!(仲要俾我知道佢對其他人唔係咁…嘩!乜事先…我好蝦D呀!)

依個問題都已經困擾左我一段時間,同佢講..又怕俾人感覺好小氣,冇朋友做,仲要俾人唱。

不過唔講…又怕繼續係咁(我自己當然好唔鐘意啦!)。

我都有諗過避,但點避呀!避得一時唔避得一世,唉…都唔知點算好!

講真,我自問都唔算係一個『孤韓』嘅人,大家係朋友就唔會斤斤計較,有時你請下我食野,我請下你飲野,都幾好呀!但次次都係咁…又點會唔令人反感呀!

不過當一個壞習慣已成養成時,大家嘅友誼係唔係已經變左質呢?

唉..我都唔識點講啦!總之…就係煩啦!

2008年4月12日星期六

東京蜜月之旅 - 第五天

3月29日:第五天的行程
新宿 ~ 成田機場 → 香港

終於都到左最後一日,依日真係好...八點鐘先MORNING CALL,食完早餐有三個鐘自由時間,可以作最後衝刺去SHOPPING啦!

我地食完早餐就一支箭去左伊勢丹百貨公司買嘢,就係依日,大肥豬買左兩個 Agnes B袋俾我,哈哈~~真係開心啦!

買完袋之後,都冇乜野想再買啦!都係周圍行吓睇吓野,時間好快就過...我地又要集合啦!

我地食埋個午餐,就去成田機場啦!

去到機場三點幾,仲有成個幾鐘先飛。CHECK-IN之後,我地就入左去免稅店行吓。原來免稅店真係乜都有,都幾多野睇,我地仲用最後依個時間買左D草餅啦!

今次終於有窗口位坐啦!不過好攪笑,原本我地兩個係度玩自拍,點知有位空中小姐走埋嚟,問洗唔洗幫我地影相,我當然唔放過,叫佢幫我地影啦!哈哈~~

可能係天黑啦,雖然坐窗口位都好似冇野睇,不過大肥豬就睇得好開心,成程飛機都冇關窗呀!

我就悶左四個幾鐘,訓左一陣,終於都返到香港啦!

就係咁.....完成左我五日嘅蜜月之旅啦!

雖然係迪迪尼依日有少少失敗,不過整體上都好好玩,好開心呀!希望可以好快再去旅行啦!

2008年4月11日星期五

東京蜜月之旅 - 第四天

3月28日:第四天的行程
全日東京迪迪尼

我地一早就去迪迪尼,我依個迪迪尼嘅FANS,真係超興奮呀!

係等導遊買入場卷時,見有間精品店,當然又去睇嘢啦..仲買左第一份迪迪尼禮物俾自己,就係小飛像頭裝飾。(因為我都好鐘意小飛像呀!)

終於都入場啦...

一入到去就見到好多公仔係度同人影相我就衝埋去想同佢地影啦,不過...真係好唔開心呀!因為佢地唔同香港排隊影,當我捉到隻公仔時,打算影啦!點知...一係佢唔理我,繼續同日本小朋友玩;一係就俾其他日本人捉去同佢地影,真你激死我啦!但依D公仔香港冇...所以都要去影。好在有其他團友一齊幫手,最後都影到幾張。

當影完之後,其中有一隻公仔(就係依隻白兔)竟然推開我....好唔開心呀!


之後我地就開始去玩啦!經一位團友介紹,我地第一時間就去『鬼屋』拎FASTPASS,見未夠鐘,又唔係太多人去『小小世界』,所以就排左半個鐘入去坐船仔啦!

玩完就剛剛好去『鬼屋』,其實我都幾驚依D野,不過見團友極力推介,咁就去啦!入到去其實一D都唔驚,仲覺得好佢地D效果好靚呀!

因為未夠鐘去拎另一個GAME嘅FASTPASS,所以就去左睇『3D電影』,講真...我就覺得麻麻地,都係香港嗰個好睇D。

當我地想去拎過山車嘅FASTPASS時,點知...竟然派晒,就連其他嘅GAME都派晒。見到條人龍都真係長到嚇人,D職員話要排三個鐘左右。嘩...點排呀!所以我地都冇再去玩其他GAME,周圍行下啦!

可能因為嗰時係日本學生放假,真係去到邊都係人,連食野都要排隊...唉!終於揀左一間冇咁多人排隊地方食野,當然...就勁貴呀!我地兩個人食左成二百幾蚊港紙,都係食得好普通.....真係唔太抵呀!

之後我地就入左去卡通地影相,因為我真係鐘意依D童話地方多D。嗰度真係好靚呀...D佈置又得意,所以我地都係嗰度留左好耐。

仲俾我見到好多公仔出嚟同人玩,我當然又走左埋去影..影..影啦!(不過個情況係同門口一樣...唉!等左好..好..好晒先影到呀!)

差唔多夠鐘巡遊,我地霸左一個都算OK嘅位睇啦!佢地真係出左有好公仔,隻隻都有特別打扮,好靚呀!不過我就覺得佢地好似氣氛唔係太好,音樂聲好細呀..係架車嚟到先聽到個音樂呀!

睇完巡遊,我地就開始去D精品店行街街買嘢啦!點知,係依個時候,竟然有好多人衝入嚟。原來...落大雨,雖然我地有雨傘,不過實在太大雨,D人又迫咁入嚟,所以就被困係度差唔多半個鐘....唉!

見細雨左...我地就去番大街行吓,諗住嗰度唔會整濕。點知...又係超勁多人,我地行都行唔到入去,都唔知點好。唉!

不過為左要買禮物,好辛苦先迫到入去,買完出番嚟都真係得番半條人命呀!慘...

邊度都係人...都唔知做乜好,仲有成三個幾鐘先走,所以大肥豬就提意我地自己早D走(因為原來導遊會係晚上九點幾先嚟接我地),返酒店附近行吓。

於是,我地就打電話俾導遊問點走,見好似唔係太複習,所以就同埋另一PAIR團友一齊搭JR走啦!

雖然唔係太開心要早離開迪迪尼,不過都好..因為大肥豬成日都話要試搭JR,都可以話係另一個節目呀!

我地一上到去車箱見到個地圖,都真係有少少驚,因為太複習啦!好在....我地依導遊教我地方法,都好易去到...冇搭錯車,我地終於番到新宿啦!

返到酒店休息一陣,都係七點鐘左右,仲有時間去去行街街買嘢呀!

原本依一日應該係我成個旅程最開心嘅一日,可以去迪迪尼玩!點知,又勁多人,又落大雨....唉,真係勁失望,同埋...我真係覺得東京迪迪尼都唔係咁好,佢地好有民族感,唔多理唔我地依D非日本嘅人,(因為我地團入面都有一個BB 仔,D公仔都唔理佢,只係同日本人玩呀!SO POOR~~)

係依個時間都真係幾掛住香港迪迪尼,我相信我係唯一一個鐘意香港迪迪尼多過東京嗰個呀!

仲有其他嘅相,因為UP唔晒上BLOG,大家有興趣就CLICK去下相簿面睇吓~

蜜月旅行第四天@東京迪迪尼

蜜月旅行第四天@東京迪迪尼(巡遊)

2008年4月10日星期四

東京蜜月之旅 - 第三天

3月27日:第三天的行程
HELLO KITTY LAND ~ 豐田汽車城 ~ 銀座 ~
 淺草雷門寺 ~ 新宿歌舞伎町

今日個行程係非常緊密,又要由富士山區去返東京市一帶,所以一早六點就MORNING CALL啦!(真係一日比一日早呀!)食完個早餐之後,我地就上車再訓過。

去到我地第一個目的地,就係HELLO KITTY LAND啦!當我一入到去就見到好多玉桂狗嘅佈置(玉桂狗係我至愛呀),原來三月係玉桂狗嘅生日月,所以用左嚟做主題佈置,真係開心死我呀!

當我地一行入去,就見到幾個玉桂狗朋友仔,我當然走埋去同佢地影啦!真係正呀...不過等左一陣都冇玉桂狗呀!

同公仔影完相,我地就去行精品店,邊影相邊掃佢D精品啦!

因為我地自由活動時間唔多,所以行完幾間精品店都已經夠鐘。好唔抵呀...係我地準備離開時,見到KITTY出嚟同人影相,原本我都想去排隊影,但因為人龍真係太長,又怕太遲返去...所以都冇得影呀!

去完我好鐘意嘅地方,第二站終於都到大肥豬鐘意嘅地方啦~~就係豐田汽車城啦!

我對車都真係完全冇興趣,不過就陪大肥豬睇吓,幫佢影吓相啦!(終於有一個地方係佢影相多過我啦!哈哈~~)

睇左一陣車,仲有少少時間就去附近個商場(唔記得左個名)行吓啦!

行過見到有得夾公仔,所以就去玩啦!我竟然好叻..第一次就夾到,真係勁開心,我都唔黑仔王得晒。哈哈~~

之後我地就去銀座,講真...都真係冇乜野睇,可能我地得一個鐘時間,唔敢行太遠。所以我地都係行左一陣,影吓相証明嚟過就算啦!

下一站就係雷門寺,去到時都已經係六點幾,因為時間關係,我地行街時間一個鐘都冇呀!基本上都係好快速咁睇下D鋪頭仔買乜!

之後就返去新宿啦!我地先去酒店放低行李,食完導遊安排嘅自助餐,我地兩個就去歌舞伎町出發。(終於都可以唔洗一早返酒店唔知做乜好啦!)

我地四周行,又去夾公仔(當然係夾唔到啦!),又去行日本藥房,總之就係行..行...行..睇野啦,都係行到倦先返酒店呀!

我地住兩晚太子酒店,但間房都真係好...好...好細,不過日本市間間都係咁啦!雖然係細,不過我訓咁多間酒店,依兩晚係最好訓哦...可以一覺訓到大天光呀!哈哈~~

仲有其他嘅相,因為UP唔晒上BLOG,大家有興趣就CLICK去下相簿面睇吓~

蜜月旅行第三天@HELLO KITTY LAND

蜜月旅行第三天@豐田汽車城

蜜月旅行第三天@銀座

蜜月旅行第三天@淺草雷門寺

蜜月旅行第三天@歌舞伎町