2008年5月31日星期六

開心的一天 PART 1:極速迪迪尼

六月係一個好重要嘅日子,除左小豬媽係月中生日之外,仲係我另一個重要人物嘅生日...就係我個大肥豬老公啦!

不過大肥豬今年生日就係父親節,就因為咁..今日就安排左少少節目同佢預早生日啦!

因為嚟緊依幾個星期都比較忙,未必抽到時間入迪迪尼拎佢嘅生日襟章,所以我係今日去玩之前抽少少時間入迪迪尼拎禮物啦!

當然一入到去迪迪尼就即刻去拎佢嘅生日襟章同生日咭。(睇吓大肥豬幾開心..)

當我地拎禮物時,個職員就話我地知米奇同米妮已都已經換左夏天新裝,同埋已經有水花巡遊啦!不過因為時間關係,我地冇睇到個新巡遊。(佢地成個暑假都會有水花巡遊,下次先睇啦!)

知道米奇米妮換左新衫,當然第一時間去排隊影相。不過樂園真係唔係好多人,所以我可以排第一,真係未試過呀!係等嘅時間冇野做,就係影相嘅時候啦~

玩左一陣,米奇米妮出嚟啦...佢地件新衫好靚呀!

唔知係唔係大肥豬有生日襟章關係,我地影左都好幾張相,仲有張係好攪笑嘅嘴嘴相呀!

當然都仲有正經相啦~

影完相之後,大肥豬就建議去玩SPACE MOUNTAIN,仲玩左兩次。兩次都係住第一行,真係好好正呀!

玩完之後,我地就約埋兩位朋友仔去另一個地方玩,所以就離開迪迪尼啦!

今次都可以算話係我地最快離開迪迪尼,不過唔緊要,因為今日主要活動都唔係依度,好戲在後頭呀!哈哈~~

依D就係迪迪尼送俾大肥豬嘅禮物啦!

2008年5月30日星期五

有新相機玩

之前見匯豐信用咭又有PROMOTE,新申請有相機送,所以又發揮師奶仔本色去左申請。雖然自己都有相機,不過總係有優惠唔好放過嘅心態。

今日大肥豬放假就去左幫我去拎依份迎新禮品啦!

個外型都幾好,手感都唔錯,佢個幕都OK大,FUNCTION都好似幾多,都好似都幾好咁。但就因為免費關係,冇其他顏色揀,只係得銀色,如果有粉紅色就好啦,一定靚爆呀!

哈哈...依家充電中,留番星期日去街街試機!

2008年5月29日星期四

小豬媽的生日禮物

每年小豬媽生日,我都會送嗰年嘅生肖金擺設俾佢,唔覺都已經送左十隻啦!

小豬媽六月中生日,我地見D金價依幾日回落左少少,加上大肥豬今日又放假,所以今日就同小豬媽一齊去左金鋪,預早送生日禮物俾佢啦!

去到金鋪,真係可以選擇嘅唔多,一係就好細隻,一係就隻老鼠仔唔可愛,所以我地三個人都睇中左依隻添,仲好快咁決定買依隻呀!

依隻又OK可愛啦,仲拎住一桶金,幾好意頭呀!

 

2008年5月28日星期三

表妹的手信

今日同放工又約左小豬媽飲下午茶,當我一見到小豬媽時,就收到兩份禮物。

依兩份禮物就係我個嘉汶表妹(即我個伴娘仔~)上星期去日本旅行時,買俾我嘅手信。

哈哈...真係好開心,估唔到表妹仔去旅行到有掛住我。

返到屋企第一時間睇吓我嘅禮物,首先就一個好靚靚嘅玉桂狗小食包,個袋真係好靚呀!

之後就仲有一盒日本空運到港嘅士多啤梨,頭先偷食左一粒,真係好甜呀!

係度真係要同嘉汶表妹講句:好鐘意,多謝晒你呀!

簡單的晚餐

今晚大肥豬又要OT,九點幾鐘返屋企,所以我就等埋佢返嚟先食我地嘅晚餐。

就係咁...所以我都煮左烏冬麵加碟菜,簡簡單單咁啦,因為晏左食飯,唔好食得太飽嘛!

不過...我今日除煮左簡單晚餐之外,我仲整多左個甜品。話時話,依個甜品都用左我好多時間呀!

因為我前幾日煮西米露時仲有一大包,開左我又唔想浪費,所以尋日就麻煩左我個好同事糖糖幫我買紅豆蓉同借D碟仔俾我,今日一返到屋企就整依左個紅豆西米糕啦!

整呀整...終於都浸好左西米,加埋紅豆蓉,鋪好晒準備蒸啦!

因為第一次整關係,我唔知幾時先熟,所以都企左係個爐前睇火,真係好鬼熱呀!

蒸左好耐...終於都蒸好啦!紅豆西米糕出場啦....個買相都好似幾好咁哦~

第一個完成作品當然係俾大肥豬食啦,不過佢都未係出面食過,所以唔知同出面有乜分別,但就話淡左少少。真係有少少失敗添....下次要再努力先得!

唉..仲諗住拎D俾同事食,都係唔好啦...等我成功左先啦,唔好嚇親佢地呀!哈哈~~

2008年5月26日星期一

愛心西米露

今日大肥豬要OT都成九點幾,所以我自己就返左去小豬媽屋企食飯。不過我食完飯就早左少少走,因為我有一個重要任務呀!

下午當我打電話問大肥豬要唔要煮D野俾佢食時,佢就話開OT前會食左野先,不過返嚟有特別野食就好啦!

係電話度我當然話唔彩佢,但其實都開始諗整乜俾佢食呀!

突然間諗起之前買左包西米,所以我就決定整一個簡單嘅糖水~~椰汁西米露。

不過我都係第一次整,所以都唔係太識。好在...我有小豬媽教路,聽落都好似好易,所以放工陪小豬媽買餸時買埋我所需要嘅材料啦!

一返到屋企就即刻開始煲西米....煲椰汁....希望可以係大肥豬返到屋企時完成,俾個驚喜佢呀!(為左要睇火,我都冇乜點睇電視呀!)

經過一輪努力,我嘅愛心西米露完成啦!

大肥豬見到就當然好開心,大讚好味,仲食左兩大碗呀!我地仲留左兩碗聽日凍食....真係正呀!

雖然係簡簡單單,但見大肥豬食得咁開心,我自己都好開心、好有滿足感。真係好有動力去學整多D野呀!

2008年5月25日星期日

再遊迪欣湖

去完迪迪尼,我地就去搭七蚊巴士去迪欣湖啦!真係唔抵,車程唔洗三分鐘,就去到目的地。依程車就真係貴,不過冇法啦...邊個叫我地懶唔行去呀!哈哈~~

今次去迪欣湖嘅目的就係去玩個腳踏船。因為之前CHECK過原來我張全年通行証係可以免費租用,有優惠當然唔執輸,所以一去到迪欣湖就即刻去玩啦!

係未上船之前就先著救生衣



著完救生衣,聽救生員講吓一般安全措施同教我地操作船仔,之後就上船啦!真係都幾緊張,因為我係第一次玩呀!

一上到船仔就用力咁踏都真係好倦,不過又真係勁好玩呀!

我地仲踏到去湖中水個噴泉附近,個噴泉真係勁,D水花飄過嚟,攪到我成身濕哂。大肥豬仲話要玩幾次飄水,所以我成個頭都差唔多濕晒,不過個感覺又真係勁正,勁好正呀!

踏到好倦,我地就係個湖中心飄浮,慢慢感受吓D湖光山色,又影吓相啦!

我地都係個湖玩左成個鐘,雖然係好倦,成對腳都好似冇晒力咁,不過又真係勁好玩。大肥豬仲話玩得好開心添!

原本打算玩完船仔四處影相,不過我地真係用力過度,真係好倦,所以冇去影,搭車走啦!下次先再去影相啦!

開頭都以為只可以免費一次,一問之下,原來張全年通行証係可以成年免費租用,咁我地下次去完迪迪尼,又可以有多一個節目..就係嚟玩腳踏船啦!

2008年5月24日星期六

先嚟迪迪尼

原本今日有野做,不過臨時取消左,見有時間又諗唔到有乜特別地方想去,所以我地又去左迪迪尼啦!(哈哈~~我地張全年通行証要回本嘛!)

不過...當我地搭地鐵去到迪士尼站時,突然間落好大雨,真係好驚要即時要回程。大肥豬話應該係過雲雨,建議我地係迪士尼站時等左一陣先再決定走唔走。

好在..我地等左十分鐘左右就停左雨啦!我當然即刻出閘,衝入迪迪尼啦!哈哈~~

雖然已經停左雨,不過間中都總係有少少毛毛雨,可能因為咁..今日成日都冇乜人,真係未試過係大街影相冇其他人呀!



一入到迪迪尼,當然第一時間去同公仔影相啦!不過..我又係見唔到MARIE~~~唉!算啦..已經放棄啦!

可能落雨關係,真係冇乜人,我地係影公仔花園唔洗半個鐘就已經影晒咁多隻公仔,真係未試過。每個公仔都影左幾張,冇人吹你影快D,個感覺真係勁正...我仲同米奇影左兩次呀!哈哈~~

影完相就當然去玩GAME啦!我地今次又有新嘢玩,就係依個哈囉阿古!

開頭我都唔知已經出左依個GAME,見有其他人行去就跟住行,原來就係去玩個GAME,依個就同史迪仔個GAME差唔多,都係一個玩互動嘅,都OK幾好玩呀!大肥豬仲俾阿古捉左做訪問添。哈哈~~

之後我地就去玩SPACE MOUNTAIN,唔多人排隊,我地仲連續玩左兩次,真係勁好玩呀!

當然我地又再去玩小小世界啦!真係勁正...我地包船呀!哈哈~~今次我地又有新坐法,就係我坐第一行,大肥豬坐第二排,咁就可以影到多D靚相啦!哈哈~

玩完出嚟大肥豬就買左杯可樂冰俾我飲...解凍呀!

真係開心到飛起呀!哈哈~~

 

因為成日都冇乜人,好快就玩晒我地想玩嘅GAME。所以就去四圍影相,不過我地搵唔到人幫我地影合照,但就好多都係單人相(其實都係得我一個影。)我影左好多單人相,仲學人擺POSE添~~

最後我地又行精品店,又見到有T-SHIRT做半價,所以我地又買左兩件情侶裝,留番下次再去迪迪尼著呀!

行完街街之後,我地就早早地離開迪迪尼,再向迪欣湖出發啦!

2008年5月23日星期五

陳年舊照

前幾日返小豬媽屋企食飯,唔覺唔覺竟然俾我攪到係N年前,小豬媽帶我去影影樓輯相嘅底片。

依一輯影樓相係我十八歲生日時小豬媽送俾我嘅生日禮物,我仲記得當時係剛剛係香港開始興起去影樓,所以影依輯相都幾貴吓呀....諗番起都幾肉痛呀!

其實我一直都KEEP得個菲林幾好,不過為左可以再保存好少少,我拎左去SCAN左做VCD,希望可以再KEEP得好D嘛!

話晒影嗰時都係青春美少女(真係嘔..哈哈!),又係一個重要嘅年歲相...十八歲...成年啦!哈哈~~

見放左入電腦,就俾幾張大家睇啦~~

唔睇唔知...都已經係N年前嘅事啦!自己睇番都有少少驚嚇,所以唔敢放太多出嚟(怕大家太驚訓唔著呀!),每個LOOK一張啦!

唉...真係時間令人有老了的感覺呀!

2008年5月22日星期四

兩個消息

今日分別收到兩個朋友仔唔係幾好嘅消息,聽完之後都真係....唔開心。

雖然件事唔係發生係自己身上,但唔知點解一聽到個心總係戚住戚住,個心又真係唔係好舒服。

我係一個不善言語嘅人,自己又唔知點幫佢地好,好怕會講錯嘢,明明想安慰開解佢地,點知又令到佢地更加唔開心....都真係唔知點好啦!

依家唯一可以做就係靜靜地坐埋一邊,唔好問...當冇事發生,等待需要時盡我能力去幫啦!

真係希望依兩位朋友仔嘅情緒可以好D,件唔開心事可以快D離開佢地....可以開開心心咁過每一日!

2008年5月20日星期二

仲乜又係我..

今日一朝返工就真係激死我....攪到成朝都真係完全冇心機.....仲乜次次都係我哦!

學生唔舒服,請家長嚟學校接...有錯嗎?
點解好似講到我好似趕個學生走咁,唔舒服當然要返屋企休息啦....我又唔係醫生,點知個學生係唔係嚴重,學生有事當然要通知家長啦!一間有乜事就又係我有問題....我都係職責所在...有錯嗎?

學生冇返學...我打俾你...有錯嗎?
我唔打俾你,我又點知個學生真係有事唔返學定係自己途學呀?我都係工作上需要先打俾你地,仲乜要講到好似我打嚟嘈醒你咁呀!我都係工作上需要....有錯嗎?

我都知我嘅人工有三分一係包受氣,如果真係我有問題,我OK囉...不過我都冇做錯...仲乜次次都係我呀?好唔開心....

2008年5月18日星期日

悼念四川死難者

中國國務院昨宣佈,今日起一連三天為全國哀悼日,全國及駐外機構下半旗,今日下午2時28分全國默哀三分鐘!

希望大家能參與一同為四川大地震遇難同胞默哀三分鐘。

天災無情,人間有情,活於幸福者,更應珍惜所有。

救助四川大地震同胞的捐款資料:

請大家幫忙將以下每個慈善機構捐款方法的圖檔廣傳開去,方便更多善長可以捐助中國受難同胞

有錢出錢  有力出力

              













以上各個慈善機構的戶口資料均在其網站節錄

如對捐款方法有疑問

請到各大慈善機構網站了解更詳盡資料

希望大家盡能力踴躍捐輸 為災民出一分力