2008年8月31日星期日

不幸嘅事終於發生

今朝一早起身,一如過往會去睇吓我對蟹仔。一個不幸嘅事......終於都要發生。

點知一望之吓,見到阿臣又裸體訓左係個水池入面...再睇真D,見到阿臣郁都唔郁,睇清楚D......斷開左兩節.....見到依個情景,真係要宣佈阿臣已經離我而去啦!

見到依個情況,心情都真係勁DOWN,即刻叫醒大肥豬話個壞消息佢知。不過...今次就比較平靜,可能俾上次阿癲疑似死亡個案訓練有數啦!

處理左阿臣之後,就帶住好DOWN心情返工啦!

其實一直都好擔心阿臣會有依一日,因為佢成日都裸體咁走出嚟。睇過一D網上資料講,如果蟹仔唔鐘意或者唔識應個殼,佢地就會裸體走出嚟。

依個阿臣大大話話都出過嚟好多次,我放左入去嗰八個殼都入過晒去,唉.....個結果都係咁。(不過都算好啦...陪我過左生日月先,如果唔係仲更加唔開心呀!)

2008年8月29日星期五

又嚟聚一聚

尋晚我個節目就係約左小M飯局聚一聚啦!

哈哈~~今次個飯局當然就係食我地都鐘意食嘅日本嘢啦,所以小M就帶左我去和民啦!話事話...和民都HIT左好耐,我都係第一次去食,真係大鄉理。

不過...我真係低估左和民嘅威力,可能係星期五啦,好多人等位,原本我都打算早少少去搵定位。點知,去到真係勁多人,都要等成廿幾張枱先到我地呀!

等左一陣,終於有位啦。雖然係耐左少少,不過我地座嗰個卡位又幾舒適,自成一角咁唔會俾人阻住傾計嘛!

我地今日個晚餐都好豐富,仲食左好多野添。小M真係冇介紹錯,樣樣都好好味,尤其係個魷魚軟骨,真係好正呀~

係食嘅途中當然我地兩個又係唔停咀咁傾計啦,乜都傾得一餐。我自己就傾都唔知時間,當走嘅時候我仲以為好早添,真係快樂不知時日過呀~

係飯局途中,小M就送左份生日禮物俾我,係一個MARIE電話座。真係好得意,好鐘意呀!

原來上次大小M上嚟我屋企打邊爐時,留意到我個電話只係放係枱面,所以就送個電話座俾我啦!哈哈...佢地真係細心,不過係白色關係,真係唔捨得用呀!

2008年8月28日星期四

黑仔之王...是我

今晚有節目,諗住靚靚地所以就帶隱形眼鏡返工啦!點知又再一次証實左『黑仔之王…是我』。

今朝戴隱形眼鏡上左眼嘅時候,都覺得怪怪地,不過因為時間關係,所以冇理到,趕住出門(因為我已經會miss左班車啦!)。

真係估中左,我一落到街就遠遠望住巴士離開,之後我就用九秒九速度,沿住條長樓梯行落山腳搭小巴。又熱又趕時間,真係行到成身濕晒!

一邊行就覺得左眼越來越唔舒服,一直都以為係有野入眼,所以一上到小巴就闔眼休息,諗住會好番啲啦!(不過都係好似冇改善呀~)

一返到學校乜都唔做,就即刻拎支眼藥水衝入廁所,諗住除出嚟洗吓佢再戴過。點知除左嚟睇,原來副隱形眼鏡裂左,仲裂得好勁,再戴唔番上眼。所以成朝都係單起隻眼做野,睇野勁辛苦,都唔係好敢用電腦,仲有少少暈暈地添。(嘩…好黑呀!)

好唔容易等到lunch,就立即衝去眼鏡88配番副隱形眼鏡。佢地都冇我個度數嘅現貨係度,不過嗰位職員知我苦況,就讓左其他客人訂左嘅俾我先。錢到未俾就即刻換晒成對,真係舒服晒.......眼前一片明亮呀!

經過今次黑仔事件之後,真係學識一樣野,就係放定啲隱形眼鏡係學校同埋化妝袋仔度,有乜問題都可以有得救,唔洗盲嬷嬷咁嘛!

2008年8月27日星期三

真係有著數

今日打開信箱,我同大肥豬都分別收到兩封信。一打開,嘩...好多COUPON啦!

哈哈...兩封信分別有五張焗豬扒飯COUPON呀~

上排見廣告話用PPS KILL BILLS,再上網登記就有得抽獎。作為一名師奶仔,有著數當然唔執輸,即刻叫本身有用開PPS交費嘅大肥豬即刻上網登記啦!

都登記左成個幾月,一路都冇收到E-MAIL通知(因為佢地要我地必須填上E-MAIL),都估冇行多啦!

係冇心理準備下,收到依五張COPUON,真係開心...

哈哈,雖然我對豬扒飯興趣都唔係太大,不過有COUPON哦,當然唔好浪費,嚟緊幾餐LUNCH又可以慳D啦!

Big Suprise

話說今年生日,大肥豬分別送左一對相片鎖匙扣同埋一個腳架俾我,我都已經好開心,因為依兩樣野都係我想要左好耐嘅野嘛。

點知....今日大肥豬返到屋企,就拎左一份禮物出嚟,俾左一個極大嘅SUPRISE我,真係攪到我非常開心呀!

登..登...登....登.....依份禮物就係一部相機

哈哈哈.....真係冇諗過依份禮物會係一部相機。部相機都幾好,個LCD又大,最好就係用AA電得嚟又唔重,真係可以唔洗驚影相影到冇電啦!

原來大肥豬聽我講過之前我隨身帶住嗰部信用咭換嘅相機影得唔係太好,所以就諗到買部相機俾我,等我可以隨身都影到靚相。

大肥豬今次又真係非常抵錫,估佢唔到又會咁細心,真係再一次俾我感受到活在幸福中呀~~

哈哈....有新相機同腳架,又係時候PLAN吓星期日去邊影相啦!

2008年8月26日星期二

今個生日好開心PART 3

因為要返工關係,我同大肥豬都話唔特別係依日去街街慶祝。最後大肥豬就提意帶我去打邊爐....哈哈~~我鐘意呀!

我地去係去左屋企附近嘅酒樓打邊爐,仲要係任食嗰隻呀!除左我地兩個之外,仲叫埋LULU妹一齊去打邊爐添。

雖然依間酒樓嘅選擇都唔算多,都係食D大路野,不過都幾新鮮,一行三人打邊爐,我地都叫左好多野食,食到好飽飽呀!

返到屋企,大肥豬就俾左個驚喜我啦!哈哈~~就係送左一個生日蛋糕俾我呀!

雖然打邊爐食得好飽飽,不過當然要即刻切埋個生日蛋糕啦

哈哈....婚後第一個生日就係咁好開心地過左,雖然好似好簡簡單單咁,不過開心就得啦。如果過得開心,日日都係生日日啦,最緊要係俾我知道其實身邊都有好多人好鍚我呀~~

今年我其中一個生日願望就係希望我身邊所有嘅朋友都可以開開心心咁就好啦~~(仲有一個願望唔可以講住,等我願望成真後先話俾大家知啦~~哈哈!)

最後...要再一次多謝各位朋友仔嘅祝福。

2008年8月25日星期一

今個生日好開心PART 1

哈哈...到啦~~到啦!今日就係我小肥豬嘅生日啦!

首先...多謝各方好友先,今日收到好多朋友仔嘅SMS、E-MAIL嘅祝賀。仲有依幾日各位BLOG友仔嘅祝賀留言,真係令我好開心..好開心....真係多謝大家呀!

今日雖然係生日,不過都係要返工。唉...冇法啦,因為就嚟開學,唔可以請假呀!

生日哦....當然打算放工就可以即刻走啦(因為約左小豬媽嘛)!點知....今日下午開個會竟然OVERTIME,攪到我要遲放工,都有少少唔開心呀~

不過,係我衝入OFFICE時,見到幾位同事都冇走到,仲係我枱面上放左個生日蛋糕,個心情即刻開心晒,仲有D唔好意思,要佢地等我...攪到大家要遲放工添!

之後大家就快快手咁食左幾張相留念,食蛋糕同我慶祝啦!哈哈~~

依個就係同事們送俾我嘅生日蛋糕

切蛋糕啦....(由於唔係太方便放與同事嘅合照上嚟,所以大家都只可以見到好開心嘅小肥豬呀!)

除左有蛋糕之外,同事們仲送左好多禮物俾我呀!

真係份份都好鐘意呀~~(不過要佢地花錢就真係唔係幾好意思呀!)

係度真係要再次同一班好有心嘅同事講多次:多謝晒呀!我真係好開心呀!

今個生日好開心PART 2

離開左學校之後,就去商場匯合小豬媽TEA一TEA啦!(其實係想係今日依個重要日子見吓小豬媽,因為N年前嘅今日,就係佢辛苦生我嘅日子嘛!)

我地如常去飲珍珠奶茶,如常傾計......點知,當我係手袋搵野嘅時候,小豬媽突然係佢手袋拎左盒嘢出嚟,係送俾我嘅生日禮物!

我當然係好驚喜,因為真係冇諗過小豬媽會送禮物俾我(因為之前幾年都係俾利是我嘛),一打開....真係嚇左一跳,原來係一對耳環呀!

粒石仔真係又大又閃,好靚呀~

當然即刻換左佢,真係好FIT我對耳仔(因為我耳珠比較大),唔大唔細,個SIZE剛剛好。

小豬媽仲好驚我唔鐘意個款,但我真係好鐘意呀~~~

不過對耳環應該都唔平,所以都真係.......唔知點講啦,總之真係好多謝小豬媽啦!

2008年8月24日星期日

行旺角...有驚喜

今日原本打算同大肥豬去街街影相,點知一起身就見到落好大雨,真係成個人都即刻DOWN晒,知道冇得去影相啦!

之後,大肥豬見個天氣都好似好左,所以就建議去旺角行吓街。都好啦....因為我都打算買幾個殼俾蟹仔。

第一站當然就係金魚街啦.....行左一陣,就買到三個蟹仔殼,同埋一支椰子樹。不過唔知係唔係養蟹仔嘅熱潮已過,買依D蟹仔用品平左少少呀!(咁就好啦...等我再買嘅時間又可以平D嘛!)

之後我地就去左花墟行左一個圈,當我地行到去繽紛三層嗰間鋪頭時,見去過咁多次都未入過去,所以就入去行個圈啦!(其實係想入去涼吓冷氣,過冷河呀!)

佢地入面真係有好多地方佈置得好靚,有靚景當然唔好浪費啦!所以我地就拎起部相機係度影...影...影啦!(係完全冇心理準備下,今日個LOOK好似唔係好得添,不過唔理,影相要緊嘛!哈哈~~)

哈哈...點解我地敢影相?原來佢地佈置得咁靚,都係建議我地影相呀!睇吓.....

玩完一輪之後,我地就去左太子商場行吓。就係依個時候,大肥豬提早送左份生日禮物俾我啦!

登...登....登.....登,就係一支腳架啦!

終於俾我買到支腳架,可以周圍影相,唔洗再等人幫我地影合照啦!睇落支腳架好似好專業咁,同部傻瓜機好似有少少格格不入.....不過唔理啦,可以影到合照就得啦!

依家有支腳架,又係時候諗吓去邊度影相啦!大家俾D建議我地呀~~(真係諗起都開心呀!)

2008年8月23日星期六

虛驚一場

話說尋晚好開心咁一家人去左食韓燒,個心情當然係超好啦!

點知......一返到屋企就見到個好驚嚇嘅場面,真係勁想喊出嚟,心諗:唔係呀...送份咁『好』嘅生日禮物俾我呀?

我嘅習慣就係一返到屋企,都會望吓兩隻小蟹,睇吓佢地有冇失蹤左。點知.....一見到阿癲,佢成隻蟹身出左個殼度,整佢又唔郁,完全冇反應。第一時間就大叫,喊住將依個消息話俾大肥豬知。

我嘅舉動,真係驚到大肥豬即刻走去個缸前面睇吓個情況。當我地都估佢已經死左嘅時候,準備拎起阿癲個身體時,又有新發現。

阿癲蟹身完來係得一半,當我地睇清楚時,我見到阿癲個蟹腳仲係個殼入面,仲有少少郁哦,咁即時開心晒,原來阿癲只不過係脫皮呀!哈哈...放心哂啦!

依個就係阿癲脫出嚟嘅皮,成隻好完整嘅蟹咁,又好難怪我會誤會佢嘛!

依家阿癲脫皮,即證明佢又長大左啦!哈哈.....

不過,阿癲係蛻皮期間會變得很脆弱,如蛻皮失敗就會引致死亡(真係有少少擔心!)。所以LULU妹就教我將阿癲放入隔離病房。

等佢完成整個蛻皮過程,活躍番先放可以放入去同阿臣一齊住個十八吋豪華洋缸呀!

2008年8月22日星期五

一家歡樂韓燒宴

今日係農曆七月廿三日....係乜日子呢?哈哈...就係小肥豬我嘅舊曆生日呀!其實我地年輕人,當然係等到新曆生日先會去慶祝啦!

當未結婚時,每年舊曆生日都係屋企普普通通食飯,都唔會特別慶祝,有時都唔會提起。不過...唔知係唔係結左婚關係,今年特別想同佢地出去食飯,之前大家又提過想去食韓燒,所以就決定左食韓燒自助餐慶祝啦!(其實都係搵個藉口去玩呀!)

所以就約左小豬爸、小豬媽、LULU妹、細佬同埋細佬女朋友,一行七人去左食韓燒慶祝。

可能今日係星期六關係,真係勁多人等位。我都已經BOOK左位,但係都要等成半個鐘有多先有位呀!

一坐低,我地都急不及待去拎嘢食。不過最興奮嘅唔係我,就係小豬媽啦....佢一嚟就拎左好多牛肉...金菇...魷魚....,仲不停炒好多俾我地食呀!哈哈~

食到中段,又係大家都要休息一陣(因為都開始飽飽地),所以又係影相好時候啦~~

原本今餐我打算由我作東請大家,不過小豬爸就話等佢嚟,當同我慶祝生日,所以仲更加開心!

其實仲有一件事令我好感動,就係小豬爸其實今日係唔舒服,佢仲食緊藥。當我知道時,都有話不如改食其他嘢,不過小豬爸食左幾次藥已經好好多,話冇事可以繼續去。其實我知道小豬爸係唔想掃我地興先唔改地點。好在......我見到小豬爸係成晚都冇唔精神,仲食好多嘢,我先安心D呀!

今日真係好開心,一家人可以開開心心咁食飯,真係好鐘意依個感覺。唔知係唔係結左婚,所以特別覺得同屋企人一齊,齊齊整整嘅時候係最開心呢!(我未婚前都係鐘意痴屋企呀!哈哈~~)。

2008年8月21日星期四

鸚鵡到訪嘅晚餐

嘩哈哈~~終於俾我恨到啦!隻鸚鵡嚟到香港,掛左成日風球,又可以放假一天啦!雖然聽日要返工,冇得連放三天,不過有多一日休息都已經好好啦~

今次醒目啦.....一早起身就開電視睇,仲好留意佢個風向。當知道會打續漸靠近香港,都知道仲有排掛,所以就即刻跳番上床繼續訓啦!

真係好好訓...訓到成十二點幾先識起身,都真係覺得自己勁呀!見都唔係好大風,所以就同大肥豬落街食嘢同埋上少少貨買餸煮晚餐。

一入到街市,俾我想像中少人,可能我地都算遲入貨。

不過都唔知煮乜好,又懶懶地唔想煮飯,所以最後都買左少少丸丸同菜,煮埋奶奶上次俾我地嘅白麵,就變左我地今日簡單嘅晚餐啦!

雖然係簡單左少少,不過都食得好飽飽呀!間唔中食吓依D晚餐都唔錯呀!(又係俾自己偷懶嘅藉口..哈哈哈!)

2008年8月20日星期三

舒服的泡泡浴

我買左幾支泡泡浴劑之後,雖然我都唔係日日浸,買左番嚟都浸左幾次,不過我真係愛上左浸浴啦!

當D泡泡包圍住時,真係好似睇電視咁,D泡多到睇唔到個身體,個感覺好得意呀!

因為當你浸緊泡泡嘅時候,成個人都真係好RELAX,好舒服呀!我一浸,就浸到D泡泡冇晒我先肯起身,由熱水變到涼水(都有成個鐘呀~),所以間唔中大肥豬都有拍門,因為怕我暈左係廁所哦!

嗰一刻...真係將你D唔開心嘢暫時忘記晒。所以每當我有唔開心事嘅時候,我都去浸泡泡,等自己開心番嘛!

哈哈....好攪笑,就係大肥豬都試過浸一次泡泡浴,不過佢就話唔鐘意,仲話唔再浸。所以買左返嚟嗰三支泡泡浴劑就係我全部擁有啦!

2008年8月19日星期二

我的手信

今日返左小豬媽屋企食飯,仲約埋嘉汶表妹一齊返去添,因為........哈哈哈~~~我又有手信啦!

上個星期嘉汶表妹去左泰國旅行,當然去玩嘅同時,都有掛住我依個表姊,仲買左依個靚靚手袋俾我呀!

真係知的心意,鐘意埋D花花嘅嘢,好鐘意呀!真係要再次多謝嘉汶表妹。

除左嘉汶表妹嘅手信之外,前日返工都收到同事送俾我嘅手信,就係台灣好HIT嘅面膜....我的美麗日記。

哈哈...又有得扮靚啦!本身我都有用開佢,不過就唔係隻隻都有試過,今次真係正好等我試吓其他款式啦!

今個星期真係開心,收到唔同地方嘅兩份手信....哈哈哈~~

不過當收到依D禮物嘅時候,又係時間俾我問:幾時到我去旅行呀?好想去玩呀......幾時到我買返手信俾佢地呀?

2008年8月18日星期一

又有新菜式(已加入食譜)

今日又嚟煮飯仔,依一個就係我地嘅是日晚餐,都幾豐富呀!有一個餸仲係新學整呀!哈哈~~

首先就係一碟白灼生菜,唔落油,健康D呀~

之後就係今日個新菜式,腐乳炒雞

哈哈...其實依個餸係今日同小豬媽下午茶時,小豬媽提意我整,仲即時講一次點煮。

好在.....第一次煮都冇失禮,都幾好味呀~(又有人自己讚自己啦!)

雖然今日得兩個餸,不過兩碟都好大碟,我地都係食唔晒。所以我整埋聽日個午餐便當,真係好啦....因為我好耐都冇帶飯盒呀~

 

有朋友仔問我問個腐乳炒雞個煮法,所以就POST個食譜出嚟同大家分享吓啦~

材料:
雞 一隻(我依隻係新鮮雞嚟呀...多謝小豬媽提供)
腐乳 5磚(如果想腐乳味多重,可以落多少少)
薑片、蔥段  少許
水 少許
糖    少許 

作法:
1) 先將雞切件,加生抽醃半小時
2) 少許油炒香、薑片及腐乳
3) 炒香後放入雞件,炒至轉色
4) 加水炒至雞肉熟透,加入糖炒勻....食得啦!