2009年2月28日星期六

龍鼓灘BBQ

講左去BBQ好耐,終於今日都去成團,約埋M&M一齊去燒一燒呀!

今次我地去左小M介紹嘅龍鼓灘其中一個自助燒烤場『劉星花園』。依個燒烤場又真係唔錯,食物種類又多,味道仲幾好添。

開始燒嘢食啦.......

爆開晒嘅芝士腸,又爆得幾靚呀~

條腸仔係唔係受左感染呀~

出至大M手嘅靚靚多春魚,好利害呀,原條燒出~

好味嘅牛油蒜蓉包~

哈哈...變身....方包超人~

仲有第一次燒嘅魷魚添~

仲有好幾樣嘢食,不過真係要特別介紹係個帶子,係入場送每人一隻,燒起嚟又好鮮甜呀~

當然唔少得同大家影吓相啦~

除左送帶子之外,仲有甜品送呀!每人一杯芒果布甸。

我地由三點幾開始燒到八點左右先走,真係又開心又食得好飽飽咁離開呀!

整體上環境都好,連個廁所都十分乾淨(依個係好重要嘅一點~哈哈)。

但唯一就比較遠,冇乜車可以直入燒烤場。好在有M&M車我地去,所以都好方便。不過又要麻煩晒佢地呀!

2009年2月26日星期四

換物網

今日經糖糖介紹,知道有一個換物網,見有新野就當然八八卦卦咁CLICK上去睇吓啦!

睇見真係有好多種類,玩具、日用品、化妝品....連PET SOCIETY嘅野都有,真係勁呀!

有新野玩我當然都試下,我仲已經放左少少野上去,睇下有冇機會換到啲好嘢返嚟。

我都覺得依個換物網都幾好,可以將自己冇乜用既野換啲有用既野,一來又可環保,二來可以慳啲錢。

大家有興趣都去睇吓有冇啱心水野交換啦!

http://www.tradeduck.com/

 

2009年2月24日星期二

勁有滿足感

今日大肥豬要開OT,所以就自己留左係屋企。不過,我冇偷懶呀,仲好乖咁嚟個家務大行動啦!

其實都唔係做左好多家務,抺左神枱,洗衫咁。不過講起洗衫,都真係勁有滿足感呀!

事緣之前大肥豬有幾件恤衫都有啲污漬,洗左幾次都唔得,總係覺得好唔夠白雪雪咁。係依個時候,醒起小豬爸之前講過有隻去污漬好勁洗衣劑,所以就買左一支嚟試吓可唔可以洗得乾淨啦!

見今日得我一個人,所以就拎左幾件衫仔去試下,諗住趁大肥豬唔係度,就算真係失敗都可以即刻毀滅佢,唔好俾佢發現嘛!

經過一輪閉關,洗洗...卒卒...擦擦...之後再放入洗衣機洗之後。終於......嘩....啲污漬真係冇得七七八八,仲有有番七八成新添。

大肥豬放工返嚟見到仲不停讚我叻,可以洗到咁乾淨添。攪到我都好開心得嚟又勁有滿足感呀!哈哈~~

2009年2月22日星期日

金利來之夜

尋日我地四個人離開左鯉魚門之後,就去食晚餐。不過我地唔係留係鯉魚門食,而係去就嚟拆既牛頭角下村。

之前都冇乜心水諗食乜,不過有一次我睇開OPEN RICE,見佢有個牛頭角下村專輯,於是就CLICK入去八卦吓,見有一間有好多人都讚好,所以我地個晚餐就係去左..............九座嘅金利來食坊啦~

唔知係唔係就拆嘅威力,我地去到都係六點十左右,不過都已經要排隊啦!

等左一陣就有位,可能我地幾個都影到餓餓地,所以一埋枱就即刻點餸。

第一樣嚟嘅就當然係凍飲啦,唔知係唔係大肥豬成日都影得勁攰,所以今次佢竟然主動叫左支啤酒,真係....好少見佢飲啤酒,好在有大M幫手飲啲~

起菜啦......

椒鹽鮮魷拼九肚魚

蒜蓉炒豆苗

蠔餅

鹵味拼盆

芝士焗扇貝

整體上啲野食都真係唔錯,碟碟好好大碟,個味道仲唔差添。尤其係個蠔餅,真係成塊面咁大呀!哈哈~~~

個服務就真係差左少少,尤其係有位樓面姐姐,都真係惡惡地呀!不過...依啲大排檔服務都係咁啦...算啦,最緊要食得開心嘛!

四個人都只係食左二百幾,都真係幾抵食呀!今餐我地都唔好意思,因為要M&M破費添.......多謝晒!

我地一齊出去影相.....一齊食飯都真係玩得好開心,希望佢地都一樣玩得開心啦!

哈哈~~下次再繼續一齊去玩...玩....玩....影...影....影呀!

2009年2月21日星期六

鯉魚門之旅

今日我約左M&M攝影團一齊入鯉魚門影相啦!事緣前幾日小M係論壇見到有人去左三家村影相,於是就約埋我地一齊去影。

我都N..N..N年冇去過鯉魚門,一直都以為只係食海鮮。如果唔係小M介紹,我都唔知有個靚景影相添。

原本都擔心我地個行程去唔成,因為個天氣都係麻麻地,不過我地都係鐘意影相,所以當然照去啦!好在都只係天陰陰咁,冇落雨已經好好啦!

我地邊行邊影,我地就影吓海景...石景...總之見到靚地方就影...影....影啦~

 

之後繼續向前行,去我地主要影嘅大草地進發。不過唔知點解同論壇睇到嘅有啲出入,啲草短得嚟仲有啲黑黑地添。

雖然係咁,不過嗰度又真係一個影相好地方呀~


今日影左好多相,不過我自己就覺得麻麻地,唔知係唔係件衫問題,有好多都影都我好肥呀....真激氣,唔通真係係時候要減吓肥?

2009年2月16日星期一

我又嚟四葉妹妹

大肥豬成日都話我係個BLOG度放DOLLCENA 毒,攪到好多朋友仔都加入左DOLLCENA行列。其實係因為我好想同大家分享我鐘意嘅D女。

不過毒人毒得多,終於俾人毒番轉頭。哈哈~~

之前係FACEBOOK成日見到可樂同糖糖放左好多佢地影嘅四葉妹妹靚相,睇睇吓真係越睇越得意,所以終於都忍唔住買左一隻,加入左四葉妹妹行列。

返到屋企當然即刻拎四葉妹妹影吓相先啦~

哈哈......我又用左WALLPAPER方法影左幾張,都影得唔差,有幾張個FEEL又好似好夾咁。(又有人自己讚自己啦!)