2009年4月30日星期四

大肥豬新玩意

01 MAY 2009 (FRI)

今日係放假第一日,我就已經大出血,就係.......送左份大禮物俾大肥豬,當係提早嘅生日禮物(不過其實大肥豬係六月生日,真係早左好多呀....哈哈)。

今日出旺角行街街原本都係大肥豬話買衫俾我,等我有新衫去影相。

可以係假期關係,成條街都迫滿晒人,攪到我到冇晒心機,所以我地就轉戰金魚街啦!

我地次次行金魚街都會去睇魚缸,因為由未搬入新屋時大肥豬都已經好想養金魚,不過次次睇到睇唔啱心水。但今日竟然俾大肥豬睇到個又啱心水又抵抵地嘅魚缸,所以我地考慮左一陣....就決定買。

原來養魚都真係好多嘢,所以我地除左買魚缸之外,又買埋多配件,再買左兩條金魚仔,大包細包咁返屋企。

一返到屋企大肥豬就即刻開工啦!

原來都要好多步驟,首先要用魚鹽浸魚缸一個鐘~

之後開晒所有儀器加幾滴藥水開一個鐘~

之後就可以放金魚啦~

睇吓魚仔游得幾開心~

其實我地係打算養八條金魚,不過因為新缸關係,唔知會點,所以買住兩條先,等遲少少再買過。

哈哈...最開心嗰個當然係大肥豬啦!

2009年4月26日星期日

神秘禮物

今日放工打俾大肥豬,佢就古古怪怪咁話有份神秘禮物俾我,話係用嚟影靚相用。

心諗係乜呢?唔通係靚鏡頭?不過又冇可能,因為佢都話過有支定焦靚鏡之後,短時間內都唔再買鏡,所以係返奶奶屋企途中,不停係度諗究竟係乜啦!

於時一見大肥豬,就迫係拎份神秘禮物出嚟!原來就係.......

依本書係專講我地部SONY單反嘅應用技巧,大肥豬話等佢學識晒書入面嘅技巧,仲話之後去影相都要帶埋本天書,咁就真係可以影到靚相啦!嘻嘻.....真係唔知好嬲定好笑!

不過都好,起碼大肥豬會俾心機去學影相,咁我之後嘅相應該會靚啲啦,有得益嘅都算係我呀....哈哈!

2009年4月25日星期六

自家制芒果糯米糍(已加入食譜)

糯米糍我自己都整過好多次,真係冇一次係成功,所以都攪到冇晒信心,唔敢再整。

不過前幾陣子見到糖糖又整糯米糍,見佢整得又靚又好味,所以又再心思思再想自己就去整。於是買整材料,就開工整啦!

依照糖糖個食譜,係廚房閉關左一陣時候,終於整好左自家制芒果糯米糍啦~

開頭我以為切大粒啲芒果,會易包啲。但原來包起上嚟真係唔容易,所以有啲個樣好醜樣,有啲又大又少咁。當然有啲都包得幾靚~

哈哈....雖然個賣相她似差左少少,但終於都算成功左,大肥豬仲讚話最好食係依一次呀!我自己都覺得唔錯,都幾好味呀!

今次仲整左一啲聽日拎俾小豬爸食,如果佢地都覺得好食,就真係真正嘅成功,咁我又會再有番心機去整其他唔同款嘅糯米糍啦!

芒果糯米糍

材料:

芒果汁       250 ml – 我用維他芒果汁
糯米粉       1 用番維他個紙盒,一盒滿
              3茶匙 – 睇下大家鐘意嘅甜度加減
芒果           1
椰絲           適量

做法:

1)將芒果汁、糖攪拌

2)將糯米粉加入至芒果汁內,攪至冇粒粒 (要小小咁落,唔好一次過,會好難攪呀!)

3)放入薄碟蒸大約15分鐘

4)待約二十分鐘稍涼後(微暖時最不痴手),戴上手套(手套一定要擦一層薄牛油,以防痴手)隔住取 一撮芒果糯米粉團,於手心壓平,加入芒果粒搓圓

5)再將糯米糍舖上椰絲即成

2009年4月24日星期五

腳底按摩

大肥豬早排睇見到萬寧有得換OTO腳底按摩機,為免我地一個個咁買嘢換印花,所以上星期我就係YAHOO拍賣場BID左30個印花,打算換個按摩機啦~

當收到啲印花時,大肥豬又話15/16唔知買唔買好。所以我就叫佢KEEP住啲印花,等佢自己決定買唔買啦!

今日放工返到屋企,就見到部腳底按摩機,真係換左啦......哈哈~~

哈哈...大肥豬仲唔等我,自己玩先啦~

當然我都有份玩,仲覺得幾過癮,做完之後仲好舒服,對腳好似輕鬆晒啦。

哈哈...依家有部按摩機係屋企,咁去完行街街就可以返屋企做機舒服番啦!

2009年4月20日星期一

又嚟我的美麗日記

之前買買埋埋都好幾盒我的美麗日記面膜,日日FULL都應該可以用個幾月...哈哈~~

原本都打算禁止自己再買,等用咁啲先再入貨,點知今日去萬寧買嘢時,見新出左一款草莓優格面膜,仲做緊特價$58添,所以又買左返屋企。

不過對我嚟講係免費,因為趁大肥豬俾錢時放埋係收錢處,所以就.......多謝大肥豬啦~

剛剛試用完,個感覺係.....冇朱古力咁香,但用完又FEEL到塊面唔乾,好乾淨咁,唔通依啲就係『零油光』嘅效果(佢係咁寫呀..哈哈)。

講起我的美麗日記面膜,記得之前有位BLOG友仔留言話我知,香港嚟講只係得萬寧同7-11獨家發售,直接係台灣既廠出品。其他地方買嘅都係水貨,好似係深圳制做。

雖然唔知係唔係真,不過為安全計(對內地產品都冇乜信心),都係去返萬寧買正貨,好似有信心啲。同埋萬寧間唔中都會做特價$58,比起其他嘅都係貴幾蚊!

對我嚟講都係安全至上好啲~

2009年4月19日星期日

D女玩轉帝苑

尋日去帝苑嘆TEA BUFFET,咁好嘅地方,又點少得我嘅DOLLCENA呢,所以今次就帶埋POOH女一齊去玩啦!

哈哈…今次幫POOH女影左唔係好多相,不過都幾靚呀~

是日至愛~~冥想中的POOH女 

除左我之外,CARCAR同小M都帶左D女同JUN兔一齊去影相~

依家好似同公仔影相變成我地聚會活動之一,咁都好呀,一齊幫公仔影相都係好開心呀!

不過因為環境所限,所以我地都唔係影得好多公仔CROSSOVER相,下次我地一定要再一齊影過呀!

2009年4月18日星期六

帝苑TEA BUFFET

繼上次迪迪尼HIGH TEA之後,我地今日又嚟食過,去帝苑酒店嘆TEA BUFFET啦!

TEA BUFFET我就好少食,不過聽BB YEE同CARCAR介紹都話好正,所以我都幾期待。

一入BUFFET餐廳,就已經俾佢地嘅CAKE吸引住,所以坐底一陣嘢都未食,就即刻出去影..影...影啦~

我地先食熱食,再食CAKE,真係冇介紹錯,啲嘢食真係錯。尤其係啲CAKE,好味得嚟又唔太甜,總之就係勁好味啦~

我地都邊食邊傾計,當然唔少得影影相啦~

隨住個TEA BUFFET個時間係兩個鐘,所以今次我地個約會係短短地,不過都已經係好開心。

食得開心之外,仲有禮物收添。就係CARCAR嘅泰國手信靚靚蝴蝶袋,我好鐘意呀,真係多謝晒~

哈哈~相信我地好快就會再嚟聚過,不過下次要時間長啲呀!

2009年4月15日星期三

溫馨意粉餐

依排我都好乖乖咁成日都煮飯仔,因為我識煮又煮得好食嘅唔多,所以次次煮都諗一陣先知煮乜好。

煮左幾日中餐,都係時候整啲新花款,所以今日就整左個意粉餐。哈哈...都幾豐富呀~

個肉醬意粉我好比心機整呀,我係用新鮮豬肉同蕃茄整呀,大肥豬都話好食。不過我自己就覺得個汁就整得少左啲啲,下次一定會再更加好味呀~

除左個意粉,當然唔少得整啲雞翼啦~

一向我都好怕煎嘢,好怕啲油彈上身,都幾痛呀!不過冇理由怕左而唔去做,所以最後都決定煎雞翼。

真係冇講錯,煎雞翼真係彈油彈到飛起,仲彈到落手度,真係勁痛,依家都紅左呀!

係我邊叫救命邊煎雞翼嘅時候,大肥豬就走左入廚房,搶左我個鑊鏟.....於是就由大肥豬煎埋下半場,所以話依碟煎雞翼係我地兩個嘅合力傑作,所以特別好食呀...哈哈!

2009年4月14日星期二

極速晚餐

今日放工如常約左小豬媽TEA一TEA先返屋企煮飯仔。不過係我地TEA完之後,見到有好多引誘,好多鞋鋪同衫鋪都做緊特價,我地當然唔執輸睇吓,就係咁睇晏左添。

同小豬媽分開後,我就急急腳咁返屋企煮飯仔啦!

好在一早就諗好晒煮乜,所以好快就買好晒餸,返到屋企又好快咁洗..洗..洗...同煮...煮...煮,最後用左四十分鐘整好左兩餸一湯嘅簡單晚餐啦~~

今日個晚餐主角就係依個腐乳炒雞,依半隻雞仲係小豬爸俾我,話等我有好野食呀~

哈哈....第二次煮依個,不過今次就重手左,落多左腐乳,所以攪到辣左啲,但都過得去。

除左仲有飯後果添,就係兩個小豬媽拜過神嘅大芒果~

2009年4月13日星期一

荔枝角公園

尋日係復活節假期最後一日,一早起身就見勁好陽光,為左唔好浪費咁好嘅天氣,所以就決定去影相。

由於時間關係,要搵個近近地嘅地方,最後就決定去荔枝角公園影番輯靚相啦!

係出發時都好地地,行到入公園都冇乜事,係個天開始冇咁好太陽,不過都唔理,不停係度影影影~

點知當我地行到去嶺南之風嗰個位置時,開始行雷同落雨,真係激氣,攪到要入去啲亭避雨。

不過咁都係,因為係個亭入面避雨時,冇嘢做就可以有多啲時間慢慢影相嘛~

仲有時間SET埋腳架慢慢就位影合照添~

雖然個天氣唔係太好,不過我真係幾鐘意依輯相,尤其係依兩張,真係唔可以唔讚下大肥豬,影好有FEEL之餘,仲影得我幾靚呀~(哈哈..又有人自己讚自己啦!)

雖然我地都未行得晒,影得晒成個公園,不過見雨細啲啲嘅時候就走啦!唯有等下次有機會就再影過啦~

點知...當我地行到去MTR時,竟然太陽又再一次出嚟,仲幾好天添....真係激氣。再一次証明.......超級黑仔王是我!