2009年6月30日星期二

尖沙咀鐘樓

1 JULY 2009 (WED)

原本都以為今日要乖乖咁留係屋企,不過最後大肥豬下午就帶左我出尖沙咀行街街。

其實大肥豬係想帶我去太空館睇新推出嘅全高清天像廳節目,不過可能係第一日推出關係,去到嘅時候所有場次都已經滿晒啦。

既然冇得睇天像節目,太空館又大排長龍,所以我地都冇係入面逗留,去文化中心出面地攤八卦吓。

當我地行到去尖沙咀鐘樓嘅時候,見個天又幾好,話晒鐘樓都咁有歷史,冇理由唔係度影相留念,所以我地就係鐘樓附近開始影相啦~

我地真係勁傻咁,係鐘樓下唔同角度都係咁影。我地仲SET左腳架影左好多合照,真係勁開心呀~

今日個天真係好靚,加埋依個樹陣,影出嚟好有大自然氣息,都唔似係市區呀~

原本我地都打算去埋1881影吓相,不過嗰度仲有好多地方裝修緊封晒啲路,加上又有好多內地遊客係入面行,所以我地都冇係入面影,只係門口隨意影吓就算,都係等遲啲有機會先再去過啦~

2009年6月28日星期日

踏入奇妙一刻

28 JUNE 2009 (SUN)

今日下午見冇乜野做,大肥豬就話出九龍灣去宜家行吓,所以我地就出發啦!

知道MEGA BOX有史迪仔活動,所以見去開德福,就搭埋個穿梭巴過去影吓相。

一入到去,就見到貓王史迪仔等緊你啦~


不過.....好唔好彩,原來樂基兒去左做開幕儀式,所以封左L5嗰個史迪仔佈置。冇得影相,所以我地就周圍行吓睇吓野。

就係依個時候,我地行到樂園售票處,見到個職員加上知道夏天又有優惠,所以我地諗到唔諗,即場買左兩張ONE DAY PASS啦~

買左兩張OPEN DAY PASS,佢地仲送左兩把自動迪迪尼傘仔俾我地,都抵啦~

哈哈....雖然係買OPEN DAY PASS,不過佢地又有兩日票,大肥豬就即時話加多$100同我入多次呀~

買完飛就同紙版史迪仔影住先,好快就可以入去同公仔版影啦~

之後我地就落左去地下扭蛋場影相啦~

今次真係影得唔夠暢快,如果有機會再捉大肥豬去影多次相先得。

哈哈....其實大肥豬講左話等七月放大假時同我入迪迪尼時已經好開心,依家買埋飛就仲高興。當知道會加$100再入一次,就仲興奮,抵呀...計番都係二百幾蚊一次呀。

雖然我係勁鐘意入迪迪尼,但都要考慮吓大肥豬感受,一兩次佢就開心,冇理由迫佢成日陪我入去嘛,所以暫時唔考慮再買AP。等佢地興建好下一期,我先再買AP成日去啦,起碼多新野玩,唔會悶親大肥豬嘛!

依家個有PASS在手,個心真係飛左入迪迪尼啦.....哈哈~

2009年6月27日星期六

天光墟買魚仔

28 JUNE 2009 (SUN)

天光墟我地都未去過,都只係聽過有好多平靚正嘅魚仔買。前排大肥豬講話想去睇,係依個時候又係我做乖乖老婆嘅時候,陪大肥豬一齊去見識吓,睇吓有冇靚魚買。

就係咁......今日一早就起身,未夠六點半就出門口,目的地就係去買魚仔。好在我地屋企樓下有小巴去到天光墟附近,咁都算方便。

好快就去到目的地,唔知係落雨關係定係我地晏左,所以都唔係好多攤檔。雖然係少少幾檔,不過都好多野睇,佢地將啲魚袋放晒係地下任人揀,都幾攪笑。

除左魚仔之外,嗰度都有好多其他嘢買呀~

行左一陣,大肥豬終於搵到目標,仲好細心咁揀魚仔添~

經過一輪戰鬥,終於買左三條大魚返屋企啦~

買完魚仔,我地就去食左個豐富早餐啦~

係我地行去搭車途中,見到平日繁忙的女人街,原來清早嘅時候係咁寧靜,仲好寬闊添~

返到屋企,大肥豬就好忙咁處理佢啲魚仔。我.....就當然去繼續訓覺訓埋下半場啦!

訓醒起身,魚仔已經好得意咁游..游...游....緊啦~

2009年6月26日星期五

支持吓啦~

27 JUNE 2009 (SAT)

早幾日係YAHOO有個PROMO,就係NIKON N-SHOT大潮集遊戲。

見到個終極大獎~單反D5000,真係好鬼吸引,所以就貪得意UPLOAD左幾張相上去玩,睇吓有冇機會贏到獎啦!

可愛金魚http://hk.promo.yahoo.com/nikon/N-Shot/member.php?sid=220~

溫馨小熊貓http://hk.promo.yahoo.com/nikon/N-Shot/member.php?sid=335~

小情侶http://hk.promo.yahoo.com/nikon/N-Shot/member.php?sid=336~

雖然都知得獎機會係微之又微,不過都試玩吓,大家要支持我呀。只要係有YAHOO E-MAIL ACCOUNT ,就可以嚟投一我票啦~ 

大家有興趣都可以去參加....不過記得投左我票先啦..哈哈

2009年6月24日星期三

我又要換...

25 JUNE 2009 (THU)

依排真係好多地方都有公仔換,繼早前惠康有BEAR BEAR換之後,今日開始又有新野啦!

就係OK便利店有史迪仔換~

嘩.....有小金換呀...所以依排要多啲去OK買嘢換印花先得。

如果大家有印花唔要....我唔介意幫你地收留。因為睇睇吓ANGEL又幾得意,其中一隻史迪仔又幾可愛,如果我有好多印花就可以換一SET史迪仔家族啦!呵呵呵~

2009年6月22日星期一

終於發生..

23 JUNE 2009 (TUE)

一個不幸嘅事終於都要發生,就係自己一隻蟹住係一個十八吋豪華洋缸既阿癲已經離我地已去啦~

其實早幾日都留意都阿癲冇行嚟行去,當時以為佢又係怕羞,所以冇郁到(之前都試過依個情況)。

不過,見幾日都係咁,好似唔係好對路,所以剛剛打算搵佢出嚟睇吓,點知.......已經冇哂反應,原來阿癲已經離開左我地啦!

唉....唔知係唔係啲又焗又熱嘅天氣令阿癲離開呢?

2009年6月21日星期日

父親節的晚餐

21 JUNE 2009 (SUN)

父親節又到....所以我地一家人又去街街食飯同小豬爸慶祝。

原本小豬爸提意去上次石澳嗰間餐廳食泰國菜,不過一諗起依個悶熱嘅天氣,加上間餐廳係冇冷氣,所以大家都打算改地點。

最後,我地就決定去近近地嘅西灣河蘇豪東嘅「吹水站」食泰國菜~

因為小豬爸同依間餐廳有生意上嚟來往,所以可以係好短時間就BOOK到張枱啦!

開餐啦....我地叫左好多嘢食,樣樣都好好味,尤其係個生菜碎肉包,真係好味呀~

食飽飽準備埋單嘅時候,個職員就嚟左兩份甜品。原來係小豬爸嘅面子關係,我地有甜品食呀~

今個豐富晚餐就係我地三姐弟妹一齊請小豬爸食,希望小豬爸食得開心啦!

開心嘅節目又點會咁快完,正當我地食飯嘅時候講起西灣河新開左新糖水鋪時,小豬爸就話請番我地去食,就係咁,下一個節目就係去『甜嫂 』食糖水~

嗰度啲糖水真係唔錯,好味得嚟又唔甜,仲幾有份量,一碗可以夠兩人食添!

今日又過左一個既開心又飽飽嘅晚上,又肥多幾磅啦~