2009年7月30日星期四

濃厚HOLIDAY MOOD的工作天

30 JULY 2009 (THU)

一連九日嘅大假終於結束,係時間都要回歸現實,努力工作。唉.....要等出年先再可以咁輕鬆地放假啦!

講真....今日返工仍然足滿濃厚嘅HOLIDAY MOOD心情,攪到冇乜心機做嘢添。呵呵呵~~

今日返工,又有另一件開心事,就係有禮物收呀~

係唔係好得意呢?大家估吓係乜東東,有乜用途?

正面~

背面~

哈哈...等我開估啦.....其實係一個公仔手機套嚟呀~

雖然我部手機唔係摺機,唔可以用住。不過隻貓仔真係好可愛,我好鐘意,所以我都已經將佢放左係個架度,當係一件少少裝飾品啦!

2009年7月28日星期二

與小茵短敘

28 JULY 2009 (TUE)

由於之前托糖糖幫小茵買左麥當當嘅 HELLO KITTY公仔,所以就趁今日依然係放假嘅好日子,約左小茵出嚟食個LUNCH,短記敘一吓啦!

原本約好左去小茵公司附近食壽司,不過我又唔爭氣個胃有啲唔舒服,所以最後就改左去味千拉麵食。

講開間味千,佢地嘅服務態度真係極差。當門口個職員指我去左邊枱,但張張枱都係有人,根本冇位。之後,我又再行去問其他職員邊個位可以容納我,但都係冇人理我。最後...我問返門口個職員,先叫做搵到個位俾我,諗起都真係嬲嬲地,依間都唔會再有下次啦!

一見到小茵,ORDER左嘢食之後,我地就不停傾..傾...傾啦!講嘅內容都圍繞住結婚嘅事,我仲將我結婚時聽到好多八卦傳統講俾小茵知,等佢可以參考。

係同小茵分享同時,其實都另我回想起好多籌備婚禮時嘅點滴添。

隨住小茵夠鐘返工,所以我地個LUNCH短敘就要結束啦!不過相信我地又會好快見面,到時一齊影靚相...哈哈。

其實今次個短敘都有另一個目的,就係我做左個中間人,幫糖糖問小茵拎左啲五個7-11小丸子公仔,真係唔該晒~

第一餐生日飯

28 JULY 2009 (TUE)

雖然仲有成個月先到我嘅生日,不過今日已經食左本年度第一餐生日飯啦!哈哈~~

因為我地七八月生日嘅都有幾個人,所以就約埋一齊出嚟食飯,當同我地慶祝,一齊開開心心食餐飯。

我地今次去左紅磡依間酒樓食杭州菜啦~

由於我地掛住傾同食,所以都冇將食物影相。不過啲嘢食都OK好味,尤其係個小籠包,我總共食左三隻呀,真係有啲唔係幾好意思添。

成晚都傾得好開心,我地嘅話題講得最多嘅係嗰啲古古怪怪嘢,不過出奇地,我竟然唔驚,唔知係我大膽左,定係佢地就住我嚟講呢?HEE HEE~

最開心嘅係....同事們都好有心,預早埋生日禮物俾我地呀~

哈哈....開開心心又過左一又食又拎嘅晚上啦!

閒影DOLLCENA

29 JULY 2009 (WED)

原來我都好耐冇帶我啲DOLLCENA去街街影靚相啦!

其實都有諗過帶埋其中一個去盤龍峽一齊去影靚相,奈何當時個包包冇位可以容納佢(或者可以話係我唔捨得『側』佢地入袋),所以最後都冇帶到。不過....咁都好,因為連我自己都唔夠時間影嘛!呵呵~

今日見個陽光好好,所以又抽起條根,係落街買餸前帶左愛麗詩落樓下公園影左少少相。

哈哈....好似好無聊咁,不過原來公園仔都係有啲好靚嘅草草,影出嚟又真係幾靚呀~

仲去埋遊戲區影吓添~

哈哈...雖然係少少嘅場地,不過原來都可以影得幾好哦!

2009年7月27日星期一

澳門一天遊

26 JULY 2009 (SUN)

繼盤龍峽之旅後,又嚟澳門一天遊啦! 不過今次就係與小豬爸、小豬媽仲有LULU妹同遊,我嘅責任就係做導遊帶佢地周圍去啦!

第一個目的地就係威尼斯人,因為佢地未嚟過嘛。不過地達目的地後,第一個活動就係去美食廣場食嘢。

由於小豬媽咪係船上獲利回吐左,所以要食番個鰻魚飯補充體力~

哈哈...我又好為食咁買左個小籠飽食~

行到大運河,我地邊行邊影相,仲帶左小豬媽去掃買蝴蝶袋同去賭場參觀吓添~

行完威尼斯人之後,我地就拎住兩大袋蝴蝶袋戰利品,向地氹仔街出發。

我地就係氹仔街行左一陣,之後就去左小飛象餐廳食LUNCH~

先嚟每人一個熱辣辣嘅豬仔飽~

燒羊肋扒(我唔鐘意食羊都試左少少,又幾好味呀)~



炒椰菜(好細碟哦)~

燒乳鴿兩隻(都OK啦,不過冇乜肉呀)~

最後就係炭燒豬頸肉(依個係勁好味呀)~

食飽飽就向去下一個目的地,依個地方就係次次嚟澳門都想嚟,但又唔識去嘅禮記雪糕~

剛剛先食完LUNCH,話咁快就又食嘢啦!我地女士們就叫左至出名嘅雪糕三文治~

兩位男士就叫左另一出名嘅雪糕紅豆冰~

真係都冇介紹錯,真係好好味呀~

為食嘅我又點會只食個三文治就足夠,又再叫左個另一出名嘅椰子雪糕,真係好好食....好香梛子味呀~

食左好滿足嘅好味雪糕之後,我地就慢慢行去新萄京酒店,當然又係參觀賭場時間啦!

之後就係行吓議事亭前街,當我地沿路行上大三巴時,見到有間新開嘅NaRaYa,依間有成三層大,早知就唔洗係威尼斯人買啦~

行到熱辣辣兼攰攰地,見到有冰凍芒果綿綿冰,所以又嚟幫襯吓~

$12一大碗,真係又抵又好食哦~

又係買手信時間,上次糖糖介紹依間豬肉干唔錯,所以今次又嚟依間買啦~

玩左成日,大家都已經好攰,所以又到晚飯時間。是次晚餐爸爸請我地食好嘢~

先係一碟燒肉~

再嚟通菜炒鮮魷~

同埋豬蹄根炆什菇~

最後,主角出場...睇吓係乜~

嘩....原來係雞燉翅嚟。依個仲係勾翅嚟呀!雖然我唔知有乜分別,不過小豬媽話係正好多呀~

睇吓我嗰碗,真係好多呀....見到一條條嘅翅添~

成排翅嚟食呀~

食左個既豐富又滿足嘅晚飯之後,見仲有時間,就過左新開嘅新濠天地行吓。不過其實都好似冇野睇,都係一所名店坊~

係賭場入口有個好靚水幕,真係好靚,忍唔住睇左一陣~



見冇乜嘢行(名店係唔啱我呀~),所以入賭場行個圈參觀吓。 不過亦都係咁,我終於都可以嘗試係賭場拎支水啦。成日都聽人講賭場多野飲品派,不過去咁多次都係第一次有依個服務.....哈哈~


睇吓我地嘅戰利品,不過當中只有兩小袋係我,其他都係小豬媽呀~

之後我地就搭車返碼頭,就係咁又開開心心過左一個家庭日啦~

我嘅戰利品,買咁多都唔知幾時先用得晒呀..哈哈~