2009年11月30日星期一

得意襪仔

30 NOVEMBER 2009 (MON)

今日經過商場,見到樣得意嘢,所以就又忍唔住要即刻買左佢~

依個其實係一對保溫襪仔,當然唔係用嚟著出街,係留係屋企著,等腳仔可以保暖呀~

哈哈...其實係上排天氣等番十度嘅時候,我見到嘅時候都已然好想買,不過可能個個都去買保暖物品,所以嗰時就冇啱我嘅SIZE。估唔到今日返左貨,仲比上次見到平啲。

今日洗白白之後就即刻著住通屋走,又真係幾舒服,對腳仲覺得到好暖添,真係啱晒我依啲怕凍嘅人。

2009年11月28日星期六

荷里活廣場

29 NOVEMBER 2009 (SUN)

今日見冇乜特別節目,所以就同大肥豬去左荷里活廣場行街SHOPPING,打算同大肥豬置啲新衫。

我地一行到去大堂就見到有一個以鹿為主角嘅佈置,見咁得意又咁有聖誕FEEL,當然要影吓啦~


之後大肥豬見旁邊有啲聖誕波波,嗰度係一個冇人發現嘅靚位~

真係越嚟越鐘意聖誕節,四周都係靚靚佈置,見到個人都已經好開心,影埋靚相就仲開心呀!

2009年11月25日星期三

杏花新城的CHRISTMAS IN BLACK

24 NOVEMBER 2009 (THU)

除左衣城的SANRIO VILLAGE之外,係杏花新都城都有個CHRISTMAS IN BLACK嘅聖誕佈置,當然我都唔放過機會,今日放工就捉左糖糖陪我去行一轉啦!

其實經過上次IQ博士,都知道個位置應該唔會太大,但我又曾經見過有朋友仔分享左好多靚相,所以都有少少期望。

點知…一去到見到,真係勁失望,上次IQ博士都只你用繩帶圍住,都可以行入少少易影啲,但今次個佈置前都圍晒鐵欄,想行埋啲都唔得,所以都唔可以好似青衣城咁同公仔有親密接觸啦!

不過既然去到,就當係欣賞吓個佈置,影吓啲公仔啦~

 一場嚟到,點都要留個紀錄同公仔影~

之後上埋二樓少少佈置地方,都有聖誕樹同畫廊呀~


如果順路入開杏花新城都可以去影吓,啲公仔真係好靚,但就唔好專登入去,因為真係唔洗幾分鐘就可以影晒,又唔可以同公仔影,唔好連車費都蝕埋呀!哈哈~

2009年11月24日星期二

青衣城的SANRIO VILLAGE

22 NOVEMBER 2009 (SUN)

離開360之後,我地就出發去青衣,往去下一個節目進發。

去到青衣城,第一時間就去醫肚先,我地去左稻香打邊爐。不過可能係星期日關係,BOOK左枱都要等成個鐘先有位,仲要限食兩個鐘。我地都唔係任食嗰種,真係唔明白點解要限時間?

食飽飽之後,就去SANRIO VILLAGE啦,嗰度雖然地方唔算大,不過成個佈置加上SANRIO人物,真係好靚呀~

同上次影IQ博士一樣,想入去影相就要隨便捐款,同等場地工作人員分批安排入去。

係等嘅時候都唔好浪費時間,就離遠影吓佈置~

排左二十分鐘左右,就到我地入去啦。由於時間所限,所以一入到去就叫大肥豬一見公仔就同我影~

雖然都叫做影晒啲大型公仔,其實仲有好啲嘢都未睇,想睇清楚啲公仔都冇時間。

講真...捐款就冇所謂,不過只係得15分鐘時間入去影,又真係好似太趕啦!