2010年1月30日星期六

新春海港城

31 JANUARY 2010 (SUN)

今日天氣好好,所以大肥豬就建議同我出尖東海旁行吓(浪漫吓哦)。見出開尖沙咀,又記得早前見有朋友仔去海港城影左啲好可愛嘅虎BB公仔,所以就順便去埋影..影...影啦!

啲虎BB真係好得意,好多人都排隊等影,但排我前前後後嗰啲都係小朋友,攪到俾大肥豬笑我同小朋友爭位置。不過啲公仔咁得意,又點可以唔影呢...哈哈~

自聖誕過後,都有一段時間冇去影相,不過見到好多商場都已經做好新年佈置,所以嚟緊應該又可以去大影特影一餐啦!

2010年1月26日星期二

小佈置

26 JANUARY 2010 (TUE)

今日返工就見到史迪哥哥買左好幾張史迪仔嘅揮春佈置佢個坐位,見佢貼得咁開心,攪到我都心思思買啲揮春佈置吓我個位。

都知道唔會有玉桂狗或者MARIE嘅揮春,即刻醒起上次係7-11買小雲利是封時都見到有出揮春,所以今日食完LUNCH之後就去左買揮春,買完仲即刻貼左係個櫃面添~

哈哈...雖然係少少地兩張,不過貼左佢都幾有新年氣氛,望住嚟做嘢都做得開心啲嘛!

2010年1月24日星期日

SAMMI - 值得

25 JANUARY 2010 (MON)

等左都有一段時間,終於都可以擁有SAMMI所著作嘅新書『值得』~

其實依本書係SAMMI演唱會期間開始推出,不過當時我冇買到個BOXSET,所以唔可以即刻擁有。之後去過幾間書局問都已經賣哂,最後冇辦法之下,只好去商務書局登記,等佢地有書就通知我。

好彩地...登記約一個星期左右就收到電話可以有得去拎,所以今日放工就即刻出左商務帶佢返屋企。

由今晚開始,我就開始好努力地溫書啦!

2010年1月13日星期三

再嚟雜誌袋

13 JANUARY 2010 (WED)

自從係十月買左CanCam雜誌送一個大SIZE嘅HOUSE of JILL STUART袋之後,我都好留意新出嘅日本雜誌,睇吓仲有冇靚袋送。

開頭仲估聖誕期間會有好嘢送,但原來聖誕仲比平日靜,好多雜誌都冇嘢送呀!

等左一段時間,終於都俾我等到又有好嘢送。今日同糖糖食LUNCH時見到報紙檔有新一期non-no出版,見附送左一個大袋袋又幾靚哦,加上報紙檔又有優惠,平左六蚊,就係咁....我地就每人買一本啦~

non-no都算係一本唔錯嘅日本雜誌,還記得當年年紀細嘅時候,我期期都有買,參考吓日本妹嘅衣著。不過隨住年紀開始大,唔可以再扮後生,所以就冇再買嚟睇啦!

今次再買當然主要都唔係為睇雜誌,都係為左依個袋袋啦~

返到屋企即刻開個袋袋嚟睇,又真係幾靚同大個,都幾實用~

2010年1月11日星期一

遲來的新碟

12 JANUARY 2010 (TUE)

閉關左一段時間,真係同外界有少少脫節,唔係今日行過CD鋪入去八卦吓,都唔知HOCC同KARY都出左新CD添。

哈哈..依兩隻碟都出左一段時間,依家先嚟買真係好似有啲OUT。一係就唔買,一買就買兩隻,冇法啦,邊個叫我儲開佢地嘅CD,所以諗都唔諗就用左三百蚊買左佢~

雖然好似有少少敗家,不過隻碟又真係幾好聽,尤其係HOCC隻演唱會DVD有埋SAMMI做嘉賓嗰PART,所以貴少少都值得呀!

2010年1月6日星期三

至愛小籠包

6 JANUARY 2010 (WED)

唔舒服左都有好幾日,攪到都冇咁胃口不過今日突然間條引出左嚟好想食小籠包,就係咁...今晚大肥豬就帶左我去食餐好啦~

哈哈.....一入到去當然諗都唔諗,即刻ORDER我嘅至愛小籠包啦,我仲好勁咁一個人食左三大粒添,真係勁好味呀~

大肥豬就ORDER左一個炸醬麵,都OK啦,不過就好似細碗左啲~

我就嚟個上海粗炒,都幾大碟,雖然就咸左啲,但都可以接受~

最後我地仲ORDER左一碟窩貼添,不過因為之前已經食左好幾隻小籠包,所以今次到大肥豬一個人食三隻啦~

2010年1月1日星期五

新年禮物

2 JANUARY 2010 (SAT)

一連九日嘅假期終於都完結,終於都要回到現實要返工啦!

講真....今個聖誕假又真係有啲浪費,因為唔係好舒服,所以就日日都係HEA係屋企訓..訓...訓...唔想周圍去,所以都可以話我真係訓到不知時日,唔係大肥豬提我,我都唔記得今日要返工。

唔知係唔係HEA到個人都傻傻地,今朝簡直係唔想起身,內心都掙扎左好耐,攪到有新一年第一日返工就遲左少少添。(哈哈....真係自己都覺得自己好懶惰)

雖然今日都係懷有勁重HOLIDAY MOOD返工,不過一返到工就遇到啲開心事.......就係有禮物收呀~

雖然係一份遲來的聖誕禮物,不過對我嚟講係一份新年嘅禮物,新一年就有禮物收,好意頭哦,真係多謝晒糖糖同小肥肥,仲有史迪哥哥嘅糖呀!