2010年5月30日星期日

砌床仔

29 MAY 2010 (SAT)

早係第一次吉之島做大減價嘅時候,都已經幫小小豬買左張MINIMOTO櫸木嬰兒大床仔,仲係一個月後已經送左嚟屋企啦!

當係送到貨嚟屋企嘅時候,大肥豬就已經好想砌張床仔,不過因為當時我覺得時間尚早,怕太早砌好會好易整污穢,所以都阻止左佢個想法。

直到上個月,我地都覺得係時間砌床仔,因為早啲砌張床仔,就可以散吓啲油漆味,之後再用消毒嘢洗床仔時,又要等一段時間散味,所以我地就決定搵日砌好張床仔啦!

原來砌床仔都有好多學問,話當砌床仔嘅時候我係唔可以在場,所以打算搵個星期六我長週嘅時候,大肥豬就留係屋企砌床仔。

當我地決定左日期之後,係同事傾計過程又知道,原來砌床仔都要搵個好日子好時間先得,最後就要小豬媽幫我搵個好日子。

終於搵到今日依個好日子,既係我長週,係下午又有一個好時間適合砌床仔。

開頭都好驚砌床仔好麻煩,唔可以係指定時間內完成。不過大肥豬話原來係好簡單,唔洗半個鐘就砌好左,真係要俾個叻叻佢先得啦~

望住張BB床,真係覺得時間過得好快,仲有唔夠三個月小小豬就會訓係張床仔度,依家個心情真係既緊張又期待呀!

 

CafeMom Tickers

2010年5月29日星期六

第五次講座

28 MAY 2010 (FRI)

繼尋日去左聽惠氏媽媽會講座之後,今日又再去聽另一個講座。雖然好似忙左少少咁,不過聽多啲講座對第日照顧小小豬會好啲嘛!

今次依個講座係由BB CARE舉辦,題目係『產前產後60天』。

今次個講座分兩部分,第一部分原來都係尋日主講者林姑娘,由於有部分資料同尋日聽嘅都係差唔多,所以我同大肥豬都覺得有少少悶,攪到冇乜心機聽。

不過第二部分就主要係講孕婦同嬰兒營養,我地就即刻醒晒,仲好比心機聽。係後半部分當講嬰兒打針問題時,雖然知道係SELL佢地私家醫療機構打針服務,不過主講嗰位姑娘又講得好似好有道理咁,所以都攪到我地心思思都想幫小小豬去私家打針呀!

今次講座又有禮物收,就係一罐細SIZE嘅初生奶粉、細細支嘅維他命丸同埋一套手襪仔,都幾豐富呀~



CafeMom Tickers

2010年5月27日星期四

第四次講座

27 MAY 2010 (THU)

早前係惠氏媽媽會網頁上見到有個『坐月錦囊面面觀』嘅講座,有講座聽當然我又有報名參加埋一份啦,所以今日放工就同埋大肥豬一齊去灣仔聽講座啦!

係入場時就已經收到一大袋禮物,打開嚟睇先知道原來係兩包媽媽奶嘅試飲同埋兩大罐初生嬰兒奶粉(同係街買嗰啲一樣大呀),依份禮物真係超正,又可以慳番幾百蚊呀!另外我地仲即場JOIN左BB CARE,又有一份小禮物送,所以話今日嘅收獲真係勁豐富呀~

今日個講座都講左幾樣嘢,雖然時間好似係短啲同埋唔算講得太深入,不過就完全冇悶場,我仲好比心機聽嚟學嘢添,都學到嘢初步坐月嘅知識,都算冇參加錯個講座啦!

 

CafeMom Tickers

2010年5月26日星期三

第三次政府產檢

26 MAY 2010 (WED)

雖然係好唔想再去政府做產檢,不過大肥豬話始終係政府醫院留資料會好啲,有起特別事上嚟都方便啲。

我見今次開始係轉介到母嬰健康院做檢查,勁近屋企之餘仲要將上次係醫院拎出嚟嘅資料交俾佢地,所以就乖乖咁又再一次去做政府產檢。

開頭都以為健康院唔洗等太耐,加上知道都係做啲普通檢查,所以今次冇叫大肥豬陪我,等佢可以留返啲假去陪我睇私家嘛!

但原來健康院都一樣都係要等好耐,雖然孕婦唔算多,不過就等嘅過程都幾耐。

我由九點鐘到達,等左成個半鐘先可以見姑娘,同姑娘傾左約五分鐘,主要都係問吓我有冇啲懷孕不適,仲教左我啲防抽筋方法,個姑娘真係勁好人呀!

見完姑娘就要再等見醫生,醫生主要都係都係CHECK吓我個肚,佢先嚟用手按吓我個肚(個醫生都幾大力,有少少痛呀),之後就俾BB個心跳我聽,聽到小小豬個心跳聲。雖然都只係得幾吓,不過聽到真係勁開心呀!

由於有親戚朋友都話我個肚仔算細,所以我成日都好擔心,咁我就問埋醫生個肚SIZE係唔係正常。醫生好好人,即刻用軟尺幫我度肚,仲同我講我肚仔係合比例唔算細,叫我唔好擔心,一聽到就即刻放心晒。

見完醫生又再等約下次覆診時間,終於我要成十一點半先可以離開健康院,足足用左兩個半鐘。

雖然係等得耐左,不過俾我個感覺健康院啲醫護人員係比聯合嗰啲好好多,所以下次都應該會返去健康院做產檢,當去聽吓小小豬心跳都好呀!哈哈~

 

CafeMom Tickers

2010年5月25日星期二

第六份BB會禮物

25 MAY 2010 (TUE)

今日又收到另一份BB會禮物,就俾一大本優惠小冊子同埋一個袋仔啦~

雖然個袋仔唔算大,不過都可以用嚟第日放小小豬嘅濕碎嘢,所以都算係一份唔差嘅禮物嚟呀!

依排收嘅禮物好似越來越大件,唔知下次又會收到邊間公司嘅禮物呢?(哈哈...師奶仔本色又嚟啦!)

 

CafeMom Tickers

2010年5月22日星期六

血拼吉之島

23 MAY 2010 (SUN)

吉之島係依幾日又有八折優惠,雖然都為左小小豬買買埋埋好多嘢,不過都總係覺得好似唔夠咁,所以今日就再去行吓,睇吓有冇得啱心水嘅嘢啦!

其實今次去行吉之島主要都係想睇吓BB車,我地係出面都睇左好多,不過都總係心大心細咁唔知買邊部好。最後大肥豬就不停上網搵資料,終於都決定左買COMBI嘅車仔。

雖然今次COMBI BB車都只係得八五折,但之前都應該唔會再有特別折扣優惠,所以就決定買左佢。不過要等到七月先有貨送到呀~

之後就睇吓衫仔先,同我對上一次買嘅款式都係差唔多,所以就冇買到。不過就買左一包被同睡袋,有得替換嘛~

最後買左啲嬰兒專用嘅清潔用品~

今次血拼之後,好多BB嘢都應該買齊,都只係差啲濕碎嘢,咁就唔洗心掛掛咁諗仲有乜未買啦!

 

CafeMom Tickers

2010年5月20日星期四

第五份BB會禮物

20 MAY 2010 (THU)

今日係信箱又收到一份BB會禮物,就俾惠氏BB會送嘅書仔一本~

雖然份禮物主要唔係俾BB,不過本書仔都唔差,都好詳細講解成個懷孕過程要注意事項,同埋原價都要成$88呀!

哈哈...今日又賺多一份禮物,希望陸陸續續會收到更多禮物啦!

 

CafeMom Tickers

2010年5月19日星期三

平安包

20 MAY 2010 (THU)

早前係電視介紹長洲搶包山活動時,大肥豬就話好想同我入長洲行吓,買個平安包俾我食等我平平安安全。

佢依個想法當然係唔可行,因為依段時間長洲一定係會有好多人,咁迫人就唔啱我去,所以都係想吓就算啦!

不過,今日大肥豬放工時就買左份小禮物,就係依一個平安包~

哈哈...估唔到唔洗入長洲都可以食到平安包,真係有啲覺得攪笑添。

依個包包大肥豬係九龍塘MTR入面間榮華餅店買,真係估唔到啲餅店咁識做生意,要俾個叻叻佢地先得啦!

2010年5月17日星期一

第四份BB會禮物

17 MAY 2010 (MON)

之前係WORLD FAMILY迪士尼登記左做會員,嗰間機構就寄左封甜心寶寶禮物包換領信俾我,所以今日趁大肥豬出開旺角整嘢,所以就叫佢去換禮物啦!

嘩...加加埋埋有成廿幾件嘢,好似好豐富咁呀~

不過啱BB用嘅都只係有依啲~

其他就係兩支細細SIZE嘅油同一批宣傳單張啦~

雖然唔算係太合用,不過有禮物收都係一件開心事呀!唔知下次係幾時再有BB會禮物收呢?希望陸續有嚟就好啦...哈哈!

 

CafeMom Tickers

2010年5月15日星期六

買片片

16 MAY 2010 (SUN)

早前係BABY KINGDOM收到風,話PAMPERS係惠康做緊特價,初生用嘅片片都係$79.8/2包。如果用埋之前入BB會送嘅$40 COUPON,即係 $39.8/2包,真係抵到唔知知形容呀!

見咁抵我當然唔放過,所以今日就去左掃貨。加埋之前同事俾我張COUPON,我總共買左四包呀~

雖然好似師奶仔左少少,不過買左四包真係慳左唔少,樣樣慳啲咁先可以買更多啲嘢俾小小豬嘛!

 

CafeMom Tickers

2010年5月14日星期五

小小豬的禮物 4

15 MAY 2010 (SAT)

前幾日係信箱收到一封掛號信通知書,由於係通知書上面係寫左我個英文全名,都以為係叫我去投票嗰啲信又或者係政府信件。

今日趁大肥豬放假,所以就叫佢幫我去郵局拎信。佢一收到份包裹就即刻打俾我,講我聽原來封掛號信唔係政府嘢,係我一位朋友寄左啲禮物俾我。

聽完之後真係心思思,估唔到係啲乜,又諗係邊個知我我個英文全名。所以放工一返到屋企就即刻拎開份禮物嚟睇,原來係我個中學同學CARMEN寄俾我呀!

應該係講.......啲禮物係送俾小小豬先真~

真係好鐘意啲禮物,尤其係嗰兩件玩具,好得意仲係小小豬嘅第一份玩具嚟呀。

係度要同CARMEN講多謝,收到依份禮物真係好開心兼驚喜呀!

 

CafeMom Tickers

2010年5月13日星期四

好激氣

14 MAY 2010 (FRI)

今日真係好激氣,好唔開心,令我對政府醫院嘅服務進一步失去信心。

事緣我早排收到聯合醫院寄左封信俾我,話我上次抽血做嘅血糖測試數字唔多理想,約我返去飲糖水兼抽多兩次血做測試。

係我上次抽血時我都已經俾抽血嗰位學員攪到我個針口瘀,仲痛左幾日。所以當知道要去再抽血時都已經驚驚地,加上又擔心自己血糖唔PASS,所以都DOWN左成晚。

後來大肥豬就建議不如問返我個私家醫生,如果佢都會幫我做同樣測試,咁就直接去私家做,起碼信心大啲之餘仲唔洗做兩次,等我唔好浪費晒啲血咁話。

終於我都係冇番聯合做,因為我都已經決定左係私家生,所以都覺得由頭至尾係私家做晒所以測試會好啲,最多到時俾番個REPORT聯合留資料做個保障。

不過今日返工時段收到聯合姑娘打嚟,一打嚟就係咁罵,又話我唔合作,仲咒我血糖測驗唔PASS要見營養師添,根本就係唔俾機會我講嘢,完全冇理會我嘅感受,真係勁嬲,攪到都冇晒心機做嘢呀。

都唔明白點解政府啲醫護人員係咁,上次產檢時個醫生又串串咁,今次又俾姑娘罵,真係對政府醫院完全失去晒信心,真係好想唔再番去做產檢呀!

 

CafeMom Tickers

2010年5月11日星期二

母乳育嬰手冊

12 MAY 2010 (WED)

早前係BABY KINGDOM見到有準媽媽通知話有香港母乳育嬰協會派發嘅母乳育嬰手冊,見有好嘢我又點會放過,所以我都申請埋一份,諗住睇多啲依方面資料對第日都有幫助嘛。

都係上星期尾先申請,估唔到今日就收到,真係有效率啦~

睇左少少,覺得雖然本書仔細細,但都好似講得好詳細,睇晒成本都應該母乳會有進一步了解,所以都真係要慢慢咪熟佢先得!

有好嘢當然都想同大家分享,有興趣嘅準媽媽就去以下網址登記啦!  http://www.breastfeeding.org.hk/form/1505

 

CafeMom Tickers

2010年5月10日星期一

小小豬的禮物 3

11 MAY 2010 (TUE)

依幾日都幫小小豬收到小禮物,首先係早前糖糖送嘅幾件衫仔~

另一樣就係今日收到同事B小姐送嘅襪仔~

唔係收到份禮物,我都唔知原來我都未買過依啲襪仔俾小小豬,成日都掛住買衫,其實都應該仲有好多嘢我係未買或者係買唔夠用。除此之前,我產後用品仲係完全未買過添。

小小豬出世嘅日子就越來越近啦,趁住我依家都算有精神,真係要開始買番啲用品先,唔係到時都唔知點算好啦!

我依個初哥其實有好多嘢唔識,雖然都已經成日去啲網站度睇,不過都總係有啲嘢係唔明,所以唔知有冇啲媽媽級朋友仔可以介紹啲好用嘅嘢/牌子俾我同小小豬呢?

有你地嘅推介,等我唔洗隨便地買就買錯嘢...係度講聲麻煩晒先啦..哈哈!

 

CafeMom Tickers

2010年5月7日星期五

康寧道公園

8 MAY 2010 (SAT)

今日個天氣唔錯,所以大肥豬就捉左我去行公園散步兼影靚相。

突然間大肥豬就醒起上次去聯合產檢時睇到醫院對面有個中式嘅公園,於是我地就出發去依個公園啦!

個公園佈置都唔差,不過就細左啲啲,都係得幾個位置可以影相。但都有一個好處,就係都算少人行,可以慢慢影,冇人阻住呀~

當然唔少得影吓合照啦~

雖然公園環境雖然唔差,不過有一樣嘢係勁唔好,就係有好多蚊滋仔飛嚟飛去。我地影左一陣終於都頂唔須啲蚊滋仔打擾,行左一個鐘左右就走人啦!

2010年5月4日星期二

幸福獎品

3 MAY 2010 (MON)

自上次係冒險樂園玩擲彩虹贏左隻長頸鹿之後,我地都間唔中會去玩吓擲彩虹,不過我地都好有節制,每次都只係玩十個金幣,擲唔中就走人,唔沈迷呀!

今日食完飯返到屋企附近,吉之島行左個圈之後,路過冒險樂園,我地個引又嚟,所以就唱左十個金幣嚟玩。

我就冇乜運,都擲唔中任何獎品,不過大肥豬就好利害,擲中粒星星有成3000分,真係未試過,係擲中嘅時候我地都真係唔肯相信呀....哈哈!

見有咁多分,我地就八卦吓有乜好獎品換,係冇意中就見到有啲嬰兒用品換,所以就換左一張尿墊同大毛巾俾小小豬啦~

除左依啲之外,我地仲見到有啲NUK嘅用品換添,真係估唔到冒險樂園都有嬰兒用品換。

希望下次玩嘅時候都可以好似今次咁好運,等我地可以係玩之外,仲可以換啲禮物俾小小豬啦!

 

CafeMom Tickers