2011年1月30日星期日

坐少少啦

28 JANUARY 2011 (FRI)

一向同小小豬影相都係HIGH CHAIR或者訓係個地膠度,因為小小豬都仲未識坐只識訓係度,所以好多時個活動空間就得依兩個地方。

小豬媽話六個月嘅BB就開始識坐定定,雖然仲有成半個月先到六個月,不過今日小豬媽就開始教定小小豬啦。

初初教坐定定,所以就利用梳化及梳化邊的『L』角位,等小小豬左右都有的依靠練習吓。

係頭嗰幾次都係好似不倒翁左右瑤,試多幾次都可以叫做識識地,仲好開心咁同佢個『好朋友』玩添~

坐係度嘅小小豬好似唔同左樣,尤其擺啲古靈精怪樣時,真係冧C我呀~

2011年1月28日星期五

為食豬嚟啦

27 JANUARY 2011 (THU)

小小豬越嚟越大個,佢識嘅嘢就好似越嚟越多,可能係佢開始睇嘢睇得清楚,知道我地做緊乜啦!

不過佢大個仔第一樣學到嘅....就係為食豬,依家開始當我地食緊嘢嘅時候,佢就會眼金金咁望住我地,之後又開開咀咁好似想食嘢咁。有好幾次小豬爸食緊麵包時,小小豬都係眼都唔轉咁追住小豬爸,真係好攪笑呀!

好似今早小豬媽食緊碗粥時,小小豬就眼定定咁望到實一實呀~

當小豬媽打算玩吓小小豬時,佢又真係張開個口仔想食咁呀(當然係角度問題,小小豬係食唔到...放心)~

係我地食晚飯嘅時候,唔知係唔係小小豬見到食嘢,所以就扭計要抱埋去食飯桌度,就係咁...又俾小豬媽整蠱,真係好攪笑呀~

 哈哈...依隻真係為食豬,不過只限食其他嘢,飲奶佢就變返隻曳豬仔,要扭計先可以飲晒支奶奶,所以有時都俾佢激C呀!

2011年1月25日星期二

仔仔轉身了

26 JANUARY 2011 (WED)

好多人都話好多BB係三個月就識得轉身,不過我個小小豬係三個月時都仲係一舊飯咁唔識轉。

我一直等...等...等...等到四個幾月時,我地幫佢側側身,咁小小豬就用力轉埋佢,都叫做識轉少少啦!

雖然都叫做轉到,但始終唔係佢自己自動自覺咁轉,所以都有啲擔心。

不過到左今日,小小豬五個半月時,我可以放下心頭大石啦,因為......小小豬識得自己轉身啦!

返工一見到小豬媽,就即刻將小小豬識轉身依個好消息話我知,小豬媽仲話小小豬個轉力真係幾驚人,成個下午都係地膠上轉,識得自己左轉右轉咁,仲有幾下係連續轉,真係聽到我都好期待親眼見到呀!

不過唔知係唔係小小豬知我地想睇佢表演,佢就玩我地,唔肯轉俾我地睇。但當我地唔理佢時,就自己玩轉,終於俾我睇到佢轉身啦~

睇見小小豬轉身,我真係勁興奮,感覺上好似又大個仔去到另一個階段咁,依個感覺真係好難形象(係唔識點形容),總之就係好開心啦!

小小豬識的轉身,我地就要開始好似看牛仔咁看住佢,因為轉轉下就會怕有意外整親嘛.....哈哈!

2011年1月24日星期一

扭計小王子

25 JANUARY 2011 (TUE)

平日同小小豬影相都係影佢開心笑咪咪個樣,不過今日就有啲唔同,事關小豬媽幫小小豬影左啲另類相,就係啲扭計喊樣啦!

先嚟同佢個『好朋友』玩得好開心,玩到咪咪眼好ENJOY呀~

不過之後就因為扭肚餓,所以開始扭計喊,睇吓喊得幾肉緊~

小小豬都真係喊都喊得可愛過人,哈哈...當然啦...任何時候都總係覺得自己嘅仔仔都係最好嘛。

係日常生活中都唔係好覺得小小豬有轉變,但睇佢今日影嘅相,真係唔可以唔話小小豬越嚟越大個仔,比起之前影嘅相,好似大個仔左好多咁,成個樣都好似唔同左 (當然我自己就覺得越嚟越似我..呵呵呵) ,所以話小朋友真係大得好快,所以真係要多啲相先得呀!

2011年1月20日星期四

攪笑小王子

20 JANUARY 2011 (THU)

尋日帶小小豬去睇霍醫生之後,食左兩次藥同藥膏,小小豬塊面仔已經好返好多冇再紅腫,唔洗做一隻可憐豬仔啦!

雖然我都知濕疹係唔會斷尾,不過醫生話如果今次醫好左之後,繼續KEEP住咁做好啲補濕,咁就唔會再嚴重落去。

依個醫生我都覺得幾好,好似都幾夾到小小豬,所以如果冇乜問題,(TOUCH WOOD)第日小小豬有乜唔舒服,都會帶佢去霍醫生度睇呀!

前排因為小小豬個醜豬樣所以都冇乜點影相,小豬媽見今日好樣左啲啲,加上見小小豬拎住佢最鐘意玩嘅噹噹玩得咁開心,就影左啲相啦!

大家好,我係小小豬,依個就係我最鐘意嘅玩具,係最錫我嘅媽咪送俾我呀~

 

佢係我個寶貝嚟,所以我唔可以借俾你地玩呀~

依個噹噹真係好多用途呀....嗅又得~

咬又得~

『LAM』又得~

個噹噹真係好好玩,睇吓我...玩到流晒口水...哈哈~

2011年1月19日星期三

再看醫生

19 JANUARY 2011 (WED)

今朝一早起身叫到小小豬,俾佢嚇左一跳,成塊面仔、額頭仔都又紅又腫,雖然小小豬冇表現出明顯嘅唔舒服,仲識得對住我地笑。不過見到佢依個樣,真係都好心痛,寧願又紅又腫嗰個係我

自上次睇完屋企附近個兒科醫生之後,小小豬嘅情況完全都冇乜點改善,不停塗啲補濕CREAM,啲濕疹都好似冇STOP過,加上今朝見到咁情況,所以決定一定要搵個醫生再睇吓先得呀!

記得早幾個POST好多朋友仔都介紹左一位兒科專科-霍建中醫生俾我,大肥豬又上網睇過依位醫生嘅資料,所以我地決定帶小小豬去睇霍醫生,希望可以有啲專業啲嘅診斷。

霍醫生又真係幾好多人睇,BOOK完位都仲要去拎籌。好在大肥豬一早就去左等,所以等到我放工時就同小豬媽一齊帶小小豬去,去到就即刻有得睇,唔洗等好耐呀!

醫生一見小小豬面仔,就話佢係好乾燥,仲有啲發炎添。最攪笑就係當小小豬俾醫生打開衫檢查身體時,佢竟然笑到卡卡聲,仲令COOL COOL地嘅醫生都笑埋一份添..哈哈哈。最後,醫生開左一個星期藥俾小小豬食同塗面仔,一個星期後就返去覆診。

除左食藥之外,醫生仲介紹左又平又正嘅CREAM俾我,個英文名我就唔記得,只係記得俗稱『豬油膏』。既然係醫生介紹,當然即刻走去買。一返屋企就塗左一次,又真係幾潤又唔笠呀~

依位醫生俾我感覺都好PRO,希望小小豬食完啲藥之後可以打敗啲濕疹怪獸啦!

2011年1月17日星期一

試用 ICE-MASK

18 JANUARY 2011 (TUE)

維特健靈俾我嘅感覺都係主力賣啲健康產品,不過原來佢地開始向美容界出發啦!

點解我會知道......就係因為我好榮幸地得到佢地嘅邀請,叫我試用佢地隻新MASK。有好嘢當然想試吓啦,所以就答應左,那位負責小姐仲好快咁SEND左個MASK俾我。

開頭仲以為係俾啲普通試用裝,原來係一支STANDARD SIZE,我去佢地個網頁睇過,原來都要成幾百蚊,作為一位師奶仔嘅我當然係勁開心啦..哈哈~

 

今日收到,當然即刻就試吓先啦,凍住嚟FULL左30分鐘(因為係要雪凍佢先有好嘅成效),都覺得幾舒服,面仔都滑滑咁,但就仲未覺得有好明顯嘅改善,可能都係第一次用,等我試用多七日先,到時再同大家分享吓啦!

係度真係要再次多謝維特嘅邀請,真係好開心又榮幸呀!唔知幾時再有其他產品試用呢?(師奶仔本色又嚟啦~)

2011年1月16日星期日

豐富的一天

16 JANUARY 2011 (SUN)

近依排個天氣都真係太凍,為免會冷病小小豬,所以都好耐冇帶小小豬去街街。剛好今日天氣叫做回暖少少,加上又有特別任務,所以就帶埋小小豬去街街啦!

我地今日個節目都真係幾豐富,第一站就係去沙田車公廟還神。因為係新年時小小豬仲係我肚入面時,我地都有去拜過神期望小小豬可以平平安安出世,所以就要嚟多謝保佑嘛~

當然小小豬仲細,加上都有啲煙怕煙到小小豬,所以我帶小小豬去『請請』左之後,就係門口等大肥豬佢地啦!

離開沙田,我地就去第二個目的地,荃灣四面佛還神,不過因為小小豬做左懶瞓豬,所以冇親身去『請請』,同大肥豬留左係車度瞓,就由我去負責做嘢啦~

 

之後就到重點節目,就係直入元朗,因為今日係我姨姨所開嘅精品店開張,我地帶埋小小豬一齊去同賀吓姨姨呀!不過當日人太多,小小豬又未習慣咁多人,所以有啲扭計,唔記得影相添..哈哈。

係姨姨精品店留左一陣,我地JOIN就細路,一家八口入深井食燒鵝啦!

嘩...原來真係有好多間燒鵝酒家,不過因為小小豬係度,所以我地就搵左間最大同最乾淨(感覺上)去食啦~


講真,依間啲餸真係麻麻,服務態度又唔係咁好,所以都應應唔會再幫襯呀~

食飽飽之後,就發生左一件大事,就係小豬爸部車唔知仲乜攪左好耐都開唔到,好在在場負責泊車嘅人仕都幫手整,整左好耐用埋『過江龍』都係唔得~

 

好彩最後都有驚冇險,成班男仕幫手推車,等個機頭著番就得啦 (其實我都唔係好明,係小豬爸咁講呀)!

唔知係唔係小小豬玩左成日野性左,所以返屋企抺完身之後都唔肯瞓,仲眼碌碌咁,要等成個鐘先瞓著,真係激C我啦...哈哈!

2011年1月15日星期六

格仔AGAIN

15 JANUARY 2011 (SAT)

前排係屋企附近個商場租左一個格仔嚟賣砂糖兔仔,經過大半個月經盈,銷量都只係屬於一般,但都叫發過市,咁都算好啦(真阿Q精神)!

哈哈...等我係度又買吓廣告先:返左啲新嘅砂糖兔貨物,如果行開就嚟睇吓有冇啲合心水嘅嘢,幫襯吓啦!格仔就係藍田匯景廣場5樓92號鋪CASHIN BOX - A5格(即係廚窗嘅左下角嗰個,都好易搵到呀!)~

除左砂糖兔小格之外,今日我又開多左一個新格仔,不過依個格仔就係我同小豬媽合股,其實係原本小豬媽叫我將佢啲貨擺埋係我個小格入面,不過我啲兔仔都已經好大件,又點夠位放埋佢啲貨呢,剛好又有一個格仔出租,所以就租埋佢嚟幫小豬媽做吓生意啦!依個格仔都係同一間鋪,不過就係K1位(即門口最高嗰行第二格)~

哈哈..突然間好似好大生意添,我地都係試吓,希望可以長做長有,咁就可以幫補吓小小豬奶粉錢呀!

2011年1月14日星期五

攪笑相

14 JANUARY 2011 (FRI)

自從有iPhone玩之後,我都只係識玩FACEBOOK同推吓銀仔咁,其他就乜都唔識,真係覺得有啲浪費左部機添..哈哈。

為左唔好浪費部機嘅功能,所以今日係APP STORE度睇吓有乜好嘢玩時,搵到個幾得意嘅APP,可以將相加啲古怪ICON,所以就貪得意幫小小豬整左幾張古怪相。

首先…小飛俠小小豬嚟啦~

再嚟一張可愛小魔鬼~

最後就係發惡的小王子~

哈哈..玩依啲古怪相玩上引添,不過依個APP就唔算太多花樣,所以如果大家仲有咁攪笑嘅APP,或者好玩嘅APP,記得介紹俾我,等我搭車時可以有得玩呀(當然最好係FREE啦..哈哈)!

2011年1月12日星期三

小小豬的新玩意

13 JANUARY 2011 (THU)

小小豬繼早前鐘意玩枕頭仔之後,依家又多左個新玩意,就係玩奶咀啦!

平日小小豬都唔算鐘意食奶咀,有時俾佢都好快吐返出嚟,只係扭眼訓時俾個奶咀佢,就可以快訓啲咁。

唔知仲乜依排俾個奶咀小小豬時,佢會即刻用拎住個奶咀,咬一陣又吮一陣,有時仲當左個奶咀係雪條咁『Lam Lam』,睇見真係勁好笑呀~

 

同場加映:小小豬係剛剛出世時就好鐘意O咀,但過左一排就冇再整啦。不過依排又有個新咀型,就係鐘意左豬咀,有時玩得開心同肉緊就會豬仔咀,真係好得意~

唔知下期佢又鐘意整個乜咀出嚟呢...哈哈!

2011年1月11日星期二

我的精神支柱

12 JANUARY 2011 (WED)

五個月嘅小小豬真係越嚟越多表情,仲越嚟越鐘意笑,同佢傾吓計、玩吓咁就會開心笑咪咪。

雖然啲濕疹仲係攪到小小豬面仔紅卜卜,不過唔知點解今日小小豬心情極度高漲,笑得勁開心仲特別燦爛,所以小豬媽就幫小小豬影左好多好得意嘅開心相呀~

小小豬真係可以話係我精神支柱,睇到佢啲開心相真係即刻冧晒,有乜唔開心都唔記得啦!

2011年1月10日星期一

轉奶粉

11 JANUARY 2011 (TUE)

上次睇屋企附近嘅兒科醫生時,嗰位醫生建議我地幫小小豬轉飲豆奶或者較低敏感嘅能恩,希望減少啲敏感,期望可以濕疹減少發作。

豆奶感覺上好似冇咁多營養,所以我完全唔考慮,於是就15/16諗轉唔轉能恩1號好。係BK討論區CHECK左一輪,終於決定轉雀巢能恩1號,因為好多媽媽轉左之後都話幾好,好多濕疹BB轉飲左之後情況都有所改善。

經過考慮之後,原本都係打算等小小豬六個月時一次過轉能恩2號,不過依兩日都見小小豬個情況冇乜改善,時好時壞咁,所以都唔再等,即刻開始轉能恩1號,希望快啲轉就快啲解決到個問題。

我上網都睇過其實1號仔奶粉係可以飲到BB八九個月大,咁小小豬如果轉1號OK,咁六個月時就唔轉住,等大多少少先轉2號仔,始終BB轉得太多奶粉都唔係一件好事嘛!

雖然唔知關唔關奶粉事,不過有方法都要試,唔想見到小小豬紅卜卜又忟忟憎個樣嘛。

尋日放工就買左一罐返屋企,諗住今日開始轉呀~


今日早上第一餐就轉飲能恩1號,小豬媽話小小豬都冇特別唔鐘意,同平時一樣咁,所以應該會繼續試轉,每三日轉多一餐,希望可以順順利利咁轉好晒,可以快啲同濕疹SAY GOODBYE啦!

2011年1月9日星期日

五個月啦

10 JANUARY 2011 (MON)

時間真係好過得好快,唔經唔覺小小豬就已經五個月人仔啦!

唔知係唔係小小豬都知道自己今日五個月大,一朝早起身好開心咁笑咪咪,開心到脷仔都伸埋出嚟,真係勁攪笑呀~

五個月嘅小小豬仲係一舊飯仔咁乜到唔識,依個懶惰豬仔幾時先識轉身呢?俾個藉口自己,唔同係天氣太凍著得多衫所以唔識轉?希望小小豬快啲學識啦,咁就好好玩啦...哈哈!

踏入五個月,就即代表小小豬越嚟越大個,所識嘅嘢就越嚟越多,真係要更加多照顧先得。因為依個階段係開始識認人,如果唔係到時唔認得我就大件事啦!

2011年1月8日星期六

傻笑的小王子

9 JANUARY 2011 (SUN)

依排天氣凍,小小豬塊面仔又再紅卜卜,不過冇之後咁紅腫,所以我都放心啲。

我都知濕疹係一件好長手尾嘅病,我會努力照顧小小豬,希望大個啲就可以斷尾,變返一隻靚豬仔呀!

雖然面仔紅卜卜,不過小小豬心情都冇受影響,今日同公公傾計時,又不停哈哈咁傻笑啦~

唔止傻笑,一笑得激動,佢個PAT PAT仲郁郁咁,勁攪笑呀~

其實唔只係今次,上幾次公公同小小豬玩嘅時候,小小豬都係咁傻笑,不過就唔夠快拎起部電話,今次終於俾我影到啦!

相信依個小小豬一定係好痴公公,因為其他人點同佢玩得興奮,佢都只係笑笑口咁,但公公一撩佢,小小豬就會即刻哈哈大笑,真係攪到我有啲妒忌添…哈哈哈!

2011年1月5日星期三

好醫生難求

6 JANUARY 2011 (WED)

首先多謝各位幫忙,提供左好多對付濕疹嘅方法,我見好多朋友仔都叫我介紹芫茜水比小小豬沖涼,所以我都會首先試用先,因為芫茜都係啲天然嘢,都應該唔怕。不過就要等天氣回暖返先可以試,因為要浸洗約五分鐘,我怕小小豬會冷親呀!

雖然小小豬今日紅卜卜情況都已經好左啲,不過今日都決定帶小小豬去睇兒科醫生。我地見個醫生係屋企附近,係BK論壇都有媽咪提及過,當然評語就有好有壞啦。其實我地都本住一試心態,如果依個醫生係好,咁第日如果小小豬有唔舒服時,都可以近近地帶佢去睇嘛!

唉...那位醫生俾我嘅感覺就係好似趕收工咁(我都已經5:00去睇,又冇乜人),一坐低就跟本唔俾機會你講嘢,一輪機關槍咁講..講...,當我俾前日小小豬紅腫病相佢睇時,我地影左五張相左右,佢都只係都只係好隨意咁望左第一張一眼,之後又繼續講,佢講嘅嘢同我之前睇接生醫生所講嘅,我係網站睇嘅完全一樣,都係話啲普通濕疹,又係開左啲有類固純嘅藥膏俾小小豬塗,成個過程四分鐘都唔知有冇呀!

唔知點解我對佢冇乜信心,唔止我..小豬媽都有同感,所以都應該又要搵個另一個醫生再睇先得啦!唉…真係覺得好醫生難求呀!

2011年1月4日星期二

擔心

5 JANUARY 2011 (WED)

小小豬由一個月開始面仔都成日紅卜卜,初時健康院姑娘話係啲BB瘡(大意話係胎毒咁解),不過過左到左兩個月之後,啲BB瘡都冇好轉(因為姑娘話約一個月之後就會散),仲變得開始嚴重左,唔止紅卜卜,曾經試過又紅又腫,真係睇見到心痛,最後帶佢去幫我地接生嘅醫生睇,終於證實左係濕疹。

雖然唔算係嚴重嗰種,加上醫生話好多飲奶粉嘅BB都有,但一聽到小小豬有濕疹真係好唔開心,因為睇左好多網站講,濕疹手尾好長有排攪嘛!(唉...小小豬係我肚入面嘅時候我都已經好小心飲食,都唔明白點解咁都會有濕疹,真激氣呀!)

醫生都俾左啲藥膏我地,雖然明知有類固醇,不過見小小豬成日因面仔紅腫咁忟憎,都冇辦法唔幫佢塗,等佢舒服啲。就係咁我地KEEP住平日同佢塗CREAM,嚴重時就塗藥膏,過左兩個月都叫做冇乜大問題。

不過今朝小小豬嘅紅腫情況又嚴重左,今次唔只面仔,頸仔都係咁,見到佢咁樣真係心都痛晒,返到工都冇晒心機做嘢,個心只係識得掛住仔仔呀!

唉...真係好肉痛,對住今早小小豬個可憐病樣相(因為小豬媽話影低佢,留番下次見醫生時俾佢睇),真係好內疚,點解小小豬會攪成咁,係唔係我依個媽媽做得唔好,攪到仔仔咁辛苦。

雖然小小豬未去到爛面、流血依個情況,不過小豬媽就建議搵個兒科專科睇吓,起碼專科睇都會好啲。所以依家好勤力咁不停上網搵資料,希望可以搵到個好醫生,貴貴地都唔緊要,最重要係等小小豬唔洗再成日咁辛苦嘛!

唔知有冇媽咪可以介紹一吓好醫生俾我呢?仲有呀…有冇啲好方法可以醫好濕疹呀!麻煩大家呀~

2011年1月2日星期日

超實用嘅禮物

2 JANUARY 2011 (SUN)

成個星期都冇開信箱,今日一打開就收到好友CARMEN送俾小小豬嘅禮物啦~

哈哈...我收到時真係比小小豬仲開心,因為小小豬名符其實係一名口水怪,佢啲口水真係多到有啲嚇親人,可以係短短嘅廿分鐘唔洗就可以令到條口水肩或者紗巾濕晒,有時仲會連依衫仔都濕埋,試過最利害就係一個早上同佢換三次衫,都係因為啲口水令到件衫仔都濕晒。

小小豬都唔係咁鐘意飲水,真係唔明白佢點解可以有咁多口水,仲間唔中係度吹口水波,真係俾佢激親。

依家未出牙仔就攪成咁,真係難以想像到佢開始出牙仔時,啲口水會多都點情況呀!

CARMEN依份禮物真係超實用,等我用嚟對付依個口水怪呀!