2011年10月31日星期一

搵到Crayola顏料啦

30 OCTOBER 2011(SUN)

今晚細路返嚟食飯,仲帶埋份禮物送俾小小豬,就係依一盒Crayola塗彩啦~

自其中一堂Playgroup學用手指點顏料用過,見小小豬又好似好鐘意咁,所以就好想買嚟俾佢係屋企玩,等佢接觸多啲唔同嘅嘢之餘,又可以趁佢用手指仔塗顏色時,訓練一吓佢手眼協調,最好嘅就係可以用洗一洗就甩,安全又乾淨。

不過原來依盒嘢都幾難買,上網搵過又搵唔到,去左好多間反斗城同Hallmark都話冇得賣。最後打電話去玩具反斗城問,佢幫我Check到話只得屯門嗰間肯定有貨,所以就細路幫我去搵啦!

聽細路講依盒都係最後一盒,所以個盒面有少少爛。唔緊要啦..有得用就得,都真係覺得好好彩,小小豬又多一樣嘢學/玩啦!

2011年10月30日星期日

開心泡泡樂

30 OCTOBER 2011(SUN)

上幾次落公園玩都冇帶埋支泡泡槍落去,所以冇得玩,今日終於都記得帶,小小豬又有泡泡玩啦!

落左公園仔玩幾次,依個小小豬都已經認得行去公園條路,睇佢知道行去公園仔時個樣幾開心~

一入到公園仔又係度偷笑,緊係知道有得玩開心啦~

開始玩泡泡啦,睇佢玩得真係好開心~

超鐘意依張相,好有FEEL呀~

可能我地晏落去,所以冇其他小朋友,只有我地一家人玩,所以冇其他小朋友一齊玩泡泡。如果有其他小朋友一齊玩多啲互動,相信小小豬應該仲開心呀!

不過原來泡泡相真係好難影,顧得小小豬個樣時,又冇晒泡泡,當有好多泡泡時,又影唔到個樣,所以話都真係好難。唔知有冇朋友仔可以教吓我地點先可以影到啲靚嘅泡泡相呢?

2011年10月29日星期六

第一次去理髮

26 OCTOBER 2011(WED)

基本上小小豬一歲嘅時候,我地係屋企幫佢修一修短啲髮腳之外,都未正式剪過頭髮。原本都冇打算咁快帶小小豬去剪頭髮,不過因為佢啲頭髮越嚟越長,加上又好大汗,每次食飽飽或者玩得激烈嘅時候,都會攪到成頭大汗,真係睇見佢都覺得辛苦,所以都係決定帶小小豬出去剪頭髮。

係未入去剪之前,我都只係打算修吓個型、剪短少少咁,不過因為小小豬成日出街都俾人叫做『妹妹』,所以最後就叫髮型師幫小小豬剪個男仔頭啦!

開頭小小豬都好乖乖咁係我腳上坐定定~

 
 不過....當髮型師用電刨(放心..係BB專用的)幫佢收後面同兩旁的髮腳時,小小豬情緒開始失控,不停咁喊,最後要小豬媽抱住剪埋下半場~


 
依個就係小小豬新髮型嘅背面,因為佢最後都唔係太合作,所以個尾就收得唔係咁好~

 
算啦....第一次剪係咁啦...不過正面睇都幾好呀!剪完之後真係即刻大個仔左好多,完全唔似BB啦~

 
同場加映:依個小小豬真係一名為食豬嚟呀,睇吓佢有得食蘋果個樣幾開心~

 
 

2011年10月28日星期五

轉季大放血

25 OCTOBER 2011(TUE)

天氣開始涼涼地,所以都要幫小小豬著返啲長衫,等佢唔好凍親。不過因為上年小小豬啲冬天衫基本上都已經唔啱著,要幫小小豬添置返啲冬天衫,所以今日放工就約左小豬媽一齊為小小豬SHOPPING買新衫。
 
小小豬大個仔啦,要自己揀衫仔啦~

 揀完衫又係度攪攪陣,真係俾佢激C呀~



經過我地半個鐘嘅努力,就幫小小豬買左好多靚衫啦~
 
件件衫都好鐘意,最好就係做緊大特價,買左咁多件都係一千蚊左右,平均一件都唔洗一百蚊,都算抵啦!

今日小小豬就大豐收,不過我就荷包大出血。不過我一啲肉痛嘅感覺都冇,仲買得好開心添...哈哈!

相信依度少少衫係唔足夠小小豬一個冬天著,睇嚟我又要慳自己多啲,留返彈藥買衫俾小小豬先得啦!

2011年10月27日星期四

10TH CPDA


23 OCTOBER 2011(SUN)

話咁快就嚟到最後一堂,今日因為小小豬係巴士上面瞓左,到PLAYGROUP就醒左,都應該係瞓唔夠,所以入到課堂都唔肯自己玩玩具,要平靜一陣先肯去玩呀~

好在到唱遊時都叫做好啲,開始精神啦~


今堂老師都認識腳指,分別俾左牙刷同海綿俾佢地擦擦腳。小小豬都叫做OK肯做,仲對支牙刷好有興趣添~

之後就到玩彩虹傘,雖然小小豬就冇乜表情,不過佢都好肯自己去搖呀~

食完茶點之後,今堂老師俾小朋友塗顏色,可能之前係屋企都試過俾小小豬劃圖畫,所以都叫做OK。佢係自己塗,我地只係幫手按住張紙,等佢易啲塗~


仲要叫小朋友自己貼啲貼紙上去,我地教左小小豬兩次,佢就可以自己貼啦~


依個就係小小豬嘅勞作,都叫做OK啦...哈哈~

之後老師就教除橡筋圈,等佢地訓練一吓手眼。手仔就好易,小小豬一除就除到,不過腳仔就困難啲,要老師教一次,之後自己試幾次先得呀~

學埋依個,玩埋泡泡就放學啦!

因為今日係最後一堂,所以老師就叫我地留低,幫小小豬做評估。經過短短嘅評估時間,老師都話小小豬整體上都表現得幾好,不過正式報告就要等幾日先有得拎,真係好緊張,唔知小小豬各方面合唔合格呢?真係好想快啲收到呀!