2011年11月11日星期五

面試日

12 NOVEMBER 2011(SAT)

等左好耐嘅面試日終於來臨,今次仲一日IN 兩間。其實原本應該係三間先真,不過有一間唔可以改時間,所以最後唯有作出取捨。

第一間IN嘅就正係我地兩公婆都好鐘意,上次去排長龍交表嗰間。 雖然已經同自己講要平常心面對,因為估收嘅機會都應該唔太大(始終小小豬都算係細仔,加上依間都係一間名校,當然好多人想入,兢爭都好大呀!),就係因為我地都好心儀,加上又係第一次,所以尋日開始我就已經好緊張啦!
 
唔知係唔係小小豬知道要去面試,所以佢一起身個精神都好好,去到幼稚園仲好醒目咁拖住我地行嚟行去,完全唔洗抱。等左一陣就可以入課室面試,由於只可以由一位家長陪同,所以就由我同小小豬去IN啦!

其實係以一個小組形式,一組八人面試,當中有幾個都比小小豬大幾個月(唉..一見咁情況都知不妙),不過我地都好比心機做埋啲測驗。

經過六個集體活動,老師問左幾個問題左右,咁就完成左個面試,過程都唔洗八分鐘。係成個面試過程,小小豬都可以做到啲指示,同老師都算有互動,應該都叫做OK,雖然一定唔係最好嗰個,不過應該唔係最差嗰個咁啦!
 
第一間就比我預期中快,所以我地先返小豬媽屋企休息一陣,再去第二間。依間就係朋友介紹,又近小豬媽屋企。面試就係觀察小朋友玩嘅情況。今次就有兩個老師陪住小小豬玩,整體上小小豬表現都幾好,都做到老師指示,又有同老師互動,所以依個面試應該唔差。

原來依家嘅面試係有禮物收,依兩份就係今日面試完畢收到啲小禮物啦~



兩個星期之後就分別會收到信,知道小小豬會唔會被取錄,仲要心掛掛多兩個星期,依家唯有等待幸運之神會來臨,可以等小小豬入到心儀嘅學校啦!
 
 

沒有留言:

發佈留言