2011年11月8日星期二

大個仔 百厭仔

6 NOVEMBER 2011(SUN)

小小豬真係越嚟越大個仔,今日我地出街俾左個書包仔佢揹。依個小小豬好鐘意揹之餘,又整左啲古靈精怪樣,睇起上嚟真係好大個,一啲都唔似十四個月嘅BB呀~



就係因為佢大個仔,就成日做啲百厭事。就好似今晚我地係小豬媽屋企打邊爐,為免小小豬攪攪陣,所以就開左個電視,放佢係張BB床度睇。之前我地都試過,一直都冇事發生過。

不過今日依個百厭小小豬,睇左一陣電視,開始不耐煩,就企圖爬出張BB床。當時食緊飯嘅大肥豬見到小小豬就快跌落床嘅時候,就不顧自己安全,即刻飛身撲過去救小小豬(就好似守龍門救波咁)鏟過去用個身體墊住小小豬,當時我都嚇到傻咗,唔識做任何反應,只係識驚。最後大肥豬就攪到周身受傷,手指傷得最深,又流血又腫左呀。

雖然大肥豬就受左傷,不過好在小小豬冇事,咁都真係有驚無險。真係好在大肥豬係咁危急情況下,識得用自己個身體墊住小小豬,如果俾著係我,我都唔知點算,可能只係識喊呀!

原來父愛真係好偉大,今次要俾10個叻叻大肥豬呀!

沒有留言:

發佈留言