2011年12月9日星期五

十六個月的小小豬

10 DECEMBER 2011(SAT)

小小豬又長大多一個月,已經係十六個月啦!時間真係過得好快,今日睇住小小豬嘅活動,佢嘅行經都表現得成個人仔咁,真係大個仔左多!(唉..真係開始覺得自己年紀大啦!)

依一個月我覺得一大進步嘅就係放膽行路,上一個月時仲係一步步慢慢咁拖住你行,到依家一出到街就要自己落地行,仲好似好急趕咁行得又急又快,有時候仲唔肯俾人拖住要自已行,有時都真係既擔心又激C。不過小豬媽話係正常,因為佢地剛剛學識行所以要扮叻咁自己行,到過多一兩個月行厭左,就自自然然咁要抱抱啦!依家唯有每當佢要自已行時,睇緊啲,唔好俾佢整襯啦!

另一件進步事就係小小豬除左學識晒A-Z 26個英文字母外,仲學識左0-9同分別到圖形及顏色。有時係街上面見到數字同英文字,佢都好會突然間讀出嚟俾我地聽,真係令我不得不讚賞吓佢叻叻呀!

除左學嘢之外,依個小小豬仲越嚟越古靈精怪,成日都做埋啲搞笑,所以有時攪到見住佢啲百厭嘢都唔記得要罵佢,都唔知話佢古惑定醒目好。

見佢一天一天咁長大,一日比一日懂事了,所以都真係要花多啲心機教好佢,等佢成為一個好乖乖!

同場加映:今日小小豬好痴大肥豬,就連睇電視都要伏係大肥豬個身上,睇吓佢地兩父子幾冧,真令我依個媽媽有少少妒忌添…哈哈哈~

 
 

沒有留言:

發佈留言