2012年5月31日星期四

家常便飯 5.30

30 MAY 2012(WED)

之前都講煮食部都已經外判左俾我,所以基本上依家嘅晚餐都係由我負責。

講真,我識煮嘅嘢唔多,加上又係新手學廚,所以好多時都要小豬媽從旁教路,咁我先可以煮到一餐豐富嘅晚飯。 其實都煮左大大話話都有大半個月,所以我嘅煮藝都有少少進步(又有人唔知醜..係度自己讚自己)。

雖然煮嘅過程都真係幾辛苦,次次煮完都成身濕晒咁,不過見到屋企人食得咁開心,又清晒碟上嘅食物時,都覺得依個辛苦都值得,仲有一種滿足感添。亦都因為咁,我開始鐘意煮嘢食,又唔想成日煮嚟煮去都係嗰幾樣,所以我就開始上網搵食譜學煮啦!
 
今日嘅晚餐就煮左兩個未煮過嘅菜式啦~

 
第一個新菜式就係薯絲炒肉碎~
 
 
依個都好易煮,煮出嚟都好好味,不過LULU妹就話比較淡少少(食咁咸唔健康呀..哈哈)。但係切薯絲嘅過程就唔多順暢,因為我嘅刀功唔太好,切得太大條,最後小豬媽頂唔住我嘅刀功,用一個嚟做示範俾我睇。嘩...真係切得又快又幼細,我都係要好好學習吓先得啦!
 
另一個就係鮮百合蜜糖豆炒豬肉~

依個餸之前小豬媽都會間唔中煮,所以我都識識地,都煮得幾好,真係好鐘意食鮮百合呀!

最後一個就係涼瓜炒蛋~


炒蛋真係好蝦人炒,雖然都叫做掌握到小豬媽所講嘅技巧,不過始終都係覺得好難,好驚會炒燶晒之餘又怕炒得太碎,所以我真係好唔鐘意炒蛋。不過奈何大肥豬鐘意食,加上小豬媽又話唔可以因為怕而唔去煮,所以我就好俾心機咁去學,終於...煮左幾次,我終於都叫做煮到一碟靚靚仔仔嘅炒蛋啦!

我要繼續努力,希望可以煮多啲唔同種類嘅菜式俾屋企人食。如果大家有啲好食、易煮同埋健康嘅菜式,記得介紹俾我,等我可以唔洗成日頭痛煮乜嘛!



 
薯絲炒肉碎

材料:
薯仔      2個
豬肉碎  約$15
蒜蓉   少許

製法:
1. 薯仔去皮切絲,用水浸半小時或以上後瀝乾水份;肉碎用豉油、老抽、糖、粟粉、麻油各少許醃15分鐘
2. 先燒紅油鑊快炒肉碎至8成熟後盛起
3. 再加2湯匙油爆香蒜蓉加薯絲舖平略煎至兩面少許金黃色,加入肉碎快炒至薯絲軟身(全程不用加水)


鮮百合蜜糖豆炒豬肉

材料:
豬 肉 
蜜 糖 豆 
鮮 百 合 1 球


製法:
1. 所 有 材 料 洗 淨 及 處 理 好 , 豬 肉 用生 粉生 抽麻 油醃 料 醃 20 分 鐘 。 調 味 料 預 先 混 合 好 。
2. 豬 肉 用 少 許 油 炒 片 刻 , 盛 起 待 用 。 蜜 糖 豆 飛 水 。
3. 再 熱 鑊 加 少 許 油 , 用薑爆香鑊, 再下蜜糖豆及百合瓣炒至熟透後 加 豬肉炒勻,再下加鹽、生抽,用生粉勾芡即可。

2012年5月30日星期三

I AM BACK

30 MAY 2012(WED)

各位朋友仔,我回來了!

其實係依個兩個月,我真係好唔開心,因為屋企出現左一個重大嘅困難,就係小豬媽得到一個重病。其實係知道嗰一刻真係好難接受,唔知點算好,喊過無數咁多次,成個腦都可以話實晒,做乜都冇心機,真係可以話係我有生以來面對嘅最黑暗日子。

不過隨著時間嘅過去,我嘅心情都可以話平靜返,都已經可以接受到,明白到成日唔開心同喊咁都唔可以解決問題,所以我要自己更加堅強,因為我仲要照顧小豬媽。

依家小豬媽第一階段嘅治療已經全部完成,需要休息六星期後等啲藥力揮發吓之後就再睇吓下一步嘅治療安排。整體上第一個階段都進展不錯,小豬媽仲肥左添。雖然之後治療係點我地都未知,不過我知道有我地支持,加上小豬媽佢自己都好積極咁面對,所以我相信小豬媽一定可以戰勝,好快冇事。希望可以一切平平安安...順順利利!

依家事情都算係安定左啲,我心情亦都平覆左,所以我亦都心思思好想寫返BLOG,所以就決定今日係今日重開啦!

就正如我之前所講,依個BLOG都寫左咁耐,某程度上我都真係唔想放棄,加上又覺寫BLOG可以俾我舒發嘅地方,又可以紀錄小小豬嘅成長。你地嘅關心支持,可以令我得到更多嘅正能量,所以都係決定繼續KEEP-ON。

不過,由於我依家要用多左時間係照顧屋企,所以應該都唔可以成日UPDATE到BLOG,所以大家有時間就要多啲入嚟,我一有時候就會繼續同大家分享我地這一家嘅生活日誌,仲有我嘅學廚事件,因為依家煮食部已經外判左俾我呀...哈哈哈!

另外,如果大家有微博,都可以去關注吓我(係左手邊有個ICON可以CLICK入我微博)。嗰度嘅分享應該會比BLOG快少少呀....HEE HEE~~


題外話:知道大家都有成兩個月冇見過小小豬,唔知大家有冇掛住佢呢?所以就等我先同大家分享一張開心嘅小小豬靚相先啦~