2012年6月30日星期六

我的助養孩子

1 JULY 2012(SUN)

今日大肥豬拎左一封信俾我睇,就係咁就有一個驚喜,就係.......我地已經加入宣明會,成為助養孩子嘅一份子啦~


依個就係我地所助養嘅小朋友~


依一個小朋友係大肥豬以我嘅名義嚟助養,事前我都全不知情。佢話我地嘅生活都可以應乎到,加上小小豬出世之後又覺得一個小朋友嘅生活係好重要,所以就不如付出少少,去幫助有需要的人,亦都可以為我地積少許福澤,為小小豬做一個好榜樣嘛!

其實依件事都係一件好事,我又點會反對,亦非常支持添啦!雖然所助養嘅費用唔多,不過都好希望依小小嘅付出,可以幫助到佢有好既生活,有一個好好讀書嘅機會啦!

原來除左每月俾助養費之後,我地仲可以同佢地有書信來往呀~


我會同我個助養小朋友書信來往,等過多幾年,小小豬大個識寫字之後,依個任務就會轉交俾小小豬,等佢可以學習大肥豬依一份善心同愛心,學懂去關心人呀!(好似講到好長遠添...哈哈哈)


2012年6月29日星期五

家常便飯6.27

27 JUNE 2012(WED)

今日等我又嚟介紹吓是日晚餐先啦~

 
先嚟西蘭花炒魚鬆~


再嚟好味嘅新鮮菠蘿雞又嚟啦~

 
今日依兩個餸都勁正,全部清晒,十個YUMMY呀!

晚飯過後,今日又挑起個引整甜品,所以我又嚟整啫喱啦~


今次唔係整普通啫喱,我地係整菠蘿雙色啫喱呀~

 
哈哈哈...只係睇個顏色都已經好吸引啦~

 
 
啫喱就整過好多次,不過雙色啫喱再加生果嘅都係第一次,雖然個賣相就幾好,不過唔知係唔係啲菠蘿會出水關係,所以上面嗰層嘅士多啤梨稀左啲啲,所以都唔算成功。

吸收左今次唔多成功經過,我一定會再接再厲,下次一定整到好味又靚嘅生果啫喱。

2012年6月28日星期四

濕水豬嚟啦

24 JUNE 2012(SUN)

成個月都冇入迪迪尼,原本
打算今日入去玩返轉,不過因為尋日先去左沙灘玩過,小小豬都晒到紅卜卜黑豬仔咁。為怕小小豬會辛苦,所以都係我都主動放棄入迪迪尼,諗住輕輕鬆鬆咁留係屋企抖吓。(雖然我係好鐘意入迪迪尼,不過我都係好理性嘅...HEE HEE)

今朝玩左一朝顏料之後,大肥豬見小小豬情緒仍然好高漲,加上又想帶小小豬出多啲街,所以就話帶小小豬去公園玩,就係咁.....我地今日就出左太古城公園玩吓。其實想帶小小豬去依個公園好耐,因為屋企附近只有依個公園有得玩盪鞦韆嘛。

睇吓個爛玩豬,一見個公園就即刻走去玩啦~


先玩吓滑豬仔先~


玩左一陣就又去玩佢個至愛...轉轉轉,不過小小豬依個POSE好似好有型呀~


之後就去玩鞦韆,可能都係叫懂事後第一次玩,所以個小小豬竟然驚,所以我都唔敢俾佢玩咁耐,只係玩左幾吓~


既然小小豬唔鐘意,所以就帶佢玩返佢鐘意嘅滑豬仔啦~


玩到成身濕水豬豬,不過都係掛住玩,唔肯乖乖地咁俾大肥豬抺汗呀(小朋友有得玩就係咁啦)~


之後仲係公園入面周圍走添~


雖然小小豬玩得好開心,不過因為天氣實在太熱,加上小小豬又不停走嚟走去,成身都濕到呢....有啲嚇人,所以我地玩左半個鐘左右就走人,費時小小豬濕到病嘛!

同場加映:
今晚食完飯就買埋片片返屋企,依個傻仔仔自己扲住包片片同棉花,由停車場扲到返屋企,全程唔洗人幫,真係叻叻又攪笑呀~

2012年6月27日星期三

顏料樂

24 JUNE 2012(SUN)

買左盒顏料俾小小豬都有一段時間,都未同佢玩過,見今日冇乜嘢做,所以大肥豬就建議教小小豬玩吓啲顏料,等佢接觸多啲唔同嘅嘢啦!

可能都唔係第一次接觸,所以小小豬完全都唔怕啲顏料,仲好似好專心咁添~


個傻豬仔仲對個油碌碌好有興趣~




好認真呀~


仲玩到成隻手隻都係添~


不過由於係第一次玩,所以都係等小小豬自由發揮。不過睇佢個過程小小豬都係鐘意玩,仲不停咁邊掃顏色邊讀COLOUR。

雖然玩到污穢豬咁,不過依隻顏料都係非常安全,仲係易於水洗,所以都真係非常好,有時間都多啲同佢玩先得。
 



2012年6月26日星期二

端午節..玩龍舟沙

23 JUNE 2012(SAT)


端午節又到啦!

雖然依家都唔多覺有端午節氣氛,我就連糉都冇食過,不過有一樣節目我就一定會記得去做,就係一定會記得帶小小豬去沙灘玩吓沙同游龍舟水去應吓節啦!(其實又係一個藉口等我帶小小豬去玩....呵呵呵!)

昨晚嘅天氣都真係唔係幾好,所以都好擔心冇得去玩。不過好在一早起身天氣都幾好,所以就如期出發,今次我地同埋LULU妹,一行四人去石澳玩啦!

我地等小小豬飲左第一餐奶之後就出發,所以去到都尚算早,好快就幫小小豬換件戰衣,準備去玩啦!

原本我地都打算即刻落水玩,點知小小豬好似仲好驚水,所以一見到個海就攬到我地實一實,唔肯落水呀~

 
既然小小豬仲驚驚地,我地都唔迫佢,唯有玩返去玩住沙先,睇吓佢玩得幾開心~




玩玩吓....仲係度ONE TO TEN咁數手指~


個傻豬仔真係玩得好開心,睇佢做埋幾多古靈精怪動作~

玩完沙就同LULU妹玩陣波波先~


仲係個沙灘周圍走呀~

見佢開始冇咁驚,就慢慢一步步咁引佢行出海邊~


之後大肥豬就先同佢係海邊浸吓水(超鐘意依一張相...勁有MOOD呀)~


開頭小小豬都仲係驚驚地,不過浸左一陣之後,開始好似冇咁驚,仲用手拍啲水,所以大肥豬就帶少少咁同佢行出啲...行出啲,仲玩跳浪添!(不過因為今日用左支短鏡,所以留係岸邊嘅我影唔到佢地玩嘅情況)

玩到最後,小小豬都叫做肯坐落水泡,玩左一陣水咁啦~


雖然都只係游左幾分鐘,不過叫做落過水,應吓節啦!

今次都已經好大進步,下次希望可以再好啲,等我都著泳衣,同小小豬開開心心咁玩水...哈哈哈!