2012年9月30日星期日

大個仔 自己拎

28 SEPTEMBER 2012(FRI)

每日小小豬落校車第一時間就係除左件冷衫仔,之後就會將個書包俾左我。人仔細細就拎個斜咩袋,個書包都大個佢,唔係好方便咁。(真係唔明白點解佢地學校唔改用背包式,方便啲小朋友嘛)

今日初時一如過往咁,我幫小小豬拎個書包仔,不過行左幾步,小小豬突然要搶返個書包自己拎,點都唔肯俾我幫佢拎呀~


睇吓佢...星期五個書包就係最重嘅,拎住個大書包行得幾辛苦~




個傻豬仔又真係可以拎住個大書包返屋企呀~

雖然個書包真係好重(以一個兩歲小朋友嚟計),不過既然佢肯自己拎,當然俾佢自己做啦。一嚟可能係老師係學校教過,我當然要配合吓啦,二嚟我唔可以做怪獸家長,吓吓照顧周到,要等佢細細個開始明白自己的事自己做,希望可以養成個習慣,唔好成為王子啦!

係見小小豬搶書包行返屋企嗰一段路,忽然間感覺小小豬好似大個仔左,唔通返左學真係有咁大影響力。

已經唔可以再以一個BB嚟對待小小豬,因為佢已經成為一個小朋友啦!


**我的微博...快啲嚟關注我地啦**

2012年9月29日星期六

沮喪

27 SEPTEMBER 2012(THU)

今日小小豬學校又有活動,就係舉行一個慶祝國慶活動,學生可以自由穿著中國民族服裝返學校慶祝。

就因為依個原因,前幾日係床下底嘅冬天衫埋中,搵返佢件型仔中國衫,等佢今日可以著返學啦~


幫小小豬著靚衫,等佢可以開開心心咁參加學校嘅國慶活動。原本滿心歡喜,但放學一聽到老師打嚟嘅電話,心情就即刻好沮喪。

其實老師主要打嚟係問小小豬個書包仔有冇其他小朋友嘅毛巾盒,不過就講埋小小豬今日鬧情緒事件俾我聽。原來今日活動內,小小豬唔肯係大堂坐定定聽老師講解,老師抱佢打算等佢都可以參加埋一份,但個百厭豬又唔肯,要自己行埋一邊自己玩。老師估可能係因為今日上課個程序有唔同,所以導致小小豬唔習慣,因而鬧情緒。

聽到老師咁講,成個人都真係DOWN晒,點解小小豬會咁百厭,唔乖乖聽老師話呢?雖然老師話小小豬係學校表現進步中,不過....幾時佢先可以做到一個好乖乖,係學校可以聽聽話話呢?依家我只能做就係係屋企多啲訓練佢,等小小豬可以聽多啲熟習多啲指令,咁可以係學校更加好啦!

沮喪一陣咁多啦,加油...加油...我同小小豬都一齊加油啦!

BTW....(等我幫小小豬話返句好話)其實今日鬧情緒事件,我估可能係因為今朝食左咳藥水,所以扭計,下次真係唔敢再食藥返學啦!

2012年9月28日星期五

小禮物

26 SEPTEMBER 2012(WED)
 
早前好榮幸得到係美素佳兒邀請參加佢地個「共享成長歷程」派對,我地三口子都好期待依個活動。

不過....真係唔好意思,因為我係活動當日個頭痛到爆,原本都考慮頂硬上去參加,但出門口時真係頭痛得十級咁,最後都真係不得不放棄依個咁好嘅派對活動。

雖然我冇去參加,前日美素佳兒公關姐姐打電話俾我,話想送返原本為我準備嘅小禮物,就係咁....PR姐姐就好快手咁送左啲小禮物嚟屋企啦!

哈哈哈...真係好豐富哦~


係咁多小禮物中,小小豬就係最鐘意個收納盒,一見到就.......又爬左入去坐啦~


真係要再一次多謝美素佳兒公關姐姐,雖然我未出席,佢都記得我,送返啲小禮物俾我,真係好啦!

上次真係唔好意思,下次再有活動記得預埋我地三口子,我都一定會出席一齊玩呀!

2012年9月27日星期四

團購鞋仔

25 SEPTEMBER 2012(TUE)
 
早係上星期,見YAHOO團購有DR.KONG鞋仔做優惠$149一對,見好似好抵咁,加上啲鞋仔個款又幾OK,所以我又團購買左一對。

趁今日有時間,就同埋大肥豬去屋企附近嗰間睇,換返對新鞋仔俾小小豬著。

不過可以因為團購關係,好多靚鞋都冇小小豬個SIZE,就算我想買大一個碼都冇,只係得返啲細碼SIZE,終於好唔容易先搵到對啱小小豬個SIZE。

唔係話依一對唔靚,小小豬著上腳都幾有型呀,但就唔多係我鐘意嘅款式,因為....太深色啦~

雖然唔係太鐘意,不過DR KONG都係SELL健康,所以都可以接受呀!

2012年9月26日星期三

試食:i-yes-mom天然有機小食

25 SEPTEMBER 2012(TUE)
 
早前收到一有機食品公司公關小姐邀請小小豬試食啲有機天然小食,有得嘗試新嘢,當然都想試吓。

PR姐姐仲好快手咁送左啲小食俾小小豬啦~


其實當初收到啲小食時,我都15/16,係唔係真係俾小小豬食,因為始終都係食落肚,當然要小心啲啦。所以當我收到啲小食時,我地上網睇左啲資料,知道依 間公司係用主力做有機小食系列,係用啲天然有機水果及材料,唔會添加其他化學劑,所以都叫做安全。就係因為依個安全原因,大肥豬先批准小小豬做今次嘅試食呀~

先嚟一盒有機果味脆脆~

產品介紹:糙米(有機)、黑米(有機)、糯米(有機)、大麥(有機)、高梁(有機)、有機糖、有機牛奶、草莓粉﹐南瓜粉、仙人掌粉、洋蔥粉、蜂蜜、核桃、葵花籽、松子、芝麻、竹鹽。3種不同味道、形狀與顏色;星星(粉紅:草莓味)、球形(紫色:黑米﹑堅湧類)、環形(黃色:南瓜﹑洋蔥)。以不同的形狀勾起孩子們視覺上的興趣,進而促進食慾。

依一盒其實係類似早餐嘅片咁,加奶嚟食嘅。不過我就冇俾小小豬加奶當早餐食,只是當係啲小食俾小小豬食。我自己都有試過個味,口感脆脆唔算太甜,個味道都唔算太差(可能大人食會覺得淡左少少,不過俾小朋友食都應該啱啱好),都幾好食,我見小小豬都食得幾開心呀!不過唯一有個缺點就係,因為小小豬濕疹關係唔可以依南瓜,所以每一次我俾小小豬食時都要做一輪功夫,挑走晒啲圈圈形,對我嚟講就有少少麻煩(不過...只係對我個人己言)。

另一種就係三種唔同味嘅有機小食~

**有機香蕉味小食 - 產品介紹:有機玉米、糯米(有機)、有機大米、有機糖、香蕉粉、有機牛奶、核桃、葵花籽油、竹鹽。
**有機芝士味小食 - 產品介紹:糙米(有機)、切達芝士(有機)、糯米(有機)、有機牛奶、有機糖、大麥(有機)、,高梁(有機)、有機大米槳、高達芝士、大豆、紅薯淀粉、竹鹽。採用百分百的天然芝士制成,於制作過程中選用天然發酵的高達芝士,倍添滋味。
**有機草莓味小食 - 產品介紹:糙米(有機)、草莓(有機)、有機糖、草莓粉、有機牛奶、山茱萸粉、竹鹽。制作中不使用草莓醬,而是將有機鮮草莓榨針後加入,與有機糖和有機米完美融合,形成柔和香甜的味道。

上星期六我地去街街,都有帶一包草莓味俾小小豬食,睇佢食得幾開心~

(其實仲有啲小小豬食其他食品嘅為食樣,不過我唔小心FORMAT左部相機...所以就得返依幾張...唉真失敗!)

三隻味我都有試食過,整體上個味都OK,感覺上有啲似食緊桃哈多,不過我就覺得淡味左少少,不過可能就因為咁先啱小朋友食。難得有云零食食,小小豬當然都好鐘意啦,不過佢就比較鐘意食草莓味,每次俾佢之後好快都食晒,仲不停叫我地添食呀!

整體上都幾好,不過依啲始終都係零食,所以每次小小豬食完之後,我都要佢飲一大杯水,感覺好似好啲呀!

如果大家有興趣可以去全線吉之島同荷花,買返包俾你地小朋友試吓啦!

2012年9月25日星期二

光波第一激

24 SEPTEMBER 2012(MON)
 
光波機都相信已經HIT左一段時間,當初初推出時,我都已經好想買部嚟玩,奈何大肥豬話阻地方之際又怕我係三分鐘熱度,所以一直都只係得個想字,不過今日終於有得玩啦!

因為嘉汶表妹轉贈左部光波機俾我地呀~


YEAH...我同小豬媽都有新玩具玩啦~




因為要試機關係,所以今日就先嚟整個簡簡單單嘅『光波雞翼』作為開機之作啦~


雞翼進行中~


完成啦,個賣相都真係唔係差呀~

某程序上光波機真係幾方便,我只係好簡單咁先用左叉燒醬醃一個鐘,之後焗左八分鐘一面,到一面就再焗五分鐘,咁就完成啦!整出嚟個味又真係唔差,熟得嚟又唔算太乾身,都有少少汁係啲肉入面,仲有啲BBQ嘅味道添。

我見介紹話光波機仲可以烤、煮、燒、煎、蒸、焗、烘、炸、燉甚至解凍,我就未試,有機會可以一樣樣咁試吓先。不過,我同小豬媽都話下次試吓整豬頸肉or燒肉,一於向難度挑戰,希望到時都可以成功啦...哈哈哈!

2012年9月24日星期一

冧爆

24 SEPTEMBER 2012(MON)
 
今日小小豬學校有個中秋提燈會活動預祝中秋節,所以要每個小朋友都帶燈籠返學一齊玩。

小小豬當然帶左舅母買俾佢嘅MICKEY燈籠啦~


哈哈哈...學校真係多活動,希望小小豬係學校都玩得開心啦!

標題話係冧爆,當然唔係依一件事啦,係乜呢?哈哈....

事緣今日因為要陪小豬媽覆診,趕唔切返嚟去車站接小小豬放學,所以依個重任就交左俾LULU妹。點知....LULU妹話個傻仔一到車站唔見我,就捉實個褓姆唔肯落車,到姨姨抱落車時,就不停叫『MaMi』『MaMi』。

哈哈哈....聽返都真係勁冧呀!

可能依家做左FTM,對小小豬嘅時間多左,所以小小豬依家痴我好多,成日都會叫『MaMi』『MaMi』咁,雖然有時小小豬係好百厭,見到佢啲百厭嘢都會好忟憎唔開心(有時都會覺得做FTM比返工真係辛苦好多陪),不過當小小豬好深情咁叫『MaMi』,又拖實你手仔冧你時,真係覺得幾辛苦都值得呀!

2012年9月23日星期日

開心沙灘小子

23 SEPTEMBER 2012(SUN)
 
好耐都冇再帶小小豬去沙灘玩啦,趁今日天氣都幾好,所以就帶小小豬去玩返轉啦!

我地個目的地就係清水灣第二灘,上年都嚟過兩次(因為係最近我地嘅海灘,今次計過時間,原來都真係勁方便,由屋企出發到目的地,一個鐘頭都唔洗,所以話都真係幾啱我地嚟玩呀。

天氣都幾好,都算有太陽,不過因為都已經開始踏入初秋,怕啲水會凍,所以我地今天都冇俾小小豬落水,主力都係玩吓沙啦!

雖然冇落水,不過我都有同小小豬換條游褲仔,加件小背心,嚟個型仔沙灘LOOK呀~


開始玩啦~


個傻豬仔玩都幾開心~


開心到佢呢....真係好少見小小豬笑得咁燦爛呀~



仲拖住大肥豬出去拎水返入嚟玩添~


熟習左個沙灘環境之後,就周圍走啦~



行到出個海邊好情深咁望海,唔知佢諗緊乜呢..哈哈哈~


行左一陣海邊,個傻仔自己行返去個位度繼續玩沙,仲係度邊唱歌..邊指身體,大家知唔知小小豬唱緊乜歌呢~


唔覺唔覺,原來我地係沙灘都玩左兩個鐘,由於個太陽開始強勁,為免小小豬又再晒成黑豬仔,所以我地就執嘢走啦!

今日小小豬真係好開心,情緒都真係勁HIGH,可能佢鐘意去沙灘玩啦。所以我地都決定,趁未到秋天,天氣好嘅時候帶多佢嚟幾次,等小小豬開心多啲!