2013年2月15日星期五

小小情人節

14 FEBRUARY 2013(THU)

今日一朝早起身我個小情人就俾左個小驚喜我,就係自動自覺走埋去個琴仔度,自彈自唱一首歌仔,好歌送我情人節~


哈哈哈....佢真係好專心咁亂彈同唱呀,雖然都唔太知佢唱乜,不過都算係一份好好嘅情人節禮物啦!

原本都PLAN左啲小節目同大肥豬兩個去慶祝,不過之後有另一個更好嘅節目,所以就更改行程。我地做左啲乜呢?咪就係一家親友嚟我家拜年兼打邊邊,雖然唔係二人世界,不過可以一家人係依個重要日子開開心心咁食飯,比起其他節目仲溫馨及溫暖啦~

話晒都係情人節,點到有少少慶祝活動。就係大肥豬放工返屋企時,買左兩件小蛋糕返嚟,等我地夜宵慶祝呀!

睇吓依個為食豬,一見到件小蛋糕就要食,完全冇諗過等埋我呀~



情深的一吻...冧C啦~

雖然就簡單左少少,不過學大肥豬話『簡單就是幸福!』,有咁多親人同我一齊過,所以我都已經覺得好開心、好幸福啦!





**我的微博..關注吧**

沒有留言:

發佈留言