2013年5月31日星期五

第一次做小MODEL@the mini way

31 MAY 2013(FRI)

首先要多謝the mini way嘅MARKETING靚女姐姐邀請,今日小小豬終於都奉獻左佢嘅第一次,去左做小MODEL呀!

事緣係the mini way個WEBSITE內有一個BLOG,每星期都有個MIX & MATCH 教室,教吓我地點樣扮靚靚。今次小小豬嘅任務就係等姐姐同佢扮型仔嚟做示範啦!

有得做小MODEL,可以俾小小豬扮吓型仔之餘,又可以俾小小豬見識多啲,等佢多啲接觸吓陌生人,我當然都即刻答應。

最好就係地點都唔算遠,係佢地銅鑼灣蘭芳道店拍攝(即係蘋果商場旁邊)~

店鋪樓高兩層,佈置環境都好舒服。除左童裝之外,佢地都有賣好多益智玩具呀~

the mini way啲衫係來自好多唔同國家嘅品牌,好多時小模特兒出SHOW都係著佢地啲衫呀!我覺得佢地啲衫嘅質地、設計同CUTTING都好好。當然一分錢一分貨,價錢就會比平時買嘅貴少少,屬於中檔次啦!

小小豬一去到就已經即刻去拎玩具玩,攝影師姐姐都建議俾佢玩一陣,等小小豬WARM-UP一吓~

玩左一陣就開始拍攝工作啦,MARKETING靚女姐姐好用心咁同小小豬襯靚衫呀~


換衫仔都掛住同姐姐玩呀~


開始啦~


攝影師姐姐啲靚相就未睇到,因為要等佢地出左BLOG先有得睇,依家就睇住我地自己影嗰啲先啦!

第一套衫仔,好鐘意依條褲仔,好夏天FEEL呀~


換第二套衫啦~


哈哈哈...點知點解總係覺得小小豬著恤衫之後,即刻大個仔左好多呀~


第三套....唔好成日話我將小小豬扮女仔,因為佢著左粉紅色衫真係好靚仔呀~


最後一套...襯左一件波波外套,好有型~



我地大約用左一個半鐘左右就完成拍攝工作,整體嚟講今日小小豬嘅表現比我想像中都算好,始終都係因為放學之後食完午餐就嚟玩,平日依個時間都係佢覺覺豬時候,所以都曾經有擔心過佢會好扭計唔合作呀!

不過唯一就係小小豬都真係好難先可以企定定咁俾姐姐影,所以又增加左姐姐嘅工作量,真係唔好意思啦!

唔知係攝影師姐姐機中小小豬啲相會係點呢?真係有啲緊張添,等the mini way出左個BLOG之後,我再同大家分享啦!

如果大家有興趣知多啲the mini way,可以去佢地個網址http://www.theminiway.com/同FACEBOOK專頁https://www.facebook.com/TheMiniWay

2013年5月30日星期四

芒果小丸子

30 MAY 2013(THU)

芒果小丸子一向都係我至愛,每一次去糖食店我都一定會點依一樣甜品。自從成功整左兩次雪葩之後,我就開始諗其實都可以係屋企自己整,諗左好耐終於今日落手,整左個好好味嘅芒果小丸子啦~


材料就只需要依兩樣咁簡單~


其實開頭我都一直搵緊啲小丸子可以係邊度買,當然係搵左好耐都搵唔到啦!最後都決定自己搓,其實都唔係好難,個做法都係同整湯圓咁,糯米粉加暖水搓,之後搓成細細粒。不過我嘅搓功唔係太好,所以就粒大粒細...哈哈哈~


之後就煲滾水,落小丸子,滾到滾啲小丸子浮面就即係熟啦~


用凍水浸住,等啲小丸子可以彈牙啲。再連水一齊放入雪櫃雪一陣備用~

先將一粒半嘅芒果切粒粒,放入雪櫃雪一陣備用~


再將兩個半嘅芒果用果汁機打成芒果漿,放入雪櫃雪一陣備用~

最後,將芒果漿放在碗上,再放啲小丸子同埋芒果粒,就係咁一個好好味嘅芒果小丸子就完成啦~


除左其中一個芒果酸左少少之外,整體都真係好好味,好有滿足感呀....呵呵呵!

2013年5月29日星期三

肉痛

29 MAY 2013(WED)

話說小豬媽係我二十歲嘅時候,送左一隻玉鈪俾我,咁我就由嗰時開始戴住,大大話話都可以講陪左我十N年。因時間嘅洗禮,我都手鈪位置都已經俾我戴到有兩節色同埋嗰個位已經笠左啦~

陪我經歷咁多風風雨雨,玉鈪依然都係冇事。係我上次搬屋時都只係撞裂左少少,不過都仍然係可以戴到依家。不過點都估唔到,最終都係敵唔過我嘅肥肉。

因為玉鈪已經係我手碗上郁唔到,只係勉強咁可以向前移少少。不過依排天氣熱到C,係我啲肥肉再加冷縮熱脹影響下,玉鈪啜到隻手碗骨好痛。

其實都已經痛左好幾日,都打算繼續忍落好,因為始終都係好唔捨得。不過到左今日,真係痛得好利害,痛到舊骨好似發炎般脹左。終於係小豬媽嘅建議之下,要扑爛佢啦~

當然係由媽咪操刀~

就係小豬媽一扑,玉鈪就同我SAY GOODBYE啦~

講真,扑落去嗰吓真係好肉痛呀!

雖然已經舊左,不過我都已經將依四節好好收藏,因為小豬媽話可以拎去金鋪鑲返好佢,整過其他玉墜俾小小豬戴,都可以留一個紀念呀!

2013年5月28日星期二

咸菜韮菜炒蜆肉

28 MAY 2013(TUE)

開始踏入夏天,真係熱到胃口都冇晒,都係時候要煮返啲開胃嘅餸先得。所以小豬媽今日就係美味娘娘度學左一個好啱夏天食,又有我至愛嘅咸菜同蜆肉,就係好吸引嘅....咸菜韮菜炒蜆肉~


哈哈哈...睇賣相都已經覺得好吸引呢!其實煮嘅都唔難,都可以算OK易啦!

主角之一...咸酸菜~

先將咸酸菜洗淨切片,用鹽水浸約兩小時,令啲咸味減少啲啲~


另一主角...蜆肉,我地買嘅係新鮮即開嘅,所以特別大粒同鮮甜呀~

洗淨後抹乾水份,鑊中燒開水落少許鹽,大滾後熄火,放下蜆肉約2分鐘,備用~


韭菜同薑片洗後切好備用~

準備好晒材料就可以開始煮啦!

燒熱油鑊,放下蒜蓉炒香後加入咸菜,加入糖和蠔油,再放入蜆肉炒一陣,加入韭菜同炒約2-3分鐘,最後埋一個生粉芡,就咁就完成啦~


依個餸真係好開胃醒胃,加上又簡單易整,真係可以係夏天煮多啲,醒醒胃呀!