2013年6月30日星期日

Monsters University@Times Square

28 JUNE 2013(FRI)

最近FACEBOOK不停俾洗版,洗嘅咪就係剛剛係時代廣場展出嘅怪獸大學啦!

睇見朋友仔啲相,真係好想去同毛毛影相呀。就係咁....今日我同小豬媽送左小小豬返學之後,我地就出發去怪獸大學~


我地十點左右出到去,可以話係冇乜人,所以我地可以慢慢影啦!好多好得意嗁怪獸,佢地一啲都唔恐怖,仲勁可愛添~


影完露天廣場之後,我地就向二樓出發啦~

不過,二樓佈置嘅除左兩兩位主角之外,其他怪獸都未見過,相信要等睇完電影之後,先知佢地個名呀~

仲有好多同學仔呀~


近期小小豬都愛上左毛毛,所以如果有時間我都會帶小小豬嚟同毛毛玩呀!

成個展覽期至到七月十七日,如果大家經過時代廣場,真係推介大家去影吓相開心吓呀!(不過....真係建議早啲啲去,因為一過左下午就開始多人,影得唔盡慶呀!)

2013年6月29日星期六

樂樂 遙遙

27 JUNE 2013(THU)

繼上一年六月大肥豬俾左個驚喜,以我名義加入宣明會助養活動,今日又俾多一個小驚喜我,就係又以我名義助養,參加左聖基道兒童院嘅助養活動。

事前大肥豬都係一樣冇同我講佢又計劃助養,到今日收到一個郵包,我先知道呀~



送上『樂樂』、『遙遙』作為紀念品,就係因為咁,小小豬又多兩個朋友仔陪佢玩啦~


依家我地除左助養宣明會海外嘅小朋友之外,亦都會助養一個香港小朋友。其實有時會諗相比需要起助養小朋友,有父母係身邊嘅小朋友真係特別幸福,可以係一個優質嘅環境下成長。所以如果可以出少少力(其實都係可能每個月外出食一餐豐富嘅晚餐價值),讓佢地可以改善生活環境,都真係要大力支持呀!

雖然聖基道兒童院唔係固定助養一個小朋友,所以都唔知我所助養嘅小朋友係點樣。不過只要幫助到小朋友們可以係一個健康的環境成長,咁已經就係最足夠啦!

2013年6月28日星期五

秘密武器

27 JUNE 2013(THU)

我成日都講小小豬係一名超級為食豬,一有嘢俾佢食呢,就會超級興奮又緊張咁,有時都真係俾佢個為食樣笑C呀!

其實因為小小豬細細個就有濕疹關係,所以我俾嘢佢食時都會好小心,基本上都係返左學之後先開始有糖食,朱古力同埋一啲唔健康嘅食物,佢真係到依家都未食過。我都係想佢身體健康啲,所以先對佢食依一方面著緊啲。

可能小小豬隨著食嘅嘢越來越多,食飯嘅時候就開始唔乖。之前為左想佢食多啲飯,所以基本上都係餵佢食多(唔係講笑...真係餵嘅時候隨時係可以食兩碗飯呀),尤其係小豬媽同大肥豬在場,依個小小豬都一定要佢地餵先食,只係間唔中先可以自己食。

不過,小小豬都開始大個仔,再係咁餵飯落去,咁咪隨時變港孩。所以要開始進行地獄式訓練,佢要係冇電視音樂嘅情況下,自己專心咁食晒碗飯。

其實都已經開始左成個幾月,當然有咁大既轉變,依個小小豬又點會習慣,所以好多時都係扭扭計計,要罰要罵先肯食,我嘅EQ唔高,所以有時都攪到我忟忟憎憎。不過.....教小朋友就係咁,所以我都要強硬啲,唔可以退讓,因為咁都係為小小豬好嘛!

依排小小豬都算好左啲啲,都唔算扭得多,但始終我都係想佢開開心心咁食飯,係心情唔好情況下食,又點會吸收呢?

就係依個時間,我醒起之前託好友CARMEN係迪迪尼全年証買嘢有優惠時,買左幾隻米奇頭碗。之前係打算買嚟食甜品用,不過見MICKEY又係小小豬至愛,所以就打算試吓等小小豬用佢至愛嘅米奇頭碗食飯,睇吓會唔會好啲。

小小豬一見到我拎住個米奇頭碗,都不知幾興奮,仲不停話要食飯。

真係講都唔信,一坐低就不停食,完全唔洗我勞氣呀~



仲食得幾得戚~


食都出埋招牌笑容添~

今日食兩餐都係用米奇頭碗食,兩餐都係食得好爽手又快手,MICKEY嘅魔力真係強勁,早知就一早拎過秘密武器出嚟,咁就唔洗咁勞氣啦!

希望小小豬唔係三分鐘熱度,KEEP住都係食得咁好啦!

2013年6月27日星期四

我們的親子裝

24 JUNE 2013(MON)

有成日嚟探我地嘅朋友仔都應該知道,我係一個親子裝發燒友,買買埋埋都真係好多套親子裝,真係買到連大肥豬都叫停一停,因為真係著唔切呀!

我覺得一家人去玩時齊齊整整咁著住親子裝,真係特別溫馨,但冇理由次次都係嗰幾套嘛!所以呢.....我都會考慮聽少少大肥豬話,之後盡量買少啲啦!(如果好靚嘅話真係除外呀...哈哈哈)

係我未減少買嘅時候,原來就係依一個六月,我地都已經多左幾套親子裝啦!

首先新鮮熱辣嘅,就係今日同小豬媽行UNIQLO入手嘅。依期怪獸大學咁HIT,當然要買返套嚟襯吓熱鬧,下次要著左迪迪尼搵毛毛影相~

另一套親子裝就係託朋友係迪迪尼用優惠價買嘅MIKE眼睛(又係怪獸大學),如果小小豬嗰件都係同大人一樣,咁就係十足十嘅親子裝啦!不過依家咁都幾好睇呀,我打算留返遲少少去影樓影相時著呀~


見朋友可以優惠價買嘢,所以我又買多一套同大肥豬嘅著蛋頭情侶裝。我真係好鐘意依套著蛋頭衫,所以冇小朋友嘅SIZE我都照買。希望遲少少迪迪尼會出埋小朋友版嘅著蛋頭,到時就可以襯返啦~

之後嗰啲就唔係我買嘅,係小豬媽送俾大肥豬嘅驚喜生日禮物呀!

首先就係一套親子褲~


哈哈哈.....衫我就買得多,不過親子褲都係第一次,真係好期待佢地兩父子著埋一樣嘅衫褲,我想一定好攪笑呀!

另一份禮物就係跳跳虎衫仔~



其實依一套係可以自己DIY嘅衫,用佢地附送嘅油彩,咁就可以上顏色啦~


依個小小豬嘅畫功真係仍需進步,所以都應該唔會同佢一齊親子油。等我有心機同時間嘅時候,先慢慢油啦!不過......好可能下一次大家見到我都著時,都係仍然KEEP住係黑白色,因為我真係對藝術方面唔大興趣呀!(唔通係我遺存左依個壞缺點俾小小豬,攪到佢都依家仍然係唔鐘意油顏色!)

某程度上覺得自己好敗家添,一個月就添置左咁多嘢,所以真係要學大肥豬話,買少啲親子裝啦!(始終都係嗰句:盡量啦....哈哈哈)

同場加映:

今日小小豬午睡我睡姿~


最早期嘅時候就只有MICKEY陪,之後就多埋MINNIE,到最近就霸埋我隻DUFFY,可憐我DUFFY仲要俾小小豬夾住。真係冇佢收,越攬越多,攪到我就嚟冇位瞓啦!