2013年11月12日星期二

乖仔?? 搗蛋??

9 NOVEMBER 2013(SAT)

今日小小豬又俾左件令我有感而發,佢竟然整濕佢個玩具地拖,再裝滿一桶水,話要幫手做家務,幫我洗地呀~
Picture

小小豬唔係玩玩吓,佢真係好認真,好用力咁用佢個玩具地拖咁擦擦擦個地板~
PicturePicture

小小豬仔蹲低係地下都大大話話有成十五分鐘,依段時間都係好專心咁擦地。當佢覺得乾淨時,佢好滿心歡喜咁同我地講"完成",睇見佢個笑話都感覺到佢好有滿足感呀!

其實小小豬之前都有用佢啲打掃玩具幫我掃地拖地,不過都係三兩吓之後就走左去,咁專心同加埋用水去做都係第一次。

我第一眼見到佢用水拖地時,第一個反應係"想C呀....又係度玩水",仲好想即刻停止佢依個舉動,因為我覺得佢都係玩多。

不過細心諗,可能平日見我地用水拖,佢當然係跟返我地嘅做法啦!所以我就等佢慢慢自己做,想睇吓之後會係點。

慶幸我沒有作出即時阻止,如果唔係我就見到小小豬完成後個滿足眼神,同埋令我覺得小小豬又大個仔多一步啦!當然,之後我係要幫佢執手尾,要再拖個地同埋幫小小豬由頭換過晒啲衫(因為佢太落力,攪到濕晒呀!),不過嗰一刻我又真係幾享受依個執手尾過程。

有時我都會諗,係唔係對小小豬嘅要求過高?當見到佢做一啲反常事時,我就批定佢係度搗蛋?

不過,經過今次事件之後,我就明白要學懂放手同埋理解,凡事都係有兩面睇。雖然表面係做緊一啲搗蛋事(當然我指唔係一啲勁過分嘅事啦),但最後得出個答案係.....其實都係表達緊佢乖一面,只係佢嘅能力未能做到,所以令我有錯覺呢?

所以話呢....乖仔?? 搗蛋??都係只差一線,視乎我地點理解同小朋友點表達,分分鐘亦都成為加深同小朋友見解。其實我都覺得幾難,不過我都會努力學習,希望可以做到一個好媽媽啦!

沒有留言:

發佈留言