2013年11月26日星期二

快遊迪迪尼

21 NOVEMBER 2013(THU)

我地今日又一齊入迪迪尼玩,感受一吓聖誕氣氛啦~
Picture

其實因為今日小小豬要去覆診,所以同學校請左一日假。好順利地覆診又唔係用左好多時間,所以小豬媽就提意入迪迪尼玩返一轉,因為佢好想同聖誕版米奇影相呀!

可能係聖誕佈置關係,所以都好多人同米奇影相,見咁多人都唔敢排,所以同唔到靚衫米奇影,唯有同城堡前嘅靚靚佈置影啦~
PicturePicture

因為我地都算晏入去,為左想去玩多啲其他嘢,所以就冇去排公仔,所以今日都只係同左薑餅人影呀~
PicturePicturePicturePicture

係大街上都有好多聖誕精靈同大家影相呀~
PicturePicturePicturePicture
Picture

我地坐定定等睇巡遊~
PicturePicturePicture

開始啦,睇吓小小豬睇得幾投入~
PicturePicture

話說之前幾次我地同小小豬睇巡遊時,都好想佢落場一齊跳舞。不過,依個細膽豬之之都唔肯。佐估唔到今次佢好主動,見到個表演者拎個樂器出嚟時,佢就去搵個表演者拎個樂器玩~
Picture

雖然佢拎完之後都係行返嚟我地身邊玩,不過都算行出左佢嘅第一步,所以我內心深處都係俾左個叻叻小小豬,相信玩多幾次佢就可以好享受一齊玩啦~
PicturePicture

睇完巡遊,當然去小小豬至愛嘅小小世界啦!睇吓依個擦鞋豬拖到小豬爸同小豬媽實一實呀~
Picture

今次仲話唔同我坐,要同小豬爸同小豬媽坐添,真係俾佢激C,有佢地係度就唔要我啦!不過咁亦都係小小豬愛錫佢地表現嚟嘛~
PicturePicture

小小世界之後就到小小豬心目中嘅重點,因為係食雪糕,依個為食仔又點會放過呀~
PicturePicturePicturePicture

睇吓依張相嘅小豬爸,佢見到小小豬真係笑得特別燦爛呀..哈哈哈~
PicturePicture

平日唔多願意分享嘅小小豬,竟然主動請小豬媽食雪糕。當然啦...係小小豬心目中係至愛小豬媽嘛(真令我有啲啲羨慕添)!小豬媽有小小豬餵,嗰一刻都不知笑得幾甜呀~
Picture

又一次證明為左食,小小豬真係乜都肯呀...哈哈哈。不過其實都係佢鍚LULU妹嘅表現嚟呀~
PicturePicture

之後因為小豬媽有少少肚餓,所以去左附近個餐廳食少少嘢。雖然小小豬話飽飽唔食嘢,不過佢都好乖仔咁坐定定玩貼紙等呀~
PicturePicture

其實由第一次同小豬爸入園玩過迷離莊園一次之後,每一次入園小豬爸都好想玩多一次,不過次次見都要係排好長龍,所以都冇玩到。 今次見都唔洗點排隊,所以有得玩啦,今次仲係小小豬第一次玩迷離莊園添~
PicturePicture

其實開頭我都好怕小小豬會好驚,因為入面有某啲場景都係黑暗暗咁,又有幾個位都少少驚,所以我全程都捉到小小豬實。不過小小豬竟然推開左我,好似話我阻住佢睇咁,不過全程佢都好專心咁睇,只係某一個位佢輕輕捉左我一吓,出嚟之後仲笑笑口咁話好玩,仲話下次帶大肥豬嚟玩呀!

睇小小豬依個表現,我諗係唔係我對佢過份保護呢?佢開始大個,有自己嘅想法同感受。其實都係一件好事嚟,所以我都應該學吓放多少少手,等小小豬自己學習啦!

最後一個地點,就當然係去行吓SHOP,因為我想買份小禮物送俾朋友作。依個小小豬又自己揀埋一份添~
PicturePicturePicturePicture

係離開迪迪尼時,小豬媽俾揀中接受訪問。入嚟咁多年都係第二次接受訪問呀~
Picture

今日雖然入園時間唔耐,又同唔到聖誕版公仔影相,不過一家人一齊玩之餘,又俾我見到小小豬越嚟越大個仔嘅表現,所以都係好開心嘅一日呀!

沒有留言:

發佈留言