2014年4月2日星期三

博一博....還是安全好啲

2 APRIL 2014(WED)

有一個難題都令我考慮左一個星期,究竟係博一博....還是安全好啲~
Picture

大家唔好俾個標題嚇親,其實我所指嘅,咪就係小小豬戒夜片嘅情況呀~
Picture

話說小小豬兩歲左右,平日都可以話已經戒左片片,都只係仍然維持夜晚要著片瞓覺。

係上年夏天時,我都有嘗試過想幫小小豬戒夜晚片,不過試左兩日之後都係唔成功,仲攪到三口子啲睡眠質素都好差,同埋洗多左好多床單同床墊之後,我地個戒片行動就取消左,打算等今個夏天先再嚟過。

神奇事就發生左係小小豬身上,因為近依一星期起身時條片片都係冇濕過,加上有一晚又識得自動自覺叫醒我話去洗手間,我就會諗...係唔係小小豬已經意識到自己要戒夜晚片呢?

雖然小小豬自覺地好似已經唔洗著片片,我應該係開心就真,因為可以唔洗再買片片嘛!不過,亦都令我產生苦惱問題,就係我應該放膽唔再俾小小豬著片瞓覺,還時安全啲繼續著呢?

小小豬都係屬於一個自信心唔夠嘅小朋友,隨著佢依家越嚟越大個仔,亦都有自己嘅思想,好怕當小小豬知道自己瀨尿尿時,會令佢失去信心,咁到日後就更加難戒到。

但話分兩頭,如果小小豬明知自己做得到,但我仍然每晚都同佢著片片,咁又會唔會令到佢覺得我地對佢信任唔夠,影響佢自信心呢!

我都係暫時都同小小豬著住片片先,一嚟小小豬都未抗拒著片片,二嚟依家天氣真係好唔定,我怕洗完床單乾唔切呀!另外,我依家都開始同小小豬講吓佢著片片嘅事,等佢自己意識多啲,咁都應該有啲幫助呀!

我都唔知我依家做法係唔係好,唔知有冇媽媽可以教吓我呢?等我參考吓呀!

其實小朋友世界看似係好簡單,不過亦都係因為簡單所以第一步係好重要,開到個靚頭之後就會行得順好多啦!

啲人成日都話做父母係上緊另一個人生課,開初我都唔多覺,不過依家真係完全感受到,所以各位爸爸媽媽大家要一齊努力呀!

沒有留言:

發佈留言