2014年6月28日星期六

紅菜頭湯

24 JUNE 2014(TUE)

話說前幾日姨媽嚟探小豬媽嘅時候,買左好幾個手掌咁大啲紅菜頭俾小豬媽煲湯飲。啲紅菜頭真係好大粒,所以今日就嚟煲個既簡單又好有益嘅紅菜頭湯啦~
Picture

其實我地之前都唔識煲紅菜頭湯,唔好話煲就連聽到好少聽,係小豬媽針灸嗰位醫師介紹,我地先識煲依個湯。

原來一個簡單嘅紅菜頭,佢嘅功效都好廣,可以補血養顏、護肝排毒。真係任何人都可以飲,連小朋友都可以飲呀!

材料都係非常簡單,只係一個紅菜頭(如果係普通街市冇大嘅,就可以用兩個細代替)、番茄五粒、薑兩大舊~
Picture

先將紅菜頭去皮切塊,成個紅菜頭都好有營養,所以啲葉同莖都一樣可以拎埋嚟煲湯呀~
PicturePicture

番茄切開四件~
Picture

薑連皮切開一半,之後拍鬆佢備用。其實薑係可以因應個人口味加減,由於我鐘意薑嗰種辣辣地嘅口感,所以先咁多啦~
Picture

隨水紅菜頭及薑放入煲內開始煲~
PicturePicture

煲左大約二十分鐘之後,就可以將蕃茄加埋入去煲~
Picture

最後再用中火煲多大約四十五分鐘,之後落少少鹽~
Picture

一個簡單又有益嘅紅菜頭湯就完成,除左可以有湯飲之外,啲湯料都一樣可以食呀~
Picture

老實講,依小豬媽開頭煲嗰幾次,我都唔多肯飲,只係好勉強咁飲左一碗,因為都真係唔多習慣飲咁"紅"嘅湯。不過飲多幾次,又發覺又真係幾好飲,加上又可以排毒咁有益,所以依家每次煲嘅時候我都會自動自覺咁大大碗飲幾碗呀!

其實好多朋友都有加埋肉嚟煲,不過針灸師話最好有營養就係只落依幾樣簡單材料,有需要時就加埋紅蘿蔔同粟米就得啦!

沒有留言:

發佈留言