2014年9月10日星期三

小小豬K2啦

1 SEPTEMBER 2014(MON)

經過一個悠長暑假,終於又到開學日,小小豬已經係K2啦!

有成個幾月冇見小小豬著校服個樣,今日見返又好似覺得大個仔左少少添(不過....真係只係大個少少,始終仲係好BB呀)~
Picture

唔知係唔係小小豬都好期待返學嘅日子,所以由換校服開始,佢都係好似開籠雀咁不停吱吱咁問返學啲嘢,就連去到巴士站等車時,佢都係好似好興奮咁呀~
Picture

其實開頭我都係幾擔心,話晒都放左成個半月,雖然小小豬係暑假都唔算玩得太過分,但始終都冇返學一段日子,所以我都有曾經諗過小小豬唔願放學。我亦都因為小小豬都算係一個好痴身嘅仔仔,都會諗佢返到學校會唔會唔肯入課室,又或者唔俾我走,所以小小豬開學亦都係我依個問題媽媽緊張之時。

不過見小小豬表現出咁鐘意返學,我都放心左一半,之後嗰一半返到學校就完全放心晒啦!

因為小小豬一入到課室就識得自己走睇返自己個名嚟搵位坐,一搵到坐仲即刻走去拎玩具自己玩,完全自動自覺唔洗我跟進呀~
Picture

其實小小豬學校係採用完班直升,所以今日又可以見返好多熟口熟面嘅同學仔。經過一個暑期,好多同學仔都已經高左好多,又大個仔左好多。不過唔知點解小小豬仍然係咁細粒,亦都係咁BB樣。佢地行埋一齊都係高成個頭,都幾大對比呀!睇嚟我真係要繼續俾多啲嘢小小豬食,等佢吸收多啲,快高長大多啲先得啦!

自己係坐玩左一陣玩具,之後又走去玩煮飯仔~
Picture

我為免影響到小小豬,所以都只係企埋一邊同其他家長傾計,遠處望見小小豬同同學仔玩得好投入,又見到佢同家長傾計,我個心就完全定晒,因為小小豬已經真真正正大個仔啦~
Picture
Picture

因為小小豬一向社交都比其他小朋友為弱,所以今日可以同學仔一齊玩得咁開心,又會主動走去問同學仔媽咪問題,所以我真係有少少喜出望外。

升上K2嘅小小豬返學有一個好開始,之後當然係依靠班主任老師嘅教導啦!

坦白講,當我知道小小豬今年的班主任係一位年紀比較大嘅老師時,我都曾經有一刻諗.....個老師會唔會攪唔到班學生呀?不過當我同老師傾過一陣之後,我就改觀了。

事緣當我去搵老師簽放學咭時,老師一見到小小豬個名,就即刻可以講到小小豬係有濕疹,仲可以講得晒小小豬有啲咩係唔食得(因為K1填過資料俾學校)。

依一個表現令我覺得老師係有心留意班上每一個小朋友嘅特點,係未開始接觸學生是時就已經可以記得晒,所以都應該係一個有心嘅老師。加上佢應該係好有教學經驗,相信應該有辦法可以對付小小豬依個百厭豬呀!

哦....我都唔諗太多啦,一切都交托俾老師啦!希望依個百厭豬返可以繼續順順利利,學做個好乖乖,唔好做曳豬啦!

沒有留言:

發佈留言