2014年10月14日星期二

親子悠閒跑

11 OCTOBER 2014(SAT)

由於依家每個星期六晚都要去上足球班,所以都唔可以去咁遠。今日就近近地去屋企附近嘅球場玩吓玩具GOLF啦~
Picture

其實依套迎新買嘅玩具GOLF都係可以係屋企玩,不過我地又覺得今日個天氣都真係唔錯,唔好浪費依啲涼涼地但又有太陽嘅天氣,所以就決定落足球場玩吓。

依套新玩具都真係買左冇幾耐,同小小豬玩都係其次,因為我地想訓練一吓小小豬嘅手眼並用,同埋佢嘅專注力。大肥豬話玩GOLF可以訓練到依幾方面,所以就平平地買左依一SET玩具等小小豬從遊戲中訓練啦!

雖然之前我地去參加DAY CAMP都有少少接觸過GOLF依個玩意(按此重溫),不過都差唔多有一年時間,相信小小豬都已經忘記左點玩,所以大肥豬就重新再教過。

玩左一陣之後,初步嘅都算識玩,不過要將個球打入去個位置度,又真係好似難難地,小小豬玩左大半個鐘都只係打入左兩次~
PicturePicture

雖然冇打入,不過小小豬冇放棄到,亦都冇發脾氣,仲不停講住佢句金句:加油...努力...俾心機!

依一刻我又有啲開心,因為小小豬真係長大左。比著之前如果佢做兩次都係失敗的話,佢就已經會放棄唔肯再去玩,仲點肯同你笑笑口繼續玩呀!

正當佢地兩父子好興高采烈咁打GOLF之際,我就坐係樹蔭下玩手機。唔知點解我突然間有一念頭,就係好想去跑跑步,等自己身體郁動吓,好過坐埋一邊玩手機好似好唔健康咁,於是我就沿住個球場邊慢步跑咁跑左一個圈。

依個小小豬見我跑步時,佢又話要跑埋一份,所以最後我地兩母子來來回回都跑左三轉~
PicturePicturePicturePicturePicturePicture

跑到最後一轉,小小豬都已經跑到冇能量啦~
Picture

雖然我都係慢步跑,一向少運動嘅我都真係跑到冇氣。不過跑完出左一身汗,成個人又真係好舒服,下次再去玩時都要跑跑,等自己做吓運動人都健康啲呀!

不過,我地下次一定會著返對波鞋,因為著住對膠鞋仔嚟跑,跑完對腳又真係有少少痛呢!

沒有留言:

發佈留言