2014年10月20日星期一

勤力豬

17 OCTOBER 2014(FRI)

睇吓小小豬做功課時個様,好認真好專心咁哦,真係要俾個LIKE 佢先得呢~
Picture

HAPPY FRIDAY所以唔洗煮飯,我地三口子就去街街食餐豐富的,再去冒險樂園等小小豬放放電!

不過因為我地去冒險樂園玩耐左,返到屋企都成九點幾,所以都打算明早先做功課。

點知洗完白白之後,我地都準備故事時間。依個時候小小豬突然衝出客廳,自動自覺係書包拎本功課出嚟,話唔記得左做功課,要做完功課先可以講故事。

見佢咁主動,我地當然係非常樂意配合,陪佢一齊做功課啦!

望住小小豬做功課一刻,我真係覺得好欣慰,估唔到小小豬咁在意佢嘅功課,仲好用心咁去做添!

其實回想起第一次正式寫字做功課時,小小豬真係做到喊哂口,簡單兩行十粒字都可以做完又擦...擦完又做,大大話話都做成個鐘呀!(我地都唔係要求小小豬寫得好靚,只係要有返個字形。不過嗰一刻小小豬啲字又真係....所以唔擦唔得呀)

不過隨著做功課次數多左,小小豬對寫字嘅信心大左同熟練左,所以依家做功課快左好多,同埋啲字都靚左啲啲啦!

希望小小豬可以繼續KEEP住依一份心,到大個時都唔洗我地為做功課而勞氣啦!

沒有留言:

發佈留言