2014年10月5日星期日

愛上足球的小小豬

4 OCTOBER 2014(SAT)

話說小小豬返嘅足球班係需要有自家嘅足球衣,經過幾星期嘅準備,教練為大家訂製嘅團體球衣已經到我地手啦!

小小豬著住套新球衣係唔係好有型呢~
Picture

背後仲有埋小小豬個英文名,同埋佢個編號。原本係可以揀個人心水號碼,不過最後為免加重教練工作,所以我地就隨教練安排。估唔到都有個好數字,八號仔就係小小豬啦~
Picture

套衫對小小豬嚟講好似大件左好多,尤其係條褲,著左上身就好似著左裙仔咁。小小豬依一套已經係最細SIZE,所以只好怪小小豬太細粒啦!

不過,睇見小小豬著住依套新球衣去踢波,真係覺得特別攪笑,見佢跑住嚟追波個樣又好似特別可愛添。

因為小豬媽話好想睇小小豬踢足球個樣,所以我今堂就帶左部DV去影低小小豬個球資俾小豬媽睇。雖然今日小小豬又好似發發地夢,未到佢踢時就游雲咁,好在到佢嘅時候都可以返番嚟,咁都算佢啦!

為免阻礙小朋友上堂同影響小小豬,所以我都係企係遠遠處嚟影,好在部DV拍攝功能都唔錯,所以都算拍到幾條片俾小豬媽睇。

係咁多條片中,就等我係度同大家分享一段小小豬嘅足球片段啦~

小小豬好似好英勇咁,可能踼入個指定位置,但其實係哥哥讓佢先可以入球。不過個傻豬聽完阿SIR讚完佢之後,睇得出佢係係發自內心咁高興,投入度即刻急劇上升,仲係度跳嚟跳去,真係俾佢笑C呀!

不過,其實在場所有小朋友都係踢得好落力,佢地踢波個認真樣又真係幾好笑,睇見佢地人都開心啲呀。

今日小小豬上完足球堂之後突然大喊,原來佢係仲想繼續踢波唔想落堂。

扭計喊雖然係唔啱,不過反而我覺得開心,因為真係估小小豬唔到咁鐘意踢足球,希望佢可以KEEP住繼續鐘意,俾心機去學,唔係希望佢可以踢到有幾叻,只係想佢可以好ENJOY咁去踢,同埋學懂可以同其他同學仔互相合作呀!

沒有留言:

發佈留言