2014年10月7日星期二

菊花雪梨茶

5 OCTOBER 2014(SUN)

繼早前我煲過雪梨蘋果茶之後(按此重溫),今日又煲另一款好嗰秋天飲嘅菊花雪梨茶啦~
Picture

依排好似好賢妻良母咁成日都煲啲滋潤嘅涼茶俾兩位老闆飲,其實係有原因呀!

首先當然就係因為秋天就嚟,天氣又會開始變得好乾燥。唔好話啲皮膚,就連我地身體入面都好會燥燥地,所以趁依家初秋起時,打定好個底,咁到乾燥時都唔會太唔舒服,要由內靚到外嘛。

另一個原因就係我同大肥豬都算係唔多鐘意飲水嘅人,都係覺得淡淡口冇嚟味道,所以我地個電櫃內一定係會有啲檸檬茶...可樂依啲飲品。雖然係好飲,不過飲太多都會好似唔多健康,所以依家我就多煲啲涼茶放入雪櫃,咁就可以隨時都飲到,對身體又可以有益啲啦!

材料就需要四個雪梨、一兩菊花同少少冰糖~
Picture

菊花用清水泡開,之後過濾洗淨~
PicturePicture

雪梨洗凈去皮,去核切成小塊~
Picture

大火將水煲開,然後加入菊花及雪梨,轉小火煲約30分鐘~
Picture

之後加入冰糖,再煲約15分鐘(冰糖分量亦都係因人口味而加減,由於我主要都係煲俾小小豬飲,所以分量就比較少)~
Picture

熄火後再焗多15分鐘,咁就大功告成啦~
Picture

待涼後就可以過濾入樽,就可以飲用啦。我地個人口味都係覺得雪凍係好飲啲啲呀~
Picture

雖然係因就小小豬關係我落冰糖分量係少左,不過我同大肥豬都覺得依個甜度都可以接受,唔會因為太甜而飲唔到菊花雪梨味,仲覺得幾夾添!

哈哈哈....小小豬都話佢鐘意飲菊花水多啲,叫我下次都煲依個俾佢飲呀!

菊花雪梨茶可以清肝明目,滋潤肺燥,極適合秋季飲用,老幼皆宜。但需提醒大家,菊花水雖好,也不是人人皆宜,有咽喉炎,胃不好的朋友都不要喝菊花茶。而脾胃虛寒、腹部冷痛和血虛者,也不能多吃梨。

沒有留言:

發佈留言