2014年11月30日星期日

MegaBox繽紛薑餅人樂園

29 NOVEMBER 2014(SAT)

其實我都好鐘意薑餅人,所以今日嚟MEGA BOX最主要目的,就係去影靚靚薑餅人啦~
Picture

想同啲靚靚薑餅人影相之後,原本我都好想帶小小豬嚟同薑餅人大跳舞,因為有一部全港首個以AR虛疑實境配合體感技術嘅互動遊戲,我睇FACEBOOK介紹好似好得意咁,好想俾小小豬玩啦!不過因為我地食完晚餐之後,剛好遊戲就已經關左,所以要等下次再嚟先有得試玩啦~
Picture

冇得玩都唔緊要,因為一見到啲靚靚薑餅人就即刻開心晒,今日人流都真係唔算多(可能係我地夜啦),所以可以大影特影啦~

PicturePicturePicture

小小豬見到個薑餅人BB,佢就話要幫忙推車仔同餵奶奶呀~
PicturePicture

之後仲同啲薑餅人一齊玩哦~
PicturePicturePicturePicturePicturePicture

佢實在太高興了,話要錫錫薑餅人呀~
PicturePicture

薑餅人實在太靚,其實係九樓童真天地嗰度都有一個小佈置,不過今日實在夜左少少,所以小小豬開始眼瞓,所以就冇上去影埋。

不過唔緊要,因為我地好快又會再嚟MEGA BOX,到時又可以再影過啦!

2014年11月29日星期六

初嘗IKEA兒童樂園

29 NOVEMBER 2014(SAT)

MEGA BOX入面嘅IKEA有個地正嘅兒童樂園,小朋友可以入去玩,爸爸媽媽就可以輕鬆咁睇傢俱。

其實依個好玩地方都開左有一大段時間,成日都好想帶小小豬入去玩返轉,不過次次都人山人海冇機會玩到,今日終於係冇預期之下,小小豬可以入去玩個飽啦~
Picture

今日係星期六,原先係應該要去上足球班。不過當我地準備出門口時,見個天落起毛毛雨,所以都唔敢帶剛病好嘅小小豬去上堂,就係咁我地就請假一堂,見有時間就改去MEGABOX行一轉食晚餐啦!

食完晚餐行過IKEA嘅兒童樂園,見到人流唔太多,所以就八卦行過去睇吓仲有冇位~
Picture

出奇地今日真係冇乜人,當然即刻去拎完張籌先啦~
Picture

拎埋張入場表格填~
Picture

之後我地行一轉IKEA,就可以入張玩啦!

雖然小小豬都係第一次入去玩,不過之前經過都有係啲窗口位望過入去,所以根本上佢都知道入面有咩玩。所以今次一入去,小小豬當然係直接衝去波波池啦~
PicturePicturePicture

見小小豬係入面玩得咁開心,我就同大肥豬繼續行IKEA。行左十五分鐘再返嚟望吓隻懶玩豬。點知唔見左佢,原來小小豬已經改左地頭,行左出去玩佢依期勁鐘意嘅火車呀

一有車玩佢就變得沈迷了,所以之後啲時間全程都玩火車~
PicturePicturePicturePicture

其實除左波波池同火車之外,入面仲有煮飯仔,同有啲珠珠遊戲,所以種類都幾多,男仔女仔都一樣啱呀~
Picture

話咁快四十五分鐘就到,小朋友們就可以著鞋仔等家長接啦~
Picture

因為到左可以接小朋友時間,大肥豬去左洗手間,我就諗住先去接小小豬先。因為我冇接小朋友回條,就連小小豬係入面不停叫"媽咪...媽咪",負責姐姐都唔俾我接,最後都係要等大肥豬嚟到,出示張回條先可以帶小小豬走啦~
Picture

哈哈哈...依樣要讚一讚,認紙唔認人做法真係唔錯,真令人好放心交底小朋友入去玩呀!

依個百厭小小豬係入面玩得不知幾開心,一行出嚟就問我幾時可以再嚟玩,真係俾佢笑C。

可能因為係免費關係,平日我地星期六日嚟睇都話要等四個鐘先可以入去玩,今日我地都算係好好彩,所以都唔敢講定幾時可以再嚟,只可以同小小豬講:等下一次好運日,我地就可以再嚟玩啦!

2014年11月28日星期五

象仔燜燒杯@杞子紅棗陳皮茶

27 NOVEMBER 2014(THU)

上次試象仔杯時,我就整左杞子元肉紅棗茶(按此重溫),今日我又試整另一款好啱女性係冬天飲嘅茶,就係杞子紅棗陳皮茶啦~
Picture

其實依款茶係我姨媽教我煲,事緣我尋日姨媽摸到我隻手好凍,佢就話我係血氣唔夠,就叫我用杞子、紅棗同陳皮嚟焗水飲,仲叫我連飲幾日,成個人就可以夠血又夠氣,咁就唔洗怕凍。

係我細問之下,原來杞子、紅棗配元肉就只係補血,所以好啱女仕係生理周期後飲。而改配陳皮的話,就變成了補血氣,加上陳皮又可以化胃氣,啱任何時候飲用。

既然有姨媽教路,所以今日就準備好材料焗嚟等自己暖暖身啦!

將一片陳皮浸透去囊,然後切絲,咁可以等啲陳皮味易出啲~
Picture

四粒紅棗去核,然後連同十數粒杞子一齊洗淨~
Picture

將所有材料放入象仔杯中~
Picture

加入滾水焗20分鐘~
Picture

話咁快就有得飲啦~
PicturePicture

我之後仲反覆沖泡左三次,係一個早上飲左三杯,飲到第三杯個味道都仍然係好有味,所以話象仔杯真係唔錯,既方便又可以焗到好嘢飲呀!

味道方面又如果,我個人覺得杞子、紅棗配陳皮係好飲啲,雖然係少左元肉嗰一種甜味,不過對於唔多鐘意飲太甜嘅嚟講,依個入口就會覺得好清,而且飲都會有那一種陳皮嘅香味,所以真係唔錯,值得同大家推薦一吓呀!

2014年11月27日星期四

再戰HELLO KITTY CAFE專櫃

25 NOVEMBER 2014(TUE)

突然間好想甜甜地食件蛋糕,但由於時間所限唔可以靜靜地坐定定咁蛋糕,所以就去左SOGO地庫嗰個HELLO KITTY CAFE專櫃食個小茶餐,等自己開心一吓啦~
Picture

其實自新開張時嚟過一次潮聖之後(按此重溫),平日都比較少出嚟銅鑼灣,所以都冇乜機會嚟呀~
Picture

聖誕將至,專櫃都已經擺放左好多HELLO KITTY嘅聖誕佈置,好靚呀...唔知邊度有得買呢~
PicturePicturePicture

嚟到當然係最關心有啲咩靚蛋糕食啦!除左一啲舊有款式外,今次見到啲新款CUP-CAKE,件件都好靚,好想試晒佢呀~
PicturePicture

仲有唔少得五顏六色嘅馬卡龍啦~
PicturePicture

考慮左好耐,終於決定ORDER左一件玫瑰草莓慕絲蛋糕~
Picture

蛋糕內嘅CREAM帶有微微嘅玫瑰味,再加上啲個草莓醬,個味又幾夾,蛋糕層都好鬆軟,最好就係一啲都唔甜,真係唔錯呀~
Picture

另外我仲叫左一粒紅桑子馬卡龍~
Picture

其實之前都試食過佢地出味嘅馬卡龍,都覺得味道唔錯,比起坊間其他嘅馬卡龍,佢地真係一啲都唔甜,非常啱我口味呀!

依個紅桑子味就帶有少少酸酸的,食落都好醒胃呀~
Picture

最後就當然唔少得飲味啦,我叫左一杯白色戀人(即係白朱古力奶),我仲即場睇住師傅整添呀~
PicturePicture

完成啦...真係有啲唔拾得飲呀~
Picture

一向白朱古都會令人覺得好甜好奶味,不過依一杯我又唔覺,仲有好香嘅朱古力味添,微暖飲落肚,真係令人都舒服啲呀!

雖然只係用左二十多分鐘去享受我嘅好味下午茶,不過輕輕鬆鬆真令人舒服,可以有足夠能量去繼續我嘅忙碌!