2014年12月12日星期五

FROZEN甜品賀52個月

10 DECEMBER 2014(WED)

早係前幾日小小豬行過美心時,見到兩個FROZEN甜品企定定睇左好耐都唔願走,最終都因為小小豬唔食得朱古力關係,我係冇買到。

今日行過見買兩個有折扣,加上又嚟到每月十號,小小豬又大一個月,所以就買嚟俾小小豬睇吓(哈哈...真係睇吓),開心吓啦~
Picture

其實小小豬又真係冇乜點接觸過FROZEN,極其量都係去過睇電影(按此重溫),就算我係屋企睇DVD時都係等小小豬瞓左先睇,所以都真係有少少唔明白點解小小豬會識FROZEN。

我估都係學校啲同學仔講過啦,所以真係可以話FROZEN無處不在呀!

上次行過美心冇買,今日突然間係佢面前,睇吓小小豬個開心樣~
Picture

Elsa依一個其實係白朱古力慕絲杯~
Picture

Elsa & Anna嗰一款就係朱古力慕絲杯~
Picture

中間嗰一個其實就係匙羹嚟呀~
PicturePicture

由於兩款都係朱古力,所以小小豬真係有得睇冇得食,不過好在每杯都有三粒棉花糖,咁小小豬都未至於咁慘,佢食依六粒棉花糖都可以話食得津津有味呀~
PicturePicture

哈哈...其實慘嗰個都應該係我,因為要一次過食兩杯朱古力慕絲杯,不過慶幸兩杯嘅味道都唔錯,食起上嚟都唔會覺得好甜,內層個慕絲都好鬆軟,所以食得多都唔會覺得膩,只係實行又肥多兩磅呀!

其實我肯點依兩甜品唔多唔少都因為個甜品杯,除左係因為FROZEN之外,今次依個甜品杯係以原個設計,即係今次食完洗乾淨之後就可以用嚟循環再用呀~
Picture

今次小小豬睇住我食咁慘,就等我快啲用依兩個FROZEN杯整其實甜品俾佢食,等佢開心吓先得!

沒有留言:

發佈留言