2015年2月10日星期二

我們去聽音樂會

8 FEBRUARY 2015(SUN)

今日大肥豬為我地準備左一個特別節目, 原來就係帶我地去做啲文靜啲活動 就係去聽音樂會呀~
Picture

今次依個活動大肥豬都好神秘, 事前只係叫我依一日唔好安排其他活動, 都係到左今日先拎三張入場卷俾我睇先知原來去聽音樂~
Picture

哈哈哈...點解要咁神秘? 咪就係要俾個意外驚喜小小豬啦! 事緣一向小小豬都幾鐘意聽啲古典音樂,平日都係聽依啲音樂仲多過聽兒歌, 而且已經習慣左每晚瞓覺都一定要播住啲古典音樂嚟入睡, 再加上上一次去聽虎豹夏日音樂節匯演(按此重溫)時小小豬都好投入, 仲成日問幾時會再去聽音樂會, 就因為咁....大肥豬就好留意啲音樂會嘅表演, 打算再帶小小豬去聽啦!

一般大型音樂會嘅門卷都貴貴地, 一買買三張又真係幾肉赤, 而且我地都係主力俾小小豬聽(我嘅興趣真係不大呀...哈哈哈), 等佢聽多啲, 現場感受下音樂會嘅氣氛, 所以肥就集中搵啲康文署舉辨嘅音樂會, 終於就搵到今日依場嘅音樂會啦~
Picture

今日依場蓓蕾新聲音樂會主要都係由一班參加康文署舉辦嘅音樂班學員表演, 中西樂表演都有, 種類都幾多呀! 雖然都係一啲學員, 不過佢地表演都唔差, 仲好投入咁演出添! (由於場地唔可以拍照, 所以我都好乖乖咁專心聽音樂)

小小豬表現又如何? 哈哈哈...佢就變身成為問題兒童, 因佢小小豬實在太留意台上哥哥姐姐嘅表演, 一時就問我哥哥用緊嗰樣係咩樂器, 一時又問我姐姐佢地點解輪住彈, 一時就問我嗰首係咩歌,真係問題一籮籮呀!(慶幸小小豬都係好細聲問, 都冇影響到其他人)

完場時小小豬仲唔願走, 問啲哥哥姐姐幾時再出嚟表演, 真係俾佢笑C呀!

整個音樂會過程小小豬都係好專心又興奮咁去聽音樂, 雖然小小豬都係好多問題, 不過亦都證明小小豬對音樂都好有興趣, 亦都好留心台上每樂器, 所以我係應該開心!

小小豬今次又睇得咁興奮投入, 大肥豬話會繼續留意多啲同類音樂會, 到時再買飛帶佢去聽, 希望可以更加培養小小豬對音樂嘅興趣呀! 

沒有留言:

發佈留言