我們的家庭照

22 JULY 2015(WED)

話說早前係團購買左一個家庭攝影套餐，所以就係上星期我地三口子一齊去影左一輯相，等左一星期之後，終於可以去睇相啦~

坦白講，其實小小豬係影相當日嘅表現都真係唔係咁好，唔合作之餘仲唔多肯笑，所以我都已經打定輸數，依輯相都唔會靚，我仲諗緊.....揀到套餐包嗰12張相都幾難呀！

今日睇返啲相，原來好多都影到小小豬笑得好燦爛，仲要好多三口子嘅都唔錯，攝影師姐姐真係好利害，捕捉到小小豬咁靚表情，所以心諗：大件事....今次一定大出血！

由於之前都已經答應左老公唔會加錢買相，所以我都好肉痛咁左抽抽...右減減，好多差唔多樣嘅都唔要。我睇左都有五轉相，先減到只係18張，最後就都真係減唔落手，靜靜地加多6張。

有件事都要提一提，係我減相過程中，SALES姐姐全程都冇黑面又冇說我買，仲好主動幫我手去作作決擇，真係好少見，所以今日成個過程我都好舒服呀！

好啦...唔講太多，去相啦！

首先就嚟我地三口子LINE親子裝，可能係第一個影，所以小小豬都叫做OK，影出嚟好多都靚呀~

超級鐘意我同小小豬依兩張合照，真係勁勁勁靚呀~

第二個LOOK就係當毛毛遇上薯蛋頭~

攝影師姐姐都好鐘意小小豬依個造型，所以影左好多小小豬個人毛毛照，不過因為張數有限，我都係留返嚟要三口子合照，所以最後忍手放棄，但依一張咁可愛又真係好難捨棄呀~

最後一個LOOK可以話係我最驚喜，因為影嗰時候小小豬都已經"謝"晒，再加上影左好耐，佢嘅耐性都真係冇乜，但俾攝影師姐姐影出嚟係勁CHOK....好型呀~

我地三口子嗰啲都幾好呀~

今次依輯相我真係好鐘意，影得小小豬真係好開心。不過，世事就係咁奇妙，係你完全冇期望嘅時候，就會有啲驚喜俾到你...哈哈哈！