2015年9月12日星期六

興奮搵食到西環@CAFE2

1 SEPTEMBER 2015(TUE)

其實我地真係好少嚟西環,就算依家有港鐵直達我都係未嚟過,不過今日就有依個新嘗試,因為約左朋友嚟一間剛開業嘅餐廳 - Cafe 2,開心食食聚下啦~
Picture

唉...一向路痴的我,今次又嚟搭錯車。原本應該係西營盤站出,再行多十分鐘左就可以嚟到Cafe 2。點知傻傻的地就去左堅尼地城站,所以最後我又要搭返車去西營盤再行去,足足遲左二十分鐘,真係勁唔好意思要朋友仔等我咁耐~
Picture

整個餐廳環境都好舒服,牆上仲掛左唔少西環嘅懷舊圖片,都幾有意思呀~
PicturePicturePicture

哈哈哈...遲到有遲到嘅好(不過我下次唔會啦),因為坐定定就有嘢食啦!

首先嚟嘅就係生蠔拼盤,隻隻生蠔都好肥美,而且係即叫即開,所以特別鮮甜,食兩隻都有啲唔夠喉呀~
PicturePicture

接住都係廚帥併盤,有煙三文魚同意式風乾火腿,兩者味道都唔錯呀~
Picture

依個周打蠔肉湯可以話係其中一個驚喜,湯內有一隻肥啫啫蠔之外,就連湯入口都有好香嘅蠔味,不過我覺得如果可以淡味少少,咁就一定更加好飲呀~
PicturePicture

再嚟德國腸拼盤,唔好睇少依碟腸仔,因為佢嘅分量都幾大,而且三款腸仔都有唔同味道。我自己就最鐘意食帶有黑椒嗰款,辣辣地幾醒神呀~
Picture

飲左個好味嘅湯,又食左兩個頭盤,係時候都我地嘅主菜出場了。首先就係店員推介嘅招牌羅馬PIZZA,味道又真係幾好,尤其係佢個薄薄餅底,入口脆卜卜好得意呀~
Picture

之後就到炭燒銀雪魚及原隻鮮魷魚,依個真係可以話係我全晚心水選銀雪魚非常嫩口,而魷魚嘅肉質就好軟屬,完全唔會覺得韌,食嘅時候配埋個泰式醬汁,超惹味呀~
Picture

另外我地都叫左個松露辣海蝦意大利飯,不過依個飯就有啲奇怪,因為有朋友仔就話幾好食(哈哈...我係其中一個),但有啲就話個飯好淋身,完全唔似食緊意大利飯。店員可能聽到我地嘅談話內容,所以就主動嚟同我地解答。原來佢地出品嘅意大利飯係刻意比平日煮法加多啲水去煮,原因係因為佢地都有好多街坊嚟食,好多時都係一家大細,所以煮淋啲啲就可以方便小朋友同老人家進食。估唔到佢地又幾細心,就依一點都抵俾個GOOD佢啦~
Picture

其實都真係食得好飽飽,不過女仕總係有另一個胃嚟食甜品,所以最後都係叫個焗棉花糖薄餅伴雪糕。PIZZA一向都係咸點,我都係第一次以PIZZA嚟做甜品,脆卜卜嘅PIZZA再加上棉花糖、士多啤梨及雪糕一齊食,個口感又真係特別哦~
PicturePicture

開心心又食左一餐豐富嘅晚餐,真係好滿足,全職媽媽都要有放鬆時候嘛

不過,都要非常多謝老公放我出去玩一晚仲要係開學第一日都放我去(不過...其實小小豬學校都係原班升,又係相同班主任,而且又冇通告,其實係冇任何嘢要家長做呀)幫我湊住隻豬厭豬...哈哈哈

沒有留言:

發佈留言