2016年2月9日星期二

狂玩日與夜...再戰東華慈善嘉年華

9 FEBRUARY 2016(TUE) 
年初二我地都冇乜節目,所以又有個廿四孝DADDY為左逗個仔開心,所以係未返奶奶屋企食開年飯時,帶左依隻百厭豬嚟喪玩啦~

有愛豬號DADDY係度,小小豬緊係可以嚟個大放電啦,今次剛好有全日票賣,DADDY就好闊老咁買一大一細嘅全日票。原來除左一有全日票之外,仲要有埋印仔先可以完成整個全日任玩過程,所以唔可以換人,即係全日陪玩專員就係我啦~

新年關係,所以入場就有財神派利是,入面係抽獎卷或者係攤位遊戲卷嚟。我地三張都係攤位遊戲卷嚟,不過咁都好,因為任玩係唔包攤位遊戲,咁我地都可以去玩下啦~
 
一入到場小小豬當然又嚟去挑戰「超級紐約滑梯」,好在我地都算早早地入場,所以人流唔多,小小豬都玩左好幾次呀~

之後就去玩哥爾夫,可能之前都玩過,所以佢就扮晒老師係度教DADDY打呀~
 
再去玩轉轉杯~
 
再轉戰「纽约滑梯」,今次小小豬好利害,佢要自己一個人玩,完全唔識驚嘅佢,仲一玩玩幾次,真係膽生毛呀~

上次嚟時見到依個BB版海盜船小小豬都好想玩,不過嗰次就未開放,今次終於都可以玩啦~
 
仲有依個BB蟲蟲,上次小小豬都好想玩,今次仲唔玩返夠本,連玩五次,仲要迫我陪佢玩五次,嗰個位又細,我都真係坐得幾辛苦,不過...小小豬鐘意就好了~
 
仲有依個轉轉過山車,由於我去左洗手間,所以....誤打誤撞下就由俾左佢兩父子SWEET SWEET一下啦~
 
上次我玩唔到鞦韆今次終於可以去玩啦~
 
正當我連玩三次之時,小小豬就去左玩BB版鞦韆啦~
 
上次碰碰車未開,今次終於可以玩,不過其實真係一啲都唔好玩,我指嘅係...俾人撞到骨到散,我仲整親條腰添,好慘呢~
 
再去玩幾個攤位遊戲,當然....我地又係失敗,嬴唔到獎品啦~
 
之後夠鐘我地就先返奶奶屋企食飯,由於買左全日票,所以飯後又嚟大作戰啦!
入夜後我地再戰「超級紐約滑梯」,不過今次小小豬就自己"SIR",佢真係一啲都唔驚,仲連玩四次呀(由於天黑黑,所以都影唔到小小豬個威風樣呀)~
 
之後我地就去玩HotWheels鬥車場,雖然依個全日票係唔包,不過小小豬非常想玩,咁俾$50入場就又可以拎一部HotWheels車仔,所以愛豬號DADDY又好願意去買飛啦~
 
再俾多$30俾小小豬玩渣車車,依個DADDY真係愛豬如命呀~
 
之後我地轉戰夜版「纽约滑梯」~

今次終於都可以玩到上層嘅旋轉木馬啦~
 
今次到我陪小小豬玩轉轉過山車,又真係幾刺激,我同小小豬仲冇落車咁連玩三次,真係勁正呀~
 
相比之下,依個普通版過山車又真係麻麻地哦,連小小豬都話坐到悶呀~
 
最後我地玩埋小船仔,時間就剛剛好,大會要關門了~
 
今日真係可以話超盡慶,仲要係小小豬第一次玩到咁夜先返屋企添,真係新年做咩都得啦....哈哈哈



**我地嘅FACEBOOK FAGE,唔知大家LIKE左未呢?** 
小小豬的成長日誌
大家一齊嚟交流下煮飯仔及去玩嘅親子樂啦


沒有留言:

發佈留言