2016年2月13日星期六

大吉湯圓

13 FEBRUARY 2016(SAT)

今日下午茶時,整左啲特別嘢等我地為食兩母子齊齊食。依個咪就係好啱新年食嘅大吉湯圓啦~

其實我之前係上海街行街時,就已經買好晒材料,打算年夜飯嗰日整嚟應節。不過嗰日我地又中午去左行花市(按此重溫),之後又返爸爸屋企食團年飯,所以嗰日冇時間整。

之後嗰幾日又掛住去玩,所以就等到今日先嚟貪得意整下。依家都仲係新正頭,依個大吉湯圓都仍然可以叫做應節呀!

其實個做法都好簡單,同搓普通湯圓嘅都係一樣,不過就加左橙色嘅橙粉同埋綠色嘅綠茶粉~
坊間都有好多食用色素嘅液,不過我總係覺得嗰啲唔多安全,所以用有機(店員話係)粉,好似安全啲,咁又食得安心啲嘛

由於我都係得我同小小豬兩個人食,所以都唔整太好,用左一飯碗嘅糯米粉加暖水開始搓,慢慢搓...慢慢搓~
搓嘅時候覺得個粉團太乾就可以加啲水,如果太水火濕的話就加多少少糯米粉,直到個粉團唔會"痴手"同埋有啲光澤,咁就完成啦~
之後就分為兩份,三分一嗰份就係用嚟加綠茶粉,另一份就係用嚟加橙粉~
色粉唔可以一次過落太多,要慢慢落慢慢搓咁先得呀,依個步驟其實係整個整湯圓過程最用神,不過為左整靚靚大吉,所以努力啦~
就係咁...兩個粉團就已經準備好啦~
之後就準備餡,今次又嚟童年回憶,我用片糖嚟做餡,切粒粒時又真係有好多感觸湧出嚟呀~
將已切粒嘅片糖放在橙色粉團中,然係搓成圓型,之後用搓少少綠色粉團做葉~
依個過程其實都幾好玩,好似搓泥膠咁,第一次整嚟講我嘅手工都算合格啦~
煲內放片糖和薑片煮滾~
煲內放片糖和薑片煮滾~
煲至湯圓浮面之後,熄火焗多十分鐘,就可以食得。幸好都叫做冇乜走樣,冇返粒吉仔樣睇,咁到叫有返啲成功感~
小小豬見到我個製成品,佢都覺得不知幾攪笑,仲食左我兩大粒添

片糖餡真係冇得輸,嗰一份流心糖心,真係勁好味~
不過就唔知係唔係個片糖味重左啲,所以食唔出嗰一個橙味同綠茶味。唔緊要啦....最重要係似大吉,食個大吉落肚,今年仲唔全年大吉大利

原來整造型湯圓係咁好玩,有左今次經驗,下次可以同小小豬齊齊親子廚房整湯圓,唔知佢會整咩樣子呢....哈哈哈! 




**我地嘅FACEBOOK FAGE,唔知大家LIKE左未呢?**
小小豬的成長日誌
大家一齊嚟交流下煮飯仔及去玩嘅親子樂啦!
 

沒有留言:

發佈留言