2016年2月8日星期一

簡單的大年初一

8 FEBRUARY 2016(MON)

嚟到大年初一,其實我地都真係冇咩特別節目,因為晚上要返奶奶屋企拜年,所以都唔去得太遠,只係近近地又嚟觀塘海濱公園等小小豬嚟放放電啦~

 由於都係突然決定去奶奶屋企前嚟,所以都真係咩都冇準備,就連相機都唔記得帶,所以都冇同小小豬影過啲咩玩樂相。

不過唔緊要,依個咁好玩又開心嘅地方我地成日都嚟,所以今日就專心同小小豬玩啦! 

雖然唔係點影相,不過我今日都同小小豬著左靚靚親子裝,所以都嚟影張相紀錄一下我倆的親子時光。


其實....我個人真係唔多鐘意著格仔衫(總係覺得同我唔多夾咁),但小小豬著上依啲格仔衫又顯得特別型仔同大個仔,一個貪心的媽媽又想同個仔親子得嚟又想個仔型,所以就唯有自己做個配合,同小小豬一齊著格仔衫啦!

玩樂完畢就去奶奶屋拜年食晚飯,不過今年就有少少特別,因為我幫手入廚,我都係第一次煮咁多人的晚餐(大大話話都有成廿幾人),老老實實我依啲廚藝BB班真係勁驚,慶幸最後其中一位嫂嫂入嚟同我一齊煮,咁就順順利利煮左一餐新年飯啦! 

食完晚飯返到屋企見到盆水仙都開得好靚,所以就拎四葉妹妹出嚟自娛一番~



影到我興起,我仲拎埋啲四葉妹妹落管理處,同開得好靚嘅大桃花影呀~




坦白講,影嘅時候又真係有點尷尬,因為旁人真係會望住你影。不過當你見到啲靚靚公仔相之後,成個人都係會好開心,所以一於好少理,享受影相嘅一刻。

今個大年初一就好似過得簡單左,不過唔緊要,最緊要係開心嘛,又見到咁多靚花,希望嚟緊一年可以花開富貴啦!



**我地嘅FACEBOOK FAGE,唔知大家LIKE左未呢?**
 小小豬的成長日誌
大家一齊嚟交流下煮飯仔及去玩嘅親子樂啦

沒有留言:

發佈留言