2016年3月21日星期一

係真定假...總之就要...反轉美食大派對@挪亞方舟

20 MARCH 2016(SUN)

挪亞方舟係每一個節日都會有唔同主題活動,係今個復活節就安排左一系列嘅反轉美食大派對,等小朋友入去玩餐飽。多謝挪亞方舟嘅邀請,小小豬又可以入嚟玩啦~
今次整個活動係以美食為主題,小小豬一嚟到就好緊張咁睇下個介紹想知道有咩玩啦~

同上次入嚟玩都係一樣,購買入場卷後,每位小朋友參加者入場時均獲派<活動通行證> 就可以玩晒大部分嘅遊戲(除左「自拍萌像飲品工房」及「創意分子料理廚藝班」需另加費用參加)

哈哈哈....係未正式開始玩時,大家都係大堂中嗰兩幅「巨型美食3D合拍區」吸引住,係度不停擺POSE影..影...影啦~
 
我地第一個活動就係去玩「自拍萌像飲品工房」,即其實係將自己相片PRINT係杯朱古力上面。

首先就請職員幫我地利用手機影抵一張開心相先,之後於現場將相片發送nahkhr@gmail.com,工作人員就會將相片打印出嚟啦~ 
 
然後經由特別嘅食用「打印機」將我地幅靚相列印出嚟~ 
 
即影即印即飲,話咁快我同小小豬獨一無二嘅SWEET SWEET朱古力就完成啦~ 
 
雖然小小豬本身係唔可以飲朱古力奶,不過佢話想飲自己落肚,所以破例一次俾佢飲少少啦~


接住我地就去欣賞「廚藝激鬥奇趣Show」~
 
兩位廚師利用一啲食材同埋廚房用具,為我地表演廚藝雜技激鬥。佢地真係好利害,完全係零失手,仲有好幾個同我地互動環節,睇到大小朋友都好開心~
 
最後Buddy仲出嚟同我地集郵一番呀~
 
嚟到小小豬期待好耐嘅「雲彩花式棉花糖」,因為棉花糖食就食得多,今次可以自己捲,小小豬話要捲個好大舊嘅,當然第一步就睇哥哥嘅示範先啦~ 
 
有左個棉花糖嘅概念,小小豬就揀左士多啤梨及提子味嘅砂糖開始啦(工作人員話小小豬真識揀,因為依兩個味就最好食呀)~ 
 
開始捲捲啦,其實一啲都唔難,將啲砂糖放人機器中間,棉花會自動飄上嚟,我地負責捲就得。不過小小豬唔係太夠高,有少少論盡,所以我就幫佢一下啦~ 
 
最後姐姐就幫手將棉花糖整成花形,再用糖霜灑上字句~ 
 
話咁快就大功告成啦~ 
 
小小豬同SY哥哥對佢地手上嘅棉花糖愛不釋手,齊齊密密食呀~
 
好在最後小小豬都肯同我分甘同味,咁都算佢仲記得我啦~
 
之後我地就去玩「和風食物模型蠟」,依個工坊係利用蠟製作生菜同埋天婦羅嘅食物模型製作~ 
 
睇哥哥們示範都好似幾易呀~ 
 
依個傻傻的小小豬見到哥哥整嘅製成品就已經開心成咁啦~ 
 
嚟到佢落手啦,先嚟整個生菜先。其實所有過程都係水內進行,水溫大約都有40度,好在小小豬一向都同我整開嘢食都唔多怕熱,所以對佢嚟講都冇難度~ 
 
繼續整埋個天婦羅~ 
 
完成啦....小小豬嘅大作都唔算失禮,都幾似呀~
 
嚟到「創意分子料理廚藝班」,我地學整印度煎蛋炒飯配酥皮紅蘿蔔。一知道有得食,小小豬就最鐘意,笑都笑得特別燦爛~ 
 
未開始就對啲工具好有興趣咁哦~ 
 
酒店大廚先為我地示範同埋好有耐性都為我地講解分子料理背後嘅科學原理~
 
不過可能小朋友們暫時都未太明白個原理,但一見到由芒果汁整成嘅蛋黃,大家都嘩聲四起呀~ 
 
到我地動手,小小豬先用酥皮整個紅蘿蔔先~ 
 
佢真係一步步慢慢捲,都有一刻嘅專心啦~ 
 
係可可米上倒少少乳酪就成為印度炒飯同蛋白~ 
 
之後就去搵大廚幫手整個大蛋黃~ 
 
最後將已經焗好嘅酥皮紅蘿蔔入面釀啲蛋沙律~ 
 
一碟小小豬親手製嘅印度煎蛋炒飯配酥皮紅蘿蔔就完成啦~
 
當然最開心時刻就係食依個時間啦,佢真係一名超級為食豬嚟呀~
 
嚟到最後一個工作坊,「趣緻甜品手作梘」嘅彩虹姐姐教整可愛冬甩手作梘~ 
 
兩位小朋友都好專心咁跟住彩虹姐姐一步步咁整依個冬甩梘~
 
成日以為整依啲手作梘會好難整,但其賓都只係等乾嘅時間耐少少,話咁快佢地就每人整左一個靚靚冬甩手作梘啦~ 
 
小小豬好奇怪地問:『乜彩虹姐姐唔係醫生?點解今次係教我整冬甩?』哈哈哈....佢真係好記性,上次暑假嚟我地嚟玩時,姐姐真係為教佢做醫生呀。不過姐姐好細心又有耐性教咁教小朋友,唔好話小小豬,就連我都對佢都好有印象呀~
 
玩左成日,依兩位小朋友都仍然意猶未盡,仲要去小公園玩一陣先肯走呀~ 
 
小朋友就係咁啦,有同伴一齊跑跑跳跳,玩都玩得特別開心,所以隨佢地玩啦,不過我地兩位媽咪就已經冇晒力,坐埋一邊等算啦!


More information :反轉美食大派對@挪亞方舟
日期: 3月19日至4月10日(逢星期六、日及公眾假期)
         **
《雲彩花式棉花糖》4月2及
3暫停
時間: 上午10時至下午6時
入場費: 成人HK$168;小童及長者HK$138  (入場後免費自由參加,
《創意分子料理廚藝班》需另加$50《自拍萌像飲品工房》需另加$30)

關於活動時間表,可到以下網址查閱:http://www.noahsark.com.hk/eng/pdf/promotion_140_timetable.pdf 

Website: http://www.noahsark.com.hk
Facebook:https://www.facebook.com/noahsark.hk/?fref=ts




**我地嘅FACEBOOK FAGE,唔知大家LIKE左未呢?** 
小小豬的成長日誌
大家一齊嚟交流下煮飯仔及去玩嘅親子樂啦


沒有留言:

發佈留言