2016年6月22日星期三

【抒發情感】一隻豬仔的回憶

21 JUNE 2016(TUE)

我對小小豬真係可以話係又愛又恨,佢做乖孩子再加埋佢嗰啲甜言密語真係冧到我暈得一陣陣當然佢激亦都有激到我半C嘅時候每個階段都有開心有激心之時,不過回想起我都係鐘意俾我"搓圓禁扁"嘅時候...哈哈哈~
 

我仲乜突然有咁大感觸呢?其實係因為FACEBOOK嗰個當年今日APP,依排基本上日日都彈出左唔同階段小小豬嘅相,睇返佢細細個樣嘅時候,又真係既好笑又感慨,話快又唔快...話慢又唔係咁,小小豬就五歲仔係我面前了~

另一個原因就係我無意間睇到Philips AVENT發佈嘅短片,睇見唔同階段小朋友嘅成長過程,一家人開開心心嘅親子時間,可能佢地都係香港家庭,所以我睇得都特別投入及有共嗚感,我真係邊睇邊回憶返小小豬嗰個時期好多古靈精怪嘅事呀~

細細個嘅小小豬都算係一個幾可愛嘅BB仔,都唔算難湊亦都幾合作,只係一個不甘寂莫嘅BB,唔可以自已一個人玩,除左瞓覺之外,好多時暗都要陪佢玩。依一點唔知係咪同我一樣呢?不過咁都好,要陪玩即係多左啲親子時間,雖然嗰時我地都工作都好忙碌,不過放假都一定會同小小豬周圍去,好好享受我地嘅家庭日~

小小豬係一隻濕疹豬,所以其實我都真係有啲擔心,因為佢由六個月開始就要轉飲豆奶。雖然醫生都係話營養係差唔多,不過始終都係覺得無咁多營養,所以都覺得小小豬嗰時係瘦左好多,見到都好心痛呀

好在小小豬都好鐘意食啲固體食物(哈哈哈...佢真係由細食到大呀)所以都叫做係個健康BB啦~
 
 

講起成長,其實小小豬比一般同年小朋友屬於遲識行又遲識講嘢,我印象中佢都係一歲半先叫做行得好好,講說話都到兩歲半先叫做可以接受,真係可以話輸在起跑線了

不過,依家佢咪又係跑得TALK得,依家佢咪係冇時停,又係全日唔停口講嘢所以我都係嗰句:那怕輸在起跑線,只要有進步,儲到足夠能量一定可以有力去到終點~

將來想小小豬做乜?其實嚟緊小小豬都有一個大挑戰,就係九月會讀小一。感恩....小小豬係依個階段入到心儀小學,真係一天都光晒,我成個人都定晒啦!雖然依一間唔係咩出名名校,不過都叫做係一間輕輕鬆鬆嘅二線學校。我都知『劉德華』係好,但我唔想做怪獸家長,依家啲功課壓力真係好大唔想迫小小豬太辛苦,所以揀『張繼聰』都唔錯,最緊要係適合小小豬希望佢繼續開開心心咁返學就好了~
當然,最想佢就係健康活潑咁成長,好好咁享受佢嘅每一日。雖然我知道所有媽媽平時工作生活都好忙,不過相信大家都係同我一樣,見到自己嘅小朋友都一定可以充滿力量般,因為小朋友快樂就對於我地快樂嘛! 

盡量多啲時間陪下家人同小朋友,開心嘅回憶就係所以嘢嘅原動力,各位媽媽...我地齊齊加油啦! 


**我地的FACEBOOK PAGE,齊齊來交流親子。育兒。烹飪啦**
Picture



沒有留言:

發佈留言