2016年6月8日星期三

【夏天消暑解毒不二之選】香草海帶綠豆沙

8 JUNE 2016(WED)

由於尋晚打尖煮左我至愛嘅蜆之後,今晚就聽大老細話煮左香草海帶綠豆沙俾佢地兩父子食,第一次煮嚟講賣相都唔錯啦~
 
其實大老細要求我煲綠豆沙都係為左小小豬,綠豆有清熱袪火、有利袪濕之外,仲可以改善皮膚濕癢、青春痘、濕疹等症狀。加埋海帶同臭草一齊煲就更加可以清熱解毒,而且仲係夏天解暑糖水之一。 

其實我今次都係第一次煲,之前都聽人講係好難成功,因為煲得唔起沙咁就真係唔好食。不過一聽到對濕疹好,為左小小豬我就即刻去搵食譜,買齊材料煲俾佢地兩父子食啦。 

係呀...只係佢地兩父子食,因為綠豆都係一種比較寒涼嘅食材,之前試過食完之後都有少少暈,所以我都真係唔敢食啦! 


成日以為好複雜,好在材料都唔算多,綠豆約一碗半飯碗、果皮一片、海帶一至兩片、臭草一棵同埋片糖~
 
洗淨綠豆,然後浸水三小時以上;果皮浸軟刮囊備用;海帶浸水15-20分鐘待軟身~ 
 
果皮及海帶浸軟切絲~
 
臭草洗乾淨,浸水15-20分鐘~ 
 
煲內放約3L水,然後加入果皮~
 
水滾後加入綠豆,加蓋以大火煲滾,之後轉小火煲1小時~ 
 
然後加臭草及海帶,再轉返大火煲15分鐘~ 
 
最後就可以因應個人口味加入片糖~ 
 
轉小火煲多15分鐘~ 
 
熄火後就要即刻夾起啲臭草,浸得太耐嗰一種臭草味就會好勁呀~
 
完成啦...可以食啦,第一次煲又好似唔錯,都叫有少少起沙啦~
 
始終都係第一次,所以都仍然有改善空間,老細話好似多豆左少少,入口就沙得嚟就帶點"杰",唔算係難食,係同坊間嗰啲有啲分別啦~ 
 
哼...我依啲叫足料呀,拎我同坊間買嗰啲比,真係有啲嬲嬲地添。不過意見我係會接受,成個夏天我都應該會煲好幾次,等我下次減少豆嘅分量,或者加多啲水,應該會好好多~ 
 
不過....自家煲除左足料之外,仲係要抵好多,我買材料都係大約$20,就已經有一大煲可以分幾日慢慢食,係坊間買嗰啲$20都只係可以買到一碗,所以話都係自己煮最好....哈哈哈!

溫馨提示:由於綠豆都係比較寒涼(尤其係有BB嘅朋友千其唔可以食呀),所以係好因應個人體質,大家記得煲之前了解下自己,或者問下相熟中醫/藥材店職員,睇下呢個啱唔啱自己呀!


**我地的FACEBOOK PAGE,齊齊來交流親子。育兒。烹飪啦**
https://www.facebook.com/kinseymama



沒有留言:

發佈留言